Ke Au Okoa, Volume VI, Number 3, 5 May 1870 — Page 1

KE AU OKOA

BUKE VI --- 3.}

HONOLULU, -TARADE, MEI 5, 1870.

{$2.00 NO KA MAK.

 

"KE AU O KOA."

E HOOPUKA MAU IA'NA I

KELA POAHA KEIA POAHA,

MA KA

HORA EWALU O KAKAHIAKA.

ELUA DALA NO KA MAKAHIKI hookahi, he kanalimikumamalua nupepa ia. E uku e ia ka DALA HOOKAHI no ka hapalua maka hiki mua, iloko o na mahina mua eono; a pela hoi ka lua o ke dala, e uku e ia i loko o ka hapa hope o ka makahiki. 

 

---------

 

No ka ua paupili.

 

Hiehie aloha ka lai o Lele,

I ka ua pauplil i ke kula,

I ka lelehuna mai i ke pili.

Pipili mamau ai ke aloha.

 

(Chorus Repeat.)

 

E hoomanao! E hoomanao!

E homanao i ke aloha.

 

Ka nenee mai a ka ua paupili.

Halii mai la ia wehi.

E aloha ae ana i ka pua o ke pili.

Ka iniki wela@ia me he ipo la

Cho. - E hoomanao!

 

Oia awawa uliuli o Harona,

Ke hoopulu ia mai la e ka n@,

E na kulu wai o ka na paupili,

Ulu pe ka liko o ka lehua. 

Cho. - E hoomanao!

 

O Maunahoomaha i ka wao,

I ke kui ohele nee i ka papa,

Ia uka haiamu i ke ala.

Hoohihi ai ke aloha e noho.

Cho. - E hoomanao!

 

Kilohi ae au i Lihau,

Ke hoope ia mai la no nae,

E na hunehune o ka wai o uka,

Eioelo ai na pua oia wao,

Cho. - E hoomanao!

 

Ka ua mai ana o pua rose,

E hoi e kui i lei hoohie no ke kino,

Ke hea mai nei ke ano liu la,

E hoi i ka lai o ke kaona.

 

Bone. 

 

 

KA MOOLELO HAWAII.

 

NA S.M. KAMAKAU.

 

HELU 30.

 

          I ka wa e pau ai ka umu puaa, me ka umu ilio maoli, a o ka awa no ka mea nui he awa hoohainu no ua poe kinolau eepa nei, ke makaukau nei ka umu e huai, aia ke momoe mai la na kino hooweliweli o ua poe nei iloko o ka wai, mai ka poe nui a ka poe liilii, aia ka awa ke hoohainu ia la, aia ka ilio ke hanai ia la, aia na mea a pau ke hanai ia la, ke pule nei ke kahu moo, a ke lawe aku nai i kana ope ukana, a haawi aku nei ma ke alo o ka aumakua i manao ia e kakuai, a o ka lilo aku la no ia, aole paha e hala na la elua a ekolu paha, alaila, o ka hoi mai la no ia iluna o kekahi makamaka e noho ai, a e keehi paa ai paha, alaila, olelo mai la no ia, e inu mau oukou, a e kahea ae i ko'u inoa, a i ai oukou i ka ai e hoohiki ae i ko'u inoa, a o ka oukou inu ana, a me ko oukou ai ana o ko kakou ai pu ana no ia, a oia ko 'u mea e ikaika ai, a i makemake oukou e ikemaka ia'u, alaila, e ikemaka no oukou, a pela no e ikemaka ai na makamaka me ka hoopau i ko lakou hoomaloka, a o ka ike i kinohi, oia ka wa e kuili, a o ka haka e noho ai ka uhane o ka mea make, ua inu mau i ka awa i ke kakahiaka a me ke ahiahi oia ka mea e ikaika ai ka uhane o ka mea make, a pela e ikaika launa ole ai na poe kinolau eepa nei, a o ka ikaika mau o na uhane o ka poe make, oia ke kumu e uku mai i ka poe ola, ma ka pomaikai o ka noho ana, a me ka wehe ana i kekahi mau pilikia a me na ulia wale, a o ka hoouku ana i ka ia a me na loaa, a o ke ao ana mai i kekahi mau laau lapaau no ka ohana iho, a o ke ao ana ma ke ano ike kilokilo a kaula, a ike akaku, a hoala uhane o ka poe kupua, a kupuna a mau hoahanau.

