Ka Hae Hawaii, Volume 1, Number 40, 3 Kekemapa 1856 — HALE NAHAHA I KA UILA ME KA HEKILI. [ARTICLE]

HALE NAHAHA I KA UILA ME KA HEKILI.

E ka Hae Hawaii e:

Aloha oe :—-Ua launa au me kau mau kaikuaana, Nonanona, Elele, a e launa hoi kaua, ma ka’u wahi makana uuku ia oe; no ka mea, he mea io ole, a puahilohilo ke hanai oleia’ku i ka ai ka mea hana mau, a he hana nui hoi kau i ke ao me ka po e hele nei ma keia mau mokupuni. Eia ua wahi makana la: I ka la ewalu o keia malama, i ka aui ana o ka la, he uila me ka hekili. I ka anapu ana o ka uila, komo ka uila iloko o ka hale, naha ke kala ma ka aoao hema, a puka aku ma ka akau; aa aku la ke ahi i ka uluna, a pauhia na kanaka iloko i ka pilikia, me keahia, aole lakou lohe i ka leo o ka hekili, o ko lakou nui ewalu, elima wahine, ekolu kane; elua kane i komo ka laau iloko o ka io a he iniha me ka hapa ka hohonu mahunehune kekahi; eha ma ka maka, ma ka papalina, ma na lala a pau o ke kanaka, hookahi wale no mea i loohia ole i keia pilikia; he ilio ka mea i make loa. O ka mea i eha’i keia poe, o na laau i nahaha i ka uila, ua lele liilii na apana ma kela wahi keia wahi o ka hale, a mawaho o ka hale, a pa i ke kino o kela mea keia mea, ua nahaha na ipu, a palupalu loa kekahi. Ke hoopaapaa nei na aoao elua; olelo kekahi poe, o ka hekili ka mea i eha’i; olelo kekahi poe, o ka uila ka mea i eha’i. O ka oiaio paha ka uila; no ka mea, ua ike au i ka uila i hanaia e ke kanaka ma Lahainaluna, he mea eha loa. Oi loa aku paha ka uila a ke Akua i hana’i i ka ikaika.

He mea kupanaha keia i ikeia i keia makahiki ma keia apana; pela paha ma na wahi a pau o ka honua. Na ke Akua i hana na mea a pau. L. MAUI. Hana, Nov. 10, 1856.