Ka Hoku o ka Pakipika, Volume I, Number 1, 26 September 1861 — KA HOKU O KA PAKIPIKA. [ARTICLE]

KA HOKU O KA PAKIPIKA.

He mau rula maikai no kekahi i malama e ko Hawaii nei mai ka wa kahiko mai no a ke nee nei no. Eia kekahi oia mau mea, "o ka noho kahu ana no kekahi alii," a he aha kana hana imua o kona alii, eia, o ka malama i ke kapa o ke alii, ka ai, ka ia, ke kahili, ka lomilomi, ka hauleuku, ka malama ipu kakele, ke kiai i ka po i ke ao, ka mililani, ka hoomikioi, ka hii, ka hapai, ka hookapukapu. A heaha hou iho ua hana? Eia, aia a ike oe ua maikai, kuu alii, kuu haku, kuu milimili, kuu lei ai, kuu hanai, alaila e haku auanei ua kahu la i mele no kana alii, a punahele oe i ke alii alaila, e ku auanei keia olelo, penei. "Moe malie i ke kai o ko Haku." Eia malalo nei he wahi mele no "Ka Hoku o ka Pakipika." Hanau kalani kau ka Hoku Pakipika, Kau ka Hoku paa ke alakai o na moku, Kau o Helekela, he Hoku i ka palena o ka Aina, Uwe wale mai o Kaawela i ke anu, Ka Hoku o ka Pakipika ka'u olioli, Ka Nu-Hou aloha a ka Hawaii, Ka pua kamahao e kau neii, I ohaoha kona kino me ke onaona. Hawaii moku nui eia ko milimili, Milimili ka laau newa i ke kai, I lohia lima ia oo Kau e ke A-e, E ai okana aku ana ia Kona, E ai ku ana ia Kohala, E ai ili ana ia Hamakua, E ai ahupuaa ana ia Hilo, Manuahi wale mai ka lua o Kilauea, E ai kalana ana ia Puna, Kapu aku la ka ulu lehua o Panaewa, I lei kahiko no ka Hoku Pakipika, Ke hea mai nei o Maui ia oe, Ke ani peahi mai la iluna o Haleakala, Na laoleo kanaka ou mai ke kaua o Iao, O ke ala apuupuu i Molokai, O ka piina ikiiki o Lanikaula, E hele oe e ke aloha ia ia e hele mai, Eia mai ka Hoku o ka Pakipika, Ka pua mailoko ae o oukou, E ike ia kakou hookanaka, O kipa hewa ke aloha ia Kaunuohua, he puu ia, E ka mokupuni o Oahu, e kilohi oukou, Eia ka Hoku Pakipika ke kau nei, Ke haawi mai nei kona mau kukuna i ka ike, A nona kekahi malamalama o ka poeleele, Mai makau oukou i ka ua Awa, Mai puiwa oukou i ka lapa a ka uwila, Eia mai ka Hoku Pakipika, Ke alo aku la i na pohaku paapaaina o Iukuwa, Aole ona makau i ke anu, me ke koekoe, A ke hea mai nei oia ia kakou, Owau no ka hookele a ka Hawaii, Aole o lakou panana mamua, O Kaiahua kanaka holo moana, O kana pule holowaa o Huano, Hamama ka waha i ka moana, Aloha ina ka wahine, me ke keiki, Huli ae la nana i ka Hoku aina, Hai ke ola no ka Hoku, Ka Hoku Pakipika, aloha oe, O Kauai kela he moku ua lewa i ke kai, Ua ku hi'a a ka po ia Liamaloa, Ua oni wale i ke anu o Ainaike, E ao o ikea mai e Kulamamaihiki, Elua hana i holo i ka manao, Ua pili pono ka la i Papaenaena, Ku mai kaena ke'hu kai olalo, Akahi ke ana ka luhi wale i ke kai, I ka hunahuna ehu wai o Kikiaola, E hiki ana ka auwai a ka Melehuna, E wili ana ka wai ula me ka wai kea, Hooniponipo ka wai i Mahaihai, Haina ae la e oe ka maka oia pua, O ka upolu a ka lau o ka Inia i ka makani, Makani mai nei luna o Kaala, Aala no oe i pili ia me ke aloha, E ka Hoku o ka Pakipika aloha oe, Ke peahi mai nei ka Niihau o kaua, Ke kikii mai la iluna o Kaali, E walea ana i ke ahe a ka makani Naulu, Ka Hoku Pakipika ka lakou kani-a, I makee ai a ka naau lia ka po, I huli ai a ka manao wela loko, Auhea oukou na kanaka Hawaii, Ke keiki a kakou ua hanau, Ka elele a kakou holo ka hana, Ka Hoku o ka Pakipika he inoa, E o no oe i kou inoa e Kahanohanomakaokalani, Ka Hoku Pakipika e kau nei, Nana ia ou hou holoholo o ka wa kamalii, Puka ka la i Kumukahi, ilaila oe, Komo ka la i Lehua pau kou palena, Ano mai ke ahiahi, aia oe i Anaki.

Kau mai la ke ahi o Kamaile, Hahai ae no e like me Aahoaka, Ka ukali a ke ahi me ka Auhau, Ka-kaiele hewa i ka pali o Nualolo, Iho mai ke ahi anuanu i na pali, Ke kakoo loa a ke ahi hele i ke kai, Haaheo mai ke ahi a ka pepala, Hele huhu ke ahi me ka momoku, Pua ka auhau welo i na pali, Ua unua e ke kai ke ono o Luhi, Ua molale ke kumu pali o Kalalu, Hikikii lua i ke one o Hoohila, Pau pono na opilua a ka makemake, Okipau ka hana i ke one kani o Nohili, Ka houhene-uhene a hano ka leo o ke kai, Haawali e mai ka Puukolu, Newa hoona i ka malu o ka ohai, Ka Hoku Pakipika i ke'hu a ke ao, Akahi au a ike ia Kaunalewa, Ua nani ua iliwai like ia e ka liula, Ua oluolu pono o Lehua i ke kai, Ka Hoku Pakipika he inoa, E-o-no, mai Hawaii a Niihau. S. K. Kuapuu. Honolulu, Sepatemaba, 19, 1861.