Ke Au Okoa, Volume I, Number 45, 26 Pepeluali 1866 — Page 4

KE AU OKOA.

HONOLULU, FEBERUARI 26, 1866.

No Kekahi Loio Opiopio.

Iloko o kekahi hale nui i pena ole ia, e noho ana kekahi wahine i loaa i ka mai, a o ua hale nei, elua wahi e noho ai, iluna a ilalo. A o ua wahine nei nae, iloko o ka hale iluna, a ua launa pinepine no ia me kona mau hoa i na wa a pau, a he wahine no hoi i aloha ia e kona poe makamaka. A i ke kokoke ana mai o ka pilikia i ua wahine nei, a aneane no hoi e lawe ia aku ka noonoo kanaka mai ua wahine nei, alaila, hu mai la ke aloha iloko ona no kana keiki kane, oiai, ua lawe e ia aku kana kane a me kekahi mau keiki ana, e na lima menemene ole o ka make, a o kana keiki hookahi no ia i koe, a kana keiki makahiapo no hoi ia.

A he nui no hoi ka hooikaika ana o ua wahine nei i ka imi ana i ka hana, i mea e loaa mai ai ko laua ola, a me ka imi pu no hoi i dala i mea e uku ai i ke kumu, no ka hele ana o kana keiki i ke kula. A ma ia hooikaika ana a ua makuahine nei no kana keiki, e hele i ke kula, nolaila, ua hookomoia ua keiki nei iloko o kekahi Kulanui, (College,) aka, ua hookaumaha ia nae ka naau o ke keiki no ka mai o kona makuahine.

A i kekahi la a ua keiki nei i hele ai i ke kula, ua hookaumaha loa ia kona manao i kona wa e noho ana iloko o ka rumi kula a hiki wale i ka pau ana o ke kula. A i ka pau ana o ke kula, wikiwiki aku la kona hoi ana i ka hale, no kona aloha i kona makuahine. O ke keiki paha ia i aloha io i ka makua, ka manao e hoi pololei i ka hale, i ike koke aku i kona makua, aka, o na keiki o keia wa, he manao lalau wale no, no ka mea, ua ike iho no he mai ka makua, aohe wahi mea a hoi poiolei i ka hale ke pau ae ke kula. A i ka hiki ana aku o ua keiki nei i ka hale, komo koke aku la ia iloko o ka rumi o kona makuahine e waiho a mai ana, a ike mai la no hoi ka makuahine i ua keiki nei ana, a haloiloi mai la na waimaka maluna o kona mau lihilihi, a komo pu aku la no hoi ke keiki iloko o ke kaumaha, no ka ike ana aku e iho iho ana na kulu—waimaka maluna o ka papalina o kona makuahine, a hoomaka mai la no hoi ka makuahine e kamailio i kana mau olelo ae i ke keiki makahiapo, aka, aole nae e hiki i ua makuahine nei ke haoikaika mai i kana mau olelo ao, no ka mea, ua aneane paupauaho oia.

Alaila, hoomha iki iho la ua makuahine nei a pau iki ae ka paupauaho iloko o kekahi mau minute pokole loa, alaila, i mai la ua makuahine nei, penei : "E kuu keiki, ua ike no oe i ko'u manao paa mamua, iloko o ko'u mau la pilikia ole, aka, e pono no ia'u ke hoike hou aku i keia manawa, e like me ka'u pule e kauoha mau ana nou. Ke makemake nui nei au ia oe e lilo oe i Kahunapule, i hai aku oe i ka olelo a ko kakou Haku, ka maa hoi nana i malama mai ia kaua iloko o ko kaua mau la popilikia, a oia no hoi ko kaua mea nana e malama mai i na la a pau o ko kaua noho ana i keia ao. A ke kokoke mai nei ko'u mau la e haalele iho ai ia oe e noho hookahi iloko o keia hale e ku nei, a e nele ana oe i ka makuahine ole, no ka mea, me he mea la eia au ma ke kae o ka luakupapau kahi i ku ai, aka, no kuu lohe mua ana mai, e makemake ana oe e lilo i Loio, nolaila, aole ia he hana kupono au i manao ai e hoolilo ia oe ma ia mea, no ka mea, ina oe e lilo i Loio, ke makau nei au nou e kuu keiki, no kuu manao aole paha oe e hana ana ma ka pololei. I kekahi wa paha, e hana ana oe me ka hooikaika i ke kanaka i ku i ka hewa, ke haawi ia mai ia oe he umi dala, a e hoolilo iho paha i kou manao e hooikaika i ka aoao pono i aoao hewa ma kau kamailio ana."

