Ke Au Okoa, Volume III, Number 27, 24 October 1867 — HE MOOLELO NO PAKAA. [ARTICLE]

HE MOOLELO NO PAKAA.

HELU 1. KA OLELO MUA A KA MEA NANA I KAKAU. Ma keia Moolelo, a Kaao hoi no Hawaii nei, ua lohe kakou e olelo wale ia ana, a e Kaao ia ana hoi, e na makua a me na kupuna o kakou, a e ola ana no ka poe i ike, a i pau hoi o na Moolelo a me na Kaao, i ka wa i hiki mai ai o ka olelo a ke Akua ma keia Pae Aina, a ua huli nui hoi na kanaka ma ka pono, a o ke Kuhina Nui hoi kekahi i oi aku ka ikaika ma ka hoolaha ana i ka pono, oia hoi o Elisabeta Kaahumanu, a mai a ia ia mai kekahi mau olelo alii a koikoi hoi, e papa ana i na Kaao lapuwale o ka wa kahiko, a me na pule anaana, a me ia mea aku, a ia mea aku o ka wa kahiko. A mamuli oia olelo, ua ano weliweli na kanaka, no ke ao ana i na Kaao, na Moolelo, a me na Mele, a ua koe kakou ka poe hemahema, a i loaa * hoi. A ma keia Moolelo, e hoike aku ana wau ia oukou i ka Moolelo o Pakaa, a me kana mau hana, oiai, e noho ana ia me kona haku me Keawenuiaumi, a me na hana hoi a kana keiki, oia o Kuapakaa. Ua lohe mua, a ua ike mua paha kakou i keia Moolelo, aia ma ka Hae Hawaii, Buke VI., Helu 3, Aoao 12; i kakauia e S. K. Kuapuu, aole nae hoi i kulike loa ka'u me kana, a ua kulike no hoi ma kekahi wahi. A no ke kakaikahi loa paha oia poe e malama Buke nei i keia manawa, a he lehulehu nae ka poe e manao ana e lohe hou i keia Moolelo, nolaila, ke paipai nei au ia

oukou e ka poe e lawe ana i "KE AU OKOA," ma keia mua aku, e lawe, e lawe nui, i ike oukou i ka Moolelo o ko kakou aina nei, oia ka Moolelo o Pakaa ma, ko Kana, ko Kamapuaa, a pela aku. Aloha nui oukou. NO KUANUUANU. O Kuanuuanu, he kahu ponoi oia no Keawenuiaumi, ka Moi o Hawaii, o Keawenuaumi, oia ke keiki a Umi laua o Kapukini, na Moi o Hawaii, a Kane. I ka manawa o Kuanuuanu i holo mai ai mai Waipio, Hawaii, a pae ma Lahaina, Maui, he mau hana kaulana no kana ma Lahaina, a he kanaka akamai hoi i ka heenalu, i ka nalu o Uo, aohe no hoi i hele mai o Kuanuuanu ma ke ano no-a-no-a, a lalolalo iho hoi, aka, ua hele mai no ma ke ano kaulana, a kahu ponoi hoi no ka Moi o Hawaii. Aole no hoi he mea e nele ai oia i ka ikeia mai e na Moi o Maui, a hiki wale i Kauai. Elua paha mahina o Kuanuuanu o ka noho ana ma Lahaina, a hoomakaukau i kona hele i kana huakai makaikai, holo mai la oia a pae ma Waikiki, Oahu, a he mea nui no hoi ia wa ke kaulana ana a me ka holo ana aku o ka lohe ma na kuaaina, i ka hiki ana mai o ke kahu ponoi o Keawenuiaumi, ka Moi o Hawaii, ua makaukau, a ua lako no hoi i na mea ai o ka wa kahiko. A pau kona noho ana ma Oahu nei, a holo loa aku la oia e kaapuni ia Kauai, a i ka puni ana o Kauai ia ia, hoi mai la oia a noho hookahuahale ma Kapaa, i Kauai. I kona wa e noho ana malaila, he mea mau hoi i na kane, na wahine a me na keiki, ka hele mau ma kahi o ka malihini hiki mai, a pae mai paha; ua hala paha na pule elua o ko Kuanuuanu noho ana ma Kauai, loaa