Ke Au Okoa, Volume VII, Number 41, 25 January 1872 — Page 1

KE AU OKOA.

BUKE VII----HELU 41.» HONOLULU, TAREDE, IANUARI 25, 1872. «$2.00 NO KA MAK.

 

"KE AU OKOA."

E HOOPUKA MAU IA'NA I

KELA POAHA KEIA POAHA,

MA KA

HORA EWALU O KAKAHIAKA.

ELUA DALA NO KA MAKAHIKI hookahi, he kanalimakumamalua nupepa ia. E uku e ia ke DALA HOOKAHI no ka hapalua makahiki mua, iloko o na mahina mua eono; a pela hoi ka lua o ke dala, e uku e ia iloko o ka hapa hope o ka makahiki.

 

 

Kuu Lei Lilia.

 

LEO MELE  - Lordly! Lordly! Swell.

 

Oi ala kuu Lei Lilia,

            O nei ano ahiahi,

He nanahe ke pili ia,

            Me ka la lii lahilahi.

 

Oia ala ka'u kaunu,

            I ke kai wa malino,

He welo na ka hae kalaumu,

            E kohu ai nei kino.

 

A he wai kapi i ka pali,

            Wai kili huna a ka manu,

Na ka iwi polena i hali,

            Wai laahia o ka hanu.

 

E ke anu koni nei,

            E ka hau kololio,

O wau ka i punihei,

            I ka ia la hokio.

 

Auhea wale ana oe,

            Ke oho maiewa o ka palai,

Ua pulu i ka ua noe,

            Ke luhe nei la i ka wai.

 

He iniki olu ka ia 'la,

            E lokuloku i ka ili,

He meheu no ka io, a mala,

            Lehiwa wale hoi ke pili.

 

Nawai oi ala e piliwi,

            He kale na ka ale loa,

He popo kaulua na kiwi,

            He uli na ka heepuloa.

 

E hoi no au e pili,

            Me ka lai o ke kaona,

I wai kilihe i ka ili,

            Ka wahine o Kaiona.

(He inoa no LELEIOHOKU.)                        FIGGS.

 

KA MOOOLELO

O

FEREDERIKA KA NUI!

Ka Moi Kaulalna o Geremania.

HELU 14.

Ia manawa kakau aku la ua kanaka opiopio nei o Katte i kekahi palapala noi hoopii i ka moi, penei:          

            "E ka Makua:-Aole no ko'u imi ana e hoapono ia'u iho ke kumu o ko'u kakau ana aku i keia palapala ia oe e ka moi. Aka, ua konoia mai au e ka manao mihi maoli a me ke kaumaha ana o ka naau no ka'u mau mea i hana ai, na mea nui nana i kono mai ia'u e koi aku i kou ahonui e ke'lii, a me ka pule ana aku e hookaia kau wahi noonoo ana ou no ko'u mau la opiopio.

            "Aohe he mea mau i ke Akua ka uhai ana mahope o kona hoopai ana i ka poe hewa, e huli mai ai lakou i kona pono; aka, he mea mau loa me kona ahonui, e hoihoi hou mai ai oia i ka pono i ka poe i auwaha aku. A aole anei oe e ke 'lii, ka makua na kou ano like me ke Akua, e hiki ke kala mai i ka hana hewa ana a me ka hoolohe ole o kau kauwa opio hana hewa nei i kona noi? O ka manaolana no kou kala ana mai ka mea hookahi nana e kakoo mai nei i ko'u ola ana, a ke paulele nei hoi au ia'u iho, aole paha oe e mu'o aku ana i ka liko o ko'u mau la opiopio, aka, e hookuu mai ia'u e hoao i ka hopena o kou ahonui ana mai.

            E ka Makua, ke mihi maoli aku nei au imua ou, ua hana hewa au i ka lani, ka honua a imua ou. Aole anei oe e ke 'lii e kala mai ia'u no ko'u mau hewa, he mea a ke Akua e hoonele ole ai i ka haawi ana i ka mea hewa nui loa o keia honua i mihi maoli aku me kona naau a pau i kona mau hewa? E makaukau mau no au i na manawa a pau loa e hookahe i ke kulu koko hope i mea e hooiaio aku ai no kau mau hana ahonui i hoala mai ai iloko o'u."

