Ke Au Okoa, Volume III, Number 32, 28 November 1867 — HE MOOLELO NO PAKAA. [ARTICLE]

HE MOOLELO NO PAKAA.

HELU 6. I ka ai ana o ke Alii, na Kuapakaa no hoi i lawelawe kana mau ai a pau, oiai, ua hoomakaukau mua ia no e Pakaa, i olahonua; a ia ia no hoi e noho malihini ana ma kela aina kaha o Molokai. Ua ono ke Alii i ka awa, a ua hoolako aku no o Kuapakaa ia mea, a ua ono ke Alii i ka hinalea ola, oia kapalili no a ke pa. No ka ike ana o ke Alii i keia mau mea, nolaila, hu ae la ke aloha o ke Alii ia Pakaa, no ka like hoi me keia keiki makaukau o ka moku pale wale. Ua hiamoe ke Alii no ka ona i ka awa, a no ka maluhiluhi hoi kekahi no ka au ana i ke kai, i ka moana a lakou i make olulo ai. I ka pau ana o lakou i ka moe, e hoo-eke ae ana no keia i ka ipu makani ana, ia Laamaomao, a o ka pa mau iho la no ia o ka makani i keia la kela la, a kohu a uluhua maoli ke Alii a me na kanaka. Ma na la mua mai, a hiki i keia mau la, e hoolako mau ana laua i ka ao, ai maloo, a me ka loulu, i mea malumalu. I ka pau ana o ka ai a na'lii a me na kanaka, olelo aku la kekahi kanaka imua o Keawenuiaumi, "I hele mai nei makou ia oe, ai mai nei i kahi ai koena mai a ke kai a pau, nolaila, hele mai nei ia oe e hoakaka ai i ai na makou." Olelo mai la o Keawenuiaumi, "E hele aku kekahi kanaka a i ke keiki, malie paha he ai no kana." O ka hele aku la no ia o ke kanaka a hiki imua o Kuapakaa, a olelo aku la ia Kuapakaa, "I hoouna mai nei ke Alii ia'u e kii mai ia oe, e hele oe ilaila." Ae aku la no o Kuapakaa, a o ko ia nei hele aku la no ia a hiki imua o ke

Alii, a olelo mai la ke Alii, "I hoouna aku nei au i ke kanaka e kii aku ia oe e hele mai, ina he ai kau i koe, e haawi mai oe i ai na ko'u mau kanaka, no ka mea, ua make nui i ka pololi." Ae aku la o Kuapakaa, me ka olelo aku, "He ai no, elua no nae pue uala, a elua no hoi pu ko, o ka ai no ia, eia nae, o na kanaka no a pau ke hele, i mahuahua ka ai." Olelo mai la o Keawenuiaumi, "Pehea boi auanei e pau loa ai keia poe kanaka a pau, ua olelo mai nei no hoi oe, elua no pue uala, a elua no hoi pu-ko." Olelo aku la ke keiki, "He uala hua ko keia wahi." A no ke ano hoomaauea o ke Alii a me na kanaka, ua pii kekahi poe i ka ai, a ua hoomaauea kekahi poe. I ka pii ana o na kanaka i ka ai, me Kuapakaa pu no kekahi, a hiki lakou nei i kahi o ka ai, kuhikuhi aku la o Kuapakaa, ia lakou i ua mau mala nei, elua mala uala, elua hoi mala ko, i ka nana ana aku o na kanaka i pii ai, aohe no hoi he ai mai a koe aku, he-

wa-i-ka-wai ua mea he ai a me ke ko, oi holo aku ke kanaka i na mala ko, a e ana, aole no i ike ia aku o kekahi aoao, a pela no noi na mala uala elua, ke laukua wale la no e anunu ai. O ka kekahi poe hoi, i kauhale no e hoaimu ai, a o ka kekahi poe hoi, hoaimu iho la iwaena, kahi kokoke o ka ai a me ka wahie.

