Ka Hoku o ka Pakipika, Volume I, Number 29, 10 April 1862 — Page 1
Ka Hoku o ka Pakipika.
BUKE I. HONOLULU, APERILA 10, 1862. HELU 29.
Hoku o ka Pakipika.
HE INOA NO HENELIKA.
Auhea wale ana oe la,
E na lehua i Hopoe la,
E nee ana i Malio la,
E lohi ana ika papa la,
Hone i ka uka mehameha la,
I manao au e ike la,
Makani anu moani la,
E noho ana i malama la,
Piko olu o ke aloha la,
I aloha ia no Puna la,
He paia ala i ka hala la,
Hala lei o maua la,
Me ka noe i ka noe la,
Inu i ka wai welawela la,
A he inoa he aloha la,
A no Henelika la,
MERE KAINOAKUPU.
Auhea wale ana oe la,
E na lehua i Haili la,
I lulu i ka ua noe la,
Hai lipolipo i ke anu la,
He paia nua ka nahele la,
Ka luna i Paieie la,
I ae nei ke ala la,
Ko Hilo mea mau ia la,
O ka hala me ke onaona la,
Lai ke one i Punahoa la,
Hoa hele o Kanaika la,
Hoa pupuu anu la,
Mehana i ke kino la,
I ka hao ana a paihi la,
A he inoa he aloha la,
A no Henelika la.
H. KAPUAKEA.
Auhea wale ana oe la,
E ka pua kau anoano la,
Eia no hoi au la,
Hoa anu o hale Lose la,
Nana e noho ia uka la,
Kohaihai na pua la,
Na pua me ke aloha la,
Ke aloha ke hiki mai la,
Kukilakila i ka noe la,
Noe aku i Wahinekapu la,
E kapu ko nui kino la,
Na ke kialua Kalefoni la,
Elua hoi kaua la,
I ka lai o hale Ola la,
A he inoa he Aloha la,
A no Henelika la. PEKE OKIA.
Auhea wale ana oe la,
Kaili wela i ke kula la,
Hoolailai i ka uka la,
Hoa pili o Pila hone la,
Haa mai ka lae lehua la,
I ke aka wailiula la,
A he la koehaeha la,
A he olu ko haihai la,
Kohai mai na pua la,
Lai mai na kuahiwi la,
E eleu ana i ka lama la,
Malama ia ke aloha la,
I hoa pili no ke kino la,
E hone ai ka manao la,
A he inoa he aloha la,
A no Henelika la.
J. HELEMAUNA.
Auhea wale ana oe la,
E kaua pau pili la,
Ka makani Kauaula la,
Kulai ulu o Lele la,
Hone i ka lau o Kaniu la,
Lai ai Waiokila la,
I ka nalu hee o uo la,
E uo oe e ke hoa la,
I pii ka huelo poki la,
Oni ko ia nei nui kino la,
O ka holo a ka moku ahi la,
Kue kaiue ka huila la,
Hukia mai ke kaula la,
Aliolio ka alihi la,
A he inoa he aloha la,
A no Henelika la, MRS. LILIA.
Auhea wale ana oe la,
Wai pipio i ka moana la,
Hoa pili o ka ua koko la,
Haa hulei i ka ino la,
Ke holo mai nei Neki la,
A hui me Moi la,
Ku kaea i ka moana la,
Iki kauliki e ka ihu la,
Hone ana Kaimanahila la,
A huiki e ka hae la,
Hailapu no ka huila la,
A komo i ke awa la,
I ka lai o Honolulu la,
E hapanuia kaua la,
A he inoa he aloha ia,
A no Henelika la.
A. W. KAHILILALAHAU.
Auhea wale ana oe la,
Ahi awela ka nahele la,
Ohuohu mai na pali la,
Liko wai anu o Kalama la,
Ua hao oe a paihi la,
Kapukapu launa ole la,
Pa-e kaua liilii la,
Liwai anu ke aloha la,
Hoa pili o hale ohuohu la,
Ua ohu o Uluhinano la,
Pua oliva i ka lai la,
Ua lai o Mauna ihi la,
Ua ihi oe e ke hoa la,
Kila hone au ia nei la,
A he inoa he aloha la,
A no Henelika la. M. KAOO.