            O kana noi, a me na pule a kona mau pilikana a me na hoa'loha, ua lilo ia i mau mea lapuwale i ka manao o ke moi.  Ma ke ahiahi Sabati i ua kanaka opiopio nei e hilinai ana no kalaia mai e ke 'lii, aia hoi, ua hoohikilele ia mai la kona hauli i ke komo ana mai o kahi luna koa, me ka i ana mai i kii mai la oia e lawe iaia, ua makaukau ke kaa aia ma ka ipuka o kona halepaahao, e lawe aku ai iaia i ka papu o Custrin he mau mile aku ke kaawale. No kahi manawa, ua hoopihaia ua kanaka opiopio nei me na manao pihoihoi nui, aka, houluulu mai la no oia i kona mau manao koa.

            He mea oiaio no, aole paha puuwai e hooneleia i ka ha'i malule ana ma keia lono kaumaha e kii mai ana iaia e ako ae i ka liko opuu o kona mau la opiopio, oiai, iloko o ka oluolu maikai o kona ola, a i hoopuniia me na mea a pau loa e hoohauoli ponoia ai ka puuwai koa opiopio. He elua mau alii koa a me ke kahunapule na mea e ukali pu me ia i kona manawa i laweia aku ai i ka amana ona e pepehiia ai. Ua aumoe ko lakou holo ana aku, a o na hora mawaena o ia manawa a me ka owehe ana mai o kaiao; a oiai, e o mai ana na kukuna wena o ke alaula kakahiaka, hoohiki aku la lakou i ka halepaahao nona ka papu Custrin, kahi e make ai.

            O na luna koa e hele pu ana me ua o Katte, he mau hoa'loha ponoi nona he mea hiki ole ia laua ke uumi i na mokumokuahua o ko laua mau puuwai no ka manao i ka nana aku i ka pepehi hoomainoino ia o ko lakou hoa'loha. O ke kahunapule Muller, ka mea nana i ukali i ka mea i hoahewaia i Custrin, a me ke kahuna o ia papu koa, ua konoia laua e holo pu maluna o ke kaa make a hiki aku i ka amana. O kekahi mau hoa'loha ponoi ona, haawi aku la oia i kona mau aloha hope loa, me ka i ana aku, "E aloha anei e kuu mau hoa'loha me ka oihana; e noho mau ke Akua me oukou a mau loa aku. " Ua laweia aku la oia iluna o ka pakaua, i hoaahu ia me ka lole ano haulaula i like loa ke ano me koke keiki alii. Ma ke kauoha a ka moi, o ua keiki alii nei kekahi mea i hoaheweia e make, a e kali ana no hoi oia o ka hiki ana mai o kona manawa; ua laweia mai oia ilalo i ka rumi e kupono ana i ka amana, i hiki ai ke konoia aku ia e nana aku me ka ike pono i ka make ana o Katte me ka mainoino.

            I ke komo ana aku o ua keiki alii nei, ua kuu ia iho ilalo ka paku o ke puka aniani; a i ka wa i kapai ia ae ka paku ma kahi aoao, ua ikea aku la ke ku palauli ana mai a ka amana, e ku ponoi mai ana mamua ona me ka eehia nui. Ua hoopihaia na manao o ua keiki alii nei me na manao mokumokuahua. Ua pinepine kona mau hoopuka ana i kona mau manao me ka nahaehae ana o ka puuwai, i ke koi ana aku i ka poe na lakou e pepehi ana ia Katte, "Ma ka inoa o ke Akua, ke noi aku nei au ia oukou e oki i ka pepehi ana, a palapala aku au i ka moi me ke noi ana aku iaia, e haalele no au i ko'u kuleana i ka nohoalii, ina oia e kala mai ana i ka mea e pepehiia ana ia Katte!" Oiai, i ua o Katte e laweia ae ana i ka amana, a maalo ae malalo ponoi iho o ka puka aniani a Fritz e ku nei, kahea aku la oia iaia, "E kuu Kate aloha, e kala mai oe ia'u i tausani manawa! O! penei iho la ka wau e hana aku ai ia oe." Aka, huli ma la o Katte me na maka i piha i ka hauoli, a i mai la, "He mea maikai ka make ana no ke keiki alii a'u i aloha nui loa ai."

