Ka Hoku o Hawaii, Volume XXII, Number 8, 17 July 1928 — Ua eo ia Kaopuiki ka Uma [ARTICLE]

Ua eo ia Kaopuiki ka Uma

Ma ka Poaona i hala iho la, ua hana ia ae kekahi Uma Lima ma waena o Wm Kualii o Hilo nei me R. Kaluahine o Kauai ame David Kaopuiki o Honolulu, ma kahi hoikeike keaka, e hoohana ia nei malalo o na Kamehameha. Ma ia hana uma ana ua lilo aku la ka eo ia David Kaopuiki a e loaa ana kana makana he kiaha dala. O keia hana umalima he hana maa mau keia i na poe Hawaii o na makahiki loihi i hala aku la. Ua hana ia keia he mea e hookaulana ana i ka ikaika ame ka noiau o ka uma ana a kekahi poe. He loina no ko keia hana Uma wahi a ka poe i ike ia hana. He hana maa mau nohoi keia i na kupuna o kakou i hala aku, a he hana hoohauoli nohoi ia lakou. He nui na hana hooikaika kino o ke au kahiko, eia nae aole hoomaopopo ia oia mau mea. I keia manawa aia ma na Kula e aoia mai nei keia mau hana hooikaika kino i na keiki, aole nae o ka Uma ana, aka, o kekahi mau mea e ae nohoi. I ka malama aku nei o Iune ua malama ia no keia hana uma ma Kauai iloko o na la i malama ia mai nei ka hoomanao ana i kahi hanau o Kalanianaole ma Kauai, ao Kualii no kekahi i komo aku iloko o keia hana uma lima, eia nae aole i lilo eo iaia, aka ua helu elua paha oia la ke ole makou e kuhihewa.