ia ia kekahi kaikamahine opiopio maikai, no Kapaa no, o Laamaomao kona inoa, he kaikamahine ui maikai oia no ia wahi, a he poe nui a kaulana no hoi no ia aina. Aole nae hoi i oi loa ae ke kiekie maluna o ko ka poe Konohiki aiaina malaila; a i ke komo ana 'ku o Kuanuuanu ia Laamaomao, ua hoomaka mai ka hai ana mai o ke ano a me na ouli o keia mea he keiki, a i ka hala hou ana o na pule elua, hiki mai la kekahi elele mai Hawaii mai, na Keawenuiaumi i hoouna mai, e kii mai ia Kuanuuanu e hoi, no ke aloha no o Keaweanuiaumi; a no ka ike ana o Kuanuuanu, ua hiki mai ka elele kii a kona haku ia ia, aole no e nele ana kona ae aku, e hoi ana no anei oia. I kekahi ahiahi, hoouna aku la oia, (Kuanuuanu,) i kona kanaka ponoi, e kii aku ia Laamaomao, a hiki mai la o Laamaomao, a i kekahi wa mehameha, olelo aku la o Kuanuuanu ia Laamaomao, "Pehea, e manao ana anei oe e loaa mai ana he keiki mailoko mai ou, e like me ka hoailona keiki a'u e malama nei, a kaua pu no hoi i ike pu iho ai?" "Ae paha, aia no hoi paha ia i ko'u noho ana 'ku," wahi a Laamaomao. Ae, ke hoi nei au i Hawaii, mamuli o ke kauoha a kuu haku i hoouna mai nei; (Keawenuiaumi.) "Ke noho la oe i Kauai nei, a i hanau mai he kaikamahine, e kapa no oe ma kou aoao o Kauai nei, a ina hoi e hanau mai he keikikane, e kapa iho oe i kona inoa o Pakaa, (oia hoi ka pakaa, a nakaka, a ma-ea, a mahuna, a puahilohilo o ka ili o Keawenuiaumi, i ka inu mau i ka awa, kela laau hoomalule kino,) a oia ka'u kauoha ia oe," wahi a Kuanuuanu.

O Kuanuuanu nae, he kanaka loihi pilalahi keokeo, a e o ae ana ka hina, a i aneane e pau loa ka hapa nui o kona mau lauoho, a he kanaka ui maikai no hoi i kona mau la, oiai na niho. O Laamaomao hoi, he wahine opioopio maikai, e hoomahie ai no hoi kolaila poe keikikane maikai. A ma ke ano kaulana hoi a me ka hanohano o Kuanuuanu, nolaila, ua pipili wale aku no hoi na kaikamahine puukani oia wa, (e like la paha me ka Netina, ma Honolulu, e pipiliia nei.) A i ka wa i hoi ai o Kuanuuanu i Hawaii, he mea aloha no hoi

ia a me ka uwe, na ka poe i noho pu a aloha ia mau la, a o Laamaomao no hoi kekahi i mahele like ia puuwai aloha like; a loaa no hoi ka hana oia mau la, e kuoe hele ai i ke ala me ka wai ua naulu. NO KA HANAU ANA O PAKAA. Ua hanauia o Pakaa ma Kapaa, i Kauai, he keikikane, na Laamaomao, a he keiki kamehai paha ko Pakaa oleloia ana, aole ona makuakane e noho pu ana, ua hala ka puulena aia i Hilo, o Laamaomao wale no ka mea nana i hanai ia ia, a o na makua no hoi o Laamaomao, he huhu ia ia, no ka hele i ka hookamakama a loaa ke keiki kamehai, aole hoi oia ka mea e luhi ia ai neia mea he keikikane, a he kaikamahine paha. I ka wa kahiko, ina he kaikamahine maikai a ka kekahi makua, e manao no anei oia, e ola ana ko laua mau iwi, e moe ana i ke kane ai ahupuaa, a ai moku paha, a no keia hua i loaa mai ia Laamaomao noloko o ka hana malu ana, nolaila, ua kipakuia o Laamaomao e na makua, a hele aku la oia a noho ma kekahi wahi lae kipapali kahakai, aia no ma Kapaa, i Kauai. A no ke aloha o kekahi wahi kaikunane o Laamaomao ia ia, ua hele pu oia me ia, a noho pu; a o ka hana akamai a keia wahi keiki, o ke kapili manu a me na olelo