Auhea wale ana oe la,
E ka la kau ahiahi la,
Hooanoano i Lehua la,
I pua i Malamanui la,
A nui mai ke aloha la,
Lai pono iho ka noho la,
Kuhi au ua holo like la,
I hookahi Ona moku,
Nana e ku ia hoe,
Nana e uweke pono e,
I ku i ka Ailana la,
I ke kai hooipoipo la,
A he ipo mai keia la,
No ka manawa hookahi la,
A he inoa he aloha la,
A no Henelika la.
B. R. KEKUAIWA.
Auhea wale ana oe la,
E nani aloha i ka pua la,
Lai pulu i ka ua noe la,
Kehakeha i ke kuahiwi la,
Ua like me ka hau anu la,
Oiwi pali o Kalama la,
I molale i ke kahawai la,
Nau e uo ia pua la,
Lei oe a ka kamahao la,
Pili no oe me au la,
Me au ka pua niniu la,
Ua hele a pohai la,
Me oe no ke aloha la,
Oki au la ia nei la,
A he inoa he aloha la,
A no Henelika la.
PEKE KAIOKALANI.
Auhea wale ana oe la,
Na lehua i luluupali la,
Eia no hoi au la,
Hoa anu o Inia la,
Akahi au a ike la,
I ka mea wela he aloha la,
Ke pipii nei i ke kino la,
Kohia i ka piko la,
Olu me he wai kahe la,
Anoi a pua lei la, Lei aku i ka liula la,
I ka malu o ka ohai la,
Hai ia ko pakii la,
I lele pono ka paona la,
A he inoa he aloha la,
A no Henelika la. S. W. HOLANIKU.
Honolulu, Aperila 1, 1862.
HE WAHI KAAO.
NO KA MANU OLELO, KA LAAUOLI, A ME KA WAI OLENALENA.
Helu 2.
I unuhiia no loko mai o ka Arabian Nights.
Mahope iho o ko ka luahine hala ana'ku, ua haalele iho oia i ke kaikamahine alii, me ka naau kaumaha, a luuluu loa hoi, a ua ano e pu me kona helehelena. Ia manawa no, hoi mai la kona mau kaikunane, mai ko laua wahi i hele ai.
A i ko laua ike mua ana aku i ko laua kaikuahine, he mea e ko laua pihoihoi, me ka hopuhopualulu. Ninau aku la laua ia ia, E ko maua kaikuahine aloha nui, e oluolu auanei oe, e hai mai ia maua, no ke aha la i hoano e ia'i kou helehelena iluna ou i keia la. Aole loa kela i ekemu mai ia laua, me he mea la e makemake ole ana oia e hai mai, aka, mamuli o ka laua noi ikaika ana, hai aku la oia i na mea a pau loa a ua luahine nei i hai iho ai, hai pu aku la oia i kona makemake ana, e lilo oia ka haku o ka Manuolelo, ka Laauolioli, a me ka Waianokula.
E ka mea e heluhelu ana ma keia wahi, e hoomaopopo kakou i ko na kaikunane lohe ana na mea a ko laua kaikuahine i manao nui ai.
A i ko laua lohe ana, hoopaapaa iho la laua, no ka mea, olelo ae la o Bahamana, oia ke hele, olelo no hoi o Paviza, oia ke hele, aka, ua hooholo laua mahope iho, o Bahamana, oia ke hele, i ka la no i kakahiaka ae. I ke ao ana ae oia po, hoomakaukau ae la oia i na mea no ka hele ana, mamua aku hoi o kona kau ana aku i kona lio, i aku la oia, i ko laua kaikuahine, e Palizadi e, ko'u kaikuahine aloha nui, ke haawi aku nei au i keia pahi ia oe, i hoailona na olua e ike iho ai i na mea no'u, no ka mea, aole au i ike i na mea e loohia mai ana ia'u ma ke ala a'u e hele aku nei, e malama hoi oe ia mea, me ka makaala loa, no ka mea, oiai e ike iho ana oe, e mau ana ka maemae o kona maka, alaila, e manao iho oe, ua maikai au, aka, ina e ike oe, ua haukae ia kona maka i ke koko, e olelo iho oe ua make au.
I ka pau ana o kana olelo ana me kona kaikuahine, ee ae la ia maluna o kona lio, a hele aku la. A i ka iwakalua o na la, halawai aku la keia me kekahi elemakule e noho ana malalo o ka malu o kekahi kumu laau ua hina kona lauoho a keokeo loa e like me ka hau; a o kona mau umiumi luna, ua uhi paapu iho la i kona waha, e maewa wale ana iluna o kona umauma; a o kona umiumi lalo hoi, ua uhipaapu aku la i kona alo okoa, e noho kohana ana aohe ona lole, a he wahi apana palaumoena nahaehae kai kilepa ia ma kona poohiwi.
