Ke Au Okoa, Volume I, Number 43, 12 February 1866 — Page 4
KE AU OKOA.
HONOLULU, FEBERUARI 12, 1866.
HE MOOLELO
—NO—
PIKOIAKAALALA.
HELU 9.
Ekolu wale no wahi i koe aole i aihue ia, o Kau, o Kohala a me Hamakua, ma kekahi po nae, hiki mua o Puapualenalena iuka o Napuu; a ike ia oia e kekahi Makaula, i pae olulo mai, mai Maui mai.
Ua kaulana loa ka maia o uka o Napuu, no ka momona, ua nui ke ko a me ka uala, ka uhi, aka, ma ka wa nae a Puapualenalena i hiki ai malaila, ua pau loa ia mau mea a pau i ka aihue ia. Aia ia wahi mawaena o Puuanahulu a me Puuwaawaa, kekahi mahinaai a ko laila kamaaina, a oia nae ka Puapualenalena i aihue ai, a malaila no hoi kahi i hailukuia ai i ka pohaku. Olelo aku la ka Makaula i na kanaka, "Mai hoeha oukou i ka ilio, no ka mea, he akua ia."
KA OLELO A PIKOIAKAALALA I KEAWENUIAUMI.
Olelo aku la o Pikoiakaalala ia Keawenuiaumi, ua olelo mai o Puapualenalena, aia a kokoke aku e hiki i na la e kani ai ka pu a ke akua, alaila, e hoi kakou a hiki i Kalahuipuaa, o oe, a owau a me na kanaka a pau loa o kaua. E! auhea oukou, o ka wa aku la paha ia i kamailio ai ka ilio me ke kanaka, he kuli loa ka ilio i keia wa, aole hiki ke olelo mai.
A no keia olelo a Pikoiakaalala imua o ke Alii, ua lilo ia i mea oluolu i kona manao. A hoi aku la lakou a hiki i Kalahuipuaa, e like me ka olelo a Pikoiakaalala.
Ma keia mea, ua ike o Puapualenalena, o Hamakua a me Kohala wale no na moku ai i koe, he awa wale no ka mea nui ma Kau, a nolaila, holo mua aku la keia e aihue i na mea a pau o Hamakua, ma ia wa i loaa ai ia ia nei o Hokuwelowelo, he Heiau ia na ke akua iluna o ka pali o Kaluahine, ma kela aoao o Waipio, aia iloko o ia Heiau o Kihapu.
NO NA LA MUA E KANI AI KA PU.
Aia ma na po o na Kaloa, e kani ai ka pu, ka po o Kaloakukahi, hiki aku la o Puapualenalena ilaila e hakilo ai, i maopopo kahi e kii aku ai a loaa, ike iho la ua ilio nei, aohe wahi kupono e holo ai ke loaa o Kihapu, hookahi paha mea kupono, o ka lele i ka pali.
A hiki i ka po o Kaloakulua, hoomau hou aku la o Puapualenalena i ka makaala, i loaa kahi kupono ana e holo ai, ina e loaa o Kihapu ia ia, a o kekahi mea hoi ana i hoomau ai i ka hele ilaila, e ake ana oia e ike pono ia Kihapu, i kona wahi i waiho ia ai Iloko o ka Heiau.
Aole i ike iki o Puapualenalea ia Kihapu iloko o na po ekolu o na Kaloa, no ka mea, aole i puhi ia o Kihapu ma ia mau po, aia wa le no ma na po o Kane a me Lono, e kani ai o Kihapu.
A hiki hou aku la o Puapualenalena ma ua Heiau la i ka po o Kane, pii ae la ua ilio la ma ka pali, ma ke alo o ka Heiau, e huli pono ana i ka aoao Akau, nee pono ae la ua ilio nei a malalo pono o ka paepae pohaku o ka pa o ka Heiau, a malaila oia i noho ai.
I ke ano poliuliu ana aku o ke ahiahi, puka mai la ke kini o ke akua me na pu elua kanaha, a puhi ae la i ua mau pu la, mai ke ahiahi aku ke kani ana o ia mau pu elua kanaha, a hiki i ka like ana o ka po me ke ao, alaila, pau ke kani ana a ia mau pu.
A pau ae la ke kani ana a ia mau pu a pau, hoihoi aku la ua poe akua la i ua mau pu nei, a kau lalani aku la ma ka paia o ka hale o ka Heiau. I ua poe akua la i komo aku ai iloko o ka hale, ma ka pau ana o ka wa a lakou i puhi ai i ka pu, nee loa aku la o Puapualenalena a hiki i ka puka o ka hale uluhe, malalo pono o ka paepae.
Ma ka wa i kani ai o keia mau pu elua kanaha, aole i poina iki o Puapualenalena i ko Kihapu leo ma ke kani ana, ia ia ma Kau, i ka wa i kani ai o Kihapu, ua paia koke kona mau pepeiao, no ka wi o ka leo ma ke kani ana.
KE KANI ANA O KIHAPU.
Mahope koke iho o ka pau ana o ke kani ana oia mau pu hoea mai la kekahi kuapuu mailoko mai o ka hale me Kihapu. Ia ka wa a ua kuapuu nei i lalau aku ai ia Kihapu, ua kani no, ua like kona kani ke pa aku i ka lima me ke kani ana o na pu e ae i puhiia. He aiwaiwa loa aku hoi ke puhi maoli ia.