A i ka lohe ana aku o ka poe i koe e noho ana i ka hale, i ka nui launaole mai o ka ai a me ke ko, a e ai kakou aole e pau wawe, a o ka pihoihoi iho la no ia o kela poe, a pii ino, o pau e anei i kekahi poe. A i ka makaukau ana o ka imu a kela mea keia mea, olelo aku la o Kuapakaa ia lakou, "E ohi oukou, o kela ai keia ai, mai haalele oukou i ka ai liilii, e malama pono oukou ia ai, a e kaulai a maloo, a hoihoi mai ia'u o ka'u ai ia, a o ka ai nui, o ka oukou ia." Ae lokahi mai la no hoi lakou a pau, a o ko lakou la hoaimu iho la no ia, a pau na imu i ka moa, a ahiahi hoi ana, aohe huaolelo i koe, he ola wale no, a o kahi amaama ae no o ua aina kaha la ola no ka noho ana. I ka wa i maloo mai ai ka ao, (he ai liilii i kaulaiia,) ua hoomakaukau o Kuapakaa ia ai, no ka manao no o Kuapakaa, e koi no anei o Keawenuiaumi ia ia, e holo pu e imi ia Pakaa. Olelo rnai na kanaka ia Kuapakaa, "Kai no hoi nau kekahi uala nui." Hoole aku la keia, "Aole, o ka uala liilii no ka'u, e kaulai nae oukou a maloo, no ka mea, o Welehu iho nei keia malama i hala iho nei, o Makalii keia, o Kaelo aku, o Kaulua aku, a i o Nana, hookau ka malie; alaila, manao ae oukou e holo, ua pau nae ka'u ai ia oukou, a ua koe hoi keia ai maloo ia'u, loaa ko'u ola e mahiai hou aku ai, aole au e wi." No keia olelo a ke keiki, nolaila, malama loa iho la na kanaka i ka ai liilii, e like me ka ke keiki olelo ia lakou. I ka wa o Keawenuiaumi i holo mai ai mai Hawaii mai, ua hai mua oia i na makaainana o Hawaii, hookahi o lakou mahina e holo ai a hoi mai, a i ka hala ana o ka mahina hookahi a keu aku, manao ae la na makaainana o Hawaii, ua make ko lakou Alii, o ka uwe lokahi ae la no ia, a pela no hoi na ohua i koe o ka poe i holo pu mai ai me ke Alii, ua huliamahi like lakou ma ia ano. A ike ae la ke keiki, ua pau ka ino, ua hiki i o Lana, popoi iho la keia i ka ipu makani ana, a malie ae la. (E ka poe heluhelu, mai manao oukou he ipu makani io, manao au o kekahi poe mamo paha a ka poe hana upamakani o Maleka, ke ike pu ae la no kakou, i na malama ino no ka o ka hooilo, ka noho'na a Keawenuiaumi i Molokai, he ha.) A olelo aku la ke keiki ia Keawenuiaumi ma, "O Nana keia mahine, ua hookau ka malie, o Welo, o Ikiiki, ke aho pula a ka lawaia, no ka ike o ka lawaia i ka malie, hele pinepine i

ka lawaia, aohe e maloo ke aho, nolaila, e hoomakaukau na waa o oukou a pau." A o ka hoomakaukau iho la no ia o ka auwaa o na kanaka a pau mai o a o, a me na'lii, a panee aku la a kahakai, a hekau maoli aku ka auwaa iloko o ke kai ia ahiahi. I ka wa nae e hoomakau ia ana ka auwaa o na'lii a me ko Keawenuiaumi mau waa, he manao no iloko o ke Alii, e koi aku ia Kuapakaa, e holo pu me ia, aia ahiahi no, koi aku la ke Alii i ke keiki, e holo pu me ia e like me kana mea e manao ana, eia nae, ua ae aku no o Kuapakaa, ke ae mai nae ke Alii e hooili pu me kana mau wahi ukana, elua ana mau ukana, he laau loihi, aia iloko olaila ka ai a me na pono e ae a pau, no ka holo moana ana, a he pohaku kekahi, i mea e hekau ai no ua mau waa nei, ke loaa lakou i ka ino ma ka moana. A no keia hookamaemae ana aku o Kuapakaa ia Keawenuiaumi i na ukana ana, aole no i hopo iho o Keawenuiaumi, kena ae la no oia i na kanaka e kii a lawe mai, a i ka nana ana iho a ka poe nana i kii, he laau nui maoli io no, ina paha e kau maluna o na waa, o ke komo no paha ia. A makaukau ka holo ana o lakou nei, ma ka hiki ana mai o ka ia nei ukana ia ahiahi no, a moe iho la lakou nei, a aole no i liuliu iho, ala mai la o Kuapakaa, a kahea i na'lii a me na kanaka, e hoaia ana e holo ka auwaa, aole nae ia o ka wa e holo ai,

