Ke Au Okoa, Volume I, Number 4, 15 Mei 1865 — Page 2

KE AU OKOA.

HONOLULU, MEI 15, 1865.

 

MA KE KAUOHA.

No ka mea, ua hoomaopopo ia mai i ke Alii Ka Moi, no ka make ana o ka Peresidena o Amerika Huipuia, nolaila, ua kauohaia na Luna a pau o ke Aupuni, e kau i ka hoailona kanikau, ma ka lima hema, no na la he umikumamaha.  F. W. Hutchison,

Kuhina Kalaiaina.

Keena Kalaiaina, Mei 10, 1865.

 

Keena o na Komi sina o na Aina Moi,

Honolulu, Mei 6, 1865.

Ke hoike akea ia nei, no ka mea, ua hookoloia na mea nona na inoa malalo e Ka Moi i poe Komisina no na aina Moi, nolaila, o na mea a pau e nonoi ana e hoolimalima ia ua mau aina la, a me na palapala a pau e pili ana, e haawiia'ku imua o ka Mea Hanohano J. O. Dominis, no ka mea, oia no ka Luna Aina Moi.  F. W. Hutchison,

Cha s C. Harris,

J. O. Dominis.

 

Ke haiia aku nei ka mea nona ka inoa malalo nei, i mea e kulike ai me ke Kanawai i kapaia, "He Kanawai no na aina ponoi o ka Moi, a me na Aina o ke Aupuni," i hooholoia ma ka la 3 o Ianuari i hala aku nei, i mau Bila Dala Aupuni he Iwakaluakumamahiku tausani dala, e hoopukaia aku no a hiki i ka Poakahi, la 7 o Augate, ma ka hora 10 o kakahiaka, no ka poe e makemake ana e koho no ka uku hoopanee o ua mau dala la; ma na ano a pau e hoakakaia aku ana malalo.

1. O ka poe e koho ana; ka nui e noi ia aku ai; a me ka wa e hoi ia ai.

2. Ka uku hoopanee he eiwa keneta, aohe e ae ia aku kekahi mea e ae ia aku malalo mai o laila.

3. E hoopuka ia aku no na Bila Dala Aupuni, penei: Hookahi haneri, Elua .haneri. Ekolu haneri. E hana ia no hoi pela i ka poe e makemake ana i Hookahi haneri dala, Elua haneri dala.

4. E hoohamama ia aku no ka Keena hana o ka mea nona ka inoa malalo, i ka poe e makemake e koho, ma ka la a me ka hora i olelo ia.  C. de Varigny,

Kuhina Waiwai.

May 6, 1865.

 

OLELO HOOLAHA—A ka Papa Hoonaauao i na Lunakanawai Hoomalu a me na Lunakanawai Apana.

Ke hoikeia'ku nei, ua hoomakaukau ia ke Kula Ao Hana Lima a me ka Hoopololei, i hookumu ia e like me ke Kanawai i hooholo ia ma ka la 30 o Dekemaba, 1864, i kapaia ua Kanawai la, "He Kanawai e kauoha ana i ka Papa Hoonaauao e hoonohonoho i Kula Ao Hana Lima a me ka Hoopololei, kahi e malamaia'i a e hoonaauaoia'i na keiki makua ole, a i haalele wale ia paha, a i hookahuliia'i ke ano o na lawehala opio." A e hiki no ke hoouna ia ma ia kula mai keia la aku, e like me ka mea i kauoha ia ma ia Kanawai.

M. Kekuanaoa,

Pe residena o ka Papa Hoonaauao.

Keena Aopalapala, Aperila 28, 1865.

 

Oihana Hookolokolo.

Aole i nui na hana ma na Aha Hookolokolo iloko o ka hebedoma i hala ae nei, a ua hele hoi kekahi no na Lunakanawai Kiekie ma Kauai, laua no me ka Loio Kuhina, i ke Kau Hookolokolo o ka Aha Kaapuni ma Nawiliwili. Iloko o keia mau la ae, e hoi nui mai ana.

Poalua, Mei 9. Hooponopono Waiwai o Keahi, (k,) no Waiehu, Maui. Ua hoopaneeia a i ka la 29 o Mei.

Poalima, Mei 12. Hooponopono Waiwai o Kanakaole, (k,) no Kalihi, Oahu. Ua hoopaneeia a i ka la 29 o Mei.