I ua kuapuu nei e puhi ana ia Kihapu, he mea e ka nalulu o ke poo o Puapualenalena, no ka wi launa ole o ke kani ana. Ina la o ua kuapuu nei wale no kai waho kahi i puhi ai ia Kihapu, ina ua lilo e ua pu la i ka wa o ka hoomaka ana e kani. Aka, no ka nui loa o na akua e poai ana a puni ua kuapuu la, no laila ko Puapualenalena mea i kaili ole ai i ka pu i ka wa o ke kani ana.
I ka pau ana o ke puhi ia ana o Kihapu, nana aku la o Puapualenalena i kahi a ke kuapuu e kau ai ia Kihapu, a ike aku la keia ua kauia ua pu la maluna pono o Hakanuu, he hulili uluhe ia maluna ae o ko ke alii wahi e moe ai, kahi iwihinu ia no ke alii o na akua.
A ike maopopo loa aku la o Puapualenalena i kahi e kau ai ua pu la, (Kihapu,) kakali aku la ua ilio la o ka moe o ka poe kini o ke akua, a ike aku la keia ua moe na akua a pau mai o a o. Ekolu wale no akua i koe, he mau akua kuapuu, o ka hana a keia mau aku, he
lomilomi i ke alii o na akua, a o ka hana a kekahi he koli kukui, a o ka hana a kekahi he kahili, o lakou na kiai o ke alii o ke akua, a hiki i ke ao ana.
Kiai aku la o Puapualenalena o ko lakou moe iho, a aole i liuliu, moe iho la ka mea lomilomi, koe elua akua i koe, a aole no hoi i upuupu iho, haule aku la ka mea paa kahili, a hiamoe iho la, nana aku la keia a ike aku la i ka mea koli kukui, ua hele a kunewa ke kino i ka nui o ka makehiamoe. Hoeu koke ae la ua ilio nei a ku i ka puka, ia wa no, lele aku la ua ilio nei a loaa o Kihapu a paa i ka waha, a o ka holo aku la no ia me ka mama loa.
I ka wa i paa ai o Kihapu i ka waha o Puapualenalena, aole o kanamai o ke kani, a no ia kani ana, puoho ae la na kiai o ke akua, me ka hooho ana, "Auwe! Lilo o Kihapu!!" I ka w a lakou i puoho ae ai, pio iho la ke kukui, naku aku, naku mai, hui ka ahamaka, he aha kaina la ia.
I ka wa no i loaa ai o Kihapu ia Puapualenalena, holo polei iho la ia ma ka pali o Waipio a hiki ilalo. Puka ae la ke kini o ke akua iwaho, a lohe i ke kani ilalo o Waipio, alualu aku la kini o ke akua mahope o Puapualenalena, i ko lakou hiki ana ilalo o Waipio, hala ia Puapualenalena ka pali o Kaholokuaiwa, a hiki kini o ke akua ma ia wahi, komo keia iloko o ka ohia loloa o Kaauwana, a hiki kini o ke akua ilaila, iho ana ua ilio nei ilalo o Waimanu.
Malaila aku ka Puapualenalena holo ana a hiki i Pololu, a mailaila aku a hiki i Kapaau, i Kohala, a hiki keia i Kapaliuka, oo ka moa, a Mahukona ke kini o ke akua, oo ka moa, makau okoa, hoi hou i hope, me ka loaa ole o Kihapu ka mea a lakou i manao nui ai e loaa aku.
E ka poe e heluhelu ana, he olelo oiaio keia, ua ike no oukou he makau wale ke akua i ke ao, a o ka lakou mea makemake o ka po, nolaila, ua kupono ole ka po i na kanaka, ua oleloia hoi, penei: "He ino ka po, he wahi ahi, ua hana ia no diabolo a me kona poe pu ia e ke akua, a oia ka mea i hoi okoa ai o ua poe akua la, no ka makau o ao e ae."
Ma ke kakahiaka ana ae, hiki aku la hoi o Puapualenalena me Kihapu e paa ana ma kona waha, ma kahi o Pikoiakaalala ma e noho ana, ma Kalahuipuaa.
KE KEAWENUIAUMI IKE ANA IA KIHAPU.
A ike iho la o Keawenuiaumi ia Kihapu, kalua o kona enemi, olelo ae la ia ia Pikoiakaalala, "Aohe ka no keia pu ka hewa, no ke akua ka! ka hewa." A no ka ike ana o ke Alii i ka maikai o Kihapu, ua kamaahaia a paa i ka aha, minamina iho la ia a hiki ole ia ia ke wawahi. Aka, i ka wa o ua Alii la e lalau iho ai i ua pu la, o ke kani ae la no ia, a olelo hou iho la ke Alii, "Ka! no ua pu nei no ka hewa, ke kani ae nei."
A hala na la elua o ko Puapualenalena moe ana ma Kalahuipuaa, i ka luhi o ia hele ana. Hooka hou aku la no ia i ka aihue, e like me kana hana mau mamua.
Noke aku la ua ilio nei i ka aihue a pau o Hamakua, pau no hoi o Kohala, aohe moku i koe o Hawaii i ka aihue ia, koe nae o Kau. Ma ka ai wale no ko Kau wi, aka, o ka awa, he mea nui ia malaila, nolaila, hoomau aku la ia malaila i ka aihue ana ia mau mea. A hiki hou aku la o Puapualenalena ma Kau, a aihue aku la ia i ka awa, ma ka aihue uuku ana.