            Me ke ano ka'oha i pii aku ai ua o Katte iluna o ka amana. Hoao mai la ka mea nana e pepehi iaia e papalu mai i kona maka, aka ua pale ae la nae kona lima ia mea, a huli aku la i ka lani, me ka i ana aku, "E ka Makua, iloko o kou lima wau e waiho e aku nei i kuu uhane!" Oiai, i ka puana ana a ua o Katte ia mau huaolelo, aia hoi, paa aku la eha mau koa nui ia Fritz me ka hooku aku iaia i ike maka aku i ka pepehiia ana o kona hoa'loha.  A ia manawa hookahi no hoi, i haule iho ai ke koi mai ka hauna hookahi, a kakaa aku la kona poo maluna o ka amana; a ia wa no hoi i haule a maule iho ai ke keiki alii, a i kona pohala ana mai, aia hoi, e kau mai ana mamua ponoi ona ke kino poo ole o kona hoa'loha, a i kona ike ana, haule a maule hou aku la oia. Ua hoomauia ke kau ana o ke kino poo ole maluna o ka amana, a po ia la hooilo pokole; a i ka po ana iho, ua kanuia ke kino maloko o ua papu nei. He keneturia i hala ae nei, ka hanaia ana o keia pepehi kanaka manaonao, aka, he ano makamaka mau na hoomanao ana no ia hana weliweli.

            I ko ke keiki alii Ferederika hoi hou ana mai i kona ano ao kanaka, aia hoi, ua lumai ia aku la oia iloko o ka fiva kaumaha; a mahope iho, ua ano hehena kona mau manao a he pinepine ka hoao ana e hoopoino i kona ola iho. I ke akakuu ana mai o ka fiva, ua oluolu mai oia, a hiolo pinepine mai la na waimaka ma kona mau papalina. Ua pinepine kona haalele a me ka hookii ana i ka ai a me ka inu ana i ka wai, a me he mea la iaia, ua pau loa kona mau hilinai manaolana ana, aole oia e ola hou ana ma keia honua, ua hoopau ia aku ia mau ano manaolana no ka wa pau ole. Aohe ona kanalua iki no ka hooholo poo ia o kona make, a ua aneane e hiki mai ka manawa no kona laweia ana iluna o ka amana.  Iloko o kona mau manawa ano hehena, ua ake nui loa aku oia e hiki koke mai ka make me ka hikiwawe, oiai, ma ka nana ana i na mea a pau loa no na mea i hanaia mai iaia, aohe kumu kupono i koe o ke ola ana.  Aka, i kekahi noonoo ana no hoi he mea ano weliweli ka make ana iloko o na la opiopio.

            Me he mea la, ma ka nanaina, ua ano punahele maoli ke kahuna Muller i ka moi, no ka mea, ua kauoha hou ia mai la no oia e noho hou no ma ka papu Custrin, a e kamailio mau me ke keiki alii, me ke ao aku iaia no na mea e pili ana i ka hoomana.  Ma ka nana ana aku i ke ano o ka moi, he kanaka hookohukohu hoomana oia. Oiai, oia e hoomainoino ana i ke kino a me ka manao o ke keiki alii, ua hoike mai nae oia i ke ake nui e hoola ia kona uhane. Aole no he mea kupaianaha, o keia ano hookamani me ka hooko ole o ka makuakane, he kumu ia e hookunewanewa mai ai i ka manao o ke keiki. O ua keiki nei, me he mea la ma keia mau ano mao ole o na hoopoinoia maluna ona, ua lilo mai oia i kanaka opiopio hoomaloka. Ua kue nui ka Baibala ia mea, a ina e mihi ole ia ma keia ao, alaila, e loaa no ka hoopai ana ma kela ao. O ke ola hoomaloka ana a me ka manaoio Karistiano oiaio, aole o hiki ke ola pu iloko o ka maluhia hookahi; e pono e kohoia kahi a e haaleleia kekahi. Ua koho ke keiki alii Ferederika e haalele i ka manaoio Karistiano.

            O kekahi hana nui a ua kahuna Muller nei i hoounaia ai i ka papu Custrin, oia no ka hoohuli ana mai i ka manao o ke keiki alii mahope o ke ano Karistiano. Ma ka la 3 o Novemaba o ka 1730, ua palapala aku ka moi ia Muller, penei:-

            "Ua hoike ia mai au he kahuna haipule maikai oe no ka olelo a ke Akua. Oiai, ke hele la oe i Custrin i ke kauia ana maluna o ka amana o Lutanela Katte, nolaila, mahope iho o kona make ana, e kipa ae e hoohuli mai i na manao o ke keiki alii, me ka hahai pu aku iaia, o ka mea haalele i ke Akua, e haalele mai no ke Akua iaia; a i ka manawa o ke Akua e haalele mai ai i ke kanaka, alaila, aohe mau mea pono, aka, he mau mea hewa wale no ka ke kanaka e hana ai. E noi aku oe iaia e mihi i kona mau hewa, a e noi mai i ke kalaia no na hewa he nui wale ana i hana ai, a me ke kai pu ana i kahi poe e ae e hana hewa pu me ia, a o ka hoopai ana hoi ia e kau nei maluna o kahi o ka poe ana i hoowalewale ai. Ina, e huli mai ke keiki alii, alaila, e haule pu iho oia me oe ma na kuli, e noi aku ai i ko ke Akua kala ana mai."

