Ke Au Okoa, Volume VI, Number 13, 14 Iulai 1870 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

            KE  AU OKOA.

      JNO. M. KAPENA.

   LUNA HOOPONOPONO.

HONOLULU, IULAI 14, 1870

KA HAKU MONETE KARISO.

MOKUNA XLXIX.

            Aohe mea e ae nana e hoopaapaa mai, o ka rumi nui hookipa o Danglars a me naromi e ae a pau loa o kona hale hanohano, uahoonele ia la oloko oia mau wahi i ka hoomaamaama nani ia me na kukui ano e a pau i loaa ma ke kulanakouhale o Parisa. O Madamoiselle Eugenie Danglars, ka mea nana ka ulu mahiehie nani oia ahiahi, ua hoaahuia oia me ka holoku silika keokeo, a ua okomo ia ae a e puhaiaa  mai ana ke keokeo popohe o ka pua rose keokeo mai loko mai o kona lauoho maewa uliuli i eleele me he po pouli la no Aigupita. O Andrea, ua maikai no hoi kona kahikoia ana ; a ua kuponi ia mai  kona wahi e ku ana e kona mau hoaaloha puni haaheo, i mumolu wale mai no lakou no kona mau tausani francs. O Barona Danglers me kona lede, ua kupuni ia mai  no laua e ko laua mau haaloha ; a e nee pu ana ke anaina iloko oia mau rumi nani.

            Oiai, i ka lehulehu o na hoa i poloai ia, e naue ana ma o a maanei o ua mau rumi la, aia hoi, i kele a me keia manawa o ka hamumu ana o na leo, lohe ia aku la ke kahea ana mai a ka leo o ka mea kiai ipuka, e hoopuka mai ana i kahi inos i manao nui ia ma na keena oihana waiwai o Parisa. I ka wa i kau pono ae ai ka manamana hora o ka wati i ka eiwa, ua puana ia mai la ka inoa o ka  Haku Monete Kariso, a me he o ana mai la a ka uila, ua huli like aku la na maka o na mea a pau loa i ka ipuka, kahi e komo mai ai. Ua hoaahuia ua count nei, aole e like me ko kekahi poe e ae ke ano haaheo loa, aka ua aahuia oia me ka paa eleele, a he puliki keokeo kona. I kona komo ana mai no, ua puni mai la oia i ka poe mahalo mai ia ia, a lulu lima pu mua mai la oia me ka lede wahine o ka hale, a mohope lulu lima aku la oia me ka Barana Danglars a me ka laua kaikamahine.

            I ka pau ana o kana aloha ana aku me ke ia poe kamaaina o ka hale a i ekolu ; aia hoi, puka mai la o Andrea mai kekai rumi okoa mai, a haawi aku la oia i kona aloha i ke count. Ia wa ua puni loa mai la ua count nei i ka poe e makemake ana e kamailio pu me ia. Aole i liuliu mahope iho komo mai la na loio, a holohola iho la i ke kanana olelo ae like e kakau inoa ai maluna o kekahi uhi pale pakaukau i kinohinohiia me na lopi gula. Noho iho la kekahi o na loio iluna o ka noho, a kekahi ke mau la no kona ku ana iluna. E hoomaka ana kekahi o laua e heluhelu i ka olelo ae like a ka hapa hanihano o Parisa holookoa i naue mai ai e ikemaka a e lohe i ka heluhelu ia ana o ka olelo ae like a ma ia mea e hoopaaia ai ka mare ia ana o na puuwai opiopio a i elua. O.M. Danglars ua pihoihoi kona mau manao, a o kana lede hoi, ua hauoli no ka hui ia ana o kana hiapo me ke keiki alii Andrea o Italia.

            Ua heluheluia ka olelo ae like me ka maluhia nui, aohe wahi mea pane leo iki oloko o ka rumi holookoa ; ua malu ka hamumu o na mea a pau. Aka, i ka pau ana o ka heluhelu ia ana o ua olelo ae like nei, ia manawa koke i lohe ia aku ai ka hamumu ana, me ka lo aku a lou mai, no na tausani a me na miliona francs, a me na daimana i hahai ia maloko o ua olelo ae like la, a oia mau mea a pau e loaa no i na puuwai opiopio he puu dala mare no laua. Ua ane huahua no hoi na lede opiopio e ae ia Madamoiselle Eugenie no ka loaa ana ia ia o ke kane oi o ka waiwai ma ke dala, na momi a me na daimana ; a komo iloko o lakou ka manao iini e hauoli io ana o eugenie me ia mau mea nani a hanohano a pau loa. O Andrea hoi, ua hoopuni ia mai la oia me kona mau hoaaloha a pau, me ka hoomaikai ana mai ia ia, ma ka loaa ana ia ia o ka wahine maikai a kupono e like me Eugenie Danglars.

            Ia manawa, lawe ae la kekahi o na loio i ka peni me ka oniu ana ae maluna o kona poo, me ka i ana mai, "E na keonimana, i keia manawa e kauinoaia i ka olelo ae like."

