Ka Hoku o ka Pakipika, Volume I, Number 13, 19 Kekemapa 1861 — KAHI MELE. [ARTICLE]

KAHI MELE.

Auhea wale ana oe, Ka Hoku Pakipika, Ka Hoku kamahao oe, He hoku kau akau, Au ana oe i ke kai, Ma na kai ewalu, Mai Hawaii a Niihau, He hoku hele no oe, No nei pae aina Ua like oe a like, Me na hoku hele i ka lani, O Ukali me Hokuloa, O Honua me Holopinaau, Wedeka me Iuno, Kereda me Palada, Kaawela me Naholoholo, Helekela o ke keu ia, Kaapuni ana i ka la, Kaohi mai Makalii, I ka mole o ka Honua, Noho mai nei Lonomuku, I ka olu o ka Mahina, Auhea wale ana oe, Ka Hoku Pakipika, O ke keu aku no oe, Kuu pua i anoi ai, Kohu pua hau o Mareka, Pua kela o Ainahau, E pili me pua rose, Pua nani a Solomona, Eia pua kalehua, Lihilihi maka onaona, Aki pohe o Kanahele, Na lehua o Kukii, Ohelo nee i ka papa, O ka hala ala ko Puna, Niu moe ko Kalapana, Na lehua i Haili, Kawa lele o Piikea, Wailele o Akaka, Koiawe lua i ka pali, Pali kui o Maulua, Elua no olua, Nuhou ma ke Kaona, Pono ole na makaainana, O Hawaii o Keawe, Aia o Maui la, Ka luna i Haleakala, Kukui o Lilikoi, Na lehua i Lihau, Kau kehakeha maoli, O ka hala i Anoilele, Ke ala ka i Moelana, Lana mai nei ka manao, I ka Hoku Pakipika, E naue mai e hui, A komo aku o ka olu, O ka malu ulu o Lele, O ka ulu niu o Mala, Malama mai kakou, I ka Hoku Pakipika, Kue mai Molokai, Pulama Honolulu nei, Na keiki o ke kaona, Lei ai keia aha, Nana i kukulu mua, Laha ae i ke akea, Loaa kau kumu hana, E ku-e kaa mai nei, Kunihi mai Kalaloa, I ka uka o Anehola, O ka lulu ko Kewa, O ka lai ko Makaiwa, He aiwaiwa oe, Ka Hoku Pakipika, Ka iini a ka manao, Mai noho oe a hopo, I ke alu a ka nui manu, Hookahi a lakou hana, O ka hui ahaolelo, E imi ana e kinai, E ake e make oe, Ua pau kou pilikia, Ua hala kou palena, I hooiloilo ia mai ai, E na kilokilo nei, Ka hope o Luau, Ke alu nei no nae, Ka pule a Hakalau, E lau mai na lima, O na keiki Hawaii, E lalau a hoipo, I ka Hoku Pakipika, Nou keia waha, E pane i ke akea, E ola ka Hoku Pakipika, Kau i ka pua aneane, G. W. K. Manuokekula. Kopuukolo, Dekemaba 19, 1861.