Ka Hoku o Hawaii, Volume XXXIII, Number 48, 29 March 1939 — E KAPU ANA PAHA KA LIMU [ARTICLE]

E KAPU ANA PAHA KA LIMU

Ua hookomo aku nei o Senatoa Charles H. Silva o Kohala he pila iloko o ke senate a ua holo mai nei nae hoi me na hooponopono ia ana, e hookapu ana i ke kii ia o ka limu e na poe i kupa ole. Ua hoakaka ae kela senatoa no kona ike ana i na poe aole he mau ai a na Hawaii a moku mai a lawe ae a hanai i ka puaa. No ka makee o keia kanaka opio i na meaai a na Hawaii ame kona ike maka ana i na mea i hana ia pela oia i hookomom aku ai i keia pila. I ka wa keia i waihoia ai no ke kalai manao ana ua ku mai kekahi mau senatoa e ae a hoakaka he mea pono e hooponopono ia ua pila la. Aole lakou i kue ia ui pila aka ua manao lakou ma o ka hooponopono ana he mea ia e komo ai kekahi mau mahele okoa iloko a e pakele hoi kekahi mau mahele. Senatoa Heen - Ua makemake au e pakui i keia pila e hapa ana i na poe kupa ole mai ke kii ana i ka limu no na pono pili oihana. Senatoa Silva - O e kii ana kela poe a moku mai a hanai i ka puaa. Senatoa Heen - Alaila e hana a koe no ka pono mea ai ma ka home. Senatoa Trask - He mea kela e akeakea mai ana i ko'u auau limu ana. O ka wahine aoo nana e haawi nei ia'u i kela mau auau ana no ke 50c he kupa ole a he ekolu ana mau keiki. Senatoa Heen - Malia o loaa aku iaia he eono mau keiki i na aole kakou e hooholo i keia pila. Senatoa Trask - Ke hoakaka nei au e pakui hou ia aku a e heluhelu ia penei," a koe i mea ai no ka home ame na pono laau." Senatoa Silva - O ka auau ana aole ia he laau. Ua apono ia na hooponopono ana, a ua hoouna ia aku ka pila i ka hale o na lunamakaainana. Ua nana no keia senatoa opio mai Hawaii Komohana mai no ka pono o na meaai a na Hawaii. He mea pono no paha i na e kapu pu me ka opihi.