Ke Au Okoa, Volume VI, Number 43, 9 Pepeluali 1871 — Ka huakai makaikai a ka Moiwahine i ka mauna kaulana o Alakai. [ARTICLE]

Ka huakai makaikai a ka Moiwahine i ka mauna kaulana o Alakai.

E ke Au Okoa e ; —Aloha ot: Ma na hora mahana o ka hapa mua o ka Poakahi iho nei, ua hoomaka ka huakai pii makaikai a ka Moiwahine i ka mauna kaulana o Alakai, o kana huakai no a pau loa kai pii a me kekahi poe kamaaina i oi mamua o ke kanalima. Ua kono ia wau e pii pu, a me I. H. Kapuniai, a me Rev. A. Kaukau, aka, no ka makau i ke anu a no ka hoomakaukau ana hoi kekahi i na mea e lako ai ka ahaaina a na makaainana e paina pu ai me ua'lii la ke hoi mai, mai ka mauna. A mamua o ko'u hoouna ana aku i keia palapala, ua makaukau ka lako ahaaina ilianu o ka Moiwahine a e ahaaina ana ma keia Poaono. O G. W. Lilikalani, Lunakanawai o Koloa ame J. Kauai, Lunakanawai o Waimea nei na hoa ukali o ka Moiwahine ma ia pii ana. Ma ka po aao ae Poalua, ma Waineki ka hiamoe ana o ka huakai, a ma ka po Poalua ao ae ai ma ka naele ponoi o Aipo ka moe ana, a ma ia po, ua uhi ia mai lakou e ka noe, a e kulu liilii mai ana ka uaawa, he keu ke anu a me ke koekoe, aole ka i hiamoe iki ia ua po nei e ka huakai a ao, aohe no hoi e hiki ke ho-a i ahi, no ka mea, ua nele olaila i ka laau maloo ole, a ina e hele mai kela ua noe me ka makani ikaika, i na la ua make kekahi poe i ke anu, no ka mea, i kela ua liilii no ka, me he mea la, ua hookomo ia na aahu i ka wai nui, aohe wahi pulu ole Ke paa nei makou i ka Moiwahine a hala ae na la makapehu alii. S. K. Kuapuu. Waimea, Ian 27, 1871.