Ka Hae Hawaii, Volume 1, Number 40, 3 December 1856 — HANA MAIKAI O NA MANU LIILII. [ARTICLE]

HANA MAIKAI O NA MANU LIILII.

Noho ae la kekahi kanaka mea aina, ma kahi o Amerika Huipuia, me ka pilikia nui no na nalo, makika, a me na mea e ae ano like, nui wale. I ka wa wela, oia no i na malama o Iune, Iulai a me Aukake, piha loa ke ea a me na hale i keia mau mea ino; pilikia na kanaka a me na holoholona no ia mau mea; aka, i ka malama o Mei i hala'ku la, lele mai la kekahi mau manu liilii, o sualo ka inoa, (swallow,) he 140 ka nui o lakou. A hana'ku la lakou i ko lakou mau punana he 70, ma ka aoao o ka hale--holoholona nui malalo iho o ka pali. Kokua'ku la ke kanaka nona ua hale la ia lakou me ka papa laau i paaia ma ka aoao oia hale malalo iho o kahi o na punana i hoomaka ia, a hanaʻku la na sualo me ke akamai a me ke mele olioli ana. O ka ai o kela mau manu liilii, o na nalo, me na makika, a me na mea e ae ano like; nolaila, lele ae la lakou i kela aoao keia aoao e imi i mea ai, a nui na nalo a me na makika i make, a pau koke ka pilikia o na kanaka oia wahi. No ka mea, iloko o kela punana keia punana, he 4 paha a he 6 paha keiki manu liilii i makemake ai, a he 350 lakou a pau, a me na manu makua 140, huiia he 490. Ua manaoia e na mea naauao i noonoo i keia mea, e ai ia na nalo he 100 e ka manu hookahi i ka la hookahi. Ina pela, o ka nui o na nalo a me na makika i ai ia e na manu 490 i ka la hookahi, he 49,000 no ia; a iloko o na la 92 o Iune a Aukake, he 4,508,000! Nolaila, aole he mea kupanaha ia, ka hoopau koke ana o ka pilikia o ua kanaka la. Heaha ka mea e hiki ole ai ke loaa mai ia manu anu maikai ma keia pae aina?

Elemakule Nalowale —Palapala mai o Kaawaloa mai Lanai mai, penei, ua nalowale o Waiemi, kekahi elemakule kahiko loa, aia ma ke kuahiwi o Lanai. Pii iuka o Waiemi, lakou me kona mau moopuna elua i ka huli i wahi paoo, a pau ka huli ana,, hoi laua i kahi e noho ana o Wāiemi, a koi lāua ia ia e hoi, olelo kela, ‘‘ouhoi e aku, a popo au hoi hoi aku.” O ka Poano no keia, a, i ka la Sabati aole hoi o Waiemi, a kakali lakou, a Poakahi ae, huli aku kona wahine a me na moopuna, a loaa ka hule ana i noho ai, aole nae o Waiemi. Uwe nui loa kona wahine, o Makalauhapa kona inoa, a huli aku a kokoke make, aole o Waiemi, a hiki i keia la, aole i loaa, ua nalowale loa!