Ka Hae Hawaii, Volume 1, Number 40, 3 Kekemapa 1856 — KA UALA HOU. [ARTICLE]

KA UALA HOU.

Ua laweia mai ka uala maoli mai Am. Hema, a ua haawiia io ia nei ma ka hale kuai o Mi Holo, ma Honolulu nei, mamua aku nei; a laweia i Maui kahi, i Hawaii kekahi, i Oa hu kekahi, i Kauai kekahi, ua ulu a ua hua mai. Nolaila, ke nonoi aku nei au ia oukou ka poe lawe i keia uala, e hooili koke mai ia’u i kekahi o keia uala i ike au, a ike hoi ka Moi, ka Peresidena o ka Ahahui Mahiai nana i kii i keia uala. Makemake makou e ike i ka hua o keia uaoa hou, i akaka kona pono a me ka pono ole. Ina hookahi wale no uala, e hooiliia mai pono; a elua paha, he uuku wale no. Ina maopopo ka maikai, alaila, kii hou makou, i uala hou e kanu. Aka, ua lohe au, ua maikai ka uala i keia makahiki. Makemake na Kapena moku; a ua lawe mahuahua no. He waiwai no ia no kakou, aole nae pau na uala ino; loliloli, makika; e pono e pau ia, mai kanu hou. E hai mai kekahi o Lahaina, a me Molokai i ke ano o ko oukou uala maoli, a me kamakemake ole—Pehea keia uala hou ma ko oukou wahi?

O ka uala kahiki kekahi; ua mahuahua ka maikai i keia wa—Aole maikai mamua e like me keia makahiki. No ke aha? No ke kanu maoli ana o na kanaka, aole ulu wale. Eia nae ka hewa, aole kanu pinepine i kela ma kahiki, keia makahiki. Ina pela ke kanu ana, maikai maoli. He mea keia e holo nu: mai ai na moku okohola i Hawaii nei, oia hoi, o ka uala maoli me ka uala kahikl; ola kakou. Nolaila, loaa ke dala e pau ai na pilikia. E na makamaka, mai palaka oukou, e hooili koke mai i uala iki, e like me ka olelo maluna. LIMAIKAIKA.