lealea no hoi, a ma ia mau hana a kahi kaikunane e loaa mai ai ko laua ola, a ma ka hoouna ana no hoi kekahi a Laamaomao e hele i ai na laua, i na kaikunane a kaikaina hoi o ka makuahine, a mau hoalauna e ae o na makua. Peia ko laua noho ana, a hanai ana hoi ia Pakaa, a nui o Pakaa, i na makahiki eha paha, oia hoi ka wa e loaa pono ai o ka olelo. A ia wa oia i ninau aku ai i kona makuakane, ia Laamaomao, e hai mai oia, olelo aku la o Laamaomao, "Aia no o kahi kaikunane ona, o Mailou kona inoa, oia kou makuakane." Olelo mai la o Pakaa, " He wahine nui hoi oe, he uuku hoi o Mailou, aole paha ia o ko'u makuakane, a e nana ae hoi kakou i kela poe makua, he nui no ke kane, a he nui no hoi ka wahine, a loaa pono no hoi ka laua keiki, he uuku hoi o Mailou." A no ka ninau mau o Pakaa, ua uluhua o Laamaomao, no ka ninau pinepine o Pakaa, alaila, kuhikuhi mai la oia i kahi a ka la i puka mai ai, a me kahi hoi a ka makani e pa mai ai, aia no ilaila kou makuakane. HE KEIKI AKAMAI A NOEAU O PAKAA. I ko Pakaa wa kamalii, he keiki akamai a noonoo oia, he hiki ke imi oia i ike nona ma ka nana ana aku i ka hanaia mai e kekahi poe, o kela ano hana keia ano hana, a he hiki no ia ia ke imi i ke akamai nona iho, me ke ao ole ia mai, a i kona ike ana, ua akamai oia ma kekahi mau hana, a i kekahi wa, olelo aku la oia ia Laamaomao, "Heaha hoi ko kakou mea e ai malolo ole nei, loaa kakaikahi mai ka kakou malolo, a o kela poe no o kakou o kela kauhale, ai pinepine mai no i ka malolo?" Olelo aku la o Laamaomao, "No ka molowa no hoi paha o ko wahi makuakane, (o Mailou,) aia no a he kapili manu, kai ala hana hoihoi iho la ia, e kuoe hele ai i ke kuahiwi." Olelo aku la o Pakaa, "Aole no anei e hiki ia'u ke holo pu i ka lawa-i-a me kela poe kanaka, malia no hoi o loaa no ka'u malolo?" "Me oe uuku no, hele aku oe i ka lawa-i-a a piho mai oe i ke kai, ko ike ole iho i ka au," wahi a Laamaomao. Olelo hou aku la o Pakaa, ''He hiki no ia'u ke hele, ke olelo aku oe ia Mailou, e hapai ae i kela wahi waa kioloa la, ana no hoi i holo ai i keia mau la iho nei." "Kai ka hoi kahi keiki koi o oe, a mea hoi ha apopo, holo i ka lawa-i-a malolo na kakou me kela poe, malia o loaa iho kau na, e na wahi keiki wahapaa," wahi a Laamaomao. Na ia la ka hua hookuakeeo mai, e hoomakaukau iho ana keia i kia, i pea, i kaula, na mea no a pau o ka holo moana ana, aia hoi, ua ike aku la no keia i ka holo o kanaka pu-a malolo, a waena moana mai o Kauai, a i ka hoi ana 'ku, he hoe wale no. (Ua oleloia ma keia Moolelo, o Pakaa ka mea i akamai mua i ka hana pea no ka waa, ma Kauai, a laha ia mea malaila a puni.) A i ke ahiahi ana iho, hoi mai ana o Mailou, mai ke kapili manu mai, me na wahi