Ka Elele, Volume 1, Number 21, 13 January 1846 — KA MAKE ANA O PUAPUA. [ARTICLE]

KA MAKE ANA O PUAPUA.

Kulihi, Oulm, Dek. 28, 1845. Ua make iho nei o Puapua i ka la 7 o Dekemaba nei; i ka wanaao kona make ana. He haumana oia no ke Kulanui o Lahainaluna i Maui. Hoi mai oia ma Oahu nei e noho kumu, a mahope, lilo oia i Lunaauhau ma Wuialua. A mahope mai, hoopauia kona noho luna ana malaila, a noho iho la oia ma na hana hiki pono ia ia ke hana. Eia ka’u Imau hana i ike ia ia e hana ana, kamena, hahau hale, hamo hala, a me kekahi mau hana e ae no hoi he nui. : Aole au i ike pono i kona noho hai[pule ana ma Oahu nei; ua ike paha oukou. Na J. L. Nailiili.

He mea kaumaha, a ine ka weliweli ka hopena o Puapua; ua ao nui ia oia i ka olelo a ke Akua; eha ona mau makahiki ma ke Kulanui; ua lilo oia i hoahanau, a ua hoohiki oia ia Iehova, o kona Akua ia, a me kona ola; ua paipaiia e ka Uhane Hemolele; a mahope iho, lilo aku o Puapua mamuli o ka hoowalewale o keia ao, a haule mawaho o ka ekalesia, a okiia no hoi, a hooliloia no Satana; o kona haalele loa no ia i ko ke Akua mau aoao, a noho Akua ole. I kona mai hope loa, oia hoi kona mai i make ai, aole lana kona manao ia Iesu, ka Hoola oiaio; huli oia i na akua wahahee, a malaila kona manao a make. Pela ka lohe ika mea ike. Auwe ka hopena o keia haumana o ke Kulanui! keia hoahanau poino! Ma ka nana’ku ia ia, i kona wa i lilo ai i Lunaauhau ma Waialua, komo ka naau hookiekie iloko ona, o ke kuma no ia o kona haule ana. O ka mea e manao ana e kupaa, e ao o hina.