          O ke kakuai ana o na makaainana, e lilo i kinolau moo, aole e kukulu ia na hale puaniu, i kukulu ia na hale puaniu, i wahi e hoolulu ai i ka ma ia, i ka niu, i ka awa, i na kapa olena, i na kapa puaniu, a me na kapa halakea, a pau halakea a me na ala a pau, a malaila e hanai mau ai i ka ai, me ke kamaha mau o ka poe kahu akua i ikaika ka uhane o ka mea make, a he ikaika io no, i ka wa e hoi mai ai, aole o kana mai ka ikaika o ka uhane o kekahi poe, me he makani ikaika la, e naueue ana ka hale, a e naka ana ka honua, a e lilo liilii ana na pohaku nui me ka ike ole ia aku o ka lima kanaka, a pela iho la ka hoi ana mai o ka uhane iluna o kekahi poe, a o ka hoi ana mai o kekahi poe uhane e noho iluna o ko lakou mau haka, ua like me ka huila o ke ahi pauda mai ka waha aku o ka pukuniahi, a me he anapu ana la na ka uila, a oia ka manawa e hoi mai ai kekahi, a he nui wale ke ano o na uhane ke hoi mai iluna o na kahu akua, a pela paha o Kamehameha I, i manaoio ai i ka nui o na kahu akua, a me ka nui o kona mau kini akua he nui loa.

          O ke kakuai ana o na makaainana, he mau hale puaniu no kekahi poe e kakuai ai, he ii ulaia no me ke kuina kapa olena no, a me ka awa, a kakuai aku la iloko o ke kinolau o ka moo, ke pono no hoi ka hana ana, a o kekahi poe no hoi, ua hookoe ia mai, a oia na ope welu e hoolani ia mai ke @ilo ole i mau kino moo.  O ka lilo ana i moo ma ke kino o ka aumakua, ina o Kalamainuu ka aumakua kinolau i kakuai ia aku ai, alaila, e lilo no kekahi kino i mano ma o Kamahoalii la, a e lilo ana no i kino Pele ma o Ailaau la, a e lilo ana no hoi i hekili, a i uila, a komo iloko o kekahi mau ouli o ka lani, a e lawe no o Kukauakahi ma kona ano mana akua a lele i ka lewa he pueo, a mailoko mai o keia mau kino lehulehu i komo ia e kekahi kino kanaka, a laila, mailoko mai oia mau kino lehulehu, aia malaila i puka mai ai na kapu hoolaa he lehulehu loa a oia ka mea i olelo wale ia he mau akua ia mau mea ai, aole o ka oiaio pela, he okoa ke akua nona ia mau kapu penei: O Kaneulupo ke akua a kekahi kanaka i hoomana ai, a i ole ia nana kupuna, a i ole ia, ua pili koko i na kupuna, alaila, ua pili wale mai no i no mamo, me ka hoomana ole, a me ka hoomanao ole o ka lakou poe mamo me ka manao ole ia poe aumakua a na kupuna, aka, ua ai ku, na ai hele i ua mau mea nei i hoolaa ia, o ka mea i hoolaa na Kaneulupo, oia ka mo@, ke kakala hooulu, ka momoa waa, na ia ka pu o ke kai, ua kapu loa keia poe ke ae ae i ka uahi o ka moa, a me ka uahi o keia mau ia, a o ka poe i loaa i ka mai hoopai maluna o ka lakou poe mamo, aole e ola i ka poe kauka lapaau, aole e ola i ka poe akamai i ka lapaau ke kii ole ia mai ia ano mai kamaaina, he mai paakiki loa ke ano mai kamaaina i huipu me ke ano mai malihini a huipu me ka fiva.     

          Pela no ko Kaneikokala, he okoa ke kino o ke akua he mano, aka, ua hoolaa ia ke kokala i mea kapu no Kaneikokala, a ua pili ka hoomana kahiko ana ia Kaneikokala a na kupuna, aka, he lohe pepeiao paha ko ka poe mamo me ka hoomana ole, aka, o ka mokuaina okoa o Kahikinui mai kela palena a keia palena, ua hoomanao okoa kela aina, a he malihini paha ka mea koe, ina e ike mai i ke kokala, a i ka uahi o ke kokala, ua pau i ka naholo me ka ai ole i ka ai i ka ia i kuhinu ia i ke kokala, a i ai i ka ai, a i ae i ka uahi a me na mea i kuhinu ia i ke kokala e pau ana no i ka make, a ua makau loa ma ka lohe lakou, a ma ka ikemaka i ka make ana o kekahi poe o lakou a ola ke k@@@ i hiki mai ai ka makau ia lakou a hiki i keia mana.  Aka, he mano kaulana o Kaneikokala no kana mau hana maikai.  Ina e make kekahi waa i ka moana, a ua naha liilii ka waa, alaila e kahea kekahi ia Kaneikokala, alaila, e hiki mai ana o Kaneikokala e hoopakele ia lakou, a e lawe ola a hoopae ola i ka aina, ina he umi a he iwakalua poe pio i ka moana, a e pau loa no lakou i ke ola, a e hoopae ola ia i ka aina, ina no Hawaii, e hoihoi ia no i Hawaii, a ina no maui, e hoihoi ia no i Maui, a he nui wale kana poe i hoopakele ai, aole nae e hiki i kekahi kanaka i pili ole ke kahea wale aku no me ke kuleana ole, aia no o ka mea kuleana, a he poe mamo, a he pulapula paha, alaila hiki ke hoolohe ia mai. 

