Ka Elele, Volume 1, Number 24, 3 March 1846 — NO NA MEA KULEANA AINA A PAU MA KO HAWAII PAE AINA. [ARTICLE]

NO NA MEA KULEANA AINA A PAU MA KO HAWAII PAE AINA.

Ua hoonoho mai ka Moi ke Alii ia makou i Poe Luna nana e hookolokolo, a hooko, a hoole i na kuleana aina i hookumuia mamua o ka la 10 o Dekemaba, M. H. 1845. E haawiia ma ke ano alodio na palapala sila nui, a i ole ia na palapala hoolimalima no na makahiki, e haawiia keia mau mea mamuli o ko makou hoakaka ana, e like me na mea e hoikeia mai ia makou. He halawai hebedoma ko ka Poe Luna ma ka Hale Kauila ma Honolulu e hoolohe i ka na mea hoopii, a me ko lakou kokua paha, i mea e akaka’i ko lakou kuleana, a ua makaukau makou i kela la i keia la e lawe ma ka palapala i ka lakou olelo koi, a me na mea e ikea ai ke kuleana, na mea hoi a na hoopii e manao ai e hoike ma ka Hale Kauila ma Honolulu, iwaena o ka hora eiwa o kakahiaka, a me ke kolu o ke ahiahi. Ua nonoiia’ku na kanaka a pau e hoike mai ia makou i na Luna, i ka olelo hoakaka i ko lakou kuleana aina, a hoike mai hoi i ke kumu o ko lakou koi ana i kela kuleana aina, ma Hawaii nei, e hana hoi mamua o na makahiki elua, mai keia la aku, a i ole lakou e hana pela, mahope iho o ia manawa, alaila, ua hoonele loa ia lakou, aole loaa ia lakou na kuleana ma na Ahahookolokolo no ka pono. Kakauia i keia la 11 o Feberuari, M. H. 1846. Kakauia na inoa, WILLIAM RICHARDS. JOHN RICORD. J. Y. KANEHOA. IOANE II. Z. KAAUWAI.