Ka Hae Hawaii, Volume 3, Number 8, 26 Mei 1858 — HE ’LII HAWAII HOU!!! [ARTICLE]

HE ’LII HAWAII HOU!!!

I ka poaha, oia ka la 20 o mei nei, i ke ahiahi, hora 6 me na minute he umi, kani aku la na pu nui ma Puawaina he 21, no ka hanau ana o ke keikikane a Emma, ka Moiwahine i aloha nui ia o ko Hawaii nei pae aina. Nui ka hauoli o ka Moi a me kona poe hoa kukakuka hanohano a me na lii a pau, i ka maopopo ana ua hanau mai ke keikikane a ka Moi. A i ka poalima, hele nui na'lii a me na Kanikela o na aina e, a me na luna o ke Aupuni, a me na haole o Honolulu, me na Koa a me na misionari pu kekahi, e hauli pu me ka Moi, me ka pane aku i na manao olioli iaia. O ka poe Kanikela i hele mua imua o ka Moi, i ka hora 2, a o A. P, Everett ka mea nana i hai aku i ka manao oluolu o keia poe; a pane aku la ka Moi ia lakou, me ka manao lana a me ka oluolu, no ke aloha nui o na haole o kela aina keia aina ia ia a me kona ohana. A pau ia, hiki mai ka poe luna o na oihana Aupuni, a o W. Goodale, ka Luna Dute Nui, ka mea i hai aku i ka manao hauoli o lakou a me ke aloha i ka Moi, i ka Moiwahine, a me ke keiki a laua, me ka manao lana e ola lakou a pau a hala na makahiki he nui, Pane aku la ka Moi ia lakou me ka manao oluolu a me ke aloha aku ia lakou.

A i ka hora 3 1/2, hele huakai mai na Koa haole me na haole a pau o Honolulu nei, a hiki i ka Hale Alii, ku na Koa imua o ka hale a hele iloko na haole me ke Kanikele Amerika. Ia manawa no, hele iwaho ka Moi a ku ma ka lanai ma kahi o ke alapii nui; alaila, hele mai ka Mea Kiekie, o L. Kamehameha, ka Alihikaua a hai aku imua o ka Moi i ka manao hauoli o kona poe Koa me ke aloha nui o lakou ia ia.

Pane aku la ke Alii ia lakou; aneane hiki ole ia no nae ke hai aku i kona manao no ka haehae o ka naau, a pokole kona olelo ana, a hoi oia iloko. A laila, hai aku ke Kanikele Amerika, o A. Pratt Esq, i ka manao hauoli o na haole o Honolulu no ka hanau ana o ke keiki a ke Alii me ka manao lana e ola ke keiki a e lilo ia he 'lii naauao, a he mea e pomaikai ai keia lahui - a pau ia. - Hai aku o Rev. S. C. Damona i ka manao aloha o ka poe misionari me ka haawi ana i kekahi Palapala Hemolele nui a maikai i ke keiki a ka Moi, i mea e alakai ia ia i ka pono a ke Akua - a pau ia, Paneaku ka Moi, me ka haehae o ka naau a me ke aloha ia lakou a pau, no ka lakou mau olelo oluolu e hoike aku ana i ke aloha nui o lakou ia ia iho a me kana wahine a me ka laua keiki i hanau ia, a pau ia mau mea, hele paikau na Koa haole i loko o ka Hale Alii, a imua o ka Moi ma kona Keena noho alii; alaila pau keia halawai hauoli ana.

Ua ola pono ka Moiwahine a me ke kaiki pu kekahi, a na ke Akua e malama ia laua a me ka Moi a hala na makahiki he nui.