A ike iho la ka mea nana ka mala awa, ua pau i ka aihue ia, a koe no nae kekahi, nolaila, hoomakaukau iho la i kaula, i koilipi, a i o-o a me ka ihe, i mea e hoeha aku ai i ka mea nana i aihue ka awa, ke hele hou mai ua mea aihue la.
Mamua ae nae o ka hiki ana aku o ua ilio la, kukullu iho la keia i hale laumaia a paa, a noho iho la keia, a, i ke kowelowelo ana aku o ka la e napoo, lohe aku la ua kanaka nei i ka halulu, a hoomaopopo iho la ia, o ua aihue nei paha keia.
Ia wa koke no, lalau aku la keia ka o-o a holo aku la me ka manao e loaa aku kona enemi, a hiki ua kanaka la ma akhi o ka awa i koe, ike aku la ia he ilio ka mea nana e iahue ana ka awa me ka ikaika loa, ia wa no, eehia koke iho la ia i ka makau, a aohe ana mea e olelo ae ai, a waiho a make iho la ia, me he mea la i pepehiia.
A i kona pohala ana ae, hoi aku la ua kanaka nei nana ka mala awa i pau i ka aihue ia, a olelo aku la i kona poe, "E! mai make au." I mai la kona poe, "Mai make oe i ke aha?" No ko ia nei naenae a kaumaha, nolaila, kakali iho la keia a pau ke ano kaumaha, alaila, hai aku la ia ka moolelo e pili ana no ia mea.
"Ia'u i hiki ai ma ka mala awa, a liuliu iki, hoolono aku la au i ka halulu, a lalau aku la au i ka o-o a holo aku la a hiki i kahi o ka awa, ike aku la au he ilio ka mea nana i uhuki ka awa, a aole au i ano makau mai ia wa, aka, i kuu wa i ike aku ai i ua ilio la, huli no ma o a maanei, a o ka pau no ia o ua mala awa la, a olelo iho la au, aohe no ka keia he ilio io, he akua no."
A no keia olelo a'u i olelo iho nei pela, me he la hee i hohola iho maluna o'u a o ko'u eehia iho la no ia a kohu a make. Olelo aku la kekahi poe ia ia, "E hoomakakiu hou kakou i ua ilio la, malia o laa ia kakou." I aku la ua kanaka nei, "E pau auanei kakou i ka make, no ka mea, o ka pu awa e kaumaha ai na kanaka elua, i ua ilio nae, i holo wale ia no me ka mama loa."
A no keia olelo a ua kanaka la, ua weliweli e ua poe kanaka la i olelo mai ai e hoomakakiu ia Puapualenalena e hopu, a hoopau iho la lakou ia manao ana no ka makau io o make lakou.
I ko Puapualenalena hiki ana aku ma Kalahuipuaa, me ka awa ana i aihue ai ma Kau, lealea iho la ko ke Alii naau, i ka ike ana iho ua lawa oia i ka awa, a he wai auau mau hoi ia nona.
Hoohiwahiwa mau aku la o Keawenuiaumi ia Puapualenalena, wahi a ke Alii, ola na iwi i ka imi loaa, he noho wale ae no ka na kanaka, a o ka hoonuu wale no ka hana i ka waiwai a Puapualenalena a ana, paki a haalele, kuehu a koe ka lehu i kapuahi.
EIA KA MOOLELO NO KIHAPU.
Ua oleloia, he pu o Kihapu mai Kahiki mai, na kekahi kupuna Alii o loko o Moaulanuiakea, o Hinanaulu ka inoa, ua malama ia keia pu e ia, ua kamaanaia a paa ma ka nuku wale no, aole o Kihapu ka inoa o keia pu mamua, o kona inoa mua o Kikipukaeke, a o Kihakepu ka inoa o ka moa nana e kiko ma ka nuku, a kani ua pu la, ua oi aku ke kani o ua pu la mamua o keia wa.
Eia ka mea i hoomaopopoia ai ke kani o keia pu mamua. Hanau iho la o Hinaau i ke keiki, a hiki i ka wa e oki ai ka piko o ke keiki, hoi aku la laua a luna o Nuumealani, a he wahi maa ia i ke okiia o ka piko o na keiki. Ia laua i hiki ai ilaila, kulikuli loa iho la ia i ke kani o ua pu nei, (aia nae a hiki aku kakou ilaila,) e ninau kakou ia laua, penei: "E hia la sekakia mai Moaulanuiakea a hiki i Nuumealani?"
NO HINANAULU.
Ua kaulana o Hinanaulu no kona hiamoe loihi, i ka wa e hiamoe ai keia kanaka, ewalu kahaku o ka moku, elua anahulu a me na po e moe ai ma ka aoao hookahi, elua la a me na po elua e oni ai, hooleiloa, pupuu, kikookoo, a huli ma kahi aoao, moe hou aku elua anahulu la a me na po e moe ai, alaila ala mai, a kaapuni i ka aina elua anahulu me ka moe ole.
O Hinanaulu no ka paku o kona aina, a he no nae na kanaka o keia aina, he poe ike ole nae lakou i na kupua e hiki aku ana ilaila.