huihui manu, a i ka pau ana o ka paina ahiahi o lakou, olelo aku la o Laamaomao ia Mailou, "E Mailou—e!" "E—o!" wahi a Mailou, "Apopo anei, ea, mai wikiwiki e oe i ka pii i ka wa kakahiaka nui loa, i kau hana hoi e hoopapau nui nei, e pono paha e hapai mua ae olua i ka waa o kahi keiki, ke koi nei hoi kahi keiki e hele i ka lawa-i-a malolo, oi au-a wale ia aku nei a, he keu aku hoi kahi keiki a ke koi hoohu-a nui wale, ku la hoi ia wai keia wahi keiki a ka hoopaakiki nui wale, ku paha i ka aoao o ka makuakane ona" wahi a Laamaomao. "Alia hoi, ke ai nei no hoi i ka i-a he manu, a ke loaa mai nei no hoi ka kakou malolo mai kauhale mai, koi hoi keia wahi keiki," wahi a Mailou. Olelo mai la o Pakaa, "Mai au-a olua ia'u, e hele au i ka lawa-i-a na kakou, malie hoi o loaa okoa mai hoi ka kakou malolo okoa, a mau kauna malolo okoa paha, he oleloa hoi keia pala maunu a hai" "Ae, pela hoi paha, aole no maua e au-a aku ana, apopo holo oe i ka la-wa-i-a malolo." Olelo hou mai la o Pakaa, "E hele kaua e hana pu i kuu waa a paa." "Ae," wahi a Mailou, ia ahiahi no, ua makaukau ko Pakaa waa a me na pono a pau. A i ke kakahiaka ana ae, ko laua nei hapai aku la no ia me kahi makuakane, a hiki ka waa i kahakai, a makaukau na mea a pau no ka holo ana, o ko Pakaa kau la no ia a holo ana, me he mea la, ua makaukau wale la i ka holo waa; a me he mea la no hoi, ua aoia i ka ikaika maoli i ua mea he hoe. O ko ia nei

holo aku la no ia a halawai me ka auwaa, a hookahi ka holo pu ana; ia ia nei nae e holo aku ana, ke hooho mai la na kanaka, "Au! eia ae kahi keiki a Laamaomao, ke holo mai nei maluna o kona waa, oia hookahi wale no, auhea la ka hoi kahi makuakane ona?" wahi a kekahi poe. "Alia hoi, o ka hookuu hookahi ia mai nei ka hoi ia o ke kamaiki a laua, aohe hoi he kau pu mai me ke keiki maluna o ka waa," wahi a kekahi poe. Olelo ae la no hoi kekahi poe, "Aia no paha kahi makuakane i kana puni no hoi he kapili manu." Pela lakou i kamailio ai a hiki wale i ka wa a lakou i manao ai o kahi kupono ia e pu-a malolo ai. A no ke kokoke loa i kahi e pu-a malolo ai, nolaila, ua kahea ae la ka lawa-i-a, e hoomakaukau na waa; a e hookuene pono, e ka-i like, i hookahi ka umauma o na waa. O ko lakou nei holo like aku la no ia, a no ka hiki mua o na waa kihi i ka waa upena, loaa e no ka laua la malolo, olelo iho la o Pakaa, "Aia ka kahi o ka i-a i kela mau kanaka, he oleloa ka hoi keia wahi." O ko Pakaa holo aku la no ia me kona wahi waa a hiki malaila, palamimo ana ko ia nei wahi waa iki mawaena o ka auwaa nui, keakea mai la nae ka poe kanaka makua, pipili aku ana no keia ma ia wahi, a loaa no ka ia nei ia, (ke ike nei no kakou i kamalii, he mea pipili nui wale ma kahi o ka i-a, a ma kekahi wahi e ae no hoi e lehulehuia ana.) A no ko ia nei pakela pipili no a me ka poalo ana'e mawaena o ka auwaa nui, ua loaa no ka ia nei malolo, a pela aku ana ia pu-a malolo ana, a hiki wale i ka wa i hoi ai lakou nei.