            "Aka, ma kou mau hoohuli ana mai ia ia, he mea pono ia oe e hana me ke akahele a me ke akamai loa, no ka mea, he kanaka opiopio maalea loa oia. Ano, ke manaolana nei au ma kona ano i keia manawa, a me ka make ana o Katte iluna o ka amana, a imua ponoi o kona mau maka, he mau kumu paha ia e hoopaluhe mai ai i ka paakiki kupono ole o kona naau, a e alakai ae ai ia ia ma na manao maikai; ke kauoha aku nei au ia oe, e like me kou manao ana i kou lunaikehala ponoi iho."

            O keia palapala, ua kakauinoa ponoi ia no e ka Moi; a oiai, aole oia i hoopuka ae i kona manao e hoopakele i ke ola o kana keiki, a me he mea la e hooko io ana no paha oia i ka lawe ana i ke ola o kana keiki; aka, ua hoopilikia ia nae oia iloko o ia mau la koke no ma ka hiki ana mai a na palapala a na aloalii o Europa, e koi mai ana ia ia, aole he mea pono i ka Moi o Perusia ma kona alii, a kahi mana hoi o Europa, ke haawi i kahi olelo hooholo e hoomake ai i kana keiki a ma ke ano hooilina alii o ua keiki alii la he kuleana ko na mana o Europa, e keakea ai no kona ola.

            He ehiku la mamua ae o ko ka moi kakau ana i ka palapala e kau ae la maluna, aia hoi palapala mai la o Kale IV, ka Emepera o Geremania me kona lima ponoi e keakea mai ana i ke ola o ke keiki alii. Ua palapala pu mai la no hoi ka emepera i kona kuhina ia Seckandorf, e keakea aku oia me kona mana a pau. Ua hoike mai la ka Emepera Kale o Geremania, oiai, o Ferderika he keiki alii oia no ka Emepera, a he kupono loa oia ke malama ia malalo o na kanawai o Geremania a o ka hooilina alii o Perusia aia malalo o ka malamaia ana e ke aupuni emepire o Geremania, a ma o ka pono maoli he mea kupono i ka moi o Perusia ka haawi ana i ka mea i hoopaiia a me na palapala a pau e pili ana i kona hihia a ka lima a me ka malama ana o ka Emepera o Geremania. Me he mea la, o ke kumu nui i konoia ai o ka Emepera e hapai i keia mau mea, aole no ke ano aloha wale ma ke ano kanaka : aka ua makemake pu oia ina e holopono kana hoao ana e hoopakele i ke ola o Feredierika, he mea ia e hoopipili mau ai iaia me na pomaikai o ka hale o Auseturia. Ua palapala pu mai kahi mau mana aupuni e ae o Europa.

            I ka manawa mua o ka hiki ana mai a keia mau palapala imua o ka moi o Perusia, ua hoonaukiukiia kona mau manao no ia mau hana keakea. Aohe nae he mea kupono iaia ke hoowahaweha ana i na manao o ka poe aupuni o Europa, aole i hookulana kupono i kona aupuni. Ua huipuia ka huhu a me ka mokumokuahua iloko o ka poli o ka moi. E hahai ana o Kapena Guy Diakens, penei:

            "Aohe e hiki i ka moi o Perusia ke hiamoe. Ua kiai mau na alii koa iaia, e noho pu ana me ia i ka po a ao, a iloko o kona mau hihio ana, ua kamailio a ua ano hehena oia a kamailio no na uhane a me na akaku."

(Aole i pau.)

 

            O NA wahi keiki nana e hooholo na lio heihei o Ewa, ua hoopai ia iho la e ka Lunakanawai he umi dala o kekahi a elima dala o ke kokoolua. O ka olelo hooholo ia a ka Lunakanawai mahope o ke kali ana; - e like me ka makou i hoike mua aku ai.