            O ka Barana Danglars oia ka mea e kauinoa mua ia i ua olelo ae like la ; alaila, o ka hope iho o ka makuakane o Andrea ; o ko Madame Danglars inoa iho ; a  mahope aku o ko na mea e mare ia ana, e like me ka hoonohonohoia ana maluna o ke kalana olelo ae like. Kauinoa iho la ka Barana Danglars mamua, a mahope aku ko ka hope o ka makuakane o Andrea. Hele mai la ka makuakane o Andrea. Hele mai la ka Madame Danglars e kau i inoa me kona kalele maluna o ka lima o Madame Vilefota, a huli ae la oia a pane aku la ia Madame Vilefota, "E kuu hoaaloha maikai ; aole anei he mea ano inoino? Ma kekahi mea ulia wale i hanaina ma ka hale o ka Haku Monete Kariso, ua hoonele ia ka hiki ana mai o kau haku kane e ike i ka hooko pono ia ana o keia olelo ae like mare o ka kakou kaikamahine!"

            "Pela io anei?" wahi a Danglars, "Ma ko'u nana ana, aohe o'u manao nui iki no ia mea," a hilinai aku la oia i hopeokona noho.

            A pane mai la no hoi ka Haku Monete Kariso, "Ke kaumaha nei ko'u manao no ko'u lilo ana i kumu e pale aku ai no ka hiki ana mai ia nei o M. de Vilefota,"-A pane mai la o Madame Danglars, mahope iho o kona kau ana i inoa, "Heaha, o oe anei e ke count? Ina o oe, e pono oe e malama ia oe iho, mamuli anei aole e hiki iau ke kaha aku ia oe."

            Aka, pane hou aku la nae ke Count, "Aole no no'u ka hewa, a @i pono no ia'u ke hooiaio aku ia oe. Ke hoomanao nei no anei oe, o ka mea i hele mai e powa ia'u ma ko'u hale, ua make oia i hou ia i ka pahi. ia ia e hoomakaukau ana e haalele mai i ka hale, ua pepehi ia oia e kona ponoi no hele mai ai e aihue, a e powa i kuu hale."

            "A," wahi Danglars, "I kumu e nana pono ia ai kona mau eha. ua kalaia kona mau kapa komo a pau a ua waihoia aku ma kekahi kihi ; a ua ohiia mai ua mau lole la e ua makai, koe aku nae ka poliki,ua palaka aku lokou."I ka loha ana o Andrea i keia mau huahuaolelo, ua haikea mai la kona mau heleheleua, me he la e lawe mai ana he ano makani ino i ka ua lokuloka panopano e hoo-poino mai i kona hauoli.

            A pane hou kai la ka Haku Monete Kariso, "Ano, o keia puliki ua loaa mai  nei i keia la, ua uhi ia me ke koko, me ka puka maluna iki iho o kahi e pili ana i ka puuwai." I ka lohe ana o ka poe lehe i keia, na ane maule lakou, a hoomak hou mai la ke Count i ka hahai hou ana mai, "Ua lawe ia mai i o'u la. Aole e hiki ke ike pono ia iho kona ano, ua paapu i ke koko, a i ka haha ana iho o kekahi kauwa a'u ika pakeke, loau iho la kekahi palapala ; a o ua palapal la, ua kau ia kou inoa mawaho, me he la e hoouna ia mai ana ia oe e Danglars !"

            "Ia'u !" wahi a Danglars, me ke ano pihoihoi nui a pane mai la no ke Count, "Ae, ia oe no, ua loaa kou inoa ia'u ma ko'u koekoe ana iho, a moakaka lea loa ae la." Ua kao ae la ke kahaha nui malama o na mea a pau e noho ana.

            "Aka wahi a Madame Danglars, me kona haka pono aku i kona mau maka i kana kana. " pehea anei ia mea e hiki ai ke pale aku i ka hiki ana i ka hiki aua mai i M. de Vifefota?"

            "A penei no ia," wahi a ke Count, " O ka puliki a me ka palapala, he mau kumu hoike kupono no ia e hookoloia aku ai o ka mea i hana hewa ; a no ia mau mea wau i hoouna aku ai i ka Lunakawai a me ka llamuku. Ma ko'u manao ana he mea pono e hoouna aku ia mau mea i hiki ai ke hulia, a malia paha he hana ino ia e kue ana ia oe e ka Barona Danglars." Ia wa haka pono mai la ko Audrea mau maka i Count, a nalowale aku la oia ma kekahi rumi aku mahope.

            "Pela io no paha ;" wahi Danglars, " Aole anei he kanaka paahao ke kanaka i pepehi ia ?" A pane mai la ke count, "Ae, a o kona inoa o Caderousse," a o ke kahuli ano haikea ae la no ia o ka helelena o Danglars.

