Ka Hae Hawaii, Volume 1, Number 40, 3 December 1856 — MOKU NAHAHA. [ARTICLE]
MOKU NAHAHA.
I ka la 24 iho nei, ua nahaha ka moku okohola, o Nauticon kona inoa, ma Honolulu nei. Penei ke kumu o ka nahaha ana: He kona no ia mau la a hiki i ka la 24 i oleloia, a ikaika iki ka makani, a nui no hoi ke kai. Hoolimalima’ku la ke kapena o ua moku la, me ke kapena o ka mokuahi aupuni o Pele t e lawe aku i ka Nauticon iwaho o ke awa. A, ao aku la na pailota a pau i ke kapena o ka Nauticon, “«Aole pono e holo, pilikia i ka makani;” paakiki no nae ua kapena la, a holo no. Holo mua o Pele me ka moku okohola mahope, paa i ke kaula. Holo maikai o laua a hiki mawaho, alaila, no ka nui o ke kai, haule mahope iho a lilo ka moku okohola ma ka aoao komohana akau o ke awa. Pakele loa na kanaka a me ka aila a waiwai a pau maloko o ua moku la. O ka uku kupono o ka moku he $25,000, a no ka waiwai he $65,000.