O Moakahaula ka inoa o ka moa nana e kiko o Kikipukaeke, e like me ka kakou i olelo mua ae nei maluna. Ina e ike keia moa i ke kupua e hiki aku ana ilaila, i ka wa e moe ana o Hinanaulu, oia ka wa e kiko ai ua moa nei ia Kikipukaeke a kani, a oia mea e ala ai o Hinanaulu.
Ma ka wa e hiamoe ai o Hinanaulu, aole oia e ala ke hoala maoli ia, ina he kanaha ku—i ana, aole no e ala ana, aka, ina e kiko ia ka pu e ua moa nei a kani, alaila, ala mai kela me ka hikiwawe loa, a hoomaka no ka hakaka, Pela i hiki mau ole ai na kupua o Hawaii nei ilaila, nolaila i manaoia ai mai Kahiki mai na kupuna kanaka a laha ia nei.
Ma kekahi manawa, ma ka wa o ka pau ana o ke kaapuni ana a Hinanaulu ma kona aina, moe hou iho la ia ma kekahi aoao a hala na anahulu a me na po elua, huli iho la ia ma kekahi aoao.
Ma ia wa, puiwa iho la ia a hikilele ae la, me ka manao iloko ona, ua kiko o Moakahaula ia Kikipukaeke, a nolaila ke kani ana, ana i puiwa ai mai kona hiamoe ana ae, e like me ka mea i maa mau ia ia.
A no ia mea, minamina loa iho la ia i kona hiamoe no ka lawa pono ole, a hoomaka hou iho la ia e moe, ia wa koke no, kani hou ana no, hele ka wi o ke kani ana a loko o kona mau pepeiao. Hoomau aku la keia i ka hoolono, halulu ana, a lohe maopopo iho la keia he leo no ka pahu, ala ino ae la keia a holo aku la me ka ama loa, a puni o Moaulanuiakea i ka la hookahi.
Ma keia wahi, ke ike maopopo nei kakou, ua ano e hou ae keia kanaka, no ka mea, ua kaulana oia no ka hiamoe loihi, i keia wa hoi, kaulana hou oia no ka mama loa, no ka mea, ua puni ka aina i ka la hookahi.
Ua olelo ae nei kakou, eha anahulu a me na po e ala ai o Hinanaulu, maloko o ia mau la, e kaapuni mau ana oia i ka aina no ke kalohe, kaili aina, ke hiki aku ilaila. A kokoke i ko ia nei wa e hiamoe ai, kauoha mua ae la o Hinanaulu ia Makaulualoa a me Makaa, kekahi o kona mau kaikaina e noho ma kekahi aoao o ka aina e kiai ai.
Kauoha ae la hoi o Hinanaulu ia Hinamakaulualoa a me Hinamakaikikaupea, kekahi o kona mau kaikaina, e noho ma kekahi aoao o ka aina e kiai ai.
Lawe ae la hoi o Hinanaulu ia Moakahaula a me Kikipukueke (Kihapu,) a hiki iluna o Hihipeapea, he wahi kiekie ia, oia nae ka piko ponoi o ko aina, oia hoi ka paha kapu o Hinanaulu, he heiau paha ke ano o ia.
A pau ko Hinanaulu hoonoho ana i kona mau kaikaina, ma kela kihi keia kihi o ka aina, hoomaka aku la ia e hiamoe. E pono e wehewehe i ke ano o na mea i oleloia ae la maluna.
NA KAIKAINA O HINANAULU.
He like wale no ke ano o na kaikaina o Hinanaulu, ma ka makaala, aole nae o lakou moe no ka manawa loihi loa, e like me Hinanaulu, he moe iki iho no ka lakou a ala ae, aka, ma ka ikaika, ua kaawale loa lakou.
NO HINAMAKAULUALOA.
He kanaka ikaika keia i ke kaa laau ma ka akau wale no, hu ka makani i kana laau ke hahau i kona hoa paio i ka wa hakaka, aka, ina e hahau ia e kekahi ma ka aoao hema, aole e hiki ia ia ke kaa i ka laau ma ia aoao, a oia kona aoao e make ai, ke ikaika nae kona hoa paio.
NO HINAMAKAIKIKAUPEA.
He kanaka ikaika keia i ke kaa laau ma ka aoao hema, ua like a like ko laua me Hinamakaulualoa, he makaukau ma ka aoao hookahi, a hemahema ma kekahi aoao.
NO MAKAULUALOA.
O keia ke kanaka oi o ka ikaika o lakou, ua hiki i ko ia nei mau hoa paio ke pa i ka ia nei laau ma na aoao eha, ma ka akau a me ka hema, maluna a malalo, pa ka hoa paio i ko ia nei mau lima, palupalu liilii, ina he lehulehu loa kona mau hoa paio e kii mai ana ia ia e pepehi a make, alaila, hoomaka keia e okaa i ka laau iluna o ke poo, aohe hoa kaua e kokoke mai ia ia, nolaila, ua lawa kona mau aoao a pau i ka ikaika. O keia ka muli loa o lakou.
NO MAKAA.