          I keia mau makahiki kokoke, aia kekahi kanaka ke ola nei ma Kipahulu.  I ka hele ana o keia kanaka, a waiho ana kekahi pueo make i ke alanui, a o na eheu me ka iwi wale no me ka paapu no i ka hulu, a ike kela ia, olelo iho la, ua kanaka nei, "Maua no hoi oe e ka pueo, heaha la hoi ko mea i make ai, e hoopohopoho iho ana i ka olemu, me ka olelo iho, ka poo ---a." O ka hemo no ia o ka uha i waho, oi hana wale ia e kahuna e hoihoi iloko ka uha a aole a hoi iki iloko, iwaho ka uha kahi i kaulai ai i ka la me he pauku aweawe hee la e kaulai ana i ka la, a e uwe ana i ka po i ke ao i ka make, a ku ke ino iwaho me ka mumulu o ka nalo, a hele mai kekahi kahuna, a ike iho la, me ka olelo mai.  "Ua hoopohopoho oe i ke poo o ka pueo me ka hoonaaikola."  A laila, hikiwawe ka waha i ka olelo "ae" ua hoo@umakaia au i ka pueo, ka inoa hoi, aole he mana i koe o na uhane ino, eia no ka hoi he mana no, o Iehova wale no ka'u akua e pule nei, a o Iesu, aole he mau akua liilii lapuwale.  Olelo mai ke kahuna, e haliu aku oe malaila e hana ai, aole na kekahi kahuna, aole oe e lapaau ia, a e ola wale ae no, me kou mihi oiaio aku i kou hewa, aia ua kanaka la, ua hoi ka uha iloko, aole i lapaau ia, ma ka mihi oiaio i ka hewa.  Aole e pili ka hoopai ia i kela kanaka i keia kanaka pili ole i ka poe i hoolaa ia iloko o ka pueo, he mea lapuwale ka pueo, he ia no ko Kula poe, a no ka Naalehu poe ma Kau, a he mea kiola wale iho i ke alanui.  Aka, aole he akua ka pueo, aole on a mana, he mea okoa ke akua, oia o Kukauakahi ke poo akua nui i hoolaa ma ke kino o ka pueo e hoike mai i kona mana ma ke kino lapuwale o ka pueo.  He mea kaulana ka pueo i ka wa kahiko no ka mana, a no ka hoopakele ana i ke ola o ko lakou mau kahu i hoopilikia ia ke ola no ka make,  Pela o Lonikinau, pela o Kapoi, Papaa, Kapehu, a me Kahiuka, o Kaahupahau.  A he nui wale ka poe i hoolaa ia mai ka pilikia o ka make, a i ke ola.  I kekahi wai kokoke loa iho nei, eia ma Lahaina kekahi kanaka o Napaepae kona inoa, ua nahaha ko lakou waapa ma ka moana o Pailolo, a ua pau ka nui o lakou i ka make, aka, ua pakele o Napaepae i ka pueo, mai ka la okoa ka au ana a po, a mai ka po a kokoke e ao, a pae ma Kapaakea ma nae iki iho o Kaunakakahi, he pueo ka mea i ola ai, a na ka pueo e kipai ma ka puu kai o na maka, a laila, ike aku la i ka aina, a pakele ke ola. 

