Ka Elele, Volume 1, Number 10, 12 ʻAukake 1845 — NO NA HAOLE. [ARTICLE]

NO NA HAOLE.

Ua akaka ma na kuikahi e maopopo ai ke kuokoa o keia aupuni, e hiki no i na haole ke komo mai a noho ma keia pae aina. E hiki no hoi i na haole hoohiki, a me na haole hoohiki ole ke noho loa ma keia pae aina, ke malama lakou i na kanawai. Aole pono ke hookuke aku ia lakou me ko lakou hewa ole. Aia

hana i ka hewa nui a kupono i ka lele i ka aina e, alaila kipaku. E hiki no i na haole e noho ana ma keia pae aina, ke hoohihia i keia aupuni me na aupuni kahi a lakou i hele mai ai. E hana auanei lakou pela, e like me mamua, ke like ole ka hookolokolo ana maanei, me ko na aina naauao. Nolaila, eia wale no ka poe ku imua o keia poe haole, a paio me lakou, o ka poe ike i ka lakou olelo me ke ano o ko lakou noho ana, ka poe ike i ka pono a me na kanawai o na aina a pau. Ua ku i ke aloha a me ka lokomaikai ka hana a na misionari, aole nae hiki ia lakou keia mau mea. Ua aoia e lakou na kumu mua o ka naauao e keia poe lokomaikai, a o ko lakou ao ana, he mea ia e makaukau ai na lii e hana i ka lakou hana ma kekahi mau mea iwaena o na kanaka maoli, aole nae hiki aku ko lakou ao ana, i na mea aupuni. E hiki no i na lii maoli ke hooponopono i na kanaka maoli me ke kokua ole mai o na haole. O ka hana a keia aupuni iwaena o na kanaka maoli, e hiki no ia i na luna Hawaii; kakaikahi ko lakou kii ana mai i na haole o ke aupuni e kokua ia lakou, ke hihia ole ka lakou hana i na haole no na aina e, a i na aupuni e aku paha. Nolaila mai ka pilikia o na luna. Ina i maopopo ole keia mau mea i na kanaka o Hawaii nei; a ike ole hoi lakou i ka hana ana a ke aupuni, ma keia mau mea, o ka poino no ia o ke aupuni. W.