Ia manawa, hoomanao ae la o Bahamana, oia no ua elemakule nana i kuhikuhi aku ia ia i kahi e loaa ai ua mea la ana i hele mai ai e huli. Lele ihola oia ilalo mai luna iho o kona lio, huli ae la, a moe aloha aku la i ua elemakule nei, a lawe aku la no hoi kela i ka haawina o ko ia nei aloha; ia manawa no, hoomaka iho la laua e kamailio, aka, no ka paapu loa o kona waha i ka hihia i kona umiumi luna, aole hiki i ke keiki alii ke lohe pono i kekahi huaolelo, i puka mai loko mai o kona waha, ia manawa nao iho la o Bahamana iloko o kona pakeke a unuhi ae la he upa, me ia no oia i ako ai i ua mau umiumi la ona, a pokopoko loa, a i ka pau ana o ka ke keiki alii ako ana ia ia, nui loa iho la kona olioli.
No keia hana maikai a ke keiki alii, i mai la ka elemakule, he aha la auanei ka uku kupono a'u e uku ai ia oe no kou lokomaikai nui. I mai la hoi ke keiki alii, e ka elemakule, e hoolohe mai, ua hele mai au mai kahi loihi mai, e huli ana i ka Manuolelo, ka Laauolioli, a me ka Waianokula. A ina he hiki ia oe ke kuhikuhi mai ia'u kahi e loaa'i ua mau mea la, alaila, e manao iho no wau, ua uku mai oe ia'u i ka uku kupono me ka oluolu.
I ko ka elemakule lohe ana i keia mau olelo a ke keiki alii, ano e ae la kona helehelena, me kona i aku ia ia, he hiki io no ia'u ke kuhikuhi aku i kahi e loaa'i ia oe ua mau mea kupanaha nei, aka, ke minamina nei au, me ke aloha nui aku ia oe, a no kau noi hoi, e hai aku no wau me ke kanalua ole, eia nae ke kauoha, e kupaa oe, a e koa hoi, ma keia la au e hele aku nei, no ka mea, ke ike lea nei au, e halawai mai ana oe me ka pilikia nana e hoopokole mai i kou mau la o keia noho malihini ana maluna iho o keia honua.
Aka, aole i hoano e ia ko ke keiki alii manao e ia mau nui leo, ua kupaa no oia e like me kana olelo mua, a i ko ka elemakule ike lea ana ia mea, i hou mai la oia, e ke kanaka ui, mai manao oe ua pilikia la a'u e olelo aku nei, he mea uuku, aole, he oi ae ia mamua o na mea au e manao la. No ka mea, he lehulehu no na kanaka, ikaika a koa hoi, i hiki mai ia nei, e imi ana no keia mea hookahi no, a ua kuhikuhi aku no wau ia lakou e hele ma keia alanui, aka, aole o lakou mea hookahi i hoi mai, nolaila mai hilinai oe i kou makaukau, a me kou koa iho, no ka mea, aole ia he mea e kaupale mai ana, i hiki ana oe ke alo ae, i ua make la, oia hoi e halawai mai ana me oe ka poe he nui loa, a e lele mai ana lakou a pau maluna ou i ka manawa hookahi, me kou ike ole aku i ko lakou mau kino.
A nolaila, eia hou ka ninau, pehea la e hiki ai ia oe ke manao iloko ou e pakele ana oe mailoko mai o ko lakou mau lima. Ma ko Bahamana lohe ana i keia mau olelo hope a ka elemakule i aku la oia ia ia, ke makemake nei auanei oe e hoooweliweli mai ia'u, ma kau olelo ana, i mea e hoopoina ia ai kou mau manao, no ka mea, ua hoolawa mai la no oe i kuu makemake, ma kau hai ana mai ia'u me ka oiaio i ke alanui a'u e hele aku ai a hiki loa aku i ka loaa ana o na mea a'u e manao nui nei.