          I ke au iho nei o ka noho Moi Liholiho Kamehameha IV.  Ua hopuia kekahi kaikamahine no Waialua, no ka holo nui maloko o ke kulanakauhale i ka la hoihoi ea o ke aupuni Hawaii, a he mea mau ka hele ana mai o na kuaaina i ka olioli o ke aupuni e olioli pu me ko ke alo alii i ka la 31 o Iulai o kela makahiki o keia makahiki a he la kaulana loa ia o ke aupuni, aka, ua hopuia ua kaikamahine la e na makai a ua hoopaa ia ma ka Halewai Hoopaahao o ka poe lawehala me na lawehala pio iloko o ka halepaahao me ka manao ia a ka wa kupono no ka hookolokolo ana, aka, he nui ka uwe o ua kaikamahine nei, a i ke aumoe, ua pau i ka hiamoe ka poe lawehala o ka rumi, a lohe ke kaikaimahine i keia mea e kipapai ana ma ka puka o ka rumi, a i ke kaakaa ana o ka maka o ke kaikamahine, e hamama ana ka puka, a ua puka ke kaikamahine iwaho, a e kau ana ka pueo iluna o ka pa, a ike ka pueo i ke kaikamahine i ka puka ana iwaho o ka puka a me ke pani ana i ka puka o ka hale, alaila, alakai aku la ka pueo ma ke kowa o ka Halewai me ka pa laau, aia no na luna makai me na makai e ala ana, a ua maalo aku la ke kaikamahine me ka pueo a pili ma ka aoao mauka o ke alanui Moi, a ma ka pili pa iho la ma ka aoao malalo a komo ka pueo ma ka pa o Keoni Miki, a ma kahi a ka pueo e alakai ai malaila no ke kaikamahine e hele ai, a puka ma ka aoao mauka, a hiki ma ke Alanui Maunakea a pii i uka, ma ke kowa o ka pa o Kaaione e iho ai i Kikihale, a hiki ma ka pa o Uilama Kivini Poomuku, aia malaila ka lio me ka puolo lole, a kau maluna o ka lio, o Waialua ka ihu me ke alakai o ka pueo a kahi i haalele ai ka pueo.  He akua anei ka pueo?  Ke olelo aku nei ke Kakau Moolelo, aole o ka pueo ke akua, he haili o ke akua ka pueo, a he wahi manu haahaa ka pueo ma ko Hawaii nei ohana @@@@, aka, ua hoolaa ia, a ua hookapu aku kekahi poe, aka, ua ike no ka poe kahiko, he mea okoa loa ke akua.  He mea hou ka Palapala Hemolele ma Hawaii nei, a ma ka nana ana, ua hoolilo ke akua i kona Uhane Hemolele ma ke kino i ike ia e ka lehulehu o ka naka.   "A ikea aku la ka uhane o ke akua e like me ka manu nunu." 

          Ua kamaaina ka lahui Hawaii, mai ka wa kahiko loa, a mai na kupuna kahiko loa mai o keia lahui, aia ke akua i ka lani, aia ma na wahi a pau loa o ka lani a o ka honua, ua piha ia ia na wahi a pau.  Eia kekahi mea nui i olelo nui ia e ka poe kahiko ma Hawaii nei, o ka make ana o ke kanaka, a hoopakele mai ke akua mai ka make mai, he make hoomainoino paha, a he make homo ia paha, he make hoopio ia paha, a me na make i hoopilikia wale ia mai paha, a oia na pilikia a ke akua e kokua mai ai, a hoopakele mai no ke akua i ka poe i kapaia he poe kanaka hemolele, a me na mea ulia wale, aka, he ae no ka poe hemolele i ka make, ke hai e mai ke akua i ka hope o ka poe pepehi hoomainoino, i na he make mainoino weliweli ka hope e loaa koke ana i ka poe pepehi hoomainoino, o ka hulihia o ke aupui, a o ka make weliweli mainoino o ka Moi nana i kena ka make, alaila, o ka ae no ia o ke kanaka hemolele i ka make, he hookahi kona kino e make, a he nui kona moepuu.  Pela o Kaopulupulu i ae ai i ka make me kana keiki o Kahulupue, no ka mea, ua hoike ke akua ia laua i ke alanui o ke ola o ka holo i Kauai, a ua hoike ke akua ia laua, e make ana laua ke hiki laua i Waianae, aka, o ka hope o ka poe nana e pepehi a e hookahe i ko laua koko, he make weliweli a he luku nui, a he au hulihia no ke aupuni, a e au hulihia ka ohana Moi a me na'lii o Oahu, a e lilo ka lahui a me ke aupuni no ke kai, a nolaila ua hooko aku o Kaopulupulu ke kahuna nui, ua pepehi ia a hookahe la ke koko o Kahulupue ma Waianae, a ua pepehiia o Kaopulupulu ma ke kaha o Puuloa.  Aole i hala na makahiki, ua hooko mua ia ka luku me ka make weliweli a me ke au hulihia o ke aupuni.  Aole i hala ka haneri makahiki mai ka make ana o Kaopulupulu, ke hooko ia nei kana mau olelo wanana kaulana no keia lahui a no ke aupuni Hawaii.

No na mahele nui o na kapu liilii.

          Ua maopopo ekolu no mau mahele nui o na kapu akua a kanaka i hookapu ai, a i hoolaa ai, a i lehulehu ai na kapu liilii i kela kanaka i keia kanaka, a koe aku no nae kekahi mau kapu liilii, a he okoa hoi ke kapu aupuni.  O ke kapu aupuni ke kapu mua loa, a oia ke kapu i mahele ia e Wakea ma, aka, o ka nui o na kapu liilii o ko kela kanaka o keia kanaka, aia oia mahope loa mai.  Eia na mahele nui o na kapu liilii o kela kanaka o keia kanaka.

