Ka Hoku o ka Pakipika, Volume I, Number 7, 7 Nowemapa 1861 — Maloo nui ma Halawa i Molokai [ARTICLE]

Maloo nui ma Halawa i Molokai

Ka Hoku o ka Pakipika.-Aloha oe : Ka Hoku nui e welo nei i ka moana o ka Pakipika, ka makamaka hookipa o ka lahui o Hawaii nei, O oe ka iini paa o kuu puuwai no ka ike ana o keia wahi kanaka o kela aina pouli i kapaia kona inoa o Pupuhikukuiopapalaua, e hiki ke hookoino i na mea hou o ka aina.

Eia ua mea hou nei ma Halawa i Molokai, ua nui loa ka maloo o ka aina ma kela kapa mai uka a hiki i kai, ma keia kapa a hiki i kai ina aole i holo ae ka mea nana e malama o Halawa, oia hoi o T. Keaweiwi, ina ua maloo loa; i kona hiki ana ae i ka la 11 Okat. hele ae la e nana ina Loi poalima e nakaka ana no ka wai ole, alaila, pane ae la o Keaweiwi, auhea oukou na kane a me na wahine me na keiki a pau o Halawa nei, eia ka hana mua aʻu e pane ai imua o oukou i ka la 15 e hoomaka mua kakou i ka hana i ka auwai ma keia kapa la, 16 hana ma kela kapa, aole make hooponopono, hoomaka ka hana no ia mau mea a maikai na Auwai ma kela kapa keia kapa, pau ae nei keia, a ka la 18 e pii kakou e kohi i ke kio wai i kapaia o Moaula e kohi a hohonu i loaa ka wai no ka aina, ae na mea a pau i ka hoomaka ana e kohi a hohonu, kahe mai la ka wai o Moaula no ia kohi ana a T. Keaweiwi, nolaila ka wai o kela kapa keia e kahe nei a hiki i keia manawa, ua pau ko laila pilikia no ka loaa ana o kela kio wai. Eia kekahi, aole wale malaila ka maloo, maluna mai o na Keopuka, na aina James, Nowland, aole malaila wale, ma Honouli, aole, maaila wale, ma Waialua aina o C. Kanaina, ina e manao ana kekahi poe he wahahee e hele i ike i pau ka hoomaloko. He mau ia e Pikapika; hele haaheo i ka Lihilihi o ka la i Lehua, nau ia e moni iho a hoopuka ae i ka la 31 Oka. i ike ka lehulehu no keia pilikia. Owau o ko oukou hoaaloha. W. TIMOTEO Holo. Halawa, Molokai Oka. 25, 1861.