Ka Hae Hawaii, Volume 1, Number 40, 3 December 1856 — Untitled [ARTICLE]

Nui na Makani ino ma Bavaria i keia mau malama i hala’ku nei, Ikala 24 o Augate, lawe iluna ka makani i kekahi keiki 8 makahiki nona, i 40 kapuai ke kiekie,a hāule iho la kela maluna o kekahi mauu, me ka poino ole a lawe aku la ka makani i kekahi kao i 150 anana a waiho ia ia maluna o ka laau, aole nae pilikia ua kao la.

Na Moku Okohola —Mai ka la 1 a hiki i ka la 22 o Nov. nei, ku mai maloko o ke awa o Honolulu nei he 64 na moku okohola me na barela aila he 68,230 a me he 782,500 na paona iwi kohola; o ka waiwai iloko o ua aila a me iwi la, he $1,700,0001 He kona ma Honolulu nei, i na la 22 a me 23 iho nei, me ka ua nui; oluolu makou no ia mea.

O ka nui o na papale i kuai ia ma ke Kulanakauhale o Nu Iorike i kela makahiki keia makahiki, he 3,000,000 a keu!

Na Inoa o kekāhi MAU Alanui Aupuni ma Honolulu nei.— Ua kapa ia e ke Ahakukakukamalu o ka Moi, penei: Ke alanui mawaena o ke Alanui Beritania a me ke Alanui li, ke Alanui Emma; ke alanui mawaena o ka hale paipalapala Polinesia a me ka Hale Luina, ke Alanui Paki; ke alanui mawaena o ke Alanui Nuuanu a me ke Alanui Liliha, mauka o ka wailele o Waikahalulu, ke Alanui Wailele; ke alanui ma Nuuanu a hiki i Kalihi, makai o ka hale o Kauku Judd, ke Alanui Kalihi; ke alanui ma Nuuanu a hiki i Kalihi, makai o kahi o Hali, a mauka o ka hale pule, ke Alanui Maemae; ke alanui ma Nuuanu a hiki i ka hale Kula Alii, makai o ka hale o Bihopa, ke Alanui Ii; ke alanui ma Nuuanu a hiki i ke Alanui Papu, mauka o ka halepule oTurena, ke Alanui Kukui.