Ae, e kuu makuahine, wahi a ke keiki, ua ike no au i ka pono a me ka hewa, a o ka pono oia ka'u e hana ai, aka, o ka aoao a'u e ike ai he hewa, aole loa no au e hana aku ma ka hoopunipuni i mea e pono ai, ano, ke kauoha aku nei au ia oe, e hana oe ma ka pololei. Aka, mai poina oe i ka hoomanao ana i ke Akua, e pule mau oe i na la a pau o kou ola ana, e like me a'u e pule pinepine nei, a e hahai no hoi oe ma kana kauoha a hiki i kou elemakule ana, ke ae aku nei no au ia oe e hana ma ka pololei ke lilo oe i Loio. A ke noi aku nei au ia oe e hoohiki mai oe ma ka oiaio wale no oe hana ai, a mai hoolilo oe i ka aoao pono i aoao hewa, a e hoolilo ae hoi i ka aoao hewa i aoao pono. Alaila, olelo aku la ia i kekahi mau mea e pili ana no kekahi poe kanaka imua o kona makuahine, alaila, hoohiki paa aku la no ia imua ona me ka olelo ana, penei : "O ka pololei, o ka'u ia e hana ai a hiki i ko'u mau la hope loa o ka noho ana i keia ao. A aole no hoi e poina ia'u ka pule pinepine ana, e like me kau kauoha ia'u i keia wa a kaua e kamailio nei." Ano, ke hoomaikai aku nei au i ke Akua nou e kuu keiki, a ke ike nei no au i kou manao e kuu keiki, a ua ike no hoi au i kekahi poe kanaka i kue i ke kanawai, aole e hiki ia lakou ke pale ae i ka hewa a lakou i hana ai, me ka haha-i pololei ole aku imua o ka mea nana e pale, a ina ua ike ka mea nana e pale, ua ku i ka hewa, alaila, o ka hooikaika aku la no ia ma ka pono ana i manao ai he pono no ka ike aku o ua mea nei nana e pale i ka puu dala e waiho mai ana a ka aoao hewa, nolaila, ia i hooika loa ai, aka, mai hana oe e like me keia poe. E pono no ia oe ke hana ma ka hana a ka poe i ku i ka pono, e like me ka pono au i manao ai he pono.

Ano, ke hooki nei au i ke kamailio ana, no ka mea, aohe hiki ia'u ke kamailio nui, ia wa koke no, lele mai la ke keiki a paa iho la ma ka lima, a kulou iho la ia ma ka aoao o kona makuahine, oiai, e puapuai mai ana na waimaka o ka makuahine, me he wai mapuna la, a honi iho la ia i ka honi hope loa, a o ka wa iho la no ia i lele ai ka ea o kona makuahine, noho iho la keia uwe, ma ka aoao kino wailua o kona makuahine.

A mahope mai o ka make ana o kona makuahine, haalele iho la ua keiki nei i kahi o laua, a pau ka ike ana i ka noho ana oluolu o Mauna Omaomao, (Green Mountain,) a hele aku la keia a noho ma kahi e aku. I ko ia nei noho ana makahi e aku, wehe ae la keia i wahi rumi Loio nona, a hooponopono iho la keia i wahi e kau ai na buke Kanawai o kela ano keia ano, ana i ao ai a makaukau, iloko o ua rumi nei ona. Aka, aole nae i loaa iki ka hana, a he nui no hoi ka poe i hele mai e kamailio a e launa pu me ua Loio opiopio nei, a i kekahi kakahiaka lailai, ike aku la keia i kekahi kanaka opiopio e hele pololei mai ana i ko ia nei hale hana.

A i ka hiki ana mai o ke kanaka opiopio a ku imua o ko ia nei alo, ninau mai la ua kanaka nei i ka Loio, "He Loio anei oe?'' "Ae,'' wahi a ka Loio, "Heaha ka'u e hana aku ai nou?'' "I hele mai nei au i ou nei, no ko'u hoopilikia wale ia ana e kekahi poe a ina he mea hiki ia oe ke kokua mai ia'u, alaila, e uku aku no au ia oe i kanalima dala." A waiho iho la ua kanaka nei i na dala he kanalima iluna o ke pakaukau, aka, aole nae i lalau aku ka Loio i ke dala, a pane hou mai la no hoi ua kanaka nei, penei: "No ke aha kou mea i lawe ole ai i keia mau dala i waiho ia aku nei ma keia pakaukau, no ka mea, o oe hoi ko'u Loio, nolaila, e pono oe e lawe i na dala?" "Mai wikiwiki oe," wahi a ka Loio, no ka mea, aole oe i hai mua mai i ke ano nui o kou hihia, nolaila, e pono e wehewehe pono mai oe, a na'u no e hai aku ia oe i ka pono a me ka hewa; ia wa no, hai mai la ua kanaka nei, "I kela mau malama akunei i kaahope ae nei, ua noho iho au he hale kuai bipi, a o ka'u hana ia, a ua kuai aku au i ka lei bipi a me na bipi, a Major Fanawaha, no na dala he haneri. Aka, aole nae au i hookaa aku, nolaila, ina he mea hiki ia oe ke kokua mai ia'u e pono oe e lawe i keia dala?" Pane aku la ka Loio, "Pehea anei oe e manao mai ai he hiki ia'u ke pale i kou hihia, no ka mea, ua hana no oe me ka pono ole, a eia wale no ka mea i koe ia'u e kamailio aku ia oe, e pono oe e lawe i kau dala a ho-o iloko o kou pakeke."

No ka mea, aole o'u makemake e hoolilo i ka aoao pono i aoao hewa, no ka mea, aohe pono o kau e kono mai nei ia'u e lawe i kau dala, a e hoohewa aku hoi i ka aoao o Major Fanawaha, i hookahi haneri no na bipi a me ka lei bibi au i kuai ai me ia. Alaila, manao iho la ia iloko ona, no ka hoole ana ia hihia, a hoomanao ae la ia i ka olelo a kona makuahine, me he mea la e hawanawana iho ana ma kona mau pepeiao, ua pono a pololei kou hoole ana ia hihia.