Ma keia wahi i ike iho ai ka elemakule i ka make hewa o kana mau olelo, no ka mea, ua paa loa ko ke keiki alii manao i ka hele. Lalau iho la nae oia he pola, a haawi aku la ia ia, me kona i pu aku, e kau ae oe iluna o kou lio, a e olokaa aku i ke pola mamua ou, a ma kahi no hoi a ua pola nei e kai ai, malaila aku no hoi oe e hookele ai i kou lio, a e pii aku oe i ka mauna ma kou mau wawae, a ia oe e pii ai i ka mauna, e malama loa ia oe, mai makau wale, a mai nana hoi i hope, no ka mea, i ka wa e hana'i oe pela, he oiaio, e hoolilo ia oe i pohaku eleele, e like me na mea a'u e ike ana ma kou mau aoao, oia mau mea a pau loa, he poe no ia, e like me oe, aka, i hiki hoi oe i ka piko o ua kuahiwi la, e manao iho oe, ua loaa ia oe na mea a kou naau i ake nui ai.
A i ko Bahamana lohe ana i keia mau olelo, piha loa iho la oia i ka olioli, no kona manao ana iho ua kokoke loa oia i kahi o kana huakai, alaila, huli ae la keia a uwe aloha aku la i ka elemakule. Kiola aku la i ke pola, a hahai aku la i kahi a ke pola i ili ai, lele iho la keia ilalo, a hoomaka aku la e pii i ka mauna, aole paha i aha a ia nei kaina wawae mamua ae o ko ia nei lohe ana aku i na kupinai leo, me he mea la malalo ae o ka honua, aka, ua hoomau mai no keia i kona hele ana, a i kona hiki ana aku i ka hapalua o ua mauna la, a malaila hoi i kuihe ai ko kakou keiki alii, me ka apoapo nui o kona oili i ka makau, no ka mea, ua oi loa ae ka ikua ana a ua mau leo weliweli nei ma keia wahi, a me ke olokea ana o na mea kaua a pau, ma ko ia nei ala e hele aku ai, nolaila, huli ae la keia i hope, me ka manao e holo e like me he koa la e hee mai ana
mai ke kahua mai. Ia manawa no, ua hooliloia keia i pohaku.
E ka mea e heluhelu ana, ma keia wahi e maopopo ai ia kakou ko Bahamana make ana, a ke waiho aku nei kakou ia ia, me ka naau kaumaha a luuluu hoi.
Mai ka la o ko Bahamana haalele ana iho ia laua, mai laila mai ko Palizadi kahei ana i kana pahi ma kona puhaka, a he noi no na manawa oloko o ka la, e unuhi ae ai oia e nana, i ike ai laua i na mea nona, a i ka la hoi o kona popilikia, ia laua e kamailio ana me Paviza, huki ae la oia a nana iho la i ka pahi, aia hoi, e kahe awai ana ke koko, e hiki aku i kona maka. Ia manawa, lele ae la kona hauli, a maule aku la, a i kona pohala ana mai, uwe akula oia me ka haaloulou nui, me ka olelo iho, e Bahamana, kuu kaikunane aloha e, i keia la, ua hoolilo mai oe ia'u i kauwa na ke aloha, e noho mehameha iho ana ma keia aina kula panoa i ka la, e uwe hooki ole ana i na la o keia noho ana aku. I ka mao iki ana ae o kana uwe ana, mihi iho la ia me ka hoahewa loa ia ia iho, me ka manao ino loa aku i ka luahine, no ka lilo ana o na mea ana i hai iho ai i mea e alakai aku ai ia ia i ke alanui o ka luhi a me ka popilikia.
Ma keia wahi ke ike lea nei kakou i ko ka pahi ike ana i ka make ana o kona Ona.
I ko Paviza manawa o kona lohe mua ana aku i ko laua kaikuahine e uwe ana, no ko laua hanau mua, ua hoopiha loa ia oia e ke aloha wela, e oi aku ana i ke aloha o na ipo, a uwe iho la no hoi oia me ke kanikau nui no kona kaikuana, a ua hele aku no hoi oia, a ku aku la imua o ko laua kaikuahine me na maka i pulu pau i ka waimaka, i aku la oia, ua make aku la o Bahamana, mamuli o ka hele ana e huli i na mea au i ake nui ai e loaa, a eia hoi ko'u manao, i ka la apopo e hele ana no hoi au, ia manawa no, wehe ae la o Paviza he lei momi, nona na pupu he haneri, ma kona ai mai, a haawi aku la i ke kaikamahine, i aku la, ke waiho nei au i keia lei, i hoailona nau e ike iho ai i na mea no'u, no ka mea, oiai, e uu ae ana oe, e mau ana no ke kaawale ana o na pupu kekahi me kekahi, alaila, e manao io iho oe, aia no au ke ola la, aka, ina e ike iho ana oe ua pipili kekahi me kekahi, alaila, e hoomaopopo oe, ua loaa ia'u i ka haawina hookahi i loaa'i i kou kaikunane aloha, aka, hoole loa aku la kona kaikuahine me ke kaohi aku ia ia, me na waimaka helelei hoi, a olelo ana e noho, e hoopau ae i ka manao ana e hele, aole nae oia i hoolohe mai i kana, ku ae la no oia a haalele aloha ole iho la i kona kaikuahine.
