Ka Hoku o Hawaii, Volume XXXVI, Number 9, 25 June 1941 — E Hoomaikai Aku I Ka Mea I Manao Ino Mai [ARTICLE]

E Hoomaikai Aku I Ka Mea I Manao Ino Mai

Ua lawe maila makou i kela poo manao e kau aela maluna, a kukulu iho i wahi e ike ia mai ai e na makamaka heluhelu o Ka Hoku i ka manao ano nui i hoopuka ia ai keia poo manao. E like me na manawa i kaahope ae nei, ua ike ia no ka ikaika o ka nee ana a keia wahaolelo, a ua hoi mai a e like me kona hoomaka mua loa ana i kinohi. Eia no ke mau nei kona nee ikaika ana. O kekahi kumu o kona ikaika hou ana ae la oia no keia, he hookahi wale no nupepa e hoopuka ia nei ma ka olelo makuahine, a ua hoouna ia maila na hoolaha aina aupuni apau na keia wahaolelo e hoopuka aku. Ua ike no na makamaka heluhelu o Ka Hoku i keia mau hoolaha aina e hoopuka mau ia nei i kela ame keia mahina. O kekahi o na mea e pili ana i na kanawai o ke kau ahaolelo. He hookahi no keia nupepa a ua lilo maila no ka hoopuka ia ana o keia mau kanawai ma ka olelo Hawaii e keia nupepa. Eia no ia pomaikai ke komo maila, a e mau ana no kona ikaika i ka hoomau ana aku. Ma kekahi manawa ae nei ua hoopuka ia, ae kekahi mau olelo ano hoomahuakala, aole ka e hala ana he elua pule a i ole maluna iki aku paha o ka pau loa no ia o kona puka ana. Nolaila, aole keia he olelo ano ku i ka maikai, a kauoha maila ka buke nui, ""E hoomaikai aku i ka mea i manao ino mai." I na oia iho la no ka olelo hoino i wahi e puka hou ole ai keia wahaolelo, a kani ka lakou aka. Nolaila, o ka makou e uwalo aku nei imua o ko makou mau makamaka heluhelu, e hookuu aku ana anei kakou i keia wahaolelo e hoopuka ia nei ma ka kakou olelo makuahine, e nalowale aku no ka wa mau loa, a e hoonalo pu ia aku hoi ka kakou olelo makuahine mai ka kakou mau pua aku? Aole o kakou wale no keia e heluhelu nei i keia nupepa na Hawaii, aka, o kekahi mau lahui e ae, a ke hoohana ia nei maloko o kekahi mau kula, no ka hoo-, maamaa ana i na poe i iinī nui e loaa ka makaukau ma ka heluhelu ana i ka oleio Hawaii. E hookuu no i na poe hoomahuakala e hana i ka lakou hana, aka, e oni paa e ka Hawaii mahope o ka hiwahiwa a ka lahui, no ka pono o na Hawaii kahiko i loaa ole ka makaukau ma ka olelo Beretania. s Eia no ke hoouna ia nei kekahi mau kope o keia wahaolelo ma kekahi mau home o na poe palupalu ame ilihune. Eia makou ke hoao nei ma na ano apau e hoomau ia aku keia wahaolelo no ka manawa loihi e hoea mai ana, a ke lana nei nohoi ka manao e loaa mai ana na kakoo ikaika ana mai ia makamaka heluhelu mai o Ka Hoku nei. E kukulu mau kakou i keia hoku malamalama mamua e lilo hoi i kukui malamalama no ka lahui Hawaii.