Ke Au Okoa, Volume VI, Number 3, 5 May 1870 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

KE AU OKOA.

HONOLULU, MEI 5, 1870.

HE KAAO

-NO-

-PUAOKAOHELO,

Ke Kamalei hiwahiwa o Kauakanilehua o Hilo, ke kaikamahine a Leleiwi me Makahanaloa, ka hanai a Punahoa, i unuhi ia mai loko mai o na Kaao kahiko o Hawaii nei.

HELU 3.

            Ia manawa no i ai ae ai Waiolama i ka kahuna no ka pono a me ka pono ole o kana wahine, ia wa no hoi i pane mai ai na kahuna, aole he manawa i koe, alaila, o ka hanau no ia oia nei, i na e hoomaka mai ana kahekili e haule me ka ikaika i keia wa, alaila, o ka hemo koke no ia o ke keiki, oiai, aole he mea keakea e pono ole ai ka hanau ana oia nei, iloko no o ka olelo ana o na kahuna o maila kauila me ka ikaika, "me he kukui mahu la ke ano ia wa," ia manawa i pule like aku ai na kahuna, aole no noi iliuliu iho, o ke kui koke iho la no ia o na hekili e 7 iloko o ka manawa hookahi, oia no ka wa i Punahoa i hanau aku ai i ke kaikamahine, a lilo ae la ua kaikamahine nei ma ka lima o na kahuna, i ke oki ana o ka Piko, ua haule hou iho ka haule ana o ka hekili, a nui ka wai o na Kahawai, a he mea haohao keia i na makaainana a pau o Hilo.

            A he po ua nui hoi keia no Hilo i moku ai ka piko o ua kaikamahine nei, ua kani kapahu a na kahuna, 'e like me ke ano mau o keia lahui i ka wa kahiko, a mahope iho o ka hanau ana o Punahoa, ua kahea ia aku ka lehulehu a me na 'lii e komo mai iloko o ka hale e ike i ke alii wahine, a he manawa loihi no hoi ma ia hope iho, mahope iho i ka pau ana o ka hana, a na kahuna a me ka hoomaemae ana i ke keiki, a ua hoouhi ia iho la hoi ke kapa keiki, aia hoi, ua lawe ia mai la ua kaikamahine nei imua o ke alii wahine Punahoa e hanai i ka u, a a ma ia wa i ike pono ai ka lehulehu a pau i ke ano a me na hiohiona o ua wahi malihini hou nei, a ua ku i ka maikai kona mau helehelena a pau loa ke nana iho, a ua kui aku ke kaulana ma Hilo a pau no ka hanau ana o ke alii wahine i ke keiki. A ua hele mai lakou a pau me na makana e hookupu aku ai imua o ke ahi, oia hoi he palala ke ano, ai ko lakou hiki ana mai imua o ke alii, wahine Punahoa, ua haawi aku lakou i na waiwai he nui loa, a ua waiho ia aku ma ia hale paapaa, o kekahi poe hoi, ua hele mai lakou me ke kahea ana aku i ka inoa o ua kaikamahine nei, e hana imua o ke alii wahine me ke kuhi ana o na lima i o ia nei, (oia no kekahi hana nui a keia lahui i ka wa kahiko a hiki mai i keia wa hou, aole no i pau loa ia mau ano i keia manawa, ke hookolo mai nei no ka hana a ko kakou mau kupuna ma ko kakou mau meheu). A he mau la ka hele ana mai o na makaainana imua o ko lakou alii wahine, a no keia hana no hoi a na makaainana ua, hoonanea ia ka puuwai o ke alii wahine me ka olioli nui.

            Ka olelo o Puueo imua o Punahoa a me Waiolama a me ka lilo ana o ke kaikamahine ia ia, a me ke kapa ana i ka inoa.

            Hookahi anahulu mahope iho o ka hanau ana o Punahoa i ke kaikamahine, i kekahi la, hele aku la o Puueo a hiki imua o Punahoa a me kana kane, ai kona 'lii ike ana mai ia Puueo, haawi mua ia mai la ke aloha, e like me ke mea mau, a he mea olioli nui no hoi keia i na 'lii i ka hiki ana mai o kekahi kahuna nana i hai mua mai na ano a pau o kona hapai ana, a me kona hanau ana, a ua ko kana mea i wanana ai mamua, a ua ike maka na mea a pau loa i kana hana, a mahope iho oia manawa.