He kanaka ikaika keia ma ka lalau lima wale no, ma ka hakaka i ka pome na hoa paio, o keia kanaka ka oi o lakou, ua a kona mau maka a malamalama kana wahi e lalau lima ai, aohe mea koe ia ia, nolaila paha kona mea i kapaia ai o Makau, hookahi no puliki ana, palupalu liilii na hoa kaua.
NO HIHIPEAPEA.
He wahi kapu loa keia, aohe kanaka e hiki iluna olaila, o Hinanaulu wale no ka mea e hiki iluna olaila ma na manawa a pau. He wahi mohai akua keia wahi, ua lilo wale ka aina ke hiki kekahi kupua ikaika e ae ke pii iluna o Hihipeapea, ua hiki no nae i kona mau kaikaina ke pii ilaila, aka, ma ke ano hoomana akua, aole lakou i ike, o Hinanaulu wale no ka mea i ike.
Nolaila, ua kapa ia o Hihipeapea ma na na inoa lehuleha wale, penei, o Hihipeapea, o Puuhonua, o Pahukapu, o Nuu, o Kiu, o Makaulu, o Hakakau, o Moakahaula a me Kikipukaeke, (Kihapu.)
Ka puoho hou ana o Hinanaulu mai ka hiamoe ana ae, ala ae la o Hinanaulu a ninau ae la i na kaikaina, "Pehea ka aina a me ka pahu kapu, aohe anei he kupua i hiki mai?" Hoole aku la na kaikaina, "Aole!"
A no ko lakou hoole ana aku imua ona, hoike mai la ia i ka moolelo e pili ana no kana mea i lohe ai, i kona wa e hiamoe ana, a penei: "Ia'u i moe ai, kawewe ana ke kani o ka pahu iloko o kuu pepeiao, hele kuu poo a nalulu, a minamina iho la au i kuu hiamoe kapu, e holo ana au a puni ka aina, a ina ua hiki mai ke kalohe iluna o Hihipeapea, make oukou ia'u, a i ole, pakele oukou i ka make i keia la ia'u."
Holo aku la o Hinanaulu a puni ka aina, aohe loaa, holo hou a puni, aohe no he loaa, eha holo ana a puni ka aina, aohe no he loaa iki. A no ia loaa ole, pii okoa a ku la keia iluna o Hihipeapea, aohe he loaa, aohe no hoi he meheu, a hoi okoa aku la.
Hoi aku la ia a olelo aku la i na kaikaina, "Ua pono oukou, aohe io no he kalohe i hiki mai i ko kakou nei aina. He pahu keia na ke akua e kani nei, e aho paha e huli ae oukou, nani ka hoi kuu hooukiuki i keia pahu e kani mai nei, no ka mea, aole i ana iho ka hiamoe ana, a puoho okoa ae nei au."
(Aole i pau.)
Na bele nui o ke ao nei.
Ma ha hana ia ana o na bele nui a pau o ka honua, o ka nui o ka leo ka mea makemake, i mea e lohe ia ai ma kahi mamao loa. Ua olelo ia ke kumu o keia, no ke kaumaha launa ole o kekahi mau bele nui loa. E like me ka bele o Sana Paulo, he 13,000 paono ke kaumaha; ka bele o Antwerp he 15,000 paona; ko Oxford he 17,000; ka bele ma Roma he 19,000; Mechin 20,000; Bruges he 23,000; York 24,000; Cologne 25,000; Montreal 29,000; Exfurt 30,000; "Big Ben," ma ka Hale Ahaolelo o Beritania he 31,000; Sens 34,000; Vienna 40,000; Novogorod he 69,000; Pekina 139,000; Moscow ma Rusia he 141,000; aka, o ka oi aku o ka bele kaulana loa no kona nui, o kekahi bele iho no o Rusia, aia no ma Moscow. Ua hoohee ia ia bele ma ke kauoha a ka Emepera wahine Anne, iloko o ka M. H. 1853, a o kona kaumaha, he 433,722 paona. O keia bele nae, aole i hiki iki ke aku ia iluna no kona nui. O kona kiekie he umikumamaiwa kapuai, a o ke anapuni ma ka waha, he kanaonokumamaha kapuai.
He kakaikahi loa na bele nui ma Amerika Huipuia, i like aku la me kela poe bele. Ka oi loa nae paha o ke kaumaha, aia ma Nu Ioka, he 23,000. O ka bele nui ma Rusia, he bele mau ko Rusia poe i kela makahiki keia makahiki e makaikai mau ai, me he poe Mahomeda la e hele mau ana i ka luakupapau o ko lakou kaula nui. Pela no hoi ko Amerika poe, he hoomanao mau no hoi lakou i ko lakou bele Kuokoa, aia ma Philadelpia a ua kakau ia maluna o ua bele la penei:—"E hai aku, ua lanakila a puni ka aina i na kanaka a pau loa."
Ninau Baibala.
Ninau 1. Owai ke kanaka i hana i pahi kaua oi lua nana, hookahi kubita ka loihi, a omau ae la ma kona uha akau?
Ninau 2. Owai ka inoa o ke kanaka a ke Akua i kau ai i ka uhane ino maluna ona, a na Davida i hookani i ka lira, a haalele ka uhane ino.
Ninau 3. I ka makahiki hea, a i ka malama hea hoi ka hana ia ana o ke kumu o ka hale o Iehova.
Ninau 4. I ka malama hea, a i ka makahiki hea hoi ka paa ana o ka hale o Iehova.