            Ia manawa, pane mai la ke vount, " E pono no paha, e hoomaka aku ke kakauinoa ana o na inoa i koe; no ka mea ke ike nei au no na mea a'u i hoopuka ake nei." O ka Lede Danglars, haawai ae la oia i ka peni ana i kakaua ai i kona inoa me ka loio.

            Kahea ae la ka loio. "Prince Cavalacanti! auhea oe!" A ia manawa no hoi i kahea koke ae ai kona poe hoi a me ka poe opiopio a pau ma kona inoa Karistiano, "E Andrea ! E Andrea! Huli ae la no hoi  o Danglars a kauohe aku i kekahi o na mea kiai puka, "E kahea aku i ka Prince Calavanti, me ka hai pu aku i ka Prince Cavalnti, me ka hai pu aku o kona manawa keia e kakau inoa ai!"

            Aka, ia manawa koko no i komo hopuhopu- alulu mai ai na hoa i poloai ia iloko o ka rumi nui, me he mea la, ua komo mai he mau mea ano e iloko o na rumi e ae a lakou e lu ana ana. He mea kupono no nae ke kulmu o keia uwe ino a komo hopuhopualulu ana mai. E hoonoho ana kekahi luna koa i na koa mana ipuka a pau, a hele mai la oia imua, io Danglars la me kekahi palapala ma kona lima, a he luna makai mamua ponoi on a. I ka ike ana o ka lede Danglars i keia mea, maule aku la oia ; a o Danglars hoi ua ane pioihoi oia imua o na malihini ana i hookipa ai.

            O ka Haku Monete Kariso kai ninau mua mai, "Heaha ke ano o keia mea?" a pane mai la ka luna makai, "Owau o oukou ka mea e pane mai ana ma ka inoa o Andrea Cavalcanti?" Ua pihoihoi na mea a pau me kaninau mai, "A owai o Andrea Cavalcanti?" Pane mai la ka luna makai, "He paahao pio oia i pakele mai kahi paa mai ma Tuulona.

            Ua hoopiiia oia no ka pepehi ana i kona hoa aihue ma ka hale o Monete Kariso." I ka huli ana ae o ke count, ua puhalahiu aku la o Andrea!

            He mau minute mahope iho o keia pioloke ino ana, aia hoi, ua noeneo iho la ua hotele nui nei o Danglars, a o ka haku hale wale no ka mea i koe iho, e ninaninau ana ka luna makai ia ia no na mea e pili ana i kela mea kaumah i kau mai maluna o ua mea malama baneko nei. Aia hoi ma kona rumi malu, ua kaikai ia aku ka Lede Danglars me kona ano maule.

            Elua hoi mau mea a makou e kono ae nei, i kau hoomanawanui e ka mea heluhelu e haliu mai; a oia no hoi ke kaikamahine Eugenie, a me kona hoa'loha pili paa me Louise de Armilly. I ka hiki ana aku o lana i karumi o Eugenie, i mai la o Louise i kona hoa, "He mea on a eehia maloi keia! Owai la ka mea i moeuhane mua, o Andrea Cavalacanti, he kanaka pepehi kanaka, he kane i manaoia ai e mare, i mahuka mai loko mai o ka hale paahao!" "A" wahi a Euginie, "Hemea oiaio no, he mau hopena ino e uhai mai ana ia'u. Ua pakele mai au mai ka mareia ana me Alebata Morcerf, e haule aku i ke Cavalcanti pepehi kanaka."

            "Ina pela," wahi a Louise, "Ua haule mai nei oe mai loko mai o keia mau mare eebia nan: heaha la anie ka kaua mea e bana ai?"

            Kulou iho la ko Eugenie poo ilalo no kehahi au ninute, a ea mai la iluna me ka pane mai, "O ka kaua mea e hana ia! oia no na mea a'u i hai aku ai ia oe i nala elua a ekolu i hala ae nei e u holo kaua mai keia wahi aku! Ua hoowahawaha au i keia ola ana; a i ake nui ai hoi, oia ke ola ana o ka mea akamai i ke pena kii a me ka himeni. No kamea, ke loaa ia mau ike ia kaua ma ko kaua ano palupalu wahine, e hiki no ia kaua ke ola kuokoa, aohe mea nana e papa mai i ka kaua mau mea a pau loa e manao ai e hana. Aka, o ka noho ana maanei! No ke aha? I hoao hou mai anei lakou e hoomare hon mai ia'u i ka mahina e hiki mai ana a owai? Ia M. Debray paha, ka mea a lakou i hoopuka mua mai ai e mareia wau. Aole, e Louise, aole. No na mea i hanaia i keia ahiaahi e hoapono mai ia'u. Na ke Akua ponoi no i hoouna mai i keia mea, a ke hoomaikai aku nei au me kuu ola ana a pau!

            No keia mau olelo a Eugenie, pane mai la o Louise, "Nani no kou ikaika a me ka aa o kou mau nanao." A pane mai la o Eugenie, "Aole no ka paha oe i ike ia'u. E hoomaka kaua e kamailio pu no ka kana mau mea e hai. Ke kaa e holo ai."