            Ninau mai la ke alii wahine Punahoa ia ia, he mea haohao no'u i keia wa, i ka ike ana i kou mau helehelena olioli, me he mea la ua loaa ia oe kekahi pomaikai me ke alanui au i hele mai nei, a no keia olelo a ke alii wahine, pane koke aku la o Puueo ae, he oiaio no ia olelo au e ke alii ia'u i keia wa, aka, aole he pomaikai i loaa ia'u ma kahi a'u i hele mai nei, a hiki wale i ou nei o ke alii, aka, ua hele mai nei au mamuli o ka olelo a ka'u wahine ia'u e hele mai au imua o olua i keia wa, nolaila, e lohe olua i ka manao o ka'u wahine, a penei no ia. Ua hoomau ia ka makemake o ka'u wahine i ke keiki i kona lohe ana ia'u ua hanau oe, a hiki wale i ka la i hele mai ai na mea a pau e ike. Ai kona hoi ana a hiki i ko maua hale, a i keia kakahiaka nui nei no la, olelo mai ana ia'u he makemake ka? oia na maua e hanai ke kaikamahine a ke alii, nolaila, hoouna o koa mai nei kela ia'u, e hele mai e hai aku ia olua i kona makemake, a oia la i lohe olua olua e na 'lii, ia manawa no i pane mai ai o punahoa ia puueo, ua ae aku au i ka olelo a kau wahine no ke kaikamahine nei, oiai hoi, akolu hoi ka mea nana i makemake mai nana e hanai no ka mea aole he alii nana i noi mai mamua, aole no hoi he makaainana, a he kahi hoi ka mea nana i noi mai la, ua lilo ia olua ke keiki i keia la me olua no ka hanai a he la ike aku ko maa i ke keiki.

            I ka lohe pono ana o Puueo i keia olelo haawi a ke alii wahine, lelele kona oili me ka hauoli nui loa, aka. pane hou aku oia i ke alii wahine, malie paha o oe kai ae mai e lilo ia maua ka hanai, a o ka manao paha o kau kane o Waiolama, aole paha one manao e lilo ke keiki ia maua, pane koke mai la no ke alii wahine, aole ana olelo mai, oiai, o ka'u mea e haawi ai, ua like no ia me kona manao, aole oia e keakea mai, a pela hoi au i kana mea e haawi ai a o ka pau no ia, a ma ia wa no i ninau aku ai o Puueo i ka inoa o ua kaikamahine nei i na alii nana ke keiki i haawi mai ia ia. Olelo mai la o Punahoa, aole maua i kapa i ka inoa o ke keiki, aka, i keia wa paha e kapa ia, ae mai la o Puueo, "a wahi hoi a puueo," owai ka olua inoa e manao ai e kahea? oia hoi ka maua e noonoo ae la i keia wa, pane hou aku no ke kahuna i ke alii wahine, e kapa olua inoa kaulana loa, i ole ai e nalowale i na hanauua a pau, a i puka loa hoi i ke ao me ka poino ole, a no keia ole a Puueo pane mai la o Punahoa ia ia, aole ae la hoi ia maua ka inoa, e aho no nau e kapa iho i keia wa, ae koke aku la o Puueo i keia olelo a ke alii wahine a kapa iho la oia i kona inoa o Makahanaloa, (a ua paa keia inoa mai ka wa mai nona keia kaao a hiki i keia wa).

            Mamuli o ke kapa ana a Puueo i keia inoa, a mahope iho oia wa, hoomakaukau ae la o Puueo ia ia iho, a me ke kaikamahine a hoihoi i knoa hale, a lalau aku la kona mau lima a hii ae la i ua kaikamahine nei ma kona mau lima, me ke kapa nui i hiki ia ma kona a-i, a ma ia manawa i honi iho ai ke alii wahine i kana hiapo a me kana kane me ka haule iho o na kulu waimaka aloha keiki, a pau ka ike aloha pu ana, puka aku la o Puueo a ku mawaho o ka paepae o ka puka, nana ae la oia ma i a naanei a puni, a leha ae la kona mau maka iluna o ka lani, aole hoi he wahi kau ao- iki, nolaila, pule aku la oia i na akua me ka noi pu aku hoi e hooko mai i kana mea e noi aku ai. A pau kana pule ana, hoomaka koke mai la no ia o na ao omamalu ua e haule mai, a haule kilikili hune mai la ka ua, :me he lopi silika la ka makalii ke awe malie iho iloko o ka lewa," a ma ia manawa no hoi i haawi aku ai keia i ke aloha i na alii, a pela mai no hoi na alii, a o ka pau no ia. Ia ia nei i hoomaka ai e hoi me ke keiki e hii ana ma kona mau lima, pio pono iho la ke anuenue maluna on a hiki wale i ka hale, aka, mamua ae nae paha o ko Puueo hoomaka ana e hoi aku me ke keiki , ua loaa mua i kana wahine ka ike, ua hooko ia mai kona makemake, e like me kana mea i hoouna aku ai i kana kane.