Ninau 5. Heaha ka hamare, a me ke koi, i kalai ia ai ka pohaku o ka hale o Iehova?
Ninau 6. Heaha ka holoholona ma ka honua nei, aole o lakou alii?
Ninau 7. Owai ke kanaka i pee ia Iehova iloko o kona lua me he Liona la?
Ninau 8. Owai ka inoa o ke kulanakauhale o ka poe hea, i hai ia ma ka Palapala Hemolele?
Ninau 9. Owai ke alii o ka Isaraela i hoolilo ai oia i ka Isaraela i poe lawehala.
Ninau 10. Owai ka inoa o ka lahuikanaka o ka honua nei a ke Akua i hoolilo ai i kumu waina e hua ana nona iho?
Me ka lana o ko'u manao e loaa ana no i ka poe imi ninau me ka hikiwawe loa. E oki au maanei, a e hoolohe aku o ka ia la awala mai, pipi holo kaao. Aloha no.
S. E. K. PAPAAI.
Waikane, Koolaupoko, Jan 28, 1866.
Hailoaa o ka ninau helu a S. P. Pa.
E KE AU OKOA E :—Aloha oe:
No ka paona hookahi o ka pahu o A. $1,00 B. 1, me 1 hapa lima, C. 1, me 2 hapa lima, D. 2,00.
O ka hailoaa keia o ko ninau aihue e ke keiki o Puna. A ina i makemake oe e hai aku i ka hana, e nonoi mua mai oe i ka Lunahooponopono o ke AU OKOA, a ina e ae mai alaila, hai aku au.
Eia mai na wahi kanaenae aloha ia oe e S. P. Pa.
Ninau 1. Elua mau keiki manu, e hele ana i ka nahelehele; a ike laua i kekahi auna manu, ki aku la ka mua a make ia ia na manu e like me ka 8 hapa 9, o ka ohana manu, a lele aku la ke koena a kau ma kahi e, alaila, ki aku la ka lua, a make ia ia na manu, elike me ke kumu kaha kuea, o ka 1 hapa 2 o ka ohana manu a lele loa aku elua manu. A eia ka ninau: Ehia na manu a pau o ka ohana?
Ninau 2. Makemake iho la kekahi kanaka e kuai i aina huina haloa nona; e haawi ana i $10,00 no kela kapuai keia kapuai, o ke anapuni. Aka, kuai aku ia i aina huinahalike, e like ana ka nui me ka aina mua, e haawi ana i $10,00 no kela kapuai keia kapuai o ke anapuni, alaila, emi iho la ke kumukuai e $330,00. Aka, kuai hou aku no ia i aina huinahalike e ae, elike ana ka nui me kela mau aina mamua, alaila, ua oi aku kona ili, he 12 me 1 hapa 4 roda. Heaha ka loa o ka aina huinahaloa?
Ninau 3. Ekolu mau puu huahelu o ka huina houluulu o ko lakou mau kuea, he 45 ia, ua oi ka puu elua imua o ka puu mua, e 2, a ua oi hoi ka puu ekolu, imua o ka puu elua, he 1, a ekolu ka oi o ka puu ekolu, i ko ka puu mua. Heaha ia mau puu huahelu?
Ninau 4. Elua mau kaikamahine ma ke kula o Makawao, a he mau eke dala ka laua. I aku la ka mua i ka lua, ina i houluulu ia ka pa 2, o ke kuea o ka'u mau dala, me ka pa 3, o ka huina hoonui o ko kaua mau puu a me ke kuea o kou puu i huipuia he 20 ia, aka, i mai ka lua, ina i huiia ka pa 4, o ke kuea o ko'u puu me ka pa 5, o ke kuea o kou, he 41 ia, ehia mau dala a kekahi me kekahi?
Ninau 5. Elua mau puu huahelu, o ka puu mua i huiia me ka huina hoonui o ko laua mau kumu kaha kuea, a huipu mai me ka puu elua, he 19 ia, aka, ina i houluulu pu ia ko laua huina hoonui me ko laua huina houluulu he 133 ia, heaha ia mau P. H.?
Ninau 6. He wahi aina huina haloa ko'u, ina i hoonui ia ka like ole o na aoao me ka aoao nui, a e puunaue ia, ia huina me ka aoao uuku, he 24 roda, aka, i na i hoonui ia ka aoao uuku, me ka like ole, a e puunaue ia, ia huina me ka aoao nui, he 6 roda. Heaha ka loa a me ka laula?
J. M. K. KAINIKIPUALEHUA.
Wailuku-luna, Jan 26, 1866.
Olelo pane ia S. E. K. Papaai.
E KE AU OKOA E:—Aloha oe.
Ua ike au i ka olelo pane a kuu hoa ma ka helu 38, o ka la 8 o Januari, M. H. 1866 o KE AU OKOA. Malaila a'u i ike ai i ke kanaaho wale ae no a ua wahi keiki nei o Kaapoko, ua hele a opili i ka ua poai hale o Kahaluu. E i mai ana oe ia'u, e makemake ana no oe e hai mai i ka haina o kuu ninau helu, i hoopuka ia ma ka helu 28 o KE AU OKOA. O kuu hai ole aku i ka haina o kau ninau, oia ko mea i hai ole mai ai i ka haina o kuu ninau, ke hai aku nei au ia oe, he kamau wale no i ka la luu loli o lakou nei. Ua ike no au ia oe, ma Puna kou aina hanau, a malaila no oe i ao ia ai e Kaui i ka heluhelu buke a me ka helu kamalii; a pau ko ao ia ana e ko kumu, holo aku nei oe i Koolau; i holo aku nei ka oe ilaila i ka hoopuka ninau helu ma ke akea, i ike ia nae paha ko akamai.
