Ka Hae Hawaii, Volume 2, Number 27, 30 September 1857 — Elua mau Uhane anei ko ke kanaka ! [ARTICLE]

Elua mau Uhane anei ko ke kanaka?

Peia ka manao kahiko ma Hawaii nei. He kuhihewa nae o lakou. Olelo lakou, E make kekahi uhane ma ke kino, oia ko ke kanaka, a e hele aku kekahi uhane i kahi e hele ai, a he uhane kuokoa ia, aole no he kanaka ia. Ua ku ole nae ia manao ma ka oiaio. Hookahi no uhane ko ke kanaka, a o ke kanaka no ia. O ke kino, he hale no ia e noho ai ka uhane kanaka iloko, i kona wa ma keia ao. A make ke kino, ka wawahiia o ka hale, a hele aku ke kanaka, oia hoi ka uhane, e imi i hale mau no kela noho ana. Aohe make ke kanaka, i ko ke kino make ana, he kuhihewa no ia, na ka naaupo. Mai manao kakou, he okoa ka uhane hele a he okoa ke kanaka. O kakou ponoi no ka mea e hele ana, a e hookahi ana ke ano o kakou ma keia ao a ma kela ao, ke pono a ke hewa paha. Nolaila, o ka mea ma ko ke Akua pono i ka wa e noho nei, oia wale no ka mea e pono ana ma kela ao. Ma keia ao no hoi e imi ai a loaa ia pono, aole ma kela noho ana.