Ka Hoku o ka Pakipika, Volume I, Number 17, 16 January 1862 — No na Kaao a me na Moolelo. [ARTICLE]

No na Kaao a me na Moolelo.

E ka poe a pau e heluhelu ana i na kaao, ua ike iho nei kakou i ka moolelo o Kailiokalauokekoa i hoopukaia iho nei e S. Hinau, a ua hoopauia iho nei ma ka helu 5 no ia kaao, a ua hoopuka hou ia iho nei e S. N. Haleole, a ma ia hoopuka hou ia ana iho nei ua moolelo la, ke nui nei ka wawa ana no ia moolelo. Ke olelo nei ka poe i pili ia Hinau, he pololei kana, a me ka poe i heluhelu mua i ka Hinau, ke hoahewa nei lakou i ka Haleole hoopuka ana i ka moolelo o Kailiokalauokekoa, me he mea la hookahi wale no mea nana i malama i keia moolelo ma kahi paa o ka honua. Kupanaha ka hana a keia poe. Ke olelo nui la ua poe la, ka! he lalau loa keia e hoopukaia mai nei, aohe e like me ka Hinau, ke i hou ae la, nawai la i hoolohe ke oli a Kailiokalauokekoa i oli ai? a nawai la i malama i ua mele? Auwe! hookahi wale no anei halau i aoia'i? O Hinau wale no anei ka mea nana i malama i keia moolelo, aole, he nui loa ia poe e noho mai nei. Nolaila, e hoopau i ko oukou kuhihewa. Ke i mai nei o "Kanaka Hawaii" ma kana olelo pane ia L. P. Kaleilehua, ma ke Kuokoa o ka la 1 Ianuari, ma ka makahiki 1862, "Ua ike iho au i na olelo a me na ninau, a me ka haina pu no," Auwe! heaha mai nei la keia ou e "Kanaka Hawaii," he hio paha ea! Pehea la oe i ike ai i ku'u manao ma ka Pakipika o ka la 12 o Dekemaba? no ka mea, aohe hoi ou lawe i ka Pakipika, he ike no ka oe i ko'u manao, kupanaha no! No kou ano kaula nae paha ea! ahe! nolaila ka! No ka mea, he hiki i ka poe kaula ke hoike mai i na mea pohihihi, ike oleia e ka lehulehu. Pela paha o "Kanaka Hawaii" i ike ai i ko'u manao ma ka Pakipika. E like auanei olua me E. Palea ka lawe ole i ka nupepa Pakipika; he ike e ka! i ko'u manao. Kupanaha ka ike o keia mau kanaka me ka lawe ole i ka nupepa. He keu! L. P. KALEILEHUA. Honolulu, Jan. 8, 1862.