I ka wa i haawi ai ka haawina lawa-i-a o lakou nei, a huipuia me ka ia nei mau malolo hopuhopu, ua hiki aku ka nui i na kaau malolo elua, (80 i-a.) A makaukau lakou nei e hoi, hoohaili no ua wahi Pakaa nei, "Ea! owai ko oukou mea pili mai me a'u e heihei waa kakou, ina no hoi e make au ia oukou, lilo no hoi ka'u i-a ia oukou, a ina hoi e make oukou ia'u, lilo hoi ka oukou i-a ia'u." Aa mai la kekahi kanaka ia ia, a hookahi no hoi ia ma kona waa, he kanaka nui nae hoi kela, a he wahi keiki uuku hoi o Pakaa, a ninau aku la o Pakaa, "Ehia au malolo?" "Elua no kauna," wahi a keia kanaka. Olelo hou aku la o Pakaa, "Aole no au e pili me oe, no ka mea, he uuku kau i-a, aia a nui e like me ka'u alaila, o ko'u hoa pili ia." "Ehia au mau malolo?" wahi a kela poe. "Elua a'u kaau malolo," wahi a Pakaa. "Aohe la hoi ou makemake o kakou ke pili, no ka mea, ke makemake la hoi oe i ka mea nui o ka i-a, ina paha e pau makou o keia waa i ka paumi o ka malolo, elua kauna i-a a me na i-a keu elua, ka pau no hoi ia o au kaau malalo, he ewalu ko makou nui la o keia waa."Aia no paha ia i ka mea i holo i ko oukou manao, ina ua aa poho mai la oukou, e heihei me a'u, oiai, ua ike mai la no oukou, he wahi keiki wale no au, aole i paa ka malo, a o oukou hoi, ua kanaka makua, aole o oukou kumu e hopohopo ai no'u," wahi a Pakaa, "Ke aa nei makou e heihei kakou," wahi a ka poe kanaka makua. Olelo aku la o Pakaa imua o lakou, "Homai ka i-a a oukou ia'u." A hoole mai la lakou la, me ka olelo mai, "Ia makou paha ka malama o ka i-a a kakou." Hoole aku la keia, me ka olelo aku, "Ua ike no oukou he keiki wale no au, aole o'u ikaika ke aua iho i ka i-a, ke make au ia oukou, he hiki no ia oukou ke kii mai a lawe aku, a ina hoi e make oukou ia'u, e aua anei oukou i ka i-a, ke kii aku au." "Ua holo," wahi a lakou la, "Aia i ka pae ana i uka o ke one maloo," (ua ike no lakou la, na lakou no ka make, a e eo ana no ia lakou, no ka mea, he ewalu ko lakou nui, a heaha la keia wahi keiki uuku imua o lakou, he mea ole no ia,) "Ae," wahi a Pakaa. A i ka makaukau ana o na mea a pau, na kekahi poe hoi i hooho ae, penei: "Ku-ku-ai-mo-ku, o Laha-i-na, o-i-a!" a o ka holo aku la no ia, ke lalau wale nei no ua o Pakaa i hope, i Muliwaa, e lalau ai, aia lakou la ke holo la a kaawale loa, aole oia nei holo aku, hoololi ae la keia i ka ihu o ka waa i ka makani, a ke olelo ae la na kanaka o kekahi poe auwaa e ae, " Aia ua keiki nei ke lalau mai la, aohe hoi he holo mai, a ke lalau la ka ihu o ka waa i Kualoa, a i Hanamanuea hoi, a heaha la ia mea nui ana e hapai mai la?" "He laau, aia la ke kukulu mai la," wahi a kekahi poe. Olelo ae la kekahi poe, "Lohia kau e na keiki, a ua ike no ka paha aohe ikaika, koi e koi ai i ka heihei," wahi a kekahi poe. NO KA PAE ANA O PAKAA IUKA. Oiai o Pakaa e kukulu ana i ke kia o kahi waa ona, a me na pea, a me na lako e ae oia nei, (o ka pea nae o ka waa oia nei i hana ai, hea opunui, a he pea heke paha ko ka moku.) O koia nei hooluli ae la no ia i ka