Ka Hoku o Hawaii, Volume XXXIII, Number 29, 16 November 1938 — KU KE AKULE MA OAHU [ARTICLE]

KU KE AKULE MA OAHU

Ma kela pule aku nei ua ku ae la ke akule ma Honolulu a mawaena o Kaimana Hila ame ka lae o Makua, a he aneane paha he hapalua mile mai ka aina aku, ua hoea aku he elima waapa Kepani lawaia malaila ma na upena a hoopuni ae la i ka iʻa. Ua piha kui maila na makeke o Honolulu i ke akule. No ka nui loa o ka iʻa i komo ae ma ka makeke ua hoemi loa ia maila ke kumukuai o ke akule a i ke kenikeni o ka paona hookahi, a ua like ia me he hapalua o ke kumukuai o na manawa i kaahope ae nei. Aia ma kahi o elima waapa lawaia akule e ku nei ma kela koʻa ia. Uakuu ia ka upena a na na Pilipino e luu. Aia paha ma kahi o elima a eono kona akule i laweia ae ma na makeke ma Honolulu a wahi a Mr. Lee ka ona o ka waapa Papio, ua hoea aku ma kahi o ka 15 kona akule kai hei ae ma ka pule aku mamua. O ke kumukuai a ka i'a ma ke kukaa he 8 keneta o ka paona a o ke kumukuai i hoopukapuka he 10 keneta o pa paona. I ke au kahiko i na e ku kekahi ano i'a o keia ano e olelo ana kahiko he alii e haule aku ana a i ole he nuhou paha. I keia manawa nae hoi, aole ia mau ano. He au hou la hoi kela, a he ano hou na mea apau. O na mea kahiko ua poina ia ia i keia manawa.