I ka iwakalua o na la, hiki aku la oia i kahi a ka elemakule e noho mai ana. A i kona aloha ana aku ia ia, aloha mai la no hoi kela, ninau aku la no hoi oia i ke alanui e hiki aku ai i kahi e loaa'i ua mau mea la ana i hele mai ai e huli, hai aku la no hoi ka elemakule ia ia i ke ala me ka hai pu aku i ka nui o na pilikia, kaohi mai la no hoi oia ia ia, me ka hai mai i ka nui o ka poe i make ilaila.
Aole nae i ae aku ke keiki alii ia mea, alaila hai mai la oia ia ia i na olelo ao, e like me kana i hai ai i kona kaikuaana, huli ae la oia a hoomaikai mai la i ka elemakule, kiola aku la i ke pola, a hahai aku la a hiki i ke kumu o ka mauna, alaila, lele iho la ilalo, ku iki iho la malaila, e noonoo ana i na olelo ao a ka elemakule, a hele aku la ma kahi a kona kaikuaana i hele ai. Ia ia e pii ana iluna o ka mauna, lohe aku la oia i kekahi leo mahope mai ona, e olelo ana i na olelo hoino he nui, me ka olelo mai, e kuiho malaila, i hoopai aku ai au ia oe, a no kona ukiuki loa, unuhi ae la oia i kana pahi, a huli aela i hope me ka manao e alualu aku i ka mea i olelo ino mai. Ia manawa lilo iho la ia i pohaku.
E ka mea e heluhelu ana, ke hoolako hou ia mai nei kaua e ku aku imua o ke ao nei me ka naau aloha menemene, e kanikau ana me na maka hooki ole i ka uwe ana.
I ke kakahiaka o ka poaha e hiki mai ana, i ka manawa malu o ka la, e halawai no kaua me Palizadi ke kaikamahine alii, no ka mea, e kii mai ana oia me kona nani a pau, e hoike ana i ko ka honua nei i kona maikai lua ole, e like me ka wai hooluu a kona mau makua i hooluu aku ai ia, a e hele ana no hoi oia i ke alanui o ka luhi a me ka popilikia.
NO PALIZADI.
Aia hoi, ia Pali zadi i ala ae ai i ke kakahiaka nui, i ka manawa a ka la i hoomaka mai ai e hohola iho i kona malamalama maluna iho o na puu, a me na awawa uliuli o ka aina Hemolele e Pasia, oni ae la oia io a ia nei, e kikookoo ana, i pau lea ae kona poluluhi hiamoe.
A i kona ku ana ae iluna, hoomanao ae la oia no kona kaikunane alua, lalau aku la i ka lei hoailona, a hoao ae la e uu me kona mau lima, aka, aole nae e hiki ia ia ke hookaawale i kekahi pupu me kekahi, alaila ike iho la oia, ua hele aku la laua ma ia ala hookahi me kona kaikuaana. Ia manawa, hohola ae o Palizadi i kona mau lima, a puiki ae la ma kona alo, huli aku la me ka nana iluna, me na maka i pulu elo i ka waimaka, me kona olelo iho i kona wa e uwe ana, e Bahamana a me Paviza, o'u kaikunane aloha nui e, ua haalele mai olua ia'u, ko olua kaikuahine, e noho me ka u, a me ka ehaeha nui, e hoolilo mai ana hoi ia'u, i heana na ko olua aloha.
A mahope iho o keia mau mea, i ka manawa i akakuu iho ai ka pa kikio ana a ka makani o ke aloha iloko ona, a me ke kanahai iki ana iho o ke kulu kuaua ana a ka pua o ka waimaka, noonoo iho la ia i na mea ana e hana'i, a ua hooholo iho kona manao e hele no ma ia ala hookahi a kona mau kaikunane i hele ai, i hoolawaia ai lakou i ka haawina hookahi oia make ana.