ihu o ka waa i ke komohana e kupono ana i uka o ka honua; hookahi aia nei hana, o ka uli wale no i ka hoe mahope, ke ahai la kapupuhi, nona keia wahi lalani mele, "Pupuhi kai o Ukoa, Puhala ka ihu nana i ke Kaao, Haalele koa waa i koa kanaka, Aloha ia lakou he ala lio ko lakou nei." A i ka ike ana mai la o lakou la e holo la mamua i ko ia nei punonohu hele aku mahope nei, o ko lakou la hoopapau loa iho la no ia i ka hoe, oiai, mai ko ia nei hoomaka ana e holo aku a i ko lakou la wa e holo ana, he aneane nalowale aku koe, ua ikea koliuliu ia aku, aole i emo, o ka loaa koke aku la no ia. A ia ia nei e holo aku ana, ke hooho wale mai la kanaka e uwa ai, " aia'e ua keiki nei, me kela mea nui e hoopunonohu mai nei, a ke noho wale mai la no, aohe hoe, ia kakou

wale no ka hoe." I ko ia nei kaalo ana ae ma ka muku o ko lakou la waa, o ko lakou la hoopapau loa iho la no ia i ua mea he hoe. I ko Pakaa ike ana ia lakou la e hoopapau ana i ka hoe, o ko ia nei kahea iho la no ia me ka leo nui, "I ikaika! i inu i ka wai o Wailua, aia o Kalanipuu ke au mai la i ke kai, ua pae, o na pae a ka hookele, na ula a ka hooluu, na ola a kahuna, pae, i ikaika i pae ka waa, ai mua ke keiki makahiapo i ka malolo mua a kau." Ma ka ia nei olelo pela, a akena hoi, he mea e ko lakou la inaina nui, a me ke kua-ki ia Pakaa, aka, he ane makehewa nae ko lakou hooikaika ana, oiai, ke hao la na pea heke, o Mareka i ka waa la pae. Aohe a Pakaa nana mai ia lakou nei, ke holo la kela e pae iuka. A i ko ia nei hiki ana aku la iuka, ua paapu mai la oia i na kanaka, e akena ana, a e mahalo ana hoi i ko ia nei akamai, a me ka noono i ka imi mea hou, a o ke e-o ae la no hoi ia iaia nei, a lilo ana ia Pakaa na malolo a lakou la, o ka la-i iho la no hoi ka ka poe hoa i pili ai. NO PAIEA KA MOI O KAUAI. Mahope iho o na makahiki elua, hoomakaukau iho la o Paiea ka Moi o Kauai, e hele i ka huakai kaapuni, ma Kauai mua, e kaapuni ai, a mahope aku na mokupuni e ae. A i ka wawa ia ana mai o a o, o ke aloalii o Paiea, a me ka holo mua ana o ka lohe ma na kuaaina a puni o Kauai, i ka hele ana aku o Paiea ka Moi, nolaila, ua liuliu, a makaukau no hoi lakou no ka hoolako ana mai i ka mea kupono no ka huakai a ke alii. O Paiea, he alii nui oia no Kauai mai na kupuna mai, a he alii inu awa no hoi, aole e a-na i ke kanaha apu awa hookahi, a hiki paha i ka hapalua o ka lau, (oia hoi 5 kanaha.) A he mau aikane punahele kana, o Kikiawaa ka inoa o ka mua, a o Manualaalahia ka inoa o ka lua, ke kumu o ko laua punahele ana, no ka like pu me Paiea ka ikaika i ka inu awa; e pau no hoi ke kanaha apu i kekahi, a pela no hoi kekahi, a no ka ike mau ia o laua ma ia hana inu awa, nolaila, ua haku ae kekahi poe kanaka a kamalii hoi, i kekahi mele, i mea e hookanikani pihe ai ma ke alo alii, a penei: "Ki-ki-awaa, Manu-ala-ala-hia, He kanaka inu-awa laua elua, Ehia ona apu, hookahi kanaha." A pela aku e hana mau ai na ohua o ke alo alii. A i ka hoolaulaha loa ia ana ae mai o a o, ka hele kaapuni o