Aole i pau. 

 

KA HAKU MONETE KARISO.

 

MOKUNA XLXIX.

 

          Ia manawa no hoi a Madame Danglars me kana kaikamahine i puka aku ai e hoi i ko laua wahi, ua lohe i@ aku la ka leo of Vilefota e kahea nui ana, mai kona rumi palapala mai, "Heaha kela e hamumumu nei?" Ma ke eno o ko Naitera helehelena, me he mea la e i mai ana i ua o Morela e pee ae ma kahi malu, a o kona komo aku la no hoi ia ma kahi rumi uuku.  Ko Vilefota komo mai la no hoi ia iloko o ka rumi, a wikiwiki iho @ la ma kahi o Valenatine e moe ana, a hapai mai la iluna o kona mau lima, ma ke kahea ana, "I kauka! Holo aku kekahi i kauka! Ia M. D'Avirigny; a i ole ia owau ponoi no ke holo aku."  Kona puka ino mai la no ia ma kekahi puka, a o Morela, puka aku la no hoi oia ma kekahi puka okoa; no ka mea, ua komo mai la iloko ona ka hoomanao ana i na olelo ana i lohe ai iloko o ka mahinaai i ka po i make ai o Madame de Merana.

          Ia manawa no hoi ana i oili mai ai mai ka rumi mai o kana aloha i maule ai, me he mea la, a pa-e mau mai ana i kona mau pepeiao na olelo a ka Haku Monete Kariso i hoopuka mai ai, "Ina oe i makemake i kekahi mea au i manao ai, e hele mai no i o'u nei."  Me ka emoole o ke komo ana mai oia mau hoomanao ana, kona holo emoole aku la no ia i ka hotele o Monete Kariso ma ka Champ Elysees.

          I ko Morela hiki ana aku ma ka ipuka o kona hoaaloha, aia ke count ma kona rumi palapala, e heluhelu ana oia i kekahi palapala a kana kauwa Bertuccio i lawe mai ai.  I ko Morela komo ana aku, ku mai la ke count @ una me ka ninau mai, "E Maximiliana, he @@@ keia? ua ano haikea kou helehelena."  Ko Morela haule ino iho la no ia iluna o ka noho, kawela ae la i kona hou, a i mai la, "Ae, ua hele ino mai nei au, no kuu makemake nui loa e kamailio pu aku me oe; oiai, ua @oomanao ae au i kau mau mea i hahai ma @ i ko kaua kaawale ana i keia kakahiaka."  "Pehea kou ohana?" wahi mai a ke count, "Ua olelo anei lakou a pau loa?" @ @ @aikai aku nei au ia oe"  wahi @ ke kanaka opiopio, me ke ano hopuhopualulu hoi o kona mau manao, "ae, o na mea a pau maloko o kuu ohana, ua oluolu maikai no lakou."  "Ua maikai ia," wahi a ke count.  "Aka, ma ke ano o kou mau helehelena, me he mea la, he mau mea kau au i makemake ai e hai mai ia'u." 

          "Ae," wahi a Morela, "he oiaio no o ko'u haalele ana aku nei no ia i ka hale kahi a ka make i komo mai ai, a holo mai nei au i ou la."  "He oiaio anei, ua hele mai nei oe mai kahi mai o Morcerf?" wahi a ke count.

          Pane mai la o Morela, "Ua make anei kekahi mea maloko o kona hale?"  a i mai la ke count, "Ua lohe mai nei au, ua hoopahu ke count i kona lolo.  Aka, o ka makuakane a me ke kane i make, ua oi ae kona maikai mamua ae o ka makuakane i hoohaahaa ia, na ke koko e holoi aku i ka hilahila."

          "Aloha ino ka Madame Morcerf" wahi a Morela; a i mai la ke count, "E pono e aloha pu aku oe ia Alebato, no ka mea, he keiki kupono oia na ka makuahine.  Aka, e haalele nae kaua i ke kamailio ana nona, a e hahai m@i ia'u i kau mea i hele mai nei."

          I mai la o Morela, "Ae, ua makemake io no au i kou kokua ana mai, no ka mea, ua manao iho au o oe wale no ka mea hiki, ke hoomalielie mai i kahi a ke akua e hooluolu mai ai ia'u.  Aia ia'u kekahi mea akahi no a kono ia mai au e hoopuka aku i ka pepeiao o kanaka ola.  Ma kou mau ano maikai a pau, ua kono ia mai au, aohe kupuno, e huna au i ka'u mau mea malu i lohe ai, a he mea pono ia'u ke hoike aku ia mau mea ia oe." 