            A pane mai la o Louise, "Ua kauiia no e a'u i na la ekou i hala ae nei; a o ko kaua mau palapala hookuu ua loaa mai ai o ka palapala hookuu, hoike aku la oia, a penei ka heluhelu ana:--

            "O M. Leon d'Amilly, he iwakalua ka nui o kona mau makahiki ; ka oihana, he pena kii ;lauoho eleele ; a e kaahela pu ana me kona kaikuahine."

            I ka heluhelu ana o Eugenie i keia palapala, i mai la oia , "Ua pololei! I hea kahi o keia palapala hookuu i loaa ai ia oe ?"  Hai mai la no hoi kona hoalauna makai,  "Ia'o i hele aku ai i kahi o ka Haku Monete Kariso, no kekahi mau palapala i na luna hooponopono o na hale keaka ma Roma a me Napela, hoopuka aku la au i ko'u makau i ka hele hookahi me ko'u ano wahine, loaa' mai la ia'u keia palapala hookuu, hookahi la mahope iho, a na'u no i kau iho ke kaikuahine mahope."

            "Ano, ua maikai na mea a pau loa," wahi a Eugenie me na maka i piha i ka hauoli no kela mau huaolelo hoolalelale, "Eia wale no ka mea i koe ia kaua e hana ai o ka hoomakaukau ana i ko kaua mau pahu ili, a e holo koke no kaua i ke ahiahi e kau kau inoa ia ai ka palapala ae like o ka mare, a aohe make kali aku a ke ahiahi o ka wa mare ia."

            I mai la o Louise, "E noonoo a kahele oe e Eugenie 1"-"O!  wahi a Eugenie,  "Ua hoopaa wau i ko'u mau noonoo ana!  Ua manaka wau i ka hoolohe ana no na lono i ka pau ana o ka mahina, ua haule iho la na dala o Sepania, a me na dala pepa o Hayti.  A ma ia mea, aole anei i maopopo ia oe?  Ua oi aku ka pomaikai o ka hoolauna ana aku me na manu leo lea a me na kula o Lombardy, na alanui o Venice, na hale alii o Roma, a me ke kaikuono aloha o Napela.  Heaha ka nui o ka kaua mau wahi dala e Louise?"  O koua hoa'loha i hoopukaia aku ai no kela ninau hope, kona wehe mai la no ia i kekahi ume, a maloko olaila kekahi mau bila baneko, he iwakaluakumakolu.

            "He iwakaluakumakolu tausani francs!" wahi a Louise.

            "A pela no ka nui ma na momi a me na daimana o kaua," wahi a Eugenie, "Ua nui ko kaua.  Me kanahakumalima tausani francs he hiki ia kaua ke ola no oa makahiki elua me he amu kaikamahine alii la; a in a he oluolu iki mai no na makahiki; aka, mamua ae o na mahina eono, o oe me kou akamai i ka hookaoi pila; a owau me ko'u leo maikai he mea hiki no ia kaua ke palapala iho ia mea.  A ano, ia oe ka malama ana  o ke kala a kaua, a ia'u ka pahu mea gula o kaua, i nalowale kekahi e koe ana kekahi.  E lalau aku i kahi ope o kaua, a e awiwi ae kaua i ka hele ana!"

            "Alia!"  wahi a Louise, a hele aku la oia e hoolohe ma ka ipuka o ka rumi o Madame Danglers.  "Heaha kau mea e makau nei?" wahi a Eugenie, a i mai la o Louise, "Mamuli anei kaua ike ia mai,"  a i hou mai la no o Eugene, " Ua paa pono no ko kaua ipuka i ke ki ia, a in a e koi ia mai e wehe aku, aole no kaua e ae aku e wehe mai i ko kau a ipuka a hiki wale i ka nahaha liilii ana."

            A ia manawa i hoomaka iho ai ua mau kaikamahine opiopio nei e paila a e  opeope i ko laua mau wahi ukana iloko oka eke ili, hue mai la o Eugenie i kekahi ko loka silika mai kekahi ume mai, me ka hai aku i kona hoa aloha, ua hoomakaukau mua oia ia mea i mea e pale aku ai i ke anu, a haawi aku la i kona hoa aloha.

            Mai loko mai no hoi oia ume hookahi, hue mai la oia i ke kapa komo kane, mai ke kamaa buti olalo, a kaupaku i ka papale.  A me ke ano eleu, me he mea la e hai mai ana, aole no ia o ka manawa ana i komo ai i ka lole kane, kono komo mai la no ia i na  kamaa buti me ke lole wawae, a phi ae la i ka puliki a hiki i kopa a-i; a kou iho la i ke kuka i kupono maoli i kona oiwi, me he mea la-e pua na mai ana, "Hikikii lua kela i ka pua wai o Kalena"

            I ka paa pono ana o ko Eugenie lole mai luna a lalo, hookahi no hana a Louise, o ka mahalo mai me ka pauaho ole; a i mai la oia, " O! Ua maikai oe, aka, pehea kela mau owili lauoho maikai ou, e nalo ana no anei ia malalo o kela paple kane?" - "E ike koke no oe ia mea i keia manawa," wahi a Eugenie.  A hopu ae la oia me kona lima hema i na owili lauoho nui, a me ka lima akau lalau aku la oia ka upa, a halawai koke ae la ua mau owili la i hu-a-hu-a ia'i e kekahi poe, me ka maka kila, a hiolo laumaewa aku la na mau oho la i mamina ia maluna o ka papahele.