Ia manawa, newa ae la oia a ka lumi o kona mau kaikunane, a lawe mai la i kekahi o ko laua aahu, a hohola iho la maluna ona, me ka manao e huna ia ana kona helehelena wahine e ia mea, a me kekahi no o ko laua papale, i huna iho ai oia i ke olohelohe o kona poo.
Kau ae la oia maluna o kekahi holoholona wawae eha, i kona hele ana, hookele aku la no oia i ka lio ma ke ala no a kona mau kaikunane i hele ai, i ka iwakalua o ka la, halawai aku la oia me ka elemakule kupua, ike mai la no kela ia ia he wahine, i mai la kela, aole au i ike i ka wahine maikai e ae e like me oe mamua, i aku la ke kaikamahine alii, aole hoi auanei oe i ike he mau kanaka opiopio i hiki mai ia nei mamua aku nei o ko'u hiki ana mai nei, i mai la hoi ka elemakule, ua hiki mai no ia nei, elua ia mau kanaka, ua aneane like loa ko laua helehelena me kou, i mai la hoi ke kaikamahine alii, o ko'u mau kaikunane no ia a no laua hoi au i hele mai nei, e naauaua ana i ke aloha, ina paha e oluolu oe e hookipa aku ia'u e hele ma ke alanui a laua i hele ai. I mai la ka elemakule, he oiaio e hookipa ana no wau ia oe ma ua alanui la, aka, mamua o ko'u ae ana aku, e hai mua aku no au i na mea e loohia mai ana ia oe. Oia hoi ka make, e like me na mea i loohia ia'i i kou mau kaikunane, eia hoi kekahi, aole no hoi au i hookipa aku i kekahi wahine e hele ma keia ala mai kahiko loa mai, nolaila, e aho paha e ae mai oe i ka'u e noi aku nei ia oe e noho, a e hopau ae i kou manao ana e hele. Aole loa au e ae aku i kau, wahi a ke kaikamahine alii.
Ia manawa, haawi mai la ke kupua i ke pola, a i ka loaa ana i ke kaikamahine alii, kiola aku la oia mamua ona, a hahai aku la a i ka hiki ana i ke kumu o ka mauna, lele iho la ilalo. A mamua o kona hoomaka ana e pii aku i ka mauna, lohe aku la oia i ka hauwawa leo, i iho la ke kaikamahine alii iloko ona, ina paha au e hoopaa iho au i o'u mau pepeiao me kekahi mea, alaila, aole hoi au e lohe aku i na mea hoomakaukau a lakou e olelo mai ai.
A i kona hooholo loa ana, pela io oia e hana ai, kiki ae la oia i kona mau pepeiao a paa loa me ka pulupulu, a pii aku la i ka mauna me ia, aka, ke mau nei no ka ikuwa ana a na leo me he mea la nae i kahi mamao loa aku, aole he lohe akaka ia o ke ano o na olelo, e hiki ai ia ia ke makau. Ua hoomau aku no oia, i kona pii ana, a hiki i ka hala ana elua hapakolu o ke kiekie o ka mauna, ilaila, lohe aku la oia i kekahi leo nui weliweli loa, me na olelo ino loa he nui e hoomakaukau mai ana ia ia, aka, i iho la ke kaikamahine alii iloko o na, aole no wau e hoolohe aku ia mau mea, e aho e akaaka wale aku no wau, me ka hoomau no i kuu hele ana imua, i kahi o kuu huakai.
Ke au ia Kamehameha.
Ekolu mau makahiki mahope iho o ka make ana o Lono, ua make iho la o Kalaniopuu, ma Waiohukini i Kau kahi i make ai, ma ka malama o Apelila, o ka makahiki 1782. He alii ikaika o Kalaniopuu i ke kaua, a pinepine kona kaua pu ana me Kahekili, ke alii o Maui. A make iho la o Kalaniopuu, koi mai la o Keawemauhili, a me na'lii, a me na puali ia Kiwalao i ke keiki a Kalaniopuu, e kaua me Kamehameha, a me na'lii a pau o Kona. O Kamehameha, oia ke keiki a Keoua, ke kaikaina o Kalaniopuu, no ka mea, hookahi o laua makuwahine o Kamakaimoku, O keoua, he inoa hou no ia, o kona inoa kahiko, oia o Kalnikupuapaikalaninui, no kona lokomaikai paha, ua kapa ia oia o Keoua, o ke-ao-ua, ina i lokoino oia, alaila, o ke-ao-ua-ole, ka mea kupono. Aia ma Kohala i hanai ia o Kamehameha, ua lawe nae i Molokai e hanai ia'i oia.