 

 

No na kumukula.

 

            Aia malalo iho nei ka hailoaa no na palapala hoike a na kumukula ma ka hoike ma Dekemabba M. H. 1871.

            O ka helu 1, oia ka hoailona no ka pololei loa; eia nae aole no he kumukula i hiki aku ilaila:

KA POE I HIKI MAWAENA O KA .6 ME .7

1          S.P. Kahukula,            -           Honolulu

2          S.H. Mahoka,              -           Kohala Ak.

MAWAENA O .5 ME .6

Aole.

MAWAENA O .4 ME .5

1          J.P.Barenaba,              -           Puna

2          J.N. Kapahu,               -           Kau.

3          J. Namomoku,             -             "

4          L.B. Nainoa,               -           Kohala H.

5          E.S. Timoteo,              -           Kohala Ak.

6          S. Haaheo                    -             "         "

7          I. Nakookoo                -           Makawao.

8          T. Puuohau,                 -           Wailuku.

9          P. Kaluna,                   -              "

10        J.W. Keahuawa,          -              "

11        S.M.P. Kaleo,              -              "

12        A. Kalauli,                   -           Honolulu.

13        D.W.P. Kahananui,     -                "

14        J.H. Kanepuu,             -                "

15        B.W. Kekapa              -                "

16        L.K. Halaulani,           -                "

MAWAENA O .3 ME .4

1          K. Unea,                      -           Hilo.

2          J. Kaauakapu,              -           Kau.

3          D.H. Nahinu,              -           Kona Hema.

4          D.K. Maleka               -             "        "

5          J.K. Loha,                   -           Kona Akau.

6          J.K. Paahana,              -           Kohala Ak.

7          J.W. Mahana,              -           Hamakua.

8          J.M. Kealoha               -           Hana.

9          J. Kulailua,                  -           Lahaina.

10        G.H. Keauiaole           -           Wailuku.

11        G. Kekipi                    -           Honolulu.

12        S.K. Kuhano,              -               "

13        J.P.Kanahele               -           Ewa.

14        J.W. Kealakalai,          -           Koolauloa.

15        E.P. Edward,              -           Koolaupoko.

MAWAENA O .2 ME .3

1          Kaikuahine                  -           Puna.

2          D.W. Kaaikauna         -             "

3          G.W. Moo,                  -           Kau.

4          C.K. Apiki,                 -             "

5          C. Kamanu,                 -             "

6          J.W. Kahalewai,          -           Kona Hema.

7          S.W. Mahanahana,      -             "         "

8          Alapai,                         -             "       Akau.

9          R. Makahalupa,           -             "          "

10        H.N. Kahulu,              -             "          "

11        P. Paniani,                   -           Kohala H.

12        Makia,                         -                "       "

13        S.M. Kekoa,                -                 "     Akau.

14        S. Kapela,                    -                "         "

15        S.W. Kamaka,             -                "         "

16        J.W. Paakaula,             -           Hamakua.

17        T. Kanamu.                 -                "

18        Henry Kamalii,                        -           Hana.

19        L. K. Kamakea,           -              "

20        W.K. Kama,                -              "

21        P. Makaula,                 -              "

22        A. Kala,                       -              "

23        P. Kamaka,                  -              "

24        J. Kaulahea,                 -           Makawao.

25        P. Kealakai,                 -               "

26        H. Elias,                      -           Lahaina.

27        Wahinehokai,              -               "

28        J.W. Kapohaku,          -               "

29        M. Kane,                     -           Molokai.

30        D. Kaailau,                  -               "

31        J.N. Kaailau,               -               "

32        D.M. Kalauli,              -           Honolulu

33        S. Kaili,                       -                 "

34        S.P. Kumalaa,             -                 "

35        K. Lapilio,                   -                 "

36        S.M. Ciritina,              -                 "

37        Emalia Kalauli,            -                 "

38        Mere Poli,                    -                 "

39        J.W. Kamakea,            -                 "

40        H. Koaihulukea,          -                 "

41        B.W. Kekuinae,          -                 "

42        F. Pomaikai,                -           Ewa.

43        J.M. Kamakahonu,      -             "

44        Kahulukuai,                 -             "

45        J. Kea,                         -           Koolaupoko.

46        J.M. Akona,                -                 "

47        H. Kuku,                     -                 "

48        W.A. Kahikina,           -                 "

49        P.W. Kaawa,               -                 "

50        A.K. Mika,                  -           Koloa.

MAWAENA O .1 ME .2