            I ka pau ana no hoi o 'ka pokeia ana oia mau owili lanoho kuewelo mahope, hooholo ae la oia i kona lima ma na lauoho mamua, me ke ano minamina ole he mea pakui aku ia i kona ula mau; aka, ua moku koke ae la no, a haole aku la maluna o ka papa hele, kahi e muu ana oia mau hoahanau lauoho o lakou, i o-u ae la ka muo o ko lakou ola ana.

            I ka hoonele ia ana o ko Eugenie poo me kela mau oho nani, ua mamina mai la o Louise, "Minamina wale kela mau oho nani, ka mea lewalewa mawaena o ka waimaka a me ka akaaka!" - " Aole anei i oi loa ae ko'u nani i keia manwa mamua ae o ko'u wa iloko o ke kapa wahine," wahi a Eugenie.  "O! Ua nani oie, aka, ea he nani mau no nae kou mai mua mai," wahi a Louse, "Ano, ihea ko kaua wahi e hele ai?"

            "Aohe wahi hele ole," wahi a Eugenie, "No ka mea, ua akea ka honua. Ina oe i manao i Berusela, ua hiki no, kahi kokoke loa ia i kapalena; mai laila aku i ka muliwai Rhine; a me Helevitia aku kaua a komo iloko o ke aupouni o Italia, a hiki aku i Roma."

            Me keia mau huaolelo, ua makaukau pono ua mau kaikamahine nei, ko laua nei puhi iho la no ia i ke kukui, hoolono aku ia o ka hamumumu mai, aohe wahi mea walaau, ka wehe mai la no ia o laua nei i ka ipuka e komo aku ai mahope o ka mahinaai, a iho aku la laua nei ma ke alanui pii, a holo mai la ka moani aala o na pua o ka mahinaai.

            I ko laua nei iho ana mai, ua kuilima mai lua, a ia Eugenie no ka pahu ili o laua.  A komo laua nei iloko o ka mahinaai, aohe mea e neeu ana maloko olaila.  Hai mai la ke kaokie ana a ka wati nui o ka luakini, o ka hora ponoi maoli no ia o ke aumoe. Aohe i hoi ka mea nana e malama ka ipuka pa ; a i ko Eugenie nana ana aku iloko o ka hale kiai, ua oiamoe loa ia oia, a hemo loa aku la laua nei i ka ipuka pa nui hookahi i koe.

            Ia laua i hiki aku ai ilaila, kahea aku la o Eugenie e hemo ka puka, a kunihi ae al oia ia Louise ma kona aoao.  I ka nana ana mai o ua mea kiai puka nei, ike wate mai la no oia ia Eugenie me ke kapa komo kane e hahau ana i kona mau wawae me ka huipa holo lio.  Nana wale mai la no ua me akiai ipuka nei i ke mai la ia wale no aohe mea okoa e ae.  Apuka aku laua nei iwaho loa o ke alanui, e maalo ana kau wahi kanaka, haawi aku la o Eugenie ia ia i kahi pahu ili o laua nei, me ka hai aku e lawe aku i ka Hotele Rue la Victorie, Holu 36, a hele aku la ua wahi kanaka nei mamua a mahope aku laua nei.

            I ko lakou hiki ana aku i ua wahi nei, haawiia aku la ka ulu o kahi kanaka a hele aku la oia mahope o kona alanui ponoi iho.  Kikeke aku la o Eugenie ma ka olepelepe o ka puka aniani, a oili mai la ka wahine holoi lole maloko, ka mea i kauoha mua ia e hoomakaukau no ko laua nei hiki ana mai.  Kona wehe mai la no ia i ka ipuka, a i aku la o Eugenie iaia, "E ka wahine opiopio, e kanoha i ke keiki kauwa e lawe koke mai i ke kaa a me na lio mai ka hotele mai kahi i hoolimalimaia ai."

            He hapaha hora mahope iho, hoi mai Ia ua keiki kauwa nei me ke kaa a me na lio; a o kahi puolo o laua nei, na hookau ia ae la a paa ma kahi o ke kahu lio e noho ana.  "Eia ka palapala hookuu la,"  wahi a ke kahu lio, "Mahea aku ke ala i holoai?"