Eia paha ke kumu o ko Hilo poe alii kaua ana me na'lii o Kona. Ua makemake nui ko Hilo alii ia Kona no ka pohu. Lawe mai la lakou i ke kupapau o Kalaniopuu maluna o ka waa, a holo pu mai la na'lii, a me na kanaka a pau i Kona, no ka manao no e kaua. A hiki lakou ma Kapalilua i Kona, holo mai la o Keeaumoku mai Honokua mai a i Kapalilua mai, i ike i ke kupapau o Kalaniopuu maluna o na waa, a uwe iho la lakou.
A ike ia ke ano o na'lii, a me na kanaka maluna o ka waa, he ano e, no ia mea, ninau aku la ia ia lakou. Mahea ke kupapau e waiho ai? I mai la lakou ia ia, ma Kailua e waiho ai, alaila, maopopo ia ia ke ano o ke kaua, no ka mea, ua manao lakou i nui kahi o Kona e lilo ai ia lakou, nolaila, i hoakea ai o Kailua. Holo mai lakou a kupono i waho o Honaunau, alaila, ua iho la ka ua, he nui loa no, nolaila, pae ae la lakou i Honaunau, a waiho aku la i ke kupapau o Kalaniopuu maloko o ka hale o Keawe, a noho iho la o Kiwalao, a me na'lii, a me na kanaka e okioki i ka aina a puni o Hawaii, no lakou wale no a pau. A na kela ua ana i paa ai ke kupapau iuka, holo aku la o Keeaumoku i o Kamehameha la, ma Kohala no o Kamehameha ia manawa, aka, ua kii aku o Kekuhaupio ia ia, a ua hiki o Kamehameha, ma ke Kekaha, a halawai aku o Keeaumoku ma Kekaha, me Kamehameha, a hai aku la o Keeaumoku ia Kamehameha, i na mea ana i ike ai maluna o na waa kupapau, a maopopo iho la ia lakou ke ano o ke kaua. Alaila, kuka iho la lakou no ke kaua ana, a pau ia, alaila, holo aku la lakou e hookokoke ma Kaawaloa, a me Keei.
Holo mai o Kiwalao mai Honaunau mai, a halawai me Kamehameha, a uwe iho la laua, a pau ka uwe ana, i mai la o Kiwalao ia Kamehameha, Auhea oe, e make ana kaua la, oia no ka makuakane o kaua la ke pue mai nei e kaua kakou, elua wale no paha auanei kaua e make, aloha ino kaua, o Keawemauhili ua makuakane la. Hoi aku la o Kiwalao a Honaunau, okioki iho i ka aina me kona poe alii, a nele iho la kehahi alii i ka aina ole, o Keoua kona inoa, ukiuki iho la no kona nele ana, a no ke kuamuamu ana mai kekahi. Alaila, hoohewahewa aku ia me kona mau kanaka a pau, e hele i ka lele kawa. A hele loa aku la lakou a Keomo, kua iho i ka nui malaila, a pepehi aku la i ko Kamehameha kanaka. O ke kaua iho la no ia, ekolu paha la i kaua ai, hoouka nui. Eia na'lii mamuli o Kamehameha i ka la i houka ai, o Keeaumoku, o Keaweaheulu, o Kameeiemoku, a o Kekuhaupio, a me na'lii kaikaina o Kamehameha a pau.
A i na la i hoouka ai, o Keeaumoku kai hoouka aku i ko Kiwalao poe kaua, a hina iho la o Keeaumoku ilalo, no kona hihia i ka pololu, hopu iho la ko Kiwalao poe koa, o moku ke kua i ka pahoa, a o iho la kekahi i ka pololu me ka i ana iho, ku aku la ka laau i ka aama kua lenalena. A ua nawaliwali o Keeaumoku, kokoke e make, aole nae i make loa. Ia wa, lohe aku la o Keeaumoku i ko Kiwalao leo, i ka i ana mai e malama i ka niho palaoa, aole e malama ia ia. Alaila, manao iho la o Keeaumoku i kona make loa. A ike o Kamanawa i ko Keeaumoku, houka aku la ia. A lohe o Kamahoe, maha poko iho la ia, a pa iho la o Kiwalao i ka pohaku, a hina ilalo, ala ae la o Keeaumoku me ka hooikaika, a uumi ia o Kiwalao, me ka leiomanu ma ko na lima, a moku ko Kiwalao ai, a make no ia. Alaila, hoouka nui iho o Kamehameha, o ka hee iho la no ia. Alaila, lilo ke aupuni ia Kamehameha, o Mokuoahi ka inoa oia kaua, oia no ke kaua mua i lilo ai ke aupuni ia Kamehameha. A ma keia kaua ana, lilo no o Keoua, make kai kana hoi ana, a lilo no ia i alii no Kau, a ia mau la iho mahuka malu o Keawemauhili ma ka mauna, a lilo ia i alii no Hilo a me Puna paha, a o laua no na hoa kaua o Kamehameha mahope iho. A noho alii iho la o Kamehameha maluna o Kona, a o Kohala a me Hamakua, akolu okana ia ia, a noho alii no hoi o Keawemauhili ma Hilo, a noho alii o Keoua ma Kau, akolu aupuni o Hawaii, akolu no hoi alii ia manawa. Oia ae la no ka hope oia kaua ana.
