Ka Hae Hawaii, Volume 3, Number 6, 12 Mei 1858 — KA PALAHU. [ARTICLE]

KA PALAHU.

O ka palahu, he manu maikai ia a kupono no ka ai o kanaka—He manu keia no Amerika Akau, ua hoolaha ia no nae ma ka nui o na aina o ka honua nei. Ua lawe mua ia ka palahu i Enelani i ka makahiki 1521, a ua lilo ia he manu laka no ka poe hanai manu. Elua ano nui o ka palahu ma Amerika, ka Palahu Honduro (Meleagris ocellata,) a me ka Palahu maoli, (Meleagris gallopavo,) ma Honduro a me na aina i pili, kela, a ma Amerika Huiia keia —O ka palahu maoli, ka mea i hoolaha nui ia, a ma keia pae aina na palahu oia ano.

Ua emi ka maikai o ka palahu i ka lilo ana ia i manu laka.—O ka manu hihiu, he nui ia a maikai loa ke nana’ku, he 4 kapuai kona loa, a he 5 kapuai ka hoopalahalaha ana o na eheu, hinuhinu na hulu, ano hookiekie ka hele ana, pela no ka ano o ka palahu kane hihiu o Amerika Huiia. O ke kaumaha o ia manu kane, ke momona ia, he 20 na pauna, a he 30 kekahi a hiki i ka

40 pauna. O na wahine, he 9 na pauna a hiki i na pauna he 12.

Aole pela ke ano o na palahu o keia pae aina ; he 5 pauna a he 10 paha na pauna no ka palahu momona o ko Hawaii nei pae aina. Eia ka hemahema o na kanaka Hawaii i ka hanai ana i na palahu, aole lakou i ike i ka hana kupono no keia mea. Eia nae kekahi mau rula no ia hana. 1 E hoomoe i ka makua ma kahi i malu- hia a hele ole ai na kanaka a me na holoholona. 2 E hoopakele i na keiki i ka ua a me ke anuanu. 3 Mai hoopaa ia lakou ma kahi uuku a kupono ole. 4 E haawi ia lakou i ai kupono a nui, o kela ano keia ano.—Uala moa, kulina, huita, milita a pela aku,—me na iwi i hoowaliia, puna, a me na mea ano like. 5 E hoomaemae i ka wahi noho ai o lakou, o pilikia i ka mai a me na uku. A ina pela ka hana ana ; alaila he nui na manu me ka momona a me ka maikai loa no hoi ; a nui ke kumu kuai, he $1, $1.50 a hiki i na dala 2. Eia maluna ke kii o ka palahu wahine me na keiki liilii e imi ana i wahi ai ma ka nahelehele.