Paiea, nolaila, uluku ae la ka poe e noho pu ana ma ko Pakaa ma wahi, a ma kekahi wahi e ae no hoi, o ka poe nae e pilipili aku ana ia Paiea, a me na ohua, a alo alii hoi o Paiea, o lakou ka poe hiki ke hele, a o ka poe kuleana ole, a awaawaina ole aku me Paiea ma, aole no e hiki ke hele pu, o lilo i mea hooluhi wale ia, (e like la paha me ka poe ike ole i ka namu okohola, no ka poe ike ka ia e namu ia mai nei, e kii ehuki i kela kaula, kuhikuhi lakou la i ka poe ike ole.) A pela i makau ia ai ka hale hoopili wale o ka wa kahiko, aia no a kuleana, a launa hoi, alaila, noho aku i ka hale alii, a hale hoopili wale e ae paha. NO KE KOI ANA O PAKAA IA LAAMAOMAO E HELE PU ME PAIEA I KA HUAKAI MAKAIKAI. A no ka ike ana o Pakaa i ka lulumi a me ka momoku hoi o ka poe o ko lakou nei wahi i ka hele pu me Paiea i ka huakai kaapuni, nolaila, olelo o Pakaa i kekahi poe, heaha ko oukou mea e hoomakaukau nei, a e lili nei hoi, a olelo ae no oukou, he makaikai, he kaapuni me Paiea, olelo mai lakou, e makemake ana makou e hele i ka makaikai me Paiea ke alii o kakou, e hela ana i ka huakai kaapuni ia Kauai nei, a pau ia, holo aku ma Oahu e kaapuni ai, a hiki loa aku i Hawaii. Aia i hea ia aina o Oahu a me Hawaii, wahi a Pakaa, aia manae aku nei, aohe ike ia'ku o Hawaii, wahi a lakou. E aho hoi ha o kakou ke hele i ka makaikai me Paiea, wahi a Pakaa, aia no paha ia ia oe, pela mai lakou. O ko ia nei hoi aku la no ia e hai ia Laamaomao, a i ka lohe ana o Laamaomao ia olelo a Pakaa, kaumaha no kona naau no ka hahai, a hele hoi o kana keiki me Paiea ma. Mahope iho nae o ke noi ana mai a Pakaa i kona makuahine, eia ka Laamaomao olelo, aole paha pono ia oe ke hele, mamuli paha huhu ia mai oe, hana ino wale ia mai, e na poe ohua o ke alii, olelo aku o Pakaa, he mea hana ino wale ia mai no ka ka ae aku, a me ka hoolohe aku hoi i ka hoounauna ia mai, he loaa ia'u kahi wai, a me ia mea liilii ae, a ia mea liilii ae, kupono ia'u i ka mea liilii, a o ka hana kupono ole ia'a, na ke kanaka makua no ia. A ma ia olelo maikai no a Pakaa, ua ae aku kona makuahine. NO KA HELE ANA O PAKAA ME PAIEA I KA HUAKAI KAAPUNI. I ka wa i hele ai o Paiea i ke kaapuni ia Kauai, ua hele pu o Pakaa me ia, malalo aku nae o kekahi poe ohua o ke alii, a he wahi keiki hoounauna ia no hoi e ka poe nui, a he pakike ia no hoi, a he ano hoomaopopo ole ia aku kana mea ai, a me kona haawina, aka, hoomanawanui no nae o Pakaa, aia ka pono i ko ia nei manao, o ka ike aku ia wahi, a ike aku no hoi ia wahi, aka, na ka hele ana no nae a ke alii, aohe no e nele ana ka ai o ka ohua i ka waiwai a kiloi, a panapana i ka ai i ka waiwai o ka moku o Kauai. Aohe no he pilikia nui o ka hele ana, oiai, he mea kahiko mai no ia, i na e hele ana ke alii i ka huakai kaapuni, he mea olioli ia no na ohua, e ai ae anei i ka waiwai a hoomaunauna, a he niho palaoa hoi ka huakaihele, wahi a ka poe kahiko, a hoi mai oe i kou wahi, nau no e hana kau, a pela no ka hele ana a puni o Kauai, i na malama eono paha. (Aole i pau.)