1          S. Kalepa,                    -           Hilo.

2          Noa,                            -             "

3          J.D. Opunui,                -           Puna

4          G.W. Kaluahine,         -             "

5          B. Manoa,                   -             "

6          J.K. Kanakanui,          -           Kau.

7          Keaweheana,               -             "

8          E.M. Kalaikoa,            -             "

9          John Keawe,               -           Kona Hema.

10        J.E. Keawehawaii,      -                 "   "

11        G.H. Kalaukoa,           -                 "   "

12        D.K. Kuapali,              -                 "   "

13        G.W. Kini,                  -                 "   "

14        W.H. Keliiaihue,         -                 "   "

15        J. Kanakaole,               -                 "  Akau.

16        Tipora,                         -                 "    "

17        J.W. Keliihuluhulu,     -           Kona Akau.

18        S. Kane,                      -                 "    "

19        S.H.P. Kalawaia,         -                 "    "

20        Keliinohola,                 -           Kohala H.

21        Iosepa,                         -                 "     "

22        J.W.A. Keoni,             -                 "     "

23        J.W. Kapiko,               -                 "  Akau.

24        H.K. Kanealai,                        -                 "     "

25        Lui,                              -                 "     "

26        J. Waiohinu,                -           Hamakua.

27        S.W. Kahoopii,           -                 "

28        K. Pila,                        -           Hana.

29        J.M. Kamakahole,       -               "

30        D. Kahaokamoku,       -               "

31        S. Kamaukoli,             -               "

32        T. Hoomaha,               -           Makawao.

33        H. Kaaiopio,                -                 "

34        S. Kuewa,                   -                 "

35        B.W. Kepaa,               -                 "

36        S.W. Kaleikau,            -           Wailuku.

37        S.W. Mokuiki,             -                 "

38        S.E. Kahu,                   -                 "

39        D.H. Hakuole,             -           Lahaina.

40        L. Naauao,                  -           Molokai.

41        D.W. Kapiioho,           -                 "

42        S. Kamokuiki,             -           Honolulu.

43        M. Kahuna,                 -                 "

44        Pele,                            -                 "

45        J. Hao,                         -                 "

46        J.B. Kaula,                  -           Waianae.

47        L.A. Kaawa,               -           Koolaupoko.

48        J. Kaaia,                      -                 "

49        J.P. Kanuikino,            -           Waimea, K.

50        J. Kauai,                      -                 "

51        W.H. Pukalo,              -           Lihue.

52        J.M. Kaakau,               -           Koloa.

53        A.W. Maioho,             -                 "

54        S. Uza,                                    -           Hanalei

55        Z. Seta,                        -                 "

56        E.W. Hairama,                        -                 "

MALOKO O KA .1

1          J.W. Kane,                  -           Hilo.

2          P. Kumalae,                 -             "

3          Kaluna,                        -             "

4          S. Wahine,                   -           Puna

5          W.R. Naia,                  -            

6          J.W. Kanekoa,             -             "

7          Kapuanu,                     -           Kau.

8          S.W. Ekekiela,                        -           Kona Hema.

9          D.S. Kaui,                   -              "      "

10        W. Kapaona,               -           Kohala Ak.

11        Zebedaio,                    -                 "     "

12        D. Palau,                     -           Hamakua.

13        L. Kaiwi,                     -           Wailuku.

14        D. Holualoa,                -                 "

15        J.D. Keamo                 -                 "

16        D.W Kauwa,               -                 "

17        J. Kowelau,                 -           Makawao.

18        D. Napela,                   -           Molokai.

19        D.W. Kaupena,           -                 "

20        Z. Pali,                         -                 "

21        Pililua,                         -           Honolulu.

22        Ikuwa,                         -           Waimea, K.

23        L. Kahuakai,               -                 "

24        J.N. Palaile,                 -                 "

25        H.H. Kahananui,         -                 "

26        H. Kahele,                   -           Lihue.

27        D.L. Nuanua,              -           Hanalei.

28        J. Kaia,                        -                 "

KA POE I NELE LOA.

1          S.S. Kahou,                 -           Kohala Hem.

2          G.B. Meheula,             -           Lihue, Kauai

 

 

No Thiers a me ka poe Alii ake Moi o Farani.