            Ia Puueo i hiki aku ai i kona hale, aia hoi, kana wahine o Wailuku ka inoa e noho mai ana ma ka puka me na maka hoihoi, a pane aku la kana kane, eia ke keiki alii la, ua lilo mai nei ia kaua ka hanai, a he la ike no na alii na mea nana ke keiki, ia manawa no i lalau mai ai na lima o ua wahine nei a hii ae la, a wehe ae la oia i ke kapa keiki, a nana pono iho la oia i na helehelena o ua kaikamahine nei, a pane ae la oia i kana huaolelo mua i kana kane, mai hanai alii ole kaua a hiki i ko kaua make ana, a me he aha la la ko'u manao ana e kii oe e noi i na alii na kaua e hanai ke keiki, nolaila, ua pomaikai kaua. A e ola ana no kaua i ka kaua hanai ke nui ae oia mahope aku, mahope iho o keia mau olelo a Wailuku me kana kane, olelo aku o Wailuku i kana kana, e kii oe i ka laau e pai ae i kumu waiu, ae mai la no hoi kana, aole he manawa o ka hele ana aku o Puueo, hoi mai ana me ua laua nei o ka hana koke iho la no ia ia manawa a pau, a hamo aku la ma na waiu o ua wahine nei, a ai hoi kekahi maloko, aole no i liuliu, ua kau koke ka waiu ia manawa me ka maikai loa, a hanai iho la no hoi i ka waha o ua kaikamahine nei (Oia kekahi hana akamai loa a ko kakou poe kahuna kahiko loa, a pela no hoi ko'u ike ana i kekahi mau wahine ma ko'u aina hanau ma Maui iloko o ko'u mau la kamalii.

            Nolaila, aole paha i loaa i na Haole keia ano la a Hawaii nei, no ka mea, i na e make ka makuahine, a no ke kau ole paha o ka waiu, a lilo aku paha na hai e hanai no ke ino o ka waiu, alaila o ka waiu o na holoholona Bipi a Kao paha ke hanai ia na keiki, a ke ola nei ia mau keiki i keia wa a ua make kekahi, aka, aole pela ka hana a keia lahui iloko o ka manawa i hiki ole mai ai na holoholona ma keia Pae Aina ua imi no lakou i na laau kupono no ka hookau ana i waiu me ka hanau ole i ke i ke keiki a kau ole paha o ka waiu).

            Nolaila, ua pau ko'u hoakaka ana no keia mea mahope iho o keia hana ana a Wailuku me kane kane, ua hanai malie laua nei, i ua kaikamahine nei, me ka hemahema ole i na pono a pau o ke keiki, a he kaikamahine nui ole mai o ka uwe ana ke awe mai ka? he waiu no, hookahi no hanai ana i ke ao a me ka po, a oia kekahi mea hilu loa i ka hanai ana i keia kaikamahine, mai kona wau uuku a hele wale no, nolaila, ua nui ka olioli a me ka makemake hanai alii o Puueo a me kana wahine no keia kaikamahine, a ua lilo ka ua kilihuna a me ka pio ana i ke anuenue i ka po a me ke ao, i mea kahiko mau no ko laua hale, "a he hoailona no hoi ia e pili ana i na alii, " a i na e hele pu o Puueo a me Wa@laku me ua hanai nei a laua, ma ka laua wahi e hele ai, alaila, e ike mau ia no auanei keia mau hoailona i olelo ia. (Aole i pau.)

KA MOOLELO O IOSEPA KAMIKA.

            O Iosepa Kamika, ka mea i kohoia, ma ka moolelo i hala ae nei, a kakou i heluhelu ai, he mea kahaha nui ia keia mea; a he nui ka poe e hoole ana, me ka olelo iho, he hoopunipuni, aole ke Akua e hoike hou mai ana ia ia iho i ke ao nei, ua lawa kana olelo maloko o ka Baibala, a eia kana euanelio ke haiia nei ma ka honua nei; aka, e noonoo iki kakou, a e hoomaopopo hoi. O ke Akua kai olelo pinepine mai i ko kakou mau kupuna, ma na moeuhane, ma na hihio, a ma o na anela la, no na mea e hiki mai ana; a ua wanana mai na kaula mai kinohi mai, no na mea e hiki mai ana mahope.

            O na lunaolelo kekahi i hoike mai no keia mea, a ua palapalaia maloko o ka lakou mau episetole, a ma na hoike ana. Oia no kai olelo hou mai ia Iosepa Kamika, i keia mau la, no kela buke i hunaia ma ka lepo, a me ke ao ana o ka euanelio mau loa, a me ka ka houluuluia o kona poe haipule ma kahi hookahi, a me ka hiki ana mai o ka Haku, a me na pilikia ma ka honua nei.

            Aia ma ka Hoikeana ma Ioane, 14:6. A ike aku la au i kekahi anela hou e lele ana iwaena o ka lani, me ka euanelio mau loa, e ao ai i ka poe e noho la me ka honua, a i ko na aina a pau, a me na ohana, a me na olelo, a me na lahui kanaka a pau loa. O keia anela i ikeia e Ioane, oia kai hoounaia mai e ke Akua, e hai aku i ke ao ana o ka euanelio o Iesu Kristo o ka poe haipule o na la hope.

            A no na mea e pili ana i ka euanelio o Iesu Kristo, alaila, e kamailio no kakou malaila, no ka nui loa o na ekalesia ma ke ao nei, e kue ana kekahi i kekahi, a he nui hoi na kanaka e alakai ia nei iloko kela ekalesia keia ekalesia; aka, in a kakou e hoomaopopo i ka olelo a Paulo ma Epeso 4: 5-6. Hookahi no Haku, hookahi manaoio, a hookahi hoi bapetizo ana.