A i kekaki mau la mai, aole i loaa hihia hou iki, aka, aole nae keia i manao iki ae e hana i kekahi hihia o iano e hiki mai ana, no ka mea, me he mea la e noho pu ana no ka makuahine o ia nei iloko o ka rumi Loio o ia nei. I kekahi la mai, kauoha ia mai la keia e Major Fanawaha, e hele aku i ona la, a i ko ia nei hiki ana aku ilaila, ike iho la keia i ke ope bila hookaa e waiho ana iluna o ke pakaukau, pane aku la keia, ''Piha pono aku la ko eke dala i keia la, no ka mea, aohe i kanamai na bila hookaa e waiho nei.'' Pane mai la o Major Fanawaha, "He bila hookaa ia no kuu bipi a me ka lei bipi, i kuai ia ai e ke kanaka nona ka hale kuai bipi, a no ka hiki ole ia'u ke hooponopono, nolaila, kauoha aku nei au ia oe e hele mai e hooponopono, a e lawe aku no oe i iwakalua dala nau, no kou hooponopono ana i keia mau bila, ke oluolu nae oe."

Alaila, lohe iho la keia i kekahi leo, a hoomanao ae la keia o ka leo no ia o kona makuuahine. Akahi no a loaa ka ia nei wahi hana kupono e loae ai ke dala, a i kekahi mau la mai mahope, i ke ahiahi, hele hou mai no kekahi kanaka i kahi o ia nei, a kamailio pu iho la laua nei no kona hihia, aka, olelo mai la ua kanaka nei, "O oe a owau, iloko o keia rumi, nolaila, ke hai aku nei au ia oe, ua lawe aihue au he kanahiku paona meli, a ua hoopii ia iho nei au i keia la, a ina he mea hiki ia oe ke kokua mai ia'u, alaila, e hai mai oe ia'u.'' Pane aku ka Loio, "Aole paha oe e hemo la'u, no ka mea, ua aihue oe i ka lakou la mau paona meli he kanahiku.''

Aka, huki koke ae la ua kanaka nei i ka eke dala, a haawi mai la i ka Loio, a hoole aku la no hoi ka Loio, me ka olelo pu aku, "Aole e hiki ia'u ke lawe i kau mau dala, i kumu no'u e pale aku ai ia oe, no ka mea, ua hewa oe, e hele no oe e imi i Loio hou aku nou,'' A puka aku la ke kanaka iwaho, a kii aku la keia papani i ka puka, a hoi mai la a noho iho la iluna o ka noho, me ka manao kaumaha no kela kanaka, no kana hana i hana ai, a manao mai na ua Loio nei e wehe i ka hewa o kana mea i aihue ai. Aka, ua aneane nae e pilikia ua Loio nei, no ka mea, ua koe iki kana mau wahi dala, a o kekahi mea no ia o ia nei i manao ai e pilikia ia, aka hoi, lohe iho la no keia i ka leo o ka makuahine e pane iho ana, "Pono, pono aku la ko hoole ana i ka hana lapuwale a kela kanaka."

A i na la a pau ma ia hope iho, ua kaulana aku la keia ma na wahi a pau o ke kulanakauhale ana e noho ana, a he nui no hoi ka poe i mahalo i ua Loio nei, no kona oluolu a me ka wehewehe pono aku i ka hihia o kela mea keia mea i hele mai imua ona.

A ia ia nei e noho ana iloko o ua rumi Loio nei ona, lawe ia mai la he palapala na kekahi wahine kanemake, e kauoha mai ana i ua Loio nei, e hele aku e kokua ia ia no kona pilikia, oiai, ua kaulana ko ia nei inoa no ka hana pololei, nolaila, i makemake loa ai ua wahine kanemake nei, o kona Loio ia.

A i kekahi la ae, hele aku la keia i kahi o o ua wahine nei, a i ko ia nei hiki ana ma kahi o ua wahine nei, aole nae keia i ike pono i ka puka e komo ai iloko o ka pa, no ka mea, akahi no keia a hele ma ia wahi, aka, ia ia nei e ku ana mawaho o ka pa, ike aku la keia i kekahi kaikamahine nona na papalina maikai, e ku ana iloko o ka mala pua, a ninau aku la keia i ua kaikamahine nei, "Eia paha ianei ka wahine kanemake, Mrs. Heneko?" Ia wa no, huli mai la ua kaikamahine nei, a nana mai la, me ka olelo pu mai no hoi o ua kaikamahine nei, "Ae, eia ianei, a o ko'u makuahine ia, aka, ua loaa nae i ka mai, a i na he manao kou nona, na'u no e hele a olelo aku ia ia." Pane hou aku la ka Loio, "E hele aku hoi ha oe a olelo aku i ko makuahine, eia mawaho nei ka Loio Laudona." I ka lohe ana mai o ua kaikamahine nei i ka ia nei mau olelo, holo aku la ia iloko o ka hale e hai ai i kona makuahine.

A puka mai la ua wahine nei me ke kaikamihe, a kahea mai la ia ia nei e komo aku iloko o ka hale, komo aku la no ua Loio nei a noho iho la maluna o kekahi noho, me ka nanana pono i ua Mrs. Heneko nei, nona makahiki he kanaha, koomanao ae la keia i ka helehelena o ko ia nei makuahine, i ka ia nei hoohalike iho, me he mea la no he kaikaina keia wahine no kona makuahine, no ka like loa o na helehelena.

