Ke Alakai O Hawaii, Volume I, Number 52, 22 ʻOkakopa 1887 — HAEHAE KA MANU KE ALE NEI KA WAI! [ARTICLE]

HAEHAE KA MANU KE ALE NEI KA WAI!

POHA KE AU KE PII NEI KA LENA!! E Kane wawahi lani E Kane huli honua E Kumukanikekaaka E Kumuhoua i ka hookui E kumuhonua i ka halawai E Hawaii nui kuauli E Maui nui kuapuu E Molokai i ke kui laau E Oahu o Kakuhihewa lae nui E ka onohi o na kai E Kauai o Manokalanipo, E ke ao opua o Koolau E ka la hiki, e ka la kau Hulihia iho i Manua Papau he aa ko ka hale. Ahuwale ka noa a ka aoao hoomae mae Aupuni. E ka lahui mai ka la hiki a ka la kau, e nana mai a e ike iho, o na Luna Auhau a puka aku, no ia pohai wale no. Kai no paha he oiaio na manao pili Aupuni e kalahea ana, aole e hooili hou ia he ukana maluna o ka mea i loaa mua kahi apana berena, aia i ka mea apana berena ole. E kali aku a hoea mai ka oiaio. Eia no nae ke hohono mai nei, na hoohune noi oihana imua o Kuhina, me ka helu pu aku, "he $500 ko'u lilo o ka hooikaika ana ia mea i lunamakaainana no ka aoao hoomaemae Aupuni." I keia leo no o ka ae mai la no ia o Kuhina. Like no la me ke au o Kipikona ka nana i na hoa o ka pohai hookahi; a he oi loa aku no nae paha keia. Ke pii aku nei no ka hana a ua poe Kuhina nei i na lunakanawai malalo o ka Aha Kiekie, e olokaa ae i ka L. K. o Makawao, Hana, Koolau, a pela aku. E ko ana no ia manao o na Kuhina; ua hookahi ka hoi umauma. E Hawaii hiwahiwa kuu home i ka iuiu; e ka onohi o na kai, eia au he La e hoike ana i ka malamalama i ke ao holookoa no kou kulana e Hawaii, e apa ia nei e keia poe. E ao kanaka mai e Kalani; e hoopono ka helena i ka uka o Puna. O ka ino o kekahi la ua nui ia nona iho - E komo pu ana me ka pilikia o ka lahui, a na ka Haku e hoomaha mai ia kakou, a e holoi ae i na waimaka o ka luuluu a me ke kaumaha. Ke nana aku iloko o na lala o kela Komite 18 o ka la 30 o Iune, aole loa e ike ia he kanaka ili ulaula Hawaii ponoi kekahi iloko e ia 13, he poe kanaka ili keokeo wale no o ka pohai like e hana nei. Eia nae ka mea kupanaha, ua onou aku nei keia poe imua o ua nupepa o Amerika Huipuia, mamuli o na ninau ia mai. na na Hawaii ili ulaula ponoi

no i hoala kela hana o ka la 30 o Iune. He mea maopopo ke [ ] hope nei lakou me he Bea keokeo la, a ke makau nei me ka hopohopo, no ka hiki mai o ko lakou hopena. Aole i ana ka inaina o keia pohai i ka pau ana o Kipikona, aka he mea aku no i koe a ke ko ia mea, o ka lea no ia o kulou a lakou, ua lai ka noho ana aohe mea nana e hoonioni. Imua i ka Hale Ahaolelo. E makaala e ka lahui no ke kau kuikawa o noho mai, a ilaila aku ke kanaho ana i koe. E waiho aku i keia mau apana hana nui o ke K. K. e hooponoponoia 1 O ka mana hooko; e hoihoi ia i ka Moi, a e hoopau i ko na Kuhina a me ko ka Ahaolelo mana. Pauku 31 a me 48. 2 E hoopau i ke koho alii ana o ka lahui, a na ka moi no e koho na alii, e like ka nui me ia ma ka Pauku 35 o ke K. K. 3 E hoopau loa i ke koho akea ana o na malihini, a ma na palapala hookupa ka pono. 4 E hoopaa loa ia na aina Leialii no ka hanohano o ka Nohoalii o Hawaii, aole e lilo i aina aupuni. 5 E noonoo akahele ia ka hoemi ana i ka Bila Haawina o 1888 - 90. E pani paa loa ia ka Hoopae Limahana no eha makahiki. 7 Na ka Hale Ahaolelo e hoonoho i na luna aupuni malalo o na Kuhina a me ka Aha Kiekie. 8 E kuu akea ia ka lapaau ana i na mai lepera ma Kalawao a me Kakaako, i na mea a pau e hiki ana ke hoola. 9 No ke ola oka lahui. Ka Puuhonua o Hawaii. Ma kela la uluaoa o ka aina, ua maopopo aohe puuhonua e ae nana i malama ia Hawaii, o Iehova ke Akua wale no, ma o ka pule la a na haipule. E mau ka ea o ka aina i ka pono. Oiaio! Oiaio! Oiaio a mau loa!