aia o ka pili o ke kakahiaka, oia ka wa e holo ai ke Alii, mai ka wa kahiko mai, o Kiauau nae ka mea nana e kahea, a e hoolale hoi i na'lii e holo. A i keia wa hoi, o Kuapakaa ka mea nana e hoala, a kahea ae la oia me ka leo nui, penei : "E ala! E ala!! E ala!!! Ua kulu ka po, ua kulu ke ao, Ua pau ka luhi, ka eha, ka oopa, Ka maka pouli i ka hoa ana i ka waa la, E ala, e ala, aia la iluna, O Hikiliimakaounulau, Ka hoku i ka palena o ka aina la—e, E ala, e eu, e holo kakou." Iloko nae o keia kahea ana a ke keiki, olele ae la na'lii kekahi i kekahi, "Kupanaha o ua o Kiauau, o ka hoala e mai nei no ka ia ia kakou e holo i keia ahiahi okoa no, aia la ke kahea mai la, alia hoi, wahi a kekahi, aole hoi pela o ua o Kiauau i na manawa aku nei mamua, no ka uluhua iho la paha i ka noho loihi o kakou ia nei, nolaila, ke pihoihoi mai nei ua wahi Kiauau nei." A pau ia kahea ana a ua o Kuapakaa, kahea hou mai la no oia i kekahi mau mele malalo iho nei, ma ke kahea pakahi ana i kela alii keia alii, o na moku eono o Hawaii, penei: "E ala, e ala ua ao, ua malamalama, Ua hiki ka la, aia iluna, O Iao, o Maiao, o Kamaha, O Kahikuokamoku, O Kani-uu, o ka hoku i Helani, "E ala, e eu e Kohala, Ka aina ia Wahilani." Ala ae la ko Kohala poe kanaka a me na 'lii o lakou, a hoomakaukau, a holo aku la. A kahea aku la no o Kuapakaa i ko Hamakua, penei: "E ala, e ala ua ao, ua malamalama, Ke hoolale mai nei ke keiki makani, O kaikamahine makani a Malanai, A Malanai, o Ku, a Haehae, Painahe ka la i ka makani, O Kaulua, o Hinaiaeleele, O na malama ino o ka moku la—e, E ala, e ala e Hamakua, Ka aina ia Wanua." Ala ae la ko Hamakua poe kanaka a me na'lii o lakou, a hoomakaukau, a holo aku la. A kahea aku la no o Kuapakaa i ko Hilo, penei: "E ala, e ala ua ao, ua malamalama, Ke hoolale mai nei ke keiki huki heenehu, He ua huki heenehu no kai o Punahoa, He ua no ka ua poolipilipi i ka unulau, Ua mohala ka pua lehua i ke keekeehi ia e ka ua, He ua hoopumehana o ka aina o Hilo, E ala, e ala e Hilo, Ka aina ia Kulukulua." Ala ae la ko Hilo poe kanaka a me na'lii o lakou, a hoomakaukau, a holo aku la. A kahea aku la no o Kuapakaa i ko Puna, penei: "E ala, e ala ua ao, ua malamalama, Ua puka ka la, aia ma Kumukahi, Ke oni ae la e like me Makanoni, No Puna ka paia ala i ka hala, Mai ke kila no a Akoakoa, He aina haaheo o Puna na kolaila kupa, E ala, e ala e Puna, Ka aina ia Hu-a-a." Ala ae la ko Puna poe kanaka a me na'lii o lakou, a hoomakaukau, a holo aku la. A kahea aku la no o Kuapakaa i ko Kau poe, penei: "E ala, e ala ua ao, ua malamalama, E ala e Kau, aina makani, Ae-ae kukio makani o Kau, Ko-a ke au i Halaea, Kapae—pae ka waa e holo, I Kailikii aku i Kalae, I Kaulanamauna la—e, E ala, e ala e Kau, Ka aina ia Makaha." Ala ae la ko Kau poe kanaka a me na'lii o lakou, a hoomakaukau, a holo aku la. A kahea aku la no o Kuapakaa i ko Kona poe, penei: "E ala, e ala ua ao, ua malamalama, Holohia mai ka lima, aina mai ka ai, O koena ulu o koena kihapai o Kaawaloa, O ke Aku aku ko Makaula, O ke Ahi aku ko Awalua, Ala ka po, ala ai a maona, Eia ke kai i ka Akulikuli, I ka Pohuehue ku kahakai, O Kona nei la—e, e ala Kona, O Kona aina pohu i ke kekau, E lele ana ke ao hoomalu o Keei, He ao kaupaku i na ulu o Leiwalu, E ala, e ala o Kona, Ka aina ia Ehu." Ala ae la no hoi ko Kona poe kanaka a me na'lii o lakou, a hoomaknaukau, a holo aku la. O ke ao loa ae la no hoi keia, e hiki ana pa-