 

            Nani wale na haule ana o ka poe nui! Ma ka haule ana o ke Aupuni Emepire o Farani, ua hele mai na keiki a na 'lii e noi i ke kamailio pu ana me ke keiki a ka makainana, a ua kaohiia mai ia mau noi ana, ana a loaa ka wa kupono ia Thiers, ke keiki a na makaainana. He mea maopopo, ua ano haahaa ke ano noho'ana alii ma Farani. Aia no he mau manawa a ka paresidena Thiers i ake nui ai e lilo i Kuhina Nui no ke 'lii nana na keiki e noi hele mai nei imua ona. Aka, ua loli ae ka manawa, oiai, ua lanakila ke keiki a na makaainana maluna o kona mau enemi a pau. O ke kanaka i kaulana ole a i ike ole ia i ka makahiki a me ka hapa i hala e a nei, ua lilo oia i keia manawa i mea mana nui maluna o na mea a pau o Farani.

            O ka poe Bourebona, Imiperiela, Oleana, Repubalikana a me ka poe Comune, ua haule like mai lakou a pau loa imua ona. Mawaena o na mea pau, aia iaia ke koena kaulike o ka mana, a ua hoope wale aku no kela a me keia malalo o kana alakai, oiai, he aho ia mamua ae o ka ike ana aku o kela mea keia mea i ko lakou mau enemi e noho alii ae ana. O ka poe ake i ka noho'na aupuni alii, ua kuemi ko lakou mau manaolana iaia, a o ka poe ohana alii Oleana, oiai, ma ko lakou ike ia Thiers i ka pipili nui me ko lakou ohana, ua komo iloko o lakou na manaolana, e hoi hou aku ana lakou i ka noho mana ana. O ua poe alii Oleana nei i kohoia mai i ka Ahaolelo mai kahi mau Apana mai, a i keakeaia ka lawe ana i ko lakou mau noho, ua manao iho la lakou ua hiki mai ka wa kupono loa no lakou e kau ai iluna o ka mana.

            Aka, aia maloko o ka Ahaolelo kahi poe nui e kue ana i ka noho ana maloko o ka Ahaolelo o ua poe alii Oleana nei; a i keia manawa, ua huipu aku o Thiers me ia poe. Ua maopopo, he makemake nui no o Thiers i ka hoomau ana i kona mana maluna o Farani, a aohe ona makemake iki e hookuu aku i kona alii ana no kahi moi a emepera paha. Ua komo iloko ona ka manaoio, ua hoonoho maoli ia mai no oia e hana i kahi mea nui ma ka moolelo o kona aina penei - o ka hapai ana ae i kona aina i ke kiekie nui ku i pono, - a e hoao ana no oia e like me ka mau hiki ia ia o ka noho Paresidena ana maluna o ka Repubalika o Farani. Ina e komo kahi ohana alii Oleana i ka Ahaolelo, e hoohalua no anei lakou no ka lilo ana ia lakou o ka noho ana Paresidena, a ma ia mea, e haule anei kona kulana noho mana ana maluna o Farani a me kona mau hopena.

 

 

KE AU OKOA

KA UKU O  NA

OLELO HOOLAHA.

NA OLELO HOOLAHA - No na lalani he 10, aia hoi 1 iniha, no ka hoopuka hookahi ana, $1 00, alua hoopuka ana, $1 50; ekolu, $1 75;hookahi mahina, $2 00.

 

Aia no ke keena o "KE AU OKOA" ma ka Hale Paipalapala Aupuni, maluna ae o ka Hale Leta.

 

 

Ke Kupanaha o ka hoomanao mawaena o na holoholona.

 

            He mea no i hoomaopopoia ala  no mawaena o na holoholona he mau hooiaio kupono no ko lakou mau hoomanao ana. E laa me ka lio, ina o kahi a lakou i hoopuiwaia ai e kahi mea, aole no lakou e hoopoina ana no kahi mau manawa loihi mahope mai. Aia i kekahi alii koa Pelekane ma Inia kekahi lio hoomanao kupaianaha. O ua alii koa nei he kanaka nui a kaumaha, a o ua nei he hookananuha i ka lawe ana i ka haawe kaumaha e like me ia maluna o kona kua; a he mea mau ia ia ke hoomaka ke kau ana o ua alii koa nei, e moe ana oia ilalo. No keia hana mau a ua lio nei kuai aku la oia a lilo i kahi poe ma kahi mamao aku. He ekolu a eha paha makahiki mahope mai, ua loaa i ua kenela nei ka hele ana aku ma kau wahi mamao aku e paikau ai i na koa malaila. Ua laweia mai la kekahi lio, a i kona hoomaka ana ae e kau, ua hoomaka iho la ka moe ana ilalo; a i ka hoomaopopo ia ana o kahi i loaa mai ai o ua lio nei, ua ikea iho la o ua lio mua nei no ia ona.