            "I Foutainebleau!" me ka leo nui ano kane; a ninau aku ia o Louise, "Pehea oe i olelo aku la?" - A pane mai la o Eugenie, "I hoopaewaewa wale aku nei no au iaia, o kuu manao mamuli anei o kumakaia oia ia kaua no ka uku oi ae mamua o ka iwakalua francs a kaua i haawi aku nei."

            Ia manawa, ko laua nei kau koke ae la no ia iluna o ke kaa, i hanaia a kupono no ka hiamoe ana ika manawa e makemake ai e hiamoe.  "He ano kupono wale no kau mau hana a pua," wahi a Louise, ia ia i noho iho ai ma ka aoao a kona   hoaaloha.

            He hapa hora hou mahope iho, kauoha aku la o Eugenie, i ke kahu lio e hoihoi ae ka i ka holo ana a ke kaa me ke kuamoo a laua i manao ai; a aole no hoi i emo ua kaa mai la laua nei mawaho o ke kaiaolu o ke kula nakauhale o Parisa.  Akaaka ae la laua nei ika kokolo mai a ka makani moani owaho mai o ke kulanakauhale.   O Barana Danglars ua haha poelo i ke kaikamahine ole.

  (Aole i pau.)

MAKAALA KA LUNA ALANUI O OAHU: - Ke hoakea hou ia nei ke alanui haiki o Piliaama, Waimea, Oahu, e ka Luna Alanui, a ua nanai loa i keia wa, holo na kaa me ka piliki a ole, aole pela mamua, huli pinepine na kaa lio a me na kaa bipi, no ka haiki o ke alanui.

KA MOOLELO O IOSEPA KAMIKA.

            A ke ike nei ko ka honua i ko lakou noho ana ma kela wahi, na ke Akua i kokua mai ia lakou, a nana no i hoopakele ia lakou mai kona mau enemi ae, no ka mea, a hiki i ka uni o na makahiki o ko lakou no ho ana ma kela wahi, ua pii ae lakou i ka nui loa ana, nolaila, ike iho la na enemi, i ko lakou hoomau ana ma kela mea, alaila noonoo iho la lakou e kii hou e luku ia loakou, a koe ole kahi Moremona ma ka honua nei, no ka mea, he poe ino loa lakou, he poe hoopunipuni, e pono e lukuia lakou a pau loa, a o ka poe i koe, e haalele lakou i ka hahai ana mamuli o n mea a Iossepa Kamika i ao mai ai.

            Nolaila, ku mai la kekahi haole no Maleka, o Aberahama Linekona kona inoa, a hoopuka mai la i kekahi mau manao on a, mamua o ke kau koho balota ana no na mea e noho Peresidena ana maluna o Amerika Huipuia.  A ina e koho na kanaka ia ia, a puka oia, a noho ana Peresidena, alaila o kona manao o ka hoopau i ka noho hookauwa kuapaa ana o na nika, a o kekahi hoi, e lukuia ka poe Moremona a koe ole kekahi, pela kekahi mau manao o ua Peresidena la.  Aua ko kona mau manao, ua lilo oia he Peresidena maluna o kela mau miliona kanaka.  Ailoko o ka makahiki 1857, hoounaia aku la kekahi mau tausani koa he umi kumamakahi, e luku i ka poe haipule o ke Akua, ma Lokopaakai; o ka papalua keia o ka lakou mau hana aloha ole i ko lakou mau makamaka, aohe makamaka i ka la o ka inaina.  A i ka hele ana o keia mau tausani koa e luku i kela poe, ua pau lakou i ka make ma ka waonahele, ua paa loa lakou i ka hau o na mauna; he 15 kapuai ke kiekie o ka hau ma kabi a lakou i hoomoana ai, a pau lakou i ka make malaila, no ke anu a me ka ai ole, a make pu me na holoholona a lakou, aole hoi e hiki i na mea kaua a lakou ke lawe, a he au tausani ekolu paha i koe aku o na koa.

            A iloko o kela mau la popilikia o kela poe koa, no ka ai ole a me ke kapa mehana ole, a me ka nele pu hoi i ka paakai ole, no ka mea, e ai ana lakou i ka io o na holoholona make wale o lakou, nolaila, hoouna aku la ke Keoela oia poe koa i kekahi mau mea o lakou io Barengama Iaua la, i ai na lakou a me ke kapa, a me ka paakai; a ua hoouna mai o Barengama Iaoa i keia mau mea no lakou, e like me ko lakou lawa pono.  A i ka hiki ana aku o keia mau mea a pau io lakou la, manao iho la lakou, ua hanaia ka mea ma ke iloko o na mea ai, a loao lakou ma ka imi ana, a ike iho la, aole i hana ino ia na me ai a pau; aka, ua hanaia me ke aloha io,  e ka poe a lakou i manao ai e luu aku.  Nolaila i ko ai ka ka Palapal Hemolele i olelo mai ai, a i pololi kou enemi, e hanai aku, a i ma ke wai ola, e hooinu aku, a i kapa ole oia, e hoaahu aku.  A i ka oukou hana ana pela alaila, ua hoahu oukou i na lanahu ahi maluna o ko lakou poo.  Pela aku o Iesu i kana poe haumana, e aloha aku oukou i ko oukou poe enemi.

