Ke Au Okoa, Volume VI, Number 41, 26 Ianuali 1871 — Ka Huakai Makaikai a ka Moiwahine i ka Mokupuni o lalo. [ARTICLE]

Ka Huakai Makaikai a ka Moiwahine i ka Mokupuni o lalo.

E KE AU OKOA E ; —Aloha oe: I ka hora 3 ahiahi o nehinei, haalele ia Lawai ka huakai hele a " Maikai ka Waikini he nani ke nana, Ka hemolele oia uka me ke onaooa, Ua hele a nolu pe i ka lehua maka noe, Ua ike maka iho nei i ka nani o Aipo." Kaahele ana o ka huakai o Kaleleonalani, a i ka liu la. ua hookipa ia ako ma ka home maemae o Hon. J. Kauai ma Waimea nei, a ua haawi mai oia i ka hale a pau, a e hana ke'lii e like me ka makemake. Pela ka haawi ana a ia keiki lalawai o Waimea. Ua oluolu maikai no ke ola o ka Moiwahine, a pela no me kona mau hoahanau, a me na'lii hoahele ona. Maloko o keia mau la, e holoholo ana makai iho nei, i kahi o ka lei pahapaha, a me ke one palalu o Nohili, a malia paha e oluolu o Limaloa e hoala ae i kauhale ona, alaila, malu o Kalani, olu ia Kaha, a ma ka Poaono, e pii ana i ka uka iu o Pupukaniao, he punawai ia, kahi e kii ia ai ka wai e inu o na Moi o Kauai nei i kela kau. A ma ka Poakahi, la 23, o ka pii no ia o ka huakai i ka mauna, e ike ia Kalehuamakanoe, a i na wahi kaulana a pau, pela ka makemake o ua o Kalani puni makaikai honua. Oia hoi, a kaahele wale ia hoi eia kukulu o Kahiki, pehea la hoi e ole ai na wahi kaulana o ko lakou pae moku. Ua hoopuka mai no hoi o Hon. J. Kauai, i ka manao aloha alii o na makaainana o Waimea nei, e hele mai ana lakou e ike ia ia, i ka la apopo, nolaila, e kaua ia ka pulale koke ana o ka huakai piimauna.

Ua lokahi ka manao o ka Ekalesia me ko lakou mau makana, ma ke alakai ana o ko lakou makua hai ola oia no o Rev. A. Kaukau, e hele mai e ike alii. A o ko makou ake nui, a me ka olioli o ka manao, e alakai mau ia e na pomaikai ka huakai kaahele a ko kakou Moi wahine aloha, ma na wahi a pau ana e naue aku ai, a e apo mau ia mai no oia, a me kona mau ukali alii e na aloha pumehana o na makaainana aloha alii o lakou. Na ke Akua e hoomalu mai i ka Moiwahine. UPAPOLOKE. Waimea, Januari 18, 1871.