Ka Hoku o Hawaii, Volume XII, Number 15, 6 September 1917 — KA POINO A KE AHI MA PIIHONUA [ARTICLE]

KA POINO A KE AHI MA PIIHONUA

Ua kamailio aku makou ma ka pule i hala aku nei, he mea pono e makaala loa i ke ahi i keia mau la papaa-la, a aole hoi e hana hoohemahema wale, oiai, ua hele a maloo ka nahelehele, ai ka pa iki ana aku no i ke ahi, o ka holapu no ia me ka awiwi a he hana nui maoli no ke kinai ana aku ia ahi hoopoino. Mahope koke iho no o keia mau kamailio ana a makou, a ia hoi mamuli paha o kekahi hemahema o kekahi poe i pii hoomaha paha ma ka aina o Piihonua, a ia hoi ua holapu aku ke ahi ma ka aina ululuau o Piihonua, a ua hoouna aku la ka Lunanui o ka Mahiko Hawaii e kanu ko nei ma ka aina o Piihonua, he haneri kanaka e kinai i keia ahi, a mai keia la a hiki i ke ahiahi ka paio ikaika ana o keia haneri kanaka i keia ahi holapu, a hiki wale i ka wa i kualiilii mai ai ka a ana o ke ahi, a ua hoopoino ia nae he aneane 25 eka ululaau, ao ka mea minamina nui, oia no ka hoopoino ia ana o na laau hou e ulu ae ana, ao ka hapanui ia oia mau laau hou, oia no na kumulaau koa, a he laau waiwai loa hoi o Hawaii nei.