Ia oe nae paha i noho aku nei ilaila, hele aku la oe e ninau ia hai, a oia kau i hai ae nei ma ke akea me kou manao e hoopuka ma ke akea; he ninau paa keia, ke paa hoi.
Ma kau olelo e kuu hoa, no kuu hai ole aku i ka haina o au mau wahi okuekue ninau helu, ke hai aku nei au ia oe, aole e hiki ia'u ke hai aku, i ko ninau, no ka mea, aole oe i haawi mai na'u e huli, e like me kuu haawi ana 'ku i kuu ninau nau e hai mai i ka haina o ua ninau la, auhea ko hai mai i ka haina o kuu ninau a hiki i keia la? Aole anei o ko hopu keia i ka laau a Kekuaokalani ia "Hoolehelehekii."
E kuu hoa, ke olelo nei oe, he mea ole kuu ninau ia oe, ke kauoha ia nei oe, e huli a hai mai ma ke akea.
He ike wale ko'u ia ia o ka papai a me ka elepi wahakani, aia ma ka niho ka oi, pela oe.
S. E. K. Papaai, ua ike maopopo loa au ia oe, aole oe i hiki i na kulana kupono no ka hoopuka ninau helu, eia ka'u mea i ike ia oe he pii ulu no Puna, a he pahele puhi no kai o Kapoho, ke hooki nei au maanei, Me ke aloha ia oe. S. W. PA.
Keaau, Puna, Hawaii, Jan 26, 1866.
NA LUNA O KEIA PEPA.
EIA IHO NA INOA O KA POE MA KELA wahi keia wahi i hookohuia i poe Puna o KE AU OKOA. Me lakou nei e hooponopono ai na makamaka lawe nupepa no ka uku o ka pepa, a me ko na Olelo Hoolaha.
HAWAII— J. H. Coney, Hilo.
D. H. Hitchcock, Hilo.
L. Kaina, Puna.
W. T. Martin, Kau.
C. N. Spencer, "
J. G. Hoapili, Kona Hema.
P. Cummings, "
J. Z. Waiau, Kona Akau.
J. H. Kamalo, "
G. K. Lindsay, Kohala.
J. Naiapaakai, "
S. P. Koko, Hamakua.
MAUI—A. M. Kahalewai, Lahaina.
P. H. Treadway, "
W. Ap Jones, "
E Saffrey, Honuaula.
C. K. Kakani, Kaupo.
John Rae, Hana.
W. P. Kahale, Wailuku.
W. G. Needham, Makawao.
T. W. Everett, "
MOLOKAI—M r. Meyers, E. H. Rogers.
OAHU— J. P. E. Kahaleaahu, Ewa & Waianae.
J. M. Kalanipoo, Waialua & Koolauloa.
J. W. Kea, Koolaupoko.
KAUAI— T. H. Marshall, Lihue.
S. Kamahalo, "
J. S. Low, Hanalei.
H. J. Wana, "
G. W. Lilikalani, Koloa.
J. Kauai, Waimea.
OLELO HOOLAHA.
E IKE AUANEI NA KANAKA A PAU, MA KA
APANA O EWA A ME WAIANAE,
ua loaa mai ia'u ka MANA KUAI AWA, aia ko'u Hale Kuai Awa ma
HALAULANI, WAIPIO, APANA O EWA.
Nolaila, ke kahea aku nei au i ka poe a pau loa e makemake ana e kuai i ka Awa, e hele mai ma kahi i hoike ia maluna, ka poe a ke Kanawai i ae ai, a no'u wale no ka Palapala Kuai Awa i ae ia ma ia mau Apana. A nolaila, e wiki mai oukou.
NAPAHUEKOLU.
Halaulani, Waipio, Ewa, O., Dec. 30, 1855, 39-3m*
KALAKO HOU!
KALAKO HOU!
KALAKO HOU!
MAKALENA HOU!
MAKALENA HOU!!
MAKALENA HOU!!!
NO KE KUMUKUAI MAKEPONO LOA!
Na wa e kuai ai, mai ke kakahiaka Poakahi, a hiki i ke ahiahi Poalima.
Ma ke kihi o ke Alanui Nuuanu a me ke Alanui Marine; mamua aku o ka Hotele Royala.
(38-3m) ISAAC REINHART.
OLELO HOOLAHA.
A KA
LUNA AUHAU!
O KA
APANA O HONOLULU, KONA, OAHU
E WEHE IA ANA KE KEENA NO KA OHI ana i na auhau, no ka Apana i olelo ia ae la maluna, i kela Poakolu, keia Poakolu, a me kela Poaono, keia Poaono, mai keia la aku, ma ke Keena o ka Luna Hana Alanui, ma "AIENUI," Alanui Marine, e hele la i Ulakoheo.
N. B.—E hamama mau no ka puka i kela la keia la, a hiki i ka la 6 o Ianuari e hiki mai ana.
G. H. LUCE.
Luna Auhau o ka Apana o Kona.