            Nolaila, hookahi Haku o Iesu Kristo, a hookahi manoio ana, o ka manaoio ia Iesu a me kona Makua, a me kana mau kauoha, a hookahi bapetizo ana, o ka bapetizo ana i bapetizo ia'i o Iesu Kristo e Ioane, a Paulo hoi i olelo ai ma Rom 6:4. Nolaila, ua kanu pu ia kakou me Kristo ma ka bapetizo ana.

            Mamua o ko Iesu Kristo hiki ana mai ma ka honua nei i kinohi, e kukulu i kona ekalesia, ua wanana mua mai na kaula, o Isaia 40:3-6. Ka leo o ka mea e kala ana ma ka waonahele,e hoomakaukau oukou i alanui no Iehova, a e hana i kona mau kuamoo i pololei. Aole o Isaia i ike i keia kanaka o Ioane bapetizo, aka, ua wanana mai me ka uluhia i ka uhane o ke Akue. He kanaka no o Ioane ua like me kakou, ua hanauia mai e Zakaria a me Elizabeta, i ke au ia Herode ke 'lii o Iudaia.

            Ua hoouna mai ke Akua i kona anela ia Zakaria, no Ioane, aka, mai ka wa o Isaia a hiki mai o Ioane, he haneri makahiki paha a oi ae; a i ka hiki ana mai o Ioane e hoomakaukau i na kanaka no ka Haku, e noho ana kekahi poe ia wa, he poe haipule i ke Akua, e kukulu ana i na luakini a me na hale halawai; o keia poe haipule, e manaoio ana no lakou i ke Kauoha Kahiko, a me ka Mose, oia no hoi na Parisaio a me na Sadusaio.

            He poe manaoio keia i ke Akua, aka, - ua hoole ia ko lakou manaoio e Ioane, ma ka olelo ana. E ka hanauna moonihoawa, nawai oukou i ao aku e holo i pakele i ka inaina e kau mai ana? Ao mai la o Ioane i ka bapetizo ana no ka mihi, a hele nui mai la na kanaka io na la, a bapetizo ia iho la lakou eia iloko o ka muliwai o Ioredane.

            A o Iesu Kristo kekahi i bapetizo ia iloko o Ioredane, a pii mai la ia mai ka wai mai, hamama ae la ka lani nona, a iho mai la ka Uhane o ke Akua il@@a ona.

            I ko iesu Kristo noho ana ma ka honua nei, e hana i ka hana a kona Makua, ua waeae la oia i kekahi poe he umikumamalua, a hoouna aku la ia lakou e hai i kana euanelio ma na wahi au kanaka, a o ka mea manaoio e bapetizo ia oia, nolaila, na hele na lunaolelo a ua hai aku i kana euanelio i na kanaka, a ua bapetizo ia lakou maloko o ka wai.

            Ua nui na mea i oleloia maloko ka Kauoha Hou, no kona ekalesia a me ka bapetizo ana; ua hoakaka lea mai o Pet. 3: 20-21. I ka poe i hoomaloka mamua, i na la o Noa, i ka wa i kakali ai ko ke Akua ahonui i ka hoomakaukau ana i ka halelana, malaila i hoola ia ai kekahi poe uuku ma ka wai, ewalu hoi lakou. Ma ia mea, o ka bapetizo ana, ka mea i hoailona ia, oia ka mea e hoola mai nei ia kakou, aole nae o ka holoi ana o ka paumaele o ke kino, aka, o ka hoomaopopo i ke ala hou ana o Kristo.

            E like me ka Mose kau ana i ka nahesa keleawe ma ka waonahele, he hoailona ia no ko Iesu Kristo kauia ana ma ke kea; a pela hoi ka bapetizo ia ana o ka honua iloko o ka wai, a koe ole na mauna kiekie, a ku mai la ka honua mai loko mai o ka wai, oia ka mea e hoola mai nei ia kakou. Nolaila, he hoailona ia no ke Keiki a ke Akua, e bapetizo ia ai iloko o ka wai, a ma o na la kakou e ola ai, ke manaoio ia ia, a me kana mau kauoha. Nolaila hoi, o ka bapetizo ia ana iloko o ka wai, he hoailona ia o ke kanu ia ana o Iesu Kristoiloko o ka honua; a ola mai la o Kristo mai ka make mai; pela hoi e pono ai kakou ke hele ma ke ola hou, ka poe i kanu pu ia me ia ma ka bapetizo ana.