ha i ka hora ekolu. A hoi aku la o Kuapakaa, a hoala aku la ia Keawenuiaumi a me kona poe kanaka ma ke mele, penei: "E ala, e ala mai oe e Kilaupale—e, Wai Oahu—e, Oahu mauna iluna, Kiekie Kaunuohua, Pua holohia Nihoa, Kela pali e, keia palai e. Palaau—e, Kahiwailuna, E ala, e ala e Hawaii nui a Kane." O ke ala mai la no ia o ke Alii, a ala pu mai la me na hoe waa, a o ka hoomakaukau iho la uo ia o lakou, a ee aku la iluna o na waa me na kanaka a pau, a me ka ke keiki mau ukana, oia hoi kela laau nui a me ka pohaku i olelo mua ia ae nei. Holo mai la lakou me ka makani maikai, oia hoi ke Kaao, nana aku la o Kuapakaa i na hookele, a makemake ae la e lilo ia ia kekahi hoe, nolaila, nonoi aku la oia i na hookele, ia ia kekahi hoe, hoole mai la nae na hookele, me ka olelo mai, "O ko laua haawina no ka ia, hewa ka laua ke lilo ko laua wahi i ke keiki." A o ka pau ae la no hoi ia o ka Kuapakaa nonoi ana aku i na hookele. He manao nae ko Kuapakaa, ina e haawi mai laua la i kekahi hoe ia ia nei, ina ua hoi koke lakou nei, aole e holo i Kaula, oiai hoi, ua loaa mai la no kahi a Pakaa i hoohalahala ai, o ka hope la o na waa, eia ka e aua ana no lana la. O ko lakou nei holo mai la no no ia a waho ae o Waikiki, he kaikoo nae ke awa ia manawa, punia ae la i ka nalu, o kahi no a Pakaa e lana mau ai, malaila no o Kuapakaa kahi i lana ai. A manao ae la no o Keawamuku o Ulukou, o Pakaa no la keia waa e lana mai nei i kai, mawaho o kua-nalu, eia ka anei o Kuapakaa no keia waa me na Haku ona. KE KAUOHA ANA O KUAPAKAA IA KAHIKOKAMOKU MA A ME KONA HOLO ANA IUKA.