Honolulu, Dec. 22, 1865. 30-3m
RAIKI! RAIKI!
E OUKOU A PAU, KA POE KANU RAIKI ma ka Mokupuni o Oahu, a me na Mokupuni e ae kekahi, owau, ka mea nona ka inoa malalo iho, e uku no au i ke kumukuai kiekie, no ka Raiki i pau ole ka ili, ke lawe ia mai ma ka Wili Raiki ma Punaluu, Oahu, a i ole ia, ma ko'u keena ma Honolulu.
H. W. SEVERANCE,
A gena o ka Huina Raiki o Punaluu.
Honolulu, Okatoba 7, 1865. 38-tf
OLELO HOOLAHA.
—A—
KA PAPA OLA!
MA KEIA, KE HAI AKU NEI I KELA MEA keia mea, e hoomaemae lakou i ke alanui, ma ke alo iho o ko lakou mau pa hale; a e halihali i na opala a waiho ma na wahi i hookaokoa ia e ka Papa Ola.
JNO. H. BROWN.
Luna o ka Papa Ola.
Honolulu, Dek. 16, 1865. 35-3m
OLELO HOOLAHA.
UA HALAWAI KA AHAHUI O HAMAKUA, Hawaii, i ka la 18 o Dek., 1865, ma Eleio, e imi i ka mea e pono ai ka hana ana i ke Awa o Honomalino, e like me ke kauoha ana a ke Kuhina Kalaiaina, "E hana na kanaka o Hamakua nei i ke Awa o Honomalino" Nolaila, ua halawai keia Aha mamua aku nei, kohoia o D. W. Kaila, i Puuku, o N. Keau, i Lunahoomalu, o P. Kaaekuahiwi, i Kakauolelo.
HOOHOLOIA; E haawi mai ke Kuhina Kalaiaina, Eha Haneri Dala, (400.00,) e kokua na kanaka o Hamakua, Eha Haneri Dala, (400.00.) Ua haawi mai ke Kuhina Kalaiaina, Hookahi Haneri Dala, (100.00,) i keia wa, a e haawi ana na kanaka Hookahi Haneri Dala, (100.00.)
Eia na inoa o na Luna ohi dala, Kamakahiki, no Waimanu a me Kahulaana, D. W. Kaila, no Waipio a me Manaaiole, N. Keikenui, no Eleio a me Kapulena, P. Kaaekuahiwi, no Kawela, S. Hao, no Paauhau, E. Nainoa, no Maunahoano, N. Kaai, no Kaala.
E halawai keia mau luna ma Eleio, i ka la 29 o Dekemaba nei, i maopopo ka nui o na dala i loaa mai. A ma ka malama o Ianuarii hoomaka ka hana hou ana i ke awa. P. KAAEKUAHIWI.
37- Kakauolelo.
OLELO HOOLAHA.
NO KA MEA, UA NONOIIA MAI KA MEA nona ka inoa malalo, e Kipola, e hooponopono ia ka waiwai o Wailama, o Waikapu, Maui, i make aku nei: Nolaila, ua hoikeia i na kanaka a pau, ke pili, o ka Poakolu, oia ka la 21 o Feberuari, ma ka hora 10 o ke kakahiaka, oia kala a me ka manawa e hoolohe ia keia nonoi ana, a me na mea kue i hoike ia, aia ma Wailuku, kahi e hana ai.
A. M. KAHALEWAI,
Lunakanawai Kaapuni o ka Apana Elua.
Lahaina, Ian. 30, 1866. 42-3t
OLELO HOOLAHA.
NO KA MEA, UA NOIIA MAI KA MEA NONA ka inoa malalo, e Auhea, Crowningburg (w,) e hooiaioia ka palapala kauoha a Haelo (w,) o Lahaina, Maui, i make aku nei, a no Honolulu, Oahu, oia mamua. Nolaila, ua hoikeia i na kanaka a pau, o ka Poakolu, oia ka la 28 o Feberuari, e hiki mai ana, oia ka manawa e hoolohe ai ka oiaio o ia palapala kauoha, a me na mea kue i hoikeia mai, aia ma ka Hale Hookolokolo ma Lahaina, kahi e hana ai.
A. M. KAHALEWAI,
Lunakanawai Kaapuni o ka Apana Elua.
Lahaina, Ian. 24, 1868. 41-3t
OLELO HOOLAHA.
MA KA WAIWAI O OPUNUI (K.)
NO ka mea, ua noiia mai ka Mea Hanohano G. M. Richardson, Lunakanawai o ka Aha Kiekie, e Kahakauwila (w,) no ka hookohu ia ia i luna hooponopono waiwai o Opunui (k,) no Waialua, Oahu, i make aku nei: Nolaila, ua hoikeia i na kanaka a pau loa, ke pili, o ka Poaono, oia ka la 17 o Feberuari, i ka hora 10 o kakahiaka, oia ka la a me ka hora i oleloia no ka hoolohe i ka oiaio o keia noi ana mai, a me na mea hoole i hoikeia, aia ma ka Hale Hookolokolo ma Honolulu, Oahu.
WM. HUMPHREYS,
Hope Kakauolelo o ka Aha Kiekie.
Honolulu, Ian. 24, 1866. 41-2t