            Nolaila, ua waiho ia mai o Kristo i kumu hoohalike, i hahai kakou ma kona mau kapuai. A mai ka wa o Iesu i ola mai ai mai ka make mai, haawi mai la oia i ka mana i kana poe humana ; eia uo na ouli kupono e pili pu aku ana me ka poe manaolo mai ia'u, ma ko'u inoa lakou e mahiki ai i na daimonio, e olelo no lakou ma na olelo e, e inu no lakou i na mea make, aole lakou e make, e kau no lakou i ko lakou lima maluna o ka poe mai, e hoola ia lakou.  A pii aku la o Iesu i ka lani, aka, aole oia i waiho mai i kana poe haumana a nele ; na hoouna mai oia i ka Uhane Hemolele, i kokua no lakou ; a ua ku na kane a me na wahine, na keiki a me na elemakule, e wanana e like me ke kuhikuhi a ka Uhane.  A mai ka wa mai i kaua poe haumana, ua noho lakou me ka hoomanao i kana mau kauoha.  A mahope mai, ua hoomaau nui ia kana poe haumana a me kona ekalesia.

            Kaahele ae la lakou ma na mauna, e pee aua iloko o na lua a me na ana, nolaila, ua ike mua no lakou ia mau mea, e hoomaau ana uo ko ke ao nei ia lakou, no ka mea, ua wae ia lakou no loko ae o ke ao nei, nolaila i olelo mai ai ka Palepale Hemolele ; o ka poe a pau e noho haipule ana ia Iesu Kristo, e hoomaau ia no lakou, a no ia mea, ua haalele kekahi poe i ka enanelio a Kristo, a lilo i ka euanelio okoa, nolaila, ua kahaha o Paulo, no ka emoole o ko lakou haalele ana mai.  Ua hai o Paulo i keia mea, i ko Galatia poe, ma ka Mok. 1: 6.  Ua kahaha iho no au i ka emoole o ko oukou haalele ana mai i ka mea i kono aku ia oukou iloko o ka euanelio a Kristo, a lilo i ka euanelio okoa.  Aole hoi he euanelio okoa ia ; aka, ke manao e hookahuli i ka eunelio o Kristo.  Ina paha o makou, a he anela paha mai ka lani mai, e hai aku i ka eunelio i kue i ka makou i hai aku ai ia oukou, e hoomainoino ia oia.  Ua ike o Paulo, a hala ia, e komo mai kekahi poe e ae Pela ma Oih. 20: 29.

            No ka mea, ua ike no au i keia, a hala au, e komo mai no na iliohae ino loa iwaena o oukou, aole lakou e minamina i ka ohana.  E ku mai kekahi poe kanaka no oukou iho, e olelo i na mea hoopuuipuni, e hoohuli i na haumana mamuli o lakou, no ka mea, e hiki mai no mamua ka hanle ana.  Nolaila, aole he mea kupanaha ke hoano e o Satana is is iho, me he anela la no ka malamalama, aole no hoi he mea kupanaha ke ano hou na kahuna nona, pela o Paulo ma II Kor. 11: 13-15.

            E like me ka olelo a Paulo, a kakou i heluhelu mua ae nei, hookahi Haku, a hookahi manaoio, hookahi bapetizo ana, a hookahi Akua ; nolaila, hookahi ekalesia wale no kona.  Aole he mau haneri, aka, ua olelo o Iesu i kana poe haumana, he nui ka poe e hele mai ana ma ko'u inoa, me ka olelo mai eia ka Mesia maanei, a aia ma o, a he nui na mea e hoopunipuni ia e lakou, a no lakou e hoowahawaha ia'i ka aoao oiaio.  E hooili mai ana ke Akua i ka hoopunipuni ikaika maluna o lakou, i manao lakou i ka mea wahahee, he oiaio.

            Nolaila, ua lanakila ka holoholona a Ione i ike ai, e hoea mai ana mai loko mai o ke kai, a kaua aku la i na haipule, a lanakila maluna o lakou a ua haawiia mai la nona ka mana maluna o na ohana a pau, a me na lahui kanaka a pau, a me na olelo, a me na aina a pau.

            A hiki mai ka manawa a ke Akua e waiho mai ai i kona mana iho ; alaila, e lanakila kone poe haipule maluna o ke ao nei, a ua lakou e hoomalu pu me ia iloko o ke tausani makahiki ; no ka mea, aole e lanakila na ipuka o ka po maluna ona.

            Aka, e pono e hookoia na wanana o ka Palapala Hemolele, ua hoouna mai ke Akua i kana Keiki i ke ao nei, a ua haawi mai i ka mana maluna on a e lanakila maluna o na mea a pau, a ma o na la hoi ke Akua i hana ai i ka lani a me ka honua, a me na mea a pau, a he mana kona e kauoha aku i na regeona anela e luku aku i ka poe nana ia i kau ma ke Kea ; aka, i ko ai ka Palapala Hemolele, ua ae aku oia i ka make kupapau a hala na la ekolu.  Ua lanakila anei ka make maluna ona? Aole, no ka mea, ua hoola mai ke Akua ia ia, me ka wehe iho i na apo o ka make, aole hoi e waiho i kona mea hoano e ike i ka palaho.