            A pau ko lakou pilikia, komo aku la kela poe koa iloko o ke kulanakauhale, a hookipa ia lakou ilaila, a nonoi aku la ke Kenela o ua poe koa nei  ia Baregama Iana, i kekahi mau luna on a, e hoihoi ia lakou i Amerika Huipuia, a na hoihoiia lakou i ko lakou wahi, me ka uku mai o ke Aupuni o Amerika i ka poe Moremona, he mau haneri tausani dala, no ko lakou hana lokomaikai ana aku ia lkou, a me ka hoihoi ana aku ia lakou i na Ilikini, o powa ia lakou; a o ka poe Moremona, ua lilo ia he poe makamake no ka poe Ilikini.  Nolaila, o na mea a pau a Baregama Iana e kauoha ai ia lakou, oia ka lakou e hana ai.

            A mahope iho o keia mau mea, ua hiki mai he kau a kuloko ma Amerika Huipuia, e like ma ka ka Palapala Hemolelei o ka mea pepehi aku me ka pahikana, e lukuia no oia me ka pahikaua.  He mau makahiki aku mamua o ka make an a o Iosepa Kamika, e hoomaka ana keia kaua ma Karolina Hema, a e kue ana ka hoahanau i kona hoahanau, a o ka makua i ke keiki.  A ua hiki io mai no ia kaua ana ma Amerika, ua hoomaka ma Karolina Hema, ua nui ka poe i make, me ka hooneleia o na wahine i ka lakou mau papa ole, a me na mama i na keiki ole; no ka mea, na hookoia ka olelo a Kristo ia lakou.  Aole au i lawe mai i ke kuikahi ma ka honua nei, aka, o ke kue, no ka mea, e kue ana na mea elima iloko o ka hale hookahi, o ke kokoolima i ke kokookolu, a o ke kokoolua i ke kokookolu; no ka mea, e kue ana ka makuakane i ke keikikane, a o ke kaikuaana i kona kaikaina, a o ka hoahanau i ka hoahanau; nolaila, iloko oia kaua ana o lakou, ua hanaia keia mau mea, no ka mea, elima poe iloko o ke hale ao hookahi, no ka oihana kaus, oia kela poe Kenela no ka Akau, a no ka Hema o Lee a me kekahi mau Kenela e ae, iloko no lakou o kekula hookahi, ka hale hookahi hoi i aoia ai, aka, ua hele kekahi ma ka Akau, a o kekahi hoi ma ka Hema, a ua pepehi aku kekahi i kekahi, pela no ka makua i ke keiki, ma ka Akau na makua, a ma ka Hema hoi na keiki, nolaila, kue ka makua i ke keiki, a pela hoi ke kaikuaana i kona kaikaina, ma ka Akau kekahi, a ma ka Hema kekahi, nolaila pepehi ke kaikuaana i ke kaikaina, a pela hoi ka hoahanau i ka hoahanau.

            Nolaila, ua hookola ka olelo a na luanolelo, in a ma ka hale o ke Akua ka aoao mua ia, alaila, mahea la auanei e ikeia ai kahi o ka poe aia a me ka hewa?  No ka mea, ua hiki mua ka luku i ka poe o ka hale  o ke Akua, nolaila, na ikeia kahi o ka poe aia a me ka hana ino, ua ikeia ko lakou hopena, ua papapau lakou he as ko ka hale.  A ua make pu hoi me kela Persidena, nona kela mau manao, e hoopau i ka hookauwa kuapaa nika, a e luku i ka poe Moremona.  A ke noho nei lakou me ka hoomana an i ke Akua  me ke keakea ole ia, aka, e hiki mai ana no paha he wa e inaina hou ai ko ke ao nei ia lakou, aka aole e hiki i ko ke ao nei ke kue hou ia lakou, me ka manao e luku ia lakou a pau, no ka mea aole e hiki ia lakou ke luku, a hoopau i ka poe haipule o ke Akua i ka wa nuku, eono wale no lakou; a pehea hoi e hiki ai ia lakou ke luku aku i ka poe haipule i keia wa, oiai he mau haneri tausani o lakou?  Aka, ua loaa hou he kumu e inaina ai ko ka honua nei ia lakou, oia hoi, no ka mare lehulehu ana; a ke hana nei ko Amerika he bila kanawai e papa ana i ka mare lehulehu ana, a ke hoopaapaa nui nei ka.  Ahaolelo no keia bila kanawai, a in a e hooholoia keia bila kanawai, alaila, aole e ae mai ana na haipule ia kanawai hoopilikia wale.  Alaila, e hoouna hou ana paoa lakou i mau tausani koa e luku i ka poe Moremona.

    (Aole i Pau.)