Olelo aku la o Kuapakaa ia Kahikuokamoku ma, "Eia wau ke holo nei iuka, i noho auanei oukou a i hoea ae he wahine malalo nei o ka waa la ea, hoouka ae oukou." Pane mai la na hookele, "He waa kapu ko ke Alii, aohe wahine ee mai iluna." Olelo aku la o Kuapakaa, "Ina aohe e kau ka wahine iluna o ka waa, ina ua poho mai nei kakou i ka moana, eia o Hinakeka ke kau nei iluna o ka waa, he wahine ia, (oia hoi ke k-a o ka liu o ka waa") Olelo mai la o Kahikuokamoku, "Aohe kapu o ka waa o ke Alii, i ka wa ia laua la ka mana o ka waa a me makou pu, he kapu io no ka wahine, eia nae, ua lilo ae la ia oe ko makou mau pono, nolaila, hana oe e like me kou makemake." O ko Kuapakaa kau aku la no ia maluna o kahi kioloa, a holo aku la iuka me ke akamai nui, o kona hoopae ana i iloko o na nalu nui, a uwa ae la na kanaka o uka, no ko lakou ike ana mai i ke keiki akamai i ka hookele ana, a pae keia iuka, a hapai aku la keia i kahi waa ona a ke one maloo, o ko ia nei holo kiki aku la no ia a ma kauhale mauka mai, he mau wahi elemakule, me ka laua mau wahi luahine wahine no, e u hanai puaa ana, olelo akula o Kuapakaa i ua mau elemakule nei, "Ho puaa kuai no nae paha ka olua?" Pane mai la ua mau elemakule nei, "Ae, he kuai no, a heaha ke kumukuai ke makemake oe e kuai mai i ka puaa?" "He hulu," wahi a ke keiki. "Ae, o ka auhau ia ia Oahu nei, o ka hulu; (hulu mamo o Hawaii. A i ka loaa ana o ka puaa ia ia nei, o ko ia nei hoi aku la no ia a kahi o ka makuahine ona, oia hoi o Keawamuku, he kaikuahine hoi no Pakaa, na Pakaa no nae i kuhikuhi mai ia ia nei, e holo mai no a kahi o ka makuahine, me na ano a pau maluna i hai ia ae nei. NO KEAWEMUKU. E ka poe heluhelu, ua ike kakou mamua iho nei, he kanaka hele makaikai o Kuanauanu, mai Hawaii mai kona hele ana mai, a noho mai ana ia wahi, pela mai ana ia wahi, a hiki loa i Kauai, a loaa mai ai o Pakaa, ka mea nona keia Moolelo a me kana keiki. A nolaila, e manao ae no paha kakou, ua loaa io no paha he keiki hou nana, ae, ua loaa no, oia hoi o Keawamuka (he wahine.) I ka noho ana o Kuanuuanu ma Waikiki, Oahu, ua hoao oia me Ulukou, he wahine kamaaina no Waikiki, a ua loaa he keiki na laua, oia hoi o Keawamuku (w.,) a ua kuhikuhi wale ia no o Pakaa e Kuanuuanu, i na makamaka ona a pau ma Hawaii, e like me na'lii aimoku a pau o Hawaii, he poe kaikaina wale no no Pakaa, ma na ohana o Kuanuuanu, a hookahi wale no kanaka e, o Ehu. I ka wa nae e noho ana o Pakaa i Hawaii, he kipa mau no o Pakaa i kahi o ke kaikuahine, a pela no hoi i ka wa ona e noho ana i Molokai, he kipau mau mai no oia, a he hele mau no hoi ma kahi oia makamaka ona, ma Kawaihapai, Waialua, Oahu, nolaila, ua ike ae la kakou, ua pili kaikuahine o Keawamuku no Pakaa. I ka nana ana mai o Keawamaku mai iuka aku nei, ike aku la oia e lana aku ana keia waa nui ma kahi a Pakaa e lana mau ai, a manao wale ae la no ke kaikuahine, o Pakaa no la keia, eia ka o ke keiki no a kona kaikunane, o kona mihi iho la no ia, no ka loaa ana o ke awa a laua me kona kaikunane. I ke keiki hoi i holo mai ai maluna o kona wahi waa, e alo mai ana iloko o na nalu nui e haki kaikoo ana, pae mai la oia iloko o ka nalu, me ke akamai nui i ka hookele ana, a pae ana oia i kula me ka poino ole. Ia wa koke no, o ka hina aku la no ia o Keawamuku, a moe aku la kona poo ma kuono o kona hale, a waiho aku la iloko o ka hiamoe, me he mea la ua make, aka hoi, malia paha he hookau no ka lia, a i ole ia, ua halawai mai la paha me na hiohiona o ka hiki ana aku o ke keiki a laua me ka makana. (Aole i pau.)