Ka Hoku o Hawaii, Volume XLI, Number 7, 19 Malaki 1947 — Hoole O Richard Smart [ARTICLE]

Hoole O Richard Smart

Ua hoike ae o Richard P. Smart ka ona ponoi o ka aina hanai holoholona o Paka, oiai oia ma kona home ma Puuopelu, aole oia i iini e hoolilo aku i kona mau kuleana ma ka mokupuni o Hawaii nei i keia manawa a aole no hoi ma keia mua aku. O ka hoolilo ia ana o ka aina hanai holoholona o Kahuku ia Glover, o ka mea ia nana i hoolaha ae i na lono e kuai hoolilo ana o Smart i kona aina hanai holoholona, a ua loaa pu aku iaia na kelepona e pili ana i ke kuai hoolilo ana, oiai no oia ma Amelika. Ua hoike ae oia no kona kuai ana iho nei i ka waiwai o Waika ma Kohala, a ua hoakaka pu ae o ke kuai ana i kela waiwai ame ka hoolilo ana i ka aina hanai holoholona o Kahuku ua kulike ia me na mea i hoolala ia no ka hoohui ana i na aina hanai holoholona o Paka. Ua makemake au i ike ia mai aole o'u iini e hoolilo i kekahi mau kuleana e a'e o'u," wahi ana. Ua hoohala oia he mau pule kakaikahi ma Hawaii nei ma ke ano hoomaha, oiai aole i loaa iaia kekahi manawa hoomaha, oiai he mea oia i komo aku iloko o na hana keaka. Iloko no ia o ka nui o ka waiwai o keia keiki, aole nae oia i kaukai i kona ola mai na loaa mai o ka aina hanai holoholona, aka, ua imi no oia i kona ola ma na hana keaka. Aole keia kanaka opio i noho loihi ma Hawaii nei, aka, i kona mau la opio e hoohala ana oia i na mahina o ke kau wela ma Kamuela, a ua kapa nae hoi ia i keia wahi o kona home ia. O ia nei no ka moopuna o Kamuela Paka, ka ona nui o na aina nanai holoholona a Paka. Kamuela. Hawaii, .. Ua hiki aku ka waiwai o keia kanaka opio maluna o na miliona dala. He nui no na poe i hanau pomaikai ia mai, a noho kuonoono a o ka hapanui aku he poe ilihune.