Ma ia la no, ua hookolokolo ka hoopii o Aa, (k,) kue ana i kana wahine, o Kealahiki, no ka haalele ia ia me ke kumu ole, a moekolohe no hoi. Ua ko ka aoao hoopii, a ua hooholoia e oki i ko laua mare ana.

 

Ka Make ana o Kaomea.—I ke ahiahi o ka Poakolu, la 10 o Mei, oiai e ku ana kekahi kanaka, o Kaomea ka inoa, ma ke alanui kahi e iho ai i ka uapo ma ka Hale Mahoe, hikaka iho la ua kanaka nei, a haule ilalo, a hu ke koko ma kona ihu, a maule loa ia. Lalau koke ae ka poe e ku  mai ana, a lomilomi i ua mai nei, a kapipi aku la i ka wai ma kona maka, aole nae ia i ola hou, ua lele loa ka uhane. A no ka mea, ua olelo ia, ua hakaka o Kaomea me kekahi keiki o ka uapo, o Kahelewaina ka inoa, a ua kui ia ka mea i make ia ia, nolaila, ua hopu a hoopaa ia o Kahelewaina e ka Makai Kiekie, a kakahiaka o ka Poaha, ia manawa, ua kaha i a ke kino kupapau e na kauka elua, o Kauka Makibina, a me Kauka Poka, a i ko laua ike ana ua popopo kahiko ke ake mamamo Kaopmea, a pahu kekahi o na aa koko o ka puuwai, ao ke kumu no ia i make ai, aole hoi he kumu e ae. Nolaila, ua hookuu ia o Kahelewaina. No Kohala, Hawaii, o Kaomea.

 

Ka Lunakanawai Kiekie.—Maluna ae o ka moku D. C. Murray, i ku mai mai San Francisco mai i ka Monede, Mei 8, ua holo mai ka Mea Hanohano Elisha H. Allen, ka Lunakanawai Kiekie o ko Hawaii nei pae aina, me kona ohana. Ua maikai ke ola o lakou.

 

Na Kanawai o ke kau Ahaolelo o ka M. H. 1864.—Ua hoomakaia ke pai ana ma ka olelo Hawaii i na Kanawai i hooholoia iloko o ke kau Ahaolelo i hala ae nei, aia a pau i ka pai ia, e hoike no makou.

 

Ua Ili mai nei maluna o makou ka hana paumako, e  hookomo ma na kolamu o keia pepa, ua make aku nei ma ka la 15 o Aperila i hala ae nei, o Aberahama Linekona, ka Peresidena o Amerika Huipuia.

I ke koho hou ia ana oia ma ka malama o Novemaba, 1864, ua lana ka manao a me ka makemake o na mea a pau, e loaa ana ia Aberahama Linekona i ka maluhia hanohano o kona Aupuni, a e hoopau ana ma o na la, ke kipi mua a me ke kipi hope loa no hoi o ka Repubelika Nui. Iloko nae o ka noonoo hohonu o ke Akua, aole no i hooholoia pela.

Ua manao paha ka hehena, nana i ki pu ia Linekona, e lanakila ana ka aoao o na kipi mamuli o ka ikaika o kona lima hookahi, oiai nae, ua lanakila ole na Kenerala a me ka poe naauao o ia aoao iloko o na makahiki eha i kaua mau ai. Ma ka hoomake ana i ke kanaka hookahi, oia nae hoi ke Poo o ka lahui, aole no ia he mea e hoomake ai ka manaolana o ka lahui okoa, aka, he mea wale no ia e hoomahuahua ai ka nui o ka poe hanohano i haawi ia ko lakou ola no ka pono o ka lehulehu, a he mea hoi e hookonokono ai i ka lahui e kupaa.

Ua lokahi ka manao hoowahawaha o na mea a pau, no na hana powa kakauha e like me ia. A pela no, a hiki i ka pau ana o keia ao, e lilo ana ia hana makona, o ka hoomake ana ia Aberahama Linekona, i kiko aai e hoomanao makena ai i ke kipi pookela o ko ke ao nei.

Ke waiho ia nei iloko o ka lima o  ke Akua, e hooponopono ai no na kanaka a me na lahui, aole no hoi e hoololi iki ia'na kana mau hana e ke kanaka hoaano wale.

 

O Amerika iloