Ka Elele, Volume 1, Number 24, 3 March 1846 — NO KE KAUOHA A KE ALII. OLELO AO A KA MEA KIEKIE KE KUHINANUI. [ARTICLE]

NO KE KAUOHA A KE ALII. OLELO AO A KA MEA KIEKIE KE KUHINANUI.

Hale Alii, Honolulu, Oahu, Feb. 26, 1846. Owau ke Kuhina o ke Aupuni, ke hoakaka’ku nei au i ka mea e malu ai ka noho ana o na haole a pau, a me na kanaka maoli ma na wahi a pau o keia Pae Aina. 1. Aole e lawe na haole i ka pu a me ka pahi, a me ka laau, ma ke ano hooweliweli, a me ke pale aku i ke keakeaia mai. 2. Aole e lawe na kanaka maoli i ka pu a me ka pahi, a me ka laau, ma ke ano hooweliweli, a me ke pale aku i ke keakeaia mai. 3. E noho like na haole, a me na kanaka maoli, malalo iho o ka malu o ke Kawai, no ka mea, o ke Kiaaina ka mea nana e hooweliweli, a me ke pale aku i ke keakeaia mai. 4. Ke hoakaka aku nei au i na mea a pau, ua hoopaiia o Hulipahu (o Torbert)

laua o Amara, (o Farbush) e like me ke Kanawai no ka pepehi ana ia Aki, ua uku mai laua a ua pau, ua like keia uku ana me ke Kanawai. Elua kanaka maoli i pepehi i ka haole i ka wa mamua, a o ka hoopai ana ia laua, ua like me keia hana ana ia Hulipahu ma, a ua pono ia, no ka mea, oia ke Kanawai i kauia i ka makahiki 1835, Pauku akahi, “o ka mea pepehi kanaka me ka huhu, aole nae i manao e make, a make ia, e paa oia i ka hao i eha makahiki a ma ka Pauku ehiku. 5. Ke olelo aku nei au i na mea a pau, mai hoopaapaa oukou, mai nuku, mai hakaka, aka, e noho malie no malalo o ka malu nui i oleloia maluna, oia hoi ke Kanawai. A pela hoi ka manao o ka Moi. Na’u, Na KEONI ANA. Na ke Akua e hoola mai i ka Moi!