          "Ua pono oe e Morela," wahi a ke count.  "Ke kamailio mai nei ke Akua i kou naau, a ke kamailio mai nei hoi kou naau ia oe, e puana mai.  E hai koke mai oe ia'u i keia manawa."  - A i mai la o Morela, "E ke count, he mea oluolu anei ia oe ke hookuu mai ia'u e hoouna aku i kau kauwa Babetisitino i kekahi mea no au i ike ai;" a no ia mea, i mai la ke count, "Ua maopopo no ia oe e Morela, aia au malalo o kau mau kauoha, e like me ka'u mau mea i hoopuka aku ai ia oe; a pela no hoi me ka'u mau kauwa a pau aia no ia malalo pu o kau mau kauoha, i na wa a pau au i makemake ai." 

          I ke count i hoopuka mai ai i kela mau hoaolelo, ko Morela puka aku la no ia a hawanawana aku la i ke kauwa, a holo wikiwiki aku la no hoi oia. "I kona hoi ana mai, i mai la oia i ke count, "Ano, akahi iho la no au a maha ae ka manao, e hai aku no au i ua mau mea la a pau loa.  I kekahi ahiahi iloko o ka mahinaai; he mau okumu laau e kuku ana ka mea e hoonalo mai ai ia'u.  Ia'u malaila, ma@lo ae la elua mau kanaka, a hoolono aku la au i ka laua mau kamailio.  E oluolu oe, aole au e hoopuka aku i ko laua mau inoa i keia manawa.  

          Ia ia i hoopuka mai ai i kela mau huaolelo, i mai la ke count, "ano eehia maoli kau mau mea a pau loa e kamailio mai nei" - A pane mai la o Morela, "ae, he ano eehia maoli io no; ua make iho ka haku o ua hale a me ua mahinaai la.  O kekahi o ua mau kanaka la a'u i lohe ai i na kamailio ana, o ka haku no ia o ka hale; a o ka lua o ua mau mea la, ke kahuna lapaau no ia o ka ohana, E wehewehe mai ana ka mua i ka hope me ke ano makau, no ka mea, o ka lua ia o ke komo ana o ka make iloko oia hale i ka mahina hookahi." 

          "A! A!" wahi a ke count me ke ano pihoihoi haalulu o kona mau manao, me kona nana pono mai i ua kanaka opiopio nei, "A heaha ka ke kauka mea i hoopuka mai ai ke kumu o ke komo ana o ka make iloko oia hale elua manawa iloko o ka mahina hookahi?"

          Pane mai la o Morela, "Ua hoopuka mai ke kauka ma ka'u hoolohe ana aku, i make ko loko olaila poe, aole ma ke ano mau, aka, i hoainu ia i ka laau make."

          "He oiaio anei ia mea?" wahi a ke count, me kona pahaohao nui ia mau mea i hoopuka ia mai, oiai, e hooiaio mai ana ia i kekahi mau mea ana i lohe mua ai, "He oiaio anei e Maximilliana, ua lohe oe ia mau mea a pau i hoopuka ia mai?" - "Ae, e ke count," wahi a Morela, "Ua lohe au me ka pololei ia mau mea; a ua lohe pu no hoi au i ke kauka e olelo ana, in a e make hou kekahi mea oloko oia hale ma ia ano, e hooopii  ana oia ma kahi e kaana ia mai ka pono a me ka hewa oia mau hana; a i me no hoi e ike lea ia ai ke kumu a me ka mea nana i hana ia hana ino." 

          I keia mau huaolelo ua hoolohe pono loa mai la ka Haku Monete Kariso i na huaolelo a pau loa i haule mai ai mai kona mau lehelehe, oiai, ua o Morela e hahai mai ana i ka kike olelo ana i lohe ai; a i hou mai la o Maximilliana, "Ano, ua kau hou iho ka make maluna o ua hale la, ano ka akolu o ka manawa, eia nae, aole i hoomaopopo ia ka hoopii ia ana aku i ka aha kaulike o ke kanawai.  I keia manawa ke hookau mai la e hookokoke ma@ka make iloko oia hale no ka eha o ka manawa.  E ke Count, heaha la ka'u mea e hana ai oia, owau kai lohe a kai hoomaopopo i keia mau mea huna a pau loa? "

          "E kuu hoaaloha maikai," wahi a ke count, "me he mea la, e hahai mai ana oe i kekahi mau holoholo  kupanaha ana, i maopopo mua ia'u ma ka naau.  Ua maopopo ia'u ka hale, ka mahinaai, na mea e kamailio ana me ke kauwa e ku mai ana ma kahi mamao aku; a me ua hale la no hoi kahi i make ano e ai kekahi poe ekolu.  Aka, ke hai aku nei nae au ia oe, ina o ko ke Akua huhu kela e hana mai la maluna o kela ohana ke koi aku nei au ia oe, e hoohuli oe ia oe iho mai ia wahi mai. 