            Nolaila, aole e lanakila na ipuka o ka po maluna o kona ekalesia, aka, i ko ai ka Palapala Hemolele, nolaila, na kaua aku ka holoholona i hoea mai ai mai loko mai o ke kai i ka poe haipule, a lanakila maluna o lakou.  Aka, ua ike hou ia ka anela. e Iona, e lele ana iwaiena o ka lani me ka euanelio mau loa, e ao ai i ka poe e noho la ma ka honua, no ka mea, ua hoomaau ia ka ekalesia o Iesu Kristo, e ka holoholona i hoea mai ai mai loko mai o ke kai, o ka mea i kue mai, a hookiekie ae la ia ia iho maluna o na mea a pau i kapaia he Akua, oia hoi me he AKua la, e noho ana iloko o ka luakini o ke Akua.

            Nolaila, ua oki ia ke poo o kona poe haipule, ua kuni ia me ka hao wela, ua kaulia iluna o ka laau, ua puhiia i ke ahi, no keia mea, ua lawe ke Akua i ka oihana kahuna mai ka honua aku, no ka mea, aole lakou makemake ia mea, a pee aku la ka wahine ma ka waonahele, ma kahi a ke Akua i hoomakaukau ai nona, a ke lawe wae nei ko ke ao nei i ka oihana kahuna, me ka haawi ole ia mai e ke Akua ; aka, ua maopopo no, i ko ai ka Palapala Hemolele, ua maopopo no, i ko ai ka Palapala Hemolele, ua hoano e hou o Satana ia ia iho me he anela la no ke Akua, a pela hoi na kahuna nona, me he poe kahuna la no ke Akua, aka, ma ka lakou hana o ike ai kakou ia lakou, no ka mea, ua hai mai o Iesu, eia no na ouli kupanaha e pili pu aku i ka poe manaoio mai ia'u, ma ko'u inoa lakou e mahiki ai i na daimonio, a e hoola ia na mai, ma ke kau ana o na lima, me ka pule ana i ka inoa o Iesu Kristo, a me ka hame ana i ka aila i hoolaaia ma ka pule no ka poo mai.                  (Aole i pau)

ALOHA ALII, ALOHA LAHUI.

KA MAKE ANA O KAMEHAMEHA-KA LOLI ANA O KE ALOHA OIAIO-KA LOLI ANA O KA AINA A ME NA MEA MALUNA-NA KUMU I EMI AI KA LAHUI-E OLA KA LAHUI!

HELU 5.

            O ke ano mau no ka o na keiki aea, a haalele wale aku la no i ko lakou mau aina, mau home, mau makua, aole no ka ia he mau keiki ku i ka pno, no ka malama ana i ka pono o ka lehulehu, aole no ka lulu ana ia mau anoano o ke aloha iloko o ko lakou mau kahua naau, a pela io no.

            Ia wa, lalau koke aku la au i na buke kanawai a pau o keia aupuni, heluhelu koke iho la au a pau loa na buke, a hoiliili mai la a akoakoa, hoohui ae la au i ka huina kanawai, a hoohui mai la wau i ka huina aloha ole o keia poe i koikeia maluna, nana aku la

a akoakoa, hoohui ae la au i ka huina kanawai a hoohui mai la wau i ka huina aloha ole o keia poe i koekeia maluna, nana aku la au me kuu wahi ohe nana, i loaa ia'u ka huina ola o keia lahui, a maopoo iho la ia'u ia huina, unuhi ae la au i kuu wahi ana kaupaona.

            Kau aku la au ma kekahi aoao ia huina kaumaha o na kanawai, ia huina aloha ele o keia poe, ma ka aoao hookahi, a me ka huina ola o keia lahui ma kekahi aoao.  Nana pono iho la au i na mea oi o ke kaumaha, nana iho la au ma na hua helu, elua paona ka oi o ke kaumaha o na kanawai, mamua o ka huina ola o keia lahui a me ka ikaika iloko o lakou.

            Ku iho la au me ka hoomaopopo a me ka noonoo nui no keia mea, a liuliu, hoomanao mai la au i kekahi kumu laau nui a'u i ike ai, me kona mau lala e holo ana i o a ia nei me ua lau, aole nae he ulu o ka mauu malalo, he oneanea wale iho no.  Hoomanao hou mai la no au no kekahi papa nui a'u i ike ai, e waiho palahalaha ana maluna o kekahi wahi kahua, i ulu nui ia e na mauu, aole i hala eono mahina, aohe mea ulu malalo ona.

            Nana ae la au ma na paia o kuu wahi rumi, he mau hua palapala e kau ana, a penei ka heluhelu ana.  E like me kou ikaika e Hawaii, a pela no hoi au e ikaika ai ko'u hewa, a e like no hoi me kou kaumaha e kanawai, a pela no hoi au e kaumaha ai o hewa.  E like no hoi me kou hookiekie e kanawai, a pela no hoi o hewa e hookiekie ae ai, a e like no hoi me kou loihi a ku i ka lani e kanawai, a pela no hoi o hewa e ulu ae ai a pa i ka lani, no ka mea, hookahi no o kaua makuahine nana i hanau mai.

