Ka Elele, Volume 3, Number 1, 1 April 1847 — Untitled [ARTICLE]

Makawao , Muraki 6, 1847. E Limaikaika, Aloha oe. I keia mau la, mahuahua ka ua ma Makawao nei, a ma Ku]a kekahi. Ua nui no hoi ka hekili a me ka uila, a na ao polohiwa maluna o ka mauna Haleakala. A kakahiaka nui, i ka poha ana mai o ka la mahope mai o ka naulu, nani ka maikai o ka na. Ua uhi nuiia kona piko i ka hiu e alohilohi ana. HaUoli paha ko Kula poe i ka hau nia ka mnuna. I ko lakou manao, he hoailona ia o ka makahiki momona. Oiaio no pa* ha; aka, heaha ka waiwai o ka makahiki momona i ka poe palaualelo aole kanu, aole mahiai? Ninau o Solomona, menei; “No ke aha la keia? He kumu kuai ma ka lima o ka mea lapuwale, e kuai aku ai i ke akamai, aolē ona manao malaila”? Pela ma na mea apau. He kumu kuai iloko o ka lima o na kanaka a pau e kuai aku ai ika waiwai. Eia ke kumu, o ka aina momona, ka ua, a me ka wai kahe; o ka la a me ka makani, o na lima, a me na wawae, oia na mea e hiki ai na kanaka ke hana, kanu, hookahe i ka wai, mahi, waele, hoiliili, a loaa ka ai, a me ka ka waiwai no hoi. Aka, he mau mea ole keia i ka poe palaualelo molowa i ka hana. Auhea oukou

e ka poe palaualelo? No ke aha la oukou e hoolilo i ka ke Akua hana e pono ai oukou, a me ke aupuni, he mea ole loa? E ala koke mai oukou, a e hana ikaika, o lilo ka aina i neoneo: aole ia, e lilo paha i na malihini o na aina e mai. Eia kekahi mea oluolu. I kuu ike ana i ka hau ma ka mauna e hookeokeo ana i kona piko, hoomanao au, i ka olelo a Isaia 55: 10, 11. “E like me ka ua, a me ka hau i iho mai na lani mai, aole hoi e hoi hou ilaila, aka, e hoomau mai no i ka honua, a hoohua iho la ia ia, a hoomuo no hoi, i haawi mai ia i ka hua na ka mea lulu hua, a i berena hoi na ka mea ai; pela auanei ka’u olelo, ka mea puka aku, mai ko’u waha aku, aole ia e hoi nele mai ia’u; aka, e hana no ia i ka mea a’u e makemake ai, a e hooko io ia i ka mea au i hoouna aku ai ia ia.” Pela e ka Haku, ke Akua o ka Iseraela, e hooko wawe mai i kau olelo. Na’u na Oelina.