          I ka lohe ana o Morela i keia mau mea, ua haalulu ino iho la kona kino mai luna o lalo; oiai, he ano leo kumakena kekahi ma kana mau mea i pane mai; "Aka, heaha la auanei kau mau mea i makemake ai ia'u e hana aku?" wahi a ke count.  "He makemake anei kou ia'u e haawi aku au i ke ano o keia mau hihia imua o ka luna maikai a me ka lunakanawai paha?"

          O keia mau huaolelo hope, ua hoopuka ia mai e ke count me ke ano weliweli, a i mai la, "Ina pela, ua maopopo no ia oe ka'u mau mea a pau loa e kamailio nei." - A pane mai la no hoi ke count, "Ua maopopo pono ia'u kau mau mea a pau e kamailio mai nei.  E hoolohe mai no oe, e holoholo ana oe i loko o ka mahinaai o Vilefota i kekahi ahiahi; a me kou mau mea i olelo mai nei, me he mea la, o ke ahiahi ia o ka make ana o Madame de Merana.  Ua lohe oe ia Vilefota e kamailio aku ana me ke Kauka d. Avirigny, a ua hahai mai oia ma kona manao, i pau i ka make i ka hanai ia i ka laau make, ka poe i make ai maloko oia hale.  Aka, he mea pono no ia oe ke noho malie, a mai a pa wale aku no me ko lakou mau mea."

          M@ keia mau huaolelo, ua hookau ia iho la na ano eehia maluna o kona mau helehelena; a lalau mai la oia i ka lima o ke count, ma ka i ana mai, "Aka, ke hai aku nei au ia oe, ke hoomaka hou mai nei ia mau hana mawaena o ua mau ohana la a he mea pono anei ia'u ke huna ia mau hana ino a pau loa?"

          "Ano wahi," a ke count, me ke ano hoihoi o kona mau manao i ka ike lea ana i na manao a pau loa o kona hoaaloha opiopio; a i hou aku la, "E hookuu aku no e hoomaka hou, no ka mea, ua kau ka hoino o ke Akua maluna oia ohana, a aole lakou e pakele ana i ka hoopai ino ana o ke Akua.  He ekolu mahina i hala ae nei, o St. Merana, i kela la aku nei hoi, o Baroise, ke kauwa; a i keia la, o Noitera, a i ole ia o Valenatine paha." 

          "Ua maopopo, a ua ike no oe," wahi a Morela, "a heaha ke kumu o kou hapai ole e hoomaopopo ia na ino ia?" - A i mai la ka Haku Monete Kariso, "A heaha auanei ia mau mea ia'u? ua ike mai anei au ia ohana e kupono ai ko'u mau hoomaopopo ana? Mawaena o ka mea i hana hewa, a me ka mea i make, aohe o'u kuleana."

          "Aka, owau," a Moreal e u ana me ke kaumaha, - "Ua aloha au ia ia!" - "Ua aloha oe! - Ia wai!" wahi a ke count, a ku ae la oia maluna o kona mau kapuai, a hopu mai la oia i na lima o Morela, me ke kau

 

 

"KE AU OKOA."

KA UKU O NA

OLELO HOOLAHA.

 

 

NA OLELO HOOLAHA - No na lalani he 10, @a hoi 1 iniha, no ka hoopuka hookahi ana, $1 00 ; alua hoopuka ana, $1 50; ekolu , $1 75; hookahi mahina, $2 00.

          Aia no ke keena o "KE AU OKOA" ma ka Hale Paipalapala Aupuni, maluna ae o ka Hale Pai.

 

 

ana aku iluna o ka lani.

          Me ke ano pihoihoi hoi, pane mai la o Morela, "Ua aloha au ia ia! Ua aloha au, me he mea la, he kanaka ano hehena ino loa au hoopuni ia e ke aloha kupuni nona - Ua aloha au ia Valenatine Velefota, a e hoao ia ia e pepehi ia i keia manawa! Ke maopopo aku la anei ia oe ka'u mau mea a pau e hoomoaakaka aku nei? A ke noi aku nei au i ke Akua a ia oe, pehea la auanei e hiki ai ia'u ke hoopakele aku ia ia, mai ka make e manao ia nei nona?"

          "A!" wahi a ke count, "A! ke kanaka opiopio i hoopoino ia e kou mau aloha opiopio! Ke aloha nei oe ia Valenatine, kela kaikamahine a ka ohana i hoino ia! Ua make hewa kahi i kukai ia ai o kou mau aloha! E noonoo pono oe, no ke aloha o ka lani, no na mea a pau loa au ia aloha aku ai i kekahi o kela ohana i hookau ia ai ka hoino o ka mea mai nona na mea a pau loa."