            Ia wa, akahi no a akaka ia'u, eia ka hookahi no o laua halau i aoia'i, eia ka hookahi no a lana kumu.  Olelo hou mai la o hewa, in a no hoi oe e kanawai e hoemi iho ana ia oe, a pela no hoi au.  A koho iho la au, eia no ka keia mau mai o kakou e omino nei kakou.

            E ka põe e heluhelu mai ana, mai kuia ko oukou mau manao no ka'u mau hoike laula, no na hana e pili ana i kei hookuina.  He makemake au ma ko'u ano kauka, e huli i ke ano o na mai, e like me ko'u ano mau.

            He mea oluolu no hoi ia'u ma ko'u ano kauka, e huli i na mai iloko o ko kakou aina a me kakou lahui kanaka.  E ahonui pu mai oukou ma ko oukou noonoo akahele a me ka hoomaopopo oiaio, oiai, o ka'u mau hoakaka e pili ana no na make, na poino, i ili mai maluna o kakou, aia no ia maloko o ka ikaika o ka hookuina mai o ke Au Hou a me kaua mau hana, kona mau mana, kona aloha pumehana, kona aloha i na keiki maua ole, na wahine kane make.

            Ke hai pu aku nie no hoi au ia oukou, o keia hookuina weliweli, weliweli ka ikaika, weliweli ke kaumaha, a me ka haalele pu ana o na poo aupuni oia mau la, i ka poe ia ia na makaukau no ka malama ana i ke ola o ka aina a me ka lahui, o ka pono.  A he mea pono no hoi i na poo aupuni, oiai, e aloha ana i ka lahui, e waiho i mohai me ko laua mau lima ponoi, a me ka poe ia ia na makukau mawaena o keia hookuina, a me ka nana pu aku hoi i ka puka ana mai o ka aina, a me ka puka ana mai o ka lahui kanaka, na kahuna, na kaula a hiki wale mai ka aina i keia hookuina, a me ka nana pu aku hoi i na makaainana e ola aua ia mau la, a me ka hoohaahaa pu iho imua o ke Akua, a waiho i ka mohai.

            Ke kuhikuhi aku nei au ia oukou, e nana aku oukou maluna, no ka'u mau wehewehe no ka uwila a me ka hekili, a me ko laua mau ikaika a me ke ano eehia weliweli i loaa mai ia oukou i kekahi wa.

            Ke hoole aku nei au ia oukou, he mama ia, ua oi aku ika ikaika o keia.  Eia nae ka mea kupanaha, aole e hiki i ko oukou mau maka ke ike, oiai, ua hiia mai ko oukou mau maka ke ike, oiai, ua uhiia mai ko oukou mau maka e na pale lahilahi o ko ke Akua mana, aia malaila kahi pilikia o oukou, oiai, ke kulou mau nei ko oukou mau maka ilalo i ka honua, a me ko oukou paulele ana i kona mau momona haumia, a in a no hoi e nana aku iluna, aole no e hiki ke naua aku, no ka mea, ua uhiia mai e na pale lani, no ka mea, ma keia hookuina ua hoino pu ia me ke Akua.

            O na poino e halawai mai ana me kakou, aia no ia i ka hora a kakou i noho nanea ai, a me he aihue la hoi, a e like hoi me na hoku i ka wanaao, ka helelai mai me he mau paka ua la, a nui ka waha i ke kahea ana, ana, "Emi ka lahui e!  emi ka lahui e!" O ka hewa ke kumu o ke emi ana o ka lahui, o ka hookuli ke kumu o ka emi ana o ka lahui, a me ka noho nanea.

            Ina oukou i makemake e lohe i ko ke Akua mau leo elua wale no, penei ke kahea ana mai, "E mihi oukou, a e ola oukou, a me ka oukou mau keiki, a me ko oukou aina, oia wale iho la no kopa mau leo elua.

            Pehea la ko oukou mau maka ke nana'ku i kekahi poe lehulehu, i kahikoia me na kahiko kau, a me na pahi ma na aoao, e hele mai ana e halawai me oukou, me he mau koa enemi la?  Pehea la ko oukou manao, makau paha oukou, weliweli paha?  Pela no kekahi poe, a o kekahi poe hoi, laua ka manao e lanakila ana no, he hiki i ke kanaka ke hooakamai aku ia.  Aole pela ka hiki ana mai o na pilikia ia kakou ma keia hookuina.

(Aole i pau)

Ke Kumu Lehua o Panaewa i wili ka okai.

E KE AU OKOA E ; - Aloha oe:

            Ua kunokunou mai ke poo o ke keiki poo ua lipilipi o Hilo, ma ka nupepa Au Okoa, Helu Akahi, o ka la 21 o keia mahina, i ka hora o kou hiamoe nana ana.

            Ua hoike mai o Kauakanilehua i kana mau olelo hoino, i ka mea nona ka inoa malalo nei, me ka olelo mai, "Kipakuia kekahi Lunamakaainana o ka Apana o Hilo, mai loko ae o ka Ahaolelo."

            Ke pane aku nei au ia oe, ma na kumu hea au e kipakuia'i?  Aole au i ike i ke kumu oia koi ana au e kipaku, no ka mea, eha wale no kumu i oleloia ma ke Kanawai.