A me he mea la e aneane iho ana e kulu na waimaka o ua keiki nei, ninau mai la ua wahine nei, "O oe anei ka Loio Laudona?" "Ae,'' wahi a ka Loio, " Aohe kanaka Loio e ae ma kou wahi e noho mai nei?" "Aole, owau wale no," wahi a ka Loio. "A heaha kou pilikia a'u e hana aku ai nou?" Ia wa, pii ae la ka ula o ka papalina o ua wahine nei, a pane mai la, "I kauoha aku nei au ia oe e hele mai e kokua mai ia'u, no ka waiwai o kuu kane i make aku nei, nolaila, ina he mea hiki ia oe ke hai mai, he kupono a he kupono ole paha ia'u ke hoopii, alaila, wehewehe pono mai la ua wahine nei." Alaila, olelo aku la ka Loio i ua wahine nei, "Aia no kuu hana i ko waiwai a ike pono au i na kumu nui e pono ai.'' Lalau iho la keia i ka pepa a me ka peni, a hoomaka iho la i ka hoonohonoho ana i na mea a pau a ua wahine nei i ololo mai ai. A olelo aku la keia, "Ke ike nei au maloko o kau mau olelo i hai mai nei imua o'u, he pono kou aoao.'' A o keia hihia, he hihia keia no ka palapala hooilina a ke kane a ua wahine nei, i waiho ai no ka wahine a me kana kaikamahine. A o ke kane hoi a ua wahine nei, he kanaka waiwai, o kana hana, he kalepa, aka, mamua ae o kona make ana, ua hele aku oia ma kekahi wawahi mamao loa aku, a hui oia me kekahi kanaka i kapaia o Baraunu, (Brown,) a ilaila oia kahi i noho ai a make. Aka, ua waiho iho ia he wahine a me kana kaikamahine, e noho i ka hale nani a kona waiwai i imi ai. A o ka inoa o ua hale nei, o Elena Kalana, (Elen Clen,) a ilaila kahi i noho ai o ka wahine me ke kaikamahine a me ke koena o ka waiwai o ua kane nei, a o kekahi waiwai a ua kane nei, ua hookaa ia no na aie. Aka, mahope mai o ka make ana o ua kane nei, ua aneane paha eha makahiki, ia wa, hoi mai la ka hoa hui o ke kane a ua wahine nei, a hoopilikia i ua wahine nei me na palapala aie o kela ano keia ano.

O keia mau palapala nae a ka hoa hui i hana ai, e olelo ana, ua aie o Mr. Heneko ia Baraunu, a o ua palapala nei, ua hana o Baraunu ma kona manao wale iho no, i kakauia me ka inoa o na hoike iloko. I ka hiki ana o keia mau mea imua o ka wahine kanemake, nolaila, hookuke ia aku la o Mrs. Heneko me kana kaikamahine, mailoko aku o ka hale Elama Kalana, a o ua palapala nei a Baraunu i hana ai, ua hoomaopopo loa ia e ka lehulehu, ua aie o Mr. Heneko ia Baraunu. A i ka hookuke ana ia Mrs. Heneko me kana kaikamahine, ua haalele iho laua i ko laua kulanakauhale i noho mua ai ai, a hele aku la laua ma kekahi kulanakauhale aku. Ilaila laua kahi i noho ai, e ao kula ana iloko o na makahiki eono.

A i ka pau ana o na makahiki eono, hoi malu mai la laua iloko o ua kulanakauhale nei a laua i noho mua ai, no ka manao ana no o Mrs. Heneko, aohe oiaio o kela mau palapala a Baraunu i hana ai, a o ke kumu nui ia o kona manao ana e hoi hou i kahi a laua i haalele ai. A i ka wa a ka Loio i olelo ai he pono no ia laua ke hoopii, nolaila, manao iho la ua wahine nei o Laudona kona Loio kupono, e hoi hou mai ai ka waiwai no laua. A i ka wa i hiki mai ai ka manawa e hookolokolo ai no ua hihia nei, ua piha pono owaho i na kaa lio a me na lio o ka poe i hele mai e lohe i ka hihia mawaena o Mrs. Heneko a me Baraunu. Mamua ae nae o ka wa i hookolokolo ai, ua koho o Baraunu i Loio nona, a o ka inoa o ua Loio nei o Baraunu, o Sanapolo, a ua lawe ia e Sanapolo ka palapala a hooiaio ia imua o ka Lunakanawai, i mea e hiki ole ai ia Laudona ke hooponopono ia hihia.

A i ka hiki ana mai o ka hora e kukulu ai ka aha, ia manawa, ku mai la no hoi ka Loio Laudona, a wehewehe mai la i na mea e pili ana no ka palapala aie o Mr. Heneko, ia Baraunu, aka, i ka pau ana o ka Laudona olelo ana no ka palapala a Baraunu i hana ai i wahi e pili ai, ua aie io o Mr. Heneko, nolaila, hai aku la ia imua o ka lehulehu, aole loa no

o Mr. Henko, i kakau i kekahi palapala a waiho aku ia Baraunu.

A hoomaopopo ae la ka lehulehu, aole loa he oiaio ka palapala i waiho ia imua o ka aha e Baraunu, a wawa ae la ka rumi holookoa i ka poe e hoolohe mai ana i na olelo a Laudona. Alaila, ike ia aku la o Sanapolo, e noho ana me ka imi iho i wahi e ko ai kona aoao, aka, aole nae e hiki, no ka mea, ua lilo ka hapanui o ka pono ma ka aoao o Laudona.