Ka hoike ana o na Kula o ka apana o Makawao

            Ma ka Poaha Iune 23, 1870  Ua hoike na kula mai Huelo a hiki loa i Kalepolepo, ma ka Luakini ma Pookela.  Ua akoakoa mai na haumana me na kumu, a ma ka ua ana paha ma ia la, aole i pau nui na haumana o kahi loihi.  a ka hoike ana a na Komite, ua ikeia ka holo mua ana ma na wahi a na kumu i ao aku ai i na haumana, o ke kula o Nakookoo ma Pulehu, ua ike ia kone ikaika ma ke ao ana, ua pahee ka heluhelu aoa, mai ke nui a ka liilii, aole he A me ka hookui, ma ka palapala aina e piliana i na mokupuni o Hawaii nei, ua paanaau maoli me ka maikai.  O ke kula a P. Kaanaana ma Kuiaha, o ka oi aku ia o na kula ma ke kakau lima, ua hoike ia mai na buke i kakau ia me ka inika, i ka pana ana o na Komite me ka  lehulehu, ua kuio no i ka mahalo, aole au e hoopoina no kekahi wahi keiki uuku, i oi aku kona noeau mamua o kona mau hoa a pau ma ke kakau ana, aia o Z. Kakaio.  O ke kula a Keawe ma Huelo, ua oi aku paha kona holo imua ma na mea ike, no ka mea ua lawe mai oia i na kii o ka pahu pailono, i ike ia ma na buke haole, oia hoi hoi ka (Eatons Common School.)  A o ka nui o na kula i koe iho, ua ike ia no ka ike ma na buke.

            He wahi kanalua nae ko'u i kekahi o na Komite, ma ka nana ana i na mea a pau i hoiki ia, ua hai mai na kumu, na palua ka huli ana o ka Huinahelu, a me ka Heluna au i ko lakou mau kula, aka, i ka ninau ana aku i ke kumuhana, no kela ninau keia ninau e pili ana i kona olelo ao iho, aole nae he maopopo, i ka hai ana mai ua lewa ka Helunaau, i ka hoomaka ana e hoike aku mamua, aole nae he lewa io, aole nae ia'u ka hoololi e pili aua no ia mea, aia wale no ia i ka mea nana ka oihana, kani e nae a ka waha o ke eleao, ma ka hoike ana nae a na Komite o ke kula o Nakookoo a me Keawe aia laua ma ka papa akahi, a o ke koena iho, aia lakou ma ka papa elua.  a ma ka nana ana a ka luna kula aia hoi o P. Nui Esq. ua oluolu is maka haawi ana aku ia na kumu ma ka papa akahi, he $500 pakahi, a i na kumu ma ka papa elua he $5,00 pakahi, a i na kumu ma ka pepa elua, he $3.00 pakahi, oia na uku kaulele o kela kumu keia kumu, i oi aku ka ikaika a me ka makaala i ke ao ana i oe haumana, ma oa mea a pau e holomua ai ka ike a me ka naauao o na haumana ma na mea a pau i aoia.

Me ke aloha no.

Na Kekahi Komite Hoike

JOHN KAWELAU.

Makawao Maui,          June 28, 1870

"MAKE I WALOHIA IHO LA" - Ma ka la 20 Iune 1870, make ma "Halaanianihale," Honolulu Oahu, o "Levi Ialua, (k) i ke 67 o kona mau makahiki, he mai loihi kona a hala aku la, ua haalele iho i ka wahine a me na keiki a me na moopuna, e u e mina e Walohia aku ma keia aoao o ka ilina, he kamaaina oia no ka aina lai kaulana a Ebu, he kupa no hoi no "Kona Aina i ka pohu" a be ae ale no ia mau makani kele lua, makani ua haaheo o ua aina ia, o ka Olauniu, Kapilia, a me ka Eko, o ke kaha o Kaelehuluhulu, i Kona Akau Hawaii, kona one hanau, a o Kanakau i Nawawa, Kona Hema kona wahi i hookupa iho ai a kawowo na keiki, a laha hoi na moopuna.  He lala oia no ka Ekalesis ma o Parisa la ma ua wahi ia, a ma Honolulu Oahu iho nei, kuu aku ia oia i ke ala loa, nona hoi keia welina leo.

Kuu makuakane mai ke kaha o Kona,

Mai ka makani o ka Awaawa,

Ola i ka hale malu lau laau ke noho,

Ua noho Ielusalema aia me Iesu ka uhane,

Haalele mai nei no oe,

Hopu i ka hale lau mihi a ka manao,

E mihi wale ae ana no,

Aole hoi na maka kahi aloha,

He aloha uwe ko ke keiki,

He aloha minamina alua,

Ke minamina nei i ka makua,

I ka nalo loa ana aku nei,

Nalo waiho i Hoakalei Home,

I ka hale kula laumania o Tahiti,

Ua lele--lele kohana aku nei,

I ka malama io Kaaona,

He pau aloha keia o ka makua.

                                                KE KEIKI