J. M. KEALOHA.
Halemakeke, Honolulu, Oahu, Mar. 5, 1862.
Rula o ka poe maikai.
Kiekie ka manao i ka ike ana i ka ulu nui o ka manao o na makaainana o keia mau la, e loaa ka noho kuonoono, e loaa ka noho maikai, e loaa ka noho maluhia ana a me ka pono. Ua nui na hale laau o na kanaka kupa Hawaii i kukulu ae me ka manao e loaa ia lakou kau wahi pono, a pono nui paha o ka poe nana lakou i ao mai, e hahai aku mahope o ko lakou mau kapuai wawae, a ke ike ia nei ke ake hanohano nei na kanaka Hawaii ma ke kukulu ana i na hale laau, a hanohano hoi, ua lu ia na wahi opala pili ma ka nahelehele, ma ke ku ana ae o na hale laau i hooluuia i na wai pena nani o na ano he nui, a iloko o keia hana maikai, e wae ia ka noonoo ana no na mea kupono, penei; E hoonani i kou hale me na pepa maikai, na noho maikai, ku i ke ano like hookahi me na pepa, hoolua i na kii maikai ma na rumi kupono i ke ano o ke kii, na papa kaukau koa, na mea waiho pua hoonani hale, na buke kupono, na kuhina wawae, na noho paio, a hooluolu hoi, na aniani nunui maikai, na pakaukau liilii kupono e ae, e pono, a e lohi ai ka maka i ka hele ana i na kinohinohi, alohilohi, hulalai i ka maka, a lilo ai i pula kau maka na mea a pau, ke hoi aku kekahi poe i ko lakou mau hale, a i kumu alakai no hoi no ka poe ike ole ke hele ia aku kou hale e makaikai.
No ka rumi hookipa keia mau mea e hooakaka ia ae nei, a e pono e kukulu ia i ekolu aniani nunui a ina ole ia, eha paha aniani nunui maloko o ko rumi hookipa, ma ko rumi noho, elua, a ma ko rumi komo kapa, ekolu aniani nui, a kauna aniani liilii, maloko o ko rumi moe, elima, a ina ole i ekolu paha, ma ka rumi aina elua, maloko o ka rumi hookipa 1, 2, 3, paha kukui hoolewalewa e like me ka nui kupono o ka hale. I mau kukui ihoiho, a ina ole i ahi makani (gas) aia i ka makemake.
I ka wa e kau nei ma ka noonoo i na mea hoonani o kou hale ponoi, mai hoopoina i na hale ohua, hale kuke, hale auau, hale liilii, a hale lio, e haawi like i ka nani kupono no ia mau mea, a ka oia aku oia o ko hale ohua a me ka hale lio, hale ilio, a pela aku.
He nui na hihimanu o na mea hoonani i kou kino, ko ka wahine, ko kau mau keiki, ko hale, a me na ohua, aka, hookahi mea i kuia, ai keakea mai ai i keia mea, no ka nui ole o ke dala o na kanaka Hawaii, ke makemake, e unuhi ae i ka makemake i holo okoa, nolaila, e aho paha e hoopoina iho kakou ia, a kali aku no na la, e o ana na kukuna o ke gula io a ia nei, (flush) ia i ka haole.
Pupu weuweu, e Laka—e,
O Kane huahua ke Akua,
I ka maha ia, e Laka,
O Laka hoi ka pule ikaika,
Ke ku mai la,
Ka milo Laka imua,
Ua noa, ua noa,
Ke kahua walu ka make—Noa!