Ka Hae Hawaii, Volume 3, Number 16, 21 Iulai 1858 — Untitled [ARTICLE]

Rev. E. W. Kalaka. Aloha nui oe me ko kou hale a pau, ua lana hou mai ka manao o kau keiki iloko o ka Haku, e hai aku ia oe no kekahi leo kahea mai keia pae aina o Maikonisia nei, e olelo ana; "E homai i misionari na'u, e homai i misionari na'u," a ua haiia mai keia leo ia Rev. A. A. Sturges ma mamua o ko makou ku ana mai o McAskill Island ka inoa o ua aina la, eia mawaena o Ponepe a me Ualana. A ke manao nei o Mr. Sturges ma, e hoonoho koke aku ia Mr. B. Kaaikaula ma kela aina, aka, no ka loaa ole o kona hoa misionari e noho pu ai laua, e like me ko Rev. H. Bingham Jr. ma noho pu ana me Kanoa ma Apia, a me Rev. Dr. Pierson me Rev. Doane, ma Epone, nolaila, ke kali nei i keia manawa e loaa mai ona hoahanau mai Honolulu mai i keia holo hou ana mai o ka moku Hokuau, alaila, e holo koke aku o Kaaikaula ma e noho koke iloko o keia makahiki hou, a ina aole e loaa mai ona misionari Hawaii, alaila, ke paa nei ko Sturges ma manao ia Kaaikaula, e hoouna aku iaia, pela ko Mr. Sturges ma manao. Nolaila, ke paipai aku nei au ia oe, e pono e hai aku oe i keia leo kahea i na hoahanau a pau ma Kawaiahao, e pono e ala mai lakou iluna, a e hoolana i ka manao, a e noi ikaika aku i ke Akua, a e ku mai a e hapai i ka hana a ka Haku, ka olelo Iesu Kristo, a e hoolaha i ka euanelio ma keia mau aina pouli, a me keia leo mai loko mai o ka moana. Ea! mai kali, e wiki mai oukou, o komo e mai auanei na luina haole o na moku kohola mai, a mahuka paha akeakea mai i na misionari, me na olelo ino, o lohe e na lahui pegana, a hoopaakiki i ko lakou naau, mai hoopanee, e like auanei me Ponepe nei, nui loa na luina haole kolohe maanei, no na moku mai, a ke hookamakama nei lakou, moekolohe, inu rama, a ao aku i na lahui pegana o onei, me na olelo ino, a lilo na misionari i poe enemi no keia poe luina kolohe i noho mai maanei. Nolaila, he pono loa e komo koke aku na misionari i keia aina, a e hoola aku i na uhane o keia poe make ma keia mau aina he nui loa ma keia moana Pakifika nei, a e loaa ia lakou ke ola mau loa ma ka lani. A nolaila, ke hu nei ko'u aloha no keia lahui kanaka a pau e noho nei ma keia moana, iloko o ka pouli mau loa o ka make. Ua manao mua no o Mr. Sturges e hoouna i keia holo ana o Bingham ma i keia makahiki i hala iho nei, ia Mr. Kaaikaula, ina nae aole e hoihoi ia'ku o Kamakahiki, ina ua komo koke aku o Kaaikaula ma, he pomaikai loa ke nui mai na paahana, no ka mea, he nui loa na kihapai e waiho nei, he uuku loa na paahana e hana nei. Eia no hoi kekahi, ke manao nei o Dr. L. H. Kulika e loaa mai ona hoa misionari nona mai Hawaii, a e noho ma Ponepe nei, pela kona manao, aia nae a kokua mai ka uhane o ke Akua i na hoahanau a pau ma ka pae aina o Hawaii.

Oia ka manao lana a me ke aloha iloko o ka Haku; Aloha nui oe, e hai aku i ko'u aloha i na hoahanau ma Kawaiahao. S. Kanakaole. Shalong, Matalanimu, Ascension, Ian. 18, '58