            1.  O ka lawa ole o na waiwai paa me na waiwai lewa.

            2.  O ka hewa o ke koho balota ana.

            3.  O ka ike ole i na mea naauao a me ke Karaima.

            4.  O ka lawa ole o na makahiki.

            Aka, o keia mau kumu a pau, ua hele a piha kuu poo, a kuineki i na papahele oluna, a hanini i ke one o Waiolama, iliki aku ku ke ko-a i ke kahawai o Waiakea.

            Ke pane aku nei au ia oe me ka aila manoi o kuu waha, no ka mea, o kau mau olelo i hoolaha ai, aole ia he kuleana a ka Aha Kau Kanawai e nana mai ai, no ka mea, ua hapala wale no oe i kau mau olelo me ka manao huhu, hoomauhala, no kou inaina i ka haule ana o kou balota, i ka la i koho ai, mai haule ole no oe, e haawiia kou balota i na kanaka o Kapohoiki a me Kapohonui, in a ua hookohuia oe e Hoolehelehekii me Hokohoka, i Pinaio.

            Ua hoolaha mai oe i kekahi palapala a'u i kakau ai ma Hilo, mamua iho o kuu holo ana mai i Oahu nei, me kou manao paha o ko'u mea ia e hilahila ai a e heneheneia ai@  Ke i aku nei au ia oe, aole au e hilahila ia mau olelo au, no ka mea, o kau olelo i kakau ai ma ka nupepa, he mau olelo ia i hoololiia e oe, aole hoi e like me ka'u i kakau ai.

            Nolaila, ke pane nei au ia oe, ina o oe ka oi o na kanaka akamai i ke kakaulima, alaila, ke makemaie nei au e hoi mai oe e noho Kupakako, no kai o Pakaka a me Leleo, no ka mea, ua hele na pahu aila a hanini ma ka Nihomole, e ka hoa!

            I aha mai nei oe i paukiki mai nei?  A hanee ko kikala i ka pauku kakaki o Ulakoheo, o ua mea he hoopuka i ka olelo kukalekale.  O kela palapala i hoolahaia ma Hilo ua waiho aku au ia palapala i akaka ai ko'u aloha i na makaainana, ka poe hoi nana au i hoouna e hele i ke Kau Ahaolelo, no ko lakou mau pilikia, e like me ka luna koa imua o na enemi, e like me ka Paulo hana ana ma Ierusalema.  Oih. 20:22.

            Ua olelo mai oe, he manao ko'u e hoopau i na Luna Aupuni o Hilo, ke pane aku nei au ia oe, aole a'u olelo hoolaha pela, ina oe e pii aku a Juna o Maunaloa, kahea iho oe i nakahawai o Wailuku, ua lohe anei oukou i ka olelo kukala a ka Lunamakaainana o Hilo, e olelo ana, e hoopauia ana na Luna Aupuni o Hilo?  E hoole mai ana na oopu okuhekuhe a me ka oopu nopili o na loko o Waiakea.

Ke hoike aku nei au ia oe me ka pololei, i hele mai nei au e kapili i kuu lae i ke keleawe, i ole e naha i na poka o ka la hoouka kaua ma ka Hale Ahaolelo, no ka mea, na ike au, o kau mau olelo pane a pau, he mau olelo ia na ka enemi, e like me Daniela i ohumuia'i i ka manawa o Dariu, B. C. 712.  Dan. 6: 4-17.

            Owau o ka Lunamakaainana o Hilo, eia au ma Honolulu nei i keia manawa, aole i moe kuu poo ma ka uluna, no na mea e hana ia'i iloko o ka Hale Ahaolelo, no ka mea, o keia Kau Ahaolelo, he Kau Ahaolelo hana nui no ia, nolaila, aole o'u makemake e noho wale maanei, me ka manao e haalele i ko oukou mau pono e na makaainana o Hilo, aka, ua hele mai au ia nei, e hui pu me na Lunamakaainana o na Apana e ae, i holo ai ke kuikahi mawaena o na aono elua, a he mea keia i hana ole ia mamua ae o ko'u komo ana.

            Nolaila, e na makaainana o Hilo, e hooikaika ana no au i ko oukou mau pomaikai, e like me ka Aeto e lele ana ma ka maka o ka la, me ka makau ole i ka wela o ka la.

            Na olelo a pau o Kauakauilehua, he mau olelo ia i ane like me ka punawelewele, he poi i ka nalo kana loaa, no ka mea, e hoi aku no kana mau olelo maluna ona, nana e iliki aku loa ke lelo i ke one o Waiolama, ua kuhi paha oe he hahau aku ko lae, hualele ka puniu i keia mea o ka lauoho, hele wale ke panoo me he paka la.

            Ke hoopau nei au i ka'u olelo pane maanei, a i pane hou mai oe, e kukai auanei ka ila o Puapuakea.  Me na keiki hoonoho hua ko'u aloha.                                                D. B. Wahine.

            Honolulu, Apr. 27, 1870