Ia wa ku mai la o Sanapolo imua o ka aha, a nonei mai la i ka aha e hai mai ia i ke kuleana kupono no ka palapala a Baraunu i waiho ai imua o ka aha hooeolokolo, a i ka pau ana o kana kamailio ana, kukulu ia mai la na hoike i ike maka ai i ua palapala nei, a hai aku la no hoi ia i kana mau mea a pau i ike ai no ua palapala nei. Ia wa, homaka mai la o Laudona e ninau i ka hoike, "Ua maopopa loa no anei ia oe, na Mr. Heneko i kakau i kela palapala?" "Ae," wahi a ka hoike.

"A ua kakau inoa no nae paha oe iloko o ka palapala?" "Ae, ua kakau no au i kuu inoa iloko o ka palapala."

I ka wa hea i kakau ia ai kela palapala? I ka la 18 o Iune, M. H. 1830. Wahi a ka hoike.

E noho pu ana no anei oe ma ia wahi hookahi ia manawa?'

Ae. A pehea ka loihi o kou noho ana ma ia wahi?

Malaila no au i noho ai iloko o na makahiki eha.

Ia mananawa haawi aku la o Laudona i kekahi palapala i ka Lunakanawai, aia iloko o keia palapala na olelo a ua hoike nei e kamailio nei. Pehea ka nui o keia wahi au i noho ai. Ua maopopo no ia'u ua like ka nui o na hale me ke kanalima. A ua maopopo no ia oe na ano pakahi o keia mau hale? Ae. Wahi a ka hoike. Pehea la ke ano o ka hale o Mr. Heneko i noho ai, elua paha hale iluna a ilalo. Ke manao nei au elua hale, i ka hale paha ilalo, a iluna paha kahi i make ai o Mr. Heneko; iluna wahi a ka hoike. A ilaila no ke kakau ana a Mr. Heneko i ka palapala aie ona ia Baraunu, aole, ilalo kahi i kakau ai; alaila, nana pono ae la ua hoike nei ia Sanapolo, ua maopopo no paha ia oe ke pena o ka hale? O ka mea i maopopo ia'u e hoike aku ai imua o ka aha, aole pena, kai no hoi o kou wahi ia i noho ai, a ua ike pinepine no hoi i ua hale ala i na la a pau, iloko o na makahiki eha au i noho ai. Ua ike no au aole i pena ia, a ma ka aoao hea o ke alanui kahi i ku ai ka hale?

Aole au i hoomaopopo, ua poina ia'u, ua maopopo paha ia oe ke alanui? Ae. Ua maopopo no ia'u ke alanui; e moe ana mai kahikina a ke komohana, ke moe nei ke ala mai ka hikina a ke komohana, a o ka hale elua hale, iluna, a ilalo, aole i pena, a i ka hale iluna kahi i make ai, a i ka hale ilalo ko wahi i ike ai i ke kakau ana i ka palapala aie. Nolaila, elua au mea i koe e koi aku ai ia oe; e lalau oe i ka peni a e kakau iho i kou inoa maluna o keia pepa e waiho nei maluna o keia pakaukau. Ia wa aole i pane mai ua kanaka nei, a hooikaika aku la o Laudona i ke kanaka e kakau i kona inoa, aka, pane mai la ua kanaka nei, aole e hiki ke kakau no ka lolo o ka lima. A pane aku la ua Laudona nei, he mai mau no nae paha ia nou, ae, he mea mau ia no ko'u lima, a he aha la ka hoi ko mea i kakau ai iloko o ka palapala aie o Mr. Heneko ia Baraunu; a ma ia hoole ana a ua kanaka nei, alaila hoopiha ia iho la ka lehulehu e noho mai ana i ka apono loa i ka aoao Laudona, a o ua kanaka nei, aole e hiki ia ia ke kakau, aole no i hele iki i ke kula, a o ke kumu no ia i kakau ole ai.

A ke manao nei au ua hoohiki iho nei oe ma ka oiaio, nau i kakau kou inoa iloko o ka palapala aie o Mr. Heneko ia Baraunu. A e ia wale no ka'u mea i koe e hana aku ai ia oe; e haawi mai oe i ko buke, a nau e wehe ae imua o ka aha i keia hora, aole au e haehae i kau wahi apana pepa hookahi. Ia wa, haawi aku la ua hoika nei i ka buke ia Sanapalo, aole i haawi ia Laudona, ia manawa ike ia aku la e ka lehulehu a pau e noho ana iloko o ka rumi, ua huhu loa o Sanapolo i ka hoike, a me he mea la e kapa aku ana i ua hoike ala he kanaka naaupo.

