Ka Hoku o ka Pakipika, Volume I, Number 22, 20 February 1862 — He inoa no Wahinealoha. [ARTICLE]

He inoa no Wahinealoha.

O oe paha ia, e ke ala, hihi i ka nahele, Aala ke kamaakahala, Maikai na pua ala, O ke kihapai, Hii poi lua i ke keiki Palani, He kanokano okoa no, Iluna o Wailehua, Aala ka Awapuhi, Popohe i ka nahele, Aala ke Kupaoa, Paoa aala i ka liko o ka Lehua, Aala ka ihu anu o Kawela, Aala ka iliahi o Makaweli, Aala ke Kiele me ke kupukupu, E aoao ana ke ala, Me ka lehua makanoe i ke anu, Anu maeele i ka noe a ke kiu, Aala ka hala o Mapuana i ke kai, E ahiahi ana ia Kaukaopua, O au pua hala elua kau aloha, E malama nei, Malama e no i ka naenae, Hoi ke ala a Hilo, Noho no me ke onaona, Onaona Panaewa i ka hala me ka lehua, U ana au o ke ala i kai o Punahoa, He hoa oe no ka launa ole mai, Nape i ka makani, Holu i ke ae loa, Nani na pua rose aia, E kahiko ana i ke kino, Manuahi a ka moe, E hoopio ana ke ala me ka alani, I lani oe na kuu aloha, E hookuleana ae i ke aloha, E kaele ana kahi nana ka manao, Aala ka luanakapa, Ke kapa o maua e moe ai, Me kuu keiki, Haule ke ala i ka moena, U ana au o ke ala o ke kini, Pakui ka ihu i ke ala o ka waina, Eha ka manao i ke ala, O ka wai lukini, He wai lulu ala ia, No ke kapa o kuu keiki, E-o i ko inoa o nani Hemolele, He kukui o ka Lena, U ana wau o ke ala o ka waina, Haupakaki ka poe ona, I ka hale inu pua, Haina ka inoa o ko makuakane, O nani Panaewa i ka maikai e waiho nei, E waiho nani ia, E ka lala pali o Uekahuna. Na J. SAVIA. Honolulu, Haliimaile, Feb. 3. 1862