          Me kela mau huaolelo, ua hoopau ia ka laua mau kamailio ana, a ua nana aku la kekahi i kekahi no na sekona paha he iwa kalua; a i aku la, "Ke ike nei oe i ke ano o ka hoopai ana mai a ke Akua maluna o ka ohana i huna i ko lakou mau hana hewa ana; a ano hoomaka mai la ke ano o ka hopena o ka lakou mau hana ino kupono ole.  Ano, e Morela, mai hookaumaha ia kou mau manao; e ala oe e hookanaka ia oe iho, a na'u pono no e kokua a e kiai maluna ou, a me kau mau hana ana a pau loa, aole he mea ano hoopunipuni.  O ka hora umikumalua keia o ke awakea, a ua hauoli au i kou hele ana mai i ke awakea, i oi ae mamua, ina, i ke ahiahi kou hele ana mai.  E hoolohe mai ia'u! - o ke awakea keia; a ina, aole i make o Valenatine i keia wa, aole no oia e make ana." 

          "Pehea ia," wahi a Morela me ke ano hopuhopualulu, "Aole paha ia e hiki, no ka mea, i kuu haalele ana aku nei ia ia, ua aneane loa oia e make."  I kela mau huaolelo, kau ae la ko ke count lima i kona lae, no ka mea, aole i maopopo ia ia, o ke Akua wale no kai ike.

          He mau minute pokole i lole ae, aia hoi, hoomaka mai la ke count e hoopuka hou mai i kona mau mana@ ma k@ @@ Maximiliana, ke k@ ona aku @@@ mai noho oe a ohi iki, aka e hoi @@ @@ kauhale, mai hoikaika oe ma kahi mea; a mai noho hoi kou helehelena a kumakaia no kekahi mau mea au i hana ai, a na'u no e hoouna aku ia oe i kekahi mau lono maikai, O hoi!"

          "O! e ke count," wahi a Morela, "Ua hoolanakila mai oe ia oe iho maluna o ko'u mau manao eehia a pau loa. - Ua oi aku anei oe mamua o ke ano kanaka? - He ano anela kou?" A o ke kanaka opiopio, ua kuemi hope loa imua o ke count, a mamua ae ma na hoouka kaua, aole i komo ia mai ia mea iloko ona he makau.  Aka, i ua kanaka opiopio nei i nana aku ai ia ia ia manawa, ua hoopuni ia kona mau helehelena e ka makau mai luna a lalo.  Aohe mea hiki ia ia ke pane aku.  Ia manawa nae i huli mai ai ke count, a olelo mai, "He mau mea nui ke hiki ia'u ke hana aku nou.  O hoi koke i keia manawa, no ka mea, makemake au e noho hookahi!"

          Me kela mau huaolelo a ke count, ko Morela ku ae la no ia iluna, lalau aku la i ka lima o ke count, kaomi iho la, a puka aku la oia iwaho me ka haalele ana mai i kona hoaaloha e noonoo nui oia ma na mea a pau i waiho ia mai @ Morela no kona mau noonoo ak@.  Ma ka ipuka, ku iho la oia e kamailio pu me ke kauwa Bapeti@itina ana i hoouna aku ai.

          Ia manawa, ma ka hale o Vilefota, ke hoomakaukau la kela mea keia mea no ka hiki ana mai o ke kauka; a mahope iho, hiki io maoli mai la no hoi ke ka@ka me Vilefota.  Ma ka nana ana a ke kauka ia Valenatine, aole i haalele loa mai ka hanu.

(Aole i pau.)

 

 

          E hai ana kekahi mau lono mai Vienna mai, ua haalele mai ka Aha Kuhina Auaeturia i ka lakou mau hana ; a ua kauoha aku ka Emepera ia Count  Patocki e hapai i Aha Kuhina hou.

          Ua hoouna aku ke Aupuni o Perusia ia Herr Silk i Elele i ke kulanakauhale nui o Kina, no ka ike ana aku i ka huakai a ka poe Elele o Kina i kipa aku ai ia aupuni.  E kipa pu ae ana no hoi oia ma Iapana, e hooponopono ai i na oihana pili kalepa a pili aupuni, o ke Aupuni Geremania Akau me Kina a me Iapana.

          Ma Glasgow I Sekotia, ua hoolana ia mai nei kekahi mokumahu nui, o Ilalia ka inoa.  He moku nui loa oia; o ka Hikina Nui wale no ka mea oi ae maluna on a.

          E hoopuka ana kekahi mau lono mai San Domingo mai; o ka poe kue wale no i ka hoohui aupuni oia mokupuni me Amerika Huipuia, o ka poe kahuna hoomana wale no.