Ka Hae Hawaii, Volume 1, Number 50, 11 Pepeluali 1857 — KULA OLELO BERITANIA MA WAIMEA, KAUAI. [ARTICLE]

KULA OLELO BERITANIA MA WAIMEA, KAUAI.

Aloha oe e ka Hae Hawaii:— Ua hoike iho nei keia kula ma ka la 22 o Dek., o V. Knudsen ke kumu haole, 38 haumana, ua maikai no keia kula, ua makaukau kekahi poe, oia hoi ka olelo ana ma ka Olelo Beritania, me ka heluhelu, kakaulima, ma ka hui hua kekahi poe, a heluhelu hookuikui no. Ua akoakoa mai ka nui, o na makua i kokua i keia kula, no ka lakou mau keiki, elima wale no makua aole hiki mai, no ka mea, aia no ia poe makua i Niihau, a ua honuna mai no i ka lakou mau keiki ma keia kula, ua olioli na makua i hiki mai, a lana ka manao o kekahi poe makua, e hoomau aku i keia kula, ma ka makahiki e hiki mai ana. O na Kahu kahi o keia kula, ua hele mai e nana, a olioli no kakou, manao no lakou, e {illegible} mua ana keia kula ma na manawa e hiki mai ana; no ka mea, ua kuhihuhi mau na makua, ma kahi e mau ai keia kula, a ua lana no na manao, a me ka hoomaopopo. O G. B. Rowela, ko makou Kahunahaiola kekahi i hele mai, me kana wahine, me na keiki, me M. P. Wini, a me kekahi poe e ae no he lehulehu, a olioli no. Ua akamai no keia poe makua i oleloia maluna, hoomaopopo no; me ka noonoo nui, i na kumu e ike ai ka lakou mau Keiki. Eia, 1, o ke dala, 2, ka hoouna, hele mau ke keiki i ke kula, a me kekahi mau mea like, me ke ake no e ike na keiki, a pii ka lahui Hawaii, ma na oihana ike. He mau makua nawaliwali kekahi, a ilihune no; aka, imi no i wahi e loaa ai ke dala, i o ia nei, e au aku ai, like me na manu koloa, a loaa no ke dala haawi no i ka Puuku o ua kula nei. Aka, eia ka makemake, e haawi mai ka Ahahui Mahiai o ka Moi, o ko Hawaii Pae Aina, ina pahu papapa, i makemake nui ia e na haole, e like me ka hai mai o ka Hae Hawaii nei, “he papapa he makemake na haole,” oia la, ina no he mau hua e ae no, pono no, i mea hoolaha aku, a loaa ke kokua no na makahiki e hiki mai ana, nolaila mai hoopoina, o haule i ka Napainawaa, a make ka manao lana ana. A ke kanu mau nei no na uala kamaaina, me na loi kalo, kela mea, keia mea. O ka

uala o Am, Hema, ua loaa no ia, ke hoolaha ia nei. Ua hoomaka ua kula nei, ma la ka mua o Ianuari, a hiki ma ka la hoike, o keia makahiki e pau nei, ua ikaikaika no ke kumu ma kona ao ana, elima hora kula a oi aku no, no ka la hookahi, a oia no ke kumu no ka makahiki e hiki mai ana. A e hoomaka ana ua kula nei, ma na la mua o Ianuari M. H. 1857, oia na manao hai aku. W. B. AKA, Waimea, Kauai, 26, Dek., 1856.