A i ka nana ia ana o ka buke a ua hoike nei, ike ia iho la he palapala hookuu no ua kanaka nei e hoike ana, imua o ka aha a penei na olele oloko o ka buke:

Ua hookuu ia aku o Ioane Odina no kona noho ana iloko o keia halepaahao, i na makahiki eha. A ua pau kona paahao ana mai keia la 15 aku o Iune, M. H. 1831. Kakauia e Mr. Wahie, (Mr. Wood,) Luna paahao o Pensilevenia. Alaila, lalau iho la keia i kahi palapala a ia nei a haawi aku la i ka Lunakanawai, ua like no keia wahi pepa me ka pepa a ia nei i haawi mua ai i ka Lunakanawai. O na olelo keia a ka hoike a ia nei i ninau aku ai i ka hoike. A haawi hou aku la keia i kekahi pepa i ka poe jure, a o ka olelo o loko, penei;

Imua o oukou e ka poe jure, ua lohe pu iho nei no kakou i ka olelo a ka hoike o Balaunu. A o ka hale o Mrs. Heneko i make ai, e ku ana no ia ma ka aoao o ke alanui e moe ana mai ka akau a i ka hema. A hookahi no hale aole elua, iluna a ilalo, a ua pena ia i ke pena ulaula, a oia hookahi no ka hale ulaula oia kulanakauhale.

Ia manawa, noho malie loa iho la oloko o ka rpmi, aohe leo pane; a pii ae la ka ula o na maka o Balaunu, me he mea la ua naha kona puuwai; a o ke kanaka i ku hoike ai, mae iho la kona helehelena me he ilio la ua make. Ia wa, komo koke aku la ka poe jure

iloko o ka rumi, a puka koke mai la no, a hai ae la i ka olelo hooholo imua o ka lunakanawai a me ka lehulehu e apono ana i ka aoao o Laudana.

A kauoha pu ia aku la no hoi o Balaunu i na poho a pau o ka wahine kanemake Mrs. Heneko e hoihoi mai; a ina aole ia e hiki ke hoihoi, e kudala ia no kona waiwai a pau.

A hoi hou ae la ka hale Elema Kalana ia Mrs. Heneko a me kana kaikamahine, a noho hou iho la ua makuahine nei me kana kaikamahine i ka hale a laua i noho ai.

A mahalo nui ia iho la ka Loio Laudona, a o ka Loio Sanapolo, ili iho la ka hoowahawaha ia e na kanaka o ua kulanakauhale nei. A loaa iho la no hoi ka pomaikai nui ia Laudona.

Ninau Hoomana ma ke akea.

Aloha oe; a me kou mau Luna Hooponopono iloko o ka loa, a me ka laula o kou kino holo okoa.

Ua poloai ia mai au e ko'u luna manao, e hoouna aku i mau talena gula, nona ke poo e kau ae la maluna, "Ninau Hoomana ma ke akea."

A oiai no hoi au e ike ana i ka hoopaapaa Hoomana i na la i hala ae nei, a me keia mau la no e hele nei, mawaena o ka Hoomana Katolika Roma, a me ka Hoomana Bihopa o Enelani; a koe nae hoi kekahi mau Hoomana i hiki mai ma Hawaii nei, aole laua i ekemu aku, aka, ua mumule iho nae: Eia ua mau ninau Hoomana la.

1. Ina aole o Iesu Kristo i hiki mai ma ke ao nei i kalahala no ka poe hewa. Eia ka ninau aku, owai la o na Hoomana i hiki mai ma Hawaii nei ka mea nana e alakai, a noho ma ka Paredaiso nani o ke Akua?

2. Ina ua hiki mai o Iesu Ksisto ma ke ao nei i kalahala a i kumu Hoomana na ko ke ao nei a pau loa. Eia ka ninau aku, owai o na Hoomana ma Hawaii nei i koho pono ia e Iesu Kristo mai kona keneturia akahi mai a hiki loa ia kakou nei? E kuhikuhi pu mai i ka mookuauhau i aka'ka ai?

3. Ehia la ka nui o na Hoomana a Iesu Kristo i kukulu ai?

4. I ka makahiki hea hoi kona kukulu ana? A i ka la hea hoi?

5. O ka Iesu Kristo Hoomana i kukulu ai a pau loa, he hiki anei i ka lima kanaka ke hoololi hou, a hooponopono hou e like me kona makemake?

6. Ina aia iloko o kela Hoomana keia Hoomana he poe manaoio hana, o ke Akua ma ka Lani ka lakou e malama ana ma o ka manaoio hana, a ina lakou e pau i ka make, mahea la ko lakou mau uhane e noho ai? Ma ko Aberahama poli anei? Ma ko Luaahi poli paha?

Me ka lana o ko'u manao, e hiki ana no i na keiki lolii Baibala o na Hoomana eha i hiki mai maanei nei, ke wehe mai i ke ki o ka pahu berita a ke Akua, i ike ia iho ke kookoo o Aarona, a me ka ipu o ka Mane, kai kalele ae ina opuu, a me na papa kanawai, i puai mai ai ka waiwai noloko mai o nei mea he ninau. Owau no me ke aloha.

W H. KALAEOKAENA.

Huleilua, Kau, Hawaii, Jan, 1866.

Olelo pane ia J. H. Kaakua.

Aia ma ka Helu 32, Buke 1, o ka la 27 o Novemaba ka makahiki e hele nei, malaila au i ike iho ai i na olelo hooio a kekahi o Waialua, e hoole ana, aole ka he haina o ka ninau helu i hoopuka ia ma ka Helu 41 o ke Kuokoa o ka la 14 Oct, 1865. "E waiho ana kekahi papa ma ke kula o Kaapoko, Waikane, Koolaupoko, he 15 kapuai ka loa, 9 kapuai ka laula, aka, ke makemake nei hoi o S. E. K. Papaai e olo i papa huinahalike, he 12 kapuai ka loa he 12 kapuai ka laula. Pehea la e olo ai i lilo ai i papa huinahalike."