            Ua hahai mai kekahi haole Farani i kekahi moolelo e pili ana i kekahi holoholona i manaoia, ua nele loa oia i na noonoo a hoomanao ana - oia hoi ka ilio hae. Ua hoike pu mai no i ke ano hoolohe a pipili loa i kekahi. Ua hanai maikai ia oia e na kanaka Farani nei, a ma ia mea i pipili nui loa ai ua ilio hae nei ia ia, a he ano pono ole ua ilio nei, ina e nalowale kona kahu ma kau mau wahi okoa e aku. No ke konoia ana o ua kahi nei e haalele i kona home, no kahi mau wahi e aku ua hoihoi ia ua ilio nei iloko o kekahi hale hanai holoholona. I ka hookomo ia ana aku o ua ilio hae nei iloko olaila, aohe ai i ka ai ke haawiia aku, a no ke ano maa iho paha, ua ano laka iki. He mau makahiki loihi mahope iho, a i ua kahu nei i hoi mai ai i Parisa, a e hoomaka aku ana oia e komo i kona hotele, aia hoi, paa ana o hope o kona kuka i ua ilio nei, a i ka nana ana iho, o kana mea no i hanai ai. Ua hoihoi hou ua kahu nei i ka hale holoholona, a mai kona wa i komo alua ai, aole oia i ai hou i ka ai, a hiki wale i kona wa i make ai.

            Ua lehulehu wale na moolelo e pili ana i ka hoopili a me ka hoomanao mau ana o na elepani i ko lakou mau kahu.  E hahai ana kekahi kanaka kaahele Pelekani ma Inia i kekahi moolelo pokole no kekahi Elepani. Ia ia e hele ana ma kahi huakai kaahele me na ukana i hooukaia maluna o na elepani a me kela mea keia mea e pono ai ka hele ana o ka huakai hele. O kekahi o ua mau elepani nei, ua kapaia kona inoa o Muaaogula, a i ko lakou hiki ana mai ma keia wahi e honi aku ai i ka meheu o ke tiga, aia hoi, ua holo pukaka ino aku la ia iloko o ka ululaau, a mai make ke ola o kona haku, ina, aole e lalama ae oia a pili iluna o kahi lala laau. Ua hoaoia aku la ka hopuia ana o ua elepani nei, aohe nae he loaa iki, a hele aku la no ua huakai la me ka haalele ana i ua elepani la.  He elua makahiki mahope mai, ho-a ia mai la kekahi puulu elepani ahiu iloko o kekahi pa, a i ka lohe ana mai o ua elepani nei i ka leo o kona kahu mamua, ua hele mai la oia i ka lohe ana i ka leo o kona kahu; a i ke kauoha ia ana aku e moe iho ilalo, ua moe malie iho la oia, a ua hoolohe i na kauoha a pau loa.

            O ka moolelo no na ilio, ua lehulehu wale lakou, a ua kaulana no hoi ka lakou mau hana hoopakele. O ka poe kaahele ma Sekotia, ua hoopuka mai lakou i ka mumulu mau o na ilio a na kahuhipa a me kahi poe e ae, ke hiki aku i na la Sabati. O ka mea nui nae i hoomaopopoia, ua oi aku ka makaala ana o na ilio i ka hele ana i ka pele mamua ae o na haku o lakou. Me he mea la, oiai, i ko lakou manawa e komo ai ma ka luakini, ua huipu mai paha me kahi ilio komohewa, a ua nui ka haunaele ma ka luakini, a ua kauoha mai ke kahunapule i na kahu e malama i na ilio i kauhale. Ua hiki no ia no ka la Sabati mea, aka, mahope mai, mamua ae o ke ala ana o na haku, ua pau mua e ua kau ilio nei i ka luakini, aole e loaa ana i ke kahu hipa, a i ole ia i ke kanaka mahiai ma kauhale; ua piha mua o ke kahua luakini i na ilio.

            Ua nui wale no na mea e ae, e hoola mai ana, aia iloko o kela a me keia ano holoholona he mau hoomanao kupaianaha ana no kekahi e hookahaha mai ai i na manao kanaka.