Ka Elele, Volume 2, Number 21, 4 Pepeluali 1847 — PUALI INU WAI MA WAIALUA. [ARTICLE]

E PUALI INU WAI MA WAIALUA.

O ka la mua o keia makahiki hou,

he la olioli nui ia ma Waialua nei. Halawai nui na haumana o na kula me na makua a me na kumu e ahaaina pu. Ma ka hora umikumamakahi, ua akoakoa na haumana ma kahi o ka hale pule kahiko, a i ka wa i hele ae ai ka hae mamua o lakou; alaila, hahai aku la ka poe puali wai mahope o ua hae la, ua kakauia ua hae la, penei, WAI WALE NO. A hoailona no hoi ma ka papale o na haumana i manao e haalele ina mea ona. Hele aku no lakou a komo like iloko o ka luakini i ka wa i kani ai ka bele. Ua nui na haumana i hoakoakoaia. Maemae ko lakou kapa a me ko lakou papale, a piha loa ka luakini i ka poe puali wai. A akoakoa lakou iloko o ka luakini. Ua himeni ka poe makaukau i keia himeni. 1 Eia makou ke hele mai Ka poe ku i ka wa, he mau puali inu wai, E oli I keia la. 2 Ua ike maoli no makou He wai ka mea maikai, No kanaka, no bipi no, Ke ikaika a ke mai. 3 Ina i maa ka poe mai o E ono mau i ka wai; Mai kela wa kahiko mai, Aole i nee ka hae. 4 Ua ea hou ka hae o nei, E mau ia e kau ai; Aole loa e hina hou, Ke ku paa ma ka wai. 5 Aka ua paa ko makou ae, E walea i ka wai, Ke ole aina ole kai, Ka wai ke koe mai. 6 Aole kakou e inu hou I ka gini, rama, bia,

I na mea a pau e ona ai Kaawale makou iu. 7 Auhea oukou ka poe i maa I ka baka, rama, bia, Holoi i na waha, hele mai Hoohiki, hui, ea. Pau ia himeni a me ka pule a me kekahi himeni hou; ua haiia kekahi mau manao. Hoike ke Kiaaina i kona manao o ka puali inu wai kekahi kumu o ke ku kaawale ana o keia aupuni, hoike oia i kona olioli i ka ike ana i keia puali wai ma Waialua nei, a pau ia, ku ae la o Laanui. Hooikaika aku la i na mea a pau e hoomakaukau e halawai me ke Akua, ke heaia mamua ae o ka hoopau ana o keia makahiki. Pau na olelo me ka himeni hou ana ame ka lua o na pule. Puka aku la ka mea ia ia ka hae, a hahai aku la ka poe puali wai mahope o ka hae, a pela lakou i poai ai a hiki hou ma ke alo o ka luakini. Ahaaina pu iho la na’lii a me na misionari, na kumu kula, na haumana a me ko lakou mau makua he nui wale. He ahaaina olioli no ia. E lilo io i mea e mahuahua ai ka pono ma Waialua nei. Eia kekahi himeni i hoomakaukauia, aole nae i himeni. 1 Aole au e inu I na mea e ona ai, I ka rama, waina, awa, Ke hoopailua nae. 2 Aole au e launa Ma kahi e kuai, I na mea e hoowale, O punihei a mai. 3 Aole au e pili, Me kanaka walea, E hele hewa wale, 0 like ka nanea.

4 Owau me ko ka pono, E mau ka noho pu, Me lakou no e launa, Me lakou mau e ku. 5 I ka wa e ola ana I ka wa e make ai, . Me ko Iesu pono, E kau mau kuu hae. Na J. Haalou