Haina oia ninau: Aohe olo ana. "A ma laila au e pane nei ia J. H. Kaakua me ko'u kanalua ole, no ka ike o ka mea nana ka ninau he hiki ke olo ia ka papa i olelo ia maluna, nolaila, i kuu ia aku ai ma ke akea i koho mai ai ka poe puni ninau, a i ke keiki hoi o Waialua, ke hoole mai nei aole wahi e olo ai, ina pela, ke hai nei au, he makapo o J. H. Kaakua, ke hoe hewa mai nei kona waa a pae i Kohala i Kapua, ka au waa panana, ke kauoha nei au ia oe e J. H. Kaakua, mai pane hou oe no ka ninau, ua ike no paha oe aole loaa ia oe mahaoi wale mai no oe i ke koho, e waiho no oe na lakou la ae no e koho mai, o hoi no oe i ka ai oopu i ko aina o Kauaula.

Ke i mai nei. Ua hukia naaupo ia paha kou lunaikehala e ka huakai hookiekie i kono ia e kou hialaai i kou naauao iho, o kou wahi akamai ia e J. H. Kaakua o ka hiki ia oe ke kapa aku ia hai he hookiekie i ike iho nei ma na olelo hoohenehene au.

Ma ka lua o ka ninau i hoopuka ia ma ka Helu 37 o ke Kuokoa no, o ka la 16 o Sept. 1865. Ke i mai nei no ua keiki koho ninau nei o Waialua, ua like kana loaa me ka S. Napahukapu, ke hai nei au aole ia o ka haina 9 kapuai 2 hapa 10 o ke kapuai ka lele ana o ka moo a loaa ka pilali, ke alu mai nei nae koho ninau, ka i mai nei o ka lakou loaa like ka ia o S. Napahukapu, aole ia o ka haina kupono e like ai me ka haina a ka mea nana ka ninau.

E aloha auanei ke AU OKOA a me kou Lunahoopono a me ka poe hoolele kepau, e ku ai ka iini o ka poe heluhelu Nupepa KE AU OKOA, ia oe aku ia ke kuupau i kau hana o ka hoopuka manao. E kali aku au o ka ia la awala mai, me ka mahalo no.

S. E. K. PAPAAI.

Waikane, Koolaupoko, Jan 12, 1866.

NA LUNA O KEIA PEPA.

EIA IHO NA INOA O KA POE MA KELA wahi keia wahi i hookohuia i poe Puna o KE AU OKOA. Me lakou nei e hooponopono ai na makamaka lawe nupepa no ka uku o ka pepa, a me ko na Olelo Hoolaha.

HAWAII— J. H. Coney, Hilo.

D. H. Hitchcock, Hilo.

L. Kaina, Puna.

W. T. Martin, Kau.

C. N. Spencer, "

J. G. Hoapili, Kona Hema.

P. Cummings, "

J. Z. Waiau, Kona Akau.

J. H. Kamalo, "

G. K. Lindsay, Kohala.

J. Naiapaakai, "

S. P. Koko, Hamakua.

MAUI—A. M. Kahalewai, Lahaina.

P. H. Treadway, "

W. Ap Jones, "

E Saffrey, Honuaula.

C. K. Kakani, Kaupo.

John Rae, Hana.

W. P. Kahale, Wailuku.

W. G. Needham, Makawao.

T. W. Everett, "

MOLOKAI—M r. Meyers, E. H. Rogers.

OAHU— J. P. E. Kahaleaahu, Ewa & Waianae.

J. M. Kalanipoo, Waialua & Koolauloa.

J. W. Kea, Koolaupoko.

KAUAI— T. H. Marshall, Lihue.

S. Kamahalo, "

J. S. Low, Hanalei.

H. J. Wana, "

G. W. Lilikalani, Koloa.

J. Kauai, Waimea.

OLELO HOOLAHA.

E IKE AUANEI NA KANAKA A PAU, MA KA

APANA O EWA A ME WAIANAE,

ua loaa mai ia'u ka MANA KUAI AWA, aia ko'u Hale Kuai Awa ma

HALAULANI, WAIPIO, APANA O EWA.

Nolaila, ke kahea aku nei au i ka poe a pau loa e makemake ana e kuai i ka Awa, e hele mai ma kahi i hoike ia maluna, ka poe a ke Kanawai i ae ai, a no'u wale no ka Palapala Kuai Awa i ae ia ma ia mau Apana. A nolaila, e wiki mai oukou.

NAPAHUEKOLU.

Halaulani, Waipio, Ewa, O., Dec. 30, 1855, 39-3m*

KALAKO HOU!

MAKALENA HOU!

MAKALENA HOU!!

MAKALENA HOU!!!

NO KE KUMUKUAI MAKEPONO LOA!

Na wa e kuai ai, mai ke kakahiaka Poakahi, a hiki i ke ahiahi Poalima.

Ma ke kihi o ke Alanui Nuuanu a me ke Alanui Marine; mamua aku o ka Hotele Royala.

(38-3m) ISAAC REINHART.

RAIKI! RAIKI!

E OUKOU A PAU, KA POE KANU RAIKI ma ka Mokupuni o Oahu, a me na Mokupuni e ae kekahi, owau, ka mea nona ka inoa malalo iho, e uku no au i ke kumukuai kiekie, no ka Raiki i pau ole ka ili, ke lawe ia mai ma ka Wili Raiki ma Punaluu, Oahu, a i ole ia, ma ko'u keena ma Honolulu.

H. W. SEVERANCE,

A gena o ka Huina Raiki o Punaluu.

Honolulu, Okatoba 7, 1865. 38-tf

OLELO HOOLAHA.

—A—

KA PAPA OLA!

MA KEIA, KE HAI AKU NEI I KELA MEA keia mea, e hoomaemae lakou i ke alanui, ma ke alo iho o ko lakou mau pa hale; a e halihali i na opala a waiho ma na wahi i hookaokoa ia e ka Papa Ola.

JNO. H. BROWN.

Luna o ka Papa Ola.

Honolulu, Dek. 16, 1865. 35-3m

OLELO HOOLAHA.

UA HALAWAI KA AHAHUI O HAMAKUA, Hawaii, i ka la 18 o Dek., 1865, ma Eleio, e imi i ka mea e pono ai ka hana ana i ke Awa o Honomalino, e like me ke kauoha ana a ke Kuhina Kalaiaina, "E hana na kanaka o Hamakua nei i ke Awa o Honomalino" Nolaila, ua halawai keia Aha mamua aku nei, kohoia o D. W. Kaila, i Puuku, o N. Keau, i Lunahoomalu, o P. Kaaekuahiwi, i Kakauolelo.

HOOHOLOIA; E haawi mai ke Kuhina Kalaiaina, Eha Haneri Dala, (400.00,) e kokua na kanaka o Hamakua, Eha Haneri Dala, (400.00.) Ua haawi mai ke Kuhina Kalaiaina, Hookahi Haneri Dala, (100.00,) i keia wa, a e haawi ana na kanaka Hookahi Haneri Dala, (100.00.)

Eia na inoa o na Luna ohi dala, Kamakahiki, no Waimanu a me Kahulaana, D. W. Kaila, no Waipio a me Manaaiole, N. Keikenui, no Eleio a me Kapulena, P. Kaaekuahiwi, no Kawela, S. Hao, no Paauhau, E. Nainoa, no Maunahoano, N. Kaai, no Kaala.

E halawai keia mau luna ma Eleio, i ka la 29 o Dekemaba nei, i maopopo ka nui o na dala i loaa mai. A ma ka malama o Ianuarii hoomaka ka hana hou ana i ke awa. P. KAAEKUAHIWI.

37- Kakauolelo.

KUAI KUDALA!

—O—

KA AINA HOOLIMALIMA!

E KUAI KUDALA ANA NA KOMISINA O NA Aina o ka MOI, ma ka puka o ka Hale Hookolokolo, ma Lahaina, ma ka Poakahi, la 5 o Maraki, ma ka hora 12 o ka auina la i ka hoolimalima, no na makahiki ELIMA, o ka aina i kapaia o OLOWALU, e kokoke ana i Lahaina, a me ke kau wahi hoi o UKUmehame, i hoolimalima ole ia mamua. E hookaaia ka uku hoolimalima i kela a me keia hapaha makahiki. O na Dala Eha Haneri, ($400) ke kumukuai emi loa e ae ia ana. E hookoe ia na pono wahie, e like me ka mea mau. P. H. TREADWAY,

43-1 t Luna Kudala.

OLELO HOOLAHA.

E IKE AUANEI NA KANAKA A PAU, KE nana mai ma keia Palapala, ke papa aku nei au i na holoholona a pau, mai hookuu wale ma kuu Aina Kula,

KAHAUIKI,

KAPALAMA,

KALAEPOHAKU,

a me PUUNUI.

Ina e komo hewa na holoholona ma keia mau Aina i hai ia ae la maluna, e uku mai ka mea nona ka holoholona $1.00 no ke poo hookahi, a ina uku ole mai, e hali ia no i ka Pa Aupuni, e like me ke kanawai. Eia ka inoa o ka Luna a'u e hookohu aku nei, N. HAONAONE, nana no e hooponopono maluna o kuu mau Aina a pau i hai ia ae nei maluna, ia ia ka mana kupono e hana ai, ka poe makemake e holimalima i na holoholona a me na mea e ae maloko o ka aina, e hele no e kamailio pu me ka Luna.

44-3 t H. A. WIDEMANN.

OLELO HOOLAHA.

MA KA WAIWAI O KAPIHENUI (W.)

E ike auanei na kanaka a pu, na mea waiwai maloko o ka waiwai o Kapihenui (w,) no Lahaina, Maui, i make aku nei, o ka poe i aieia, o ka poe pili kino, a pili paha ma kekahi ano e ae, na lakou e hele mai a e hoike mai ia lakou iho, imua o ka Mea Hanohano E. H. Allen, ka Lunakanawai Nui o ka Aha Kiekie, ma ka Hale Hookolokolo i ke kulanakauhale o Honolulu, i ka Poalua, oia ka la 27 o Feberuari, e hiki mai ana, i ka hora 10 o kakahiaka. Ia manawa e hooponopono ia ka moo waiwai a Lahela (w,) pu me Lonoakeawe (k,) na luna hooponopono waiwai a ka mea i make, a e hoike mai i kauwahi kumu, ina paha he kumu oiaio kona, aole e hookoia ua moo waiwai la, a e hoopauia ka oihana a ua mea hooponopono waiwai la.

WM. HUMPHREYS,

Hope Kakauolelo o ka Aha Kiekie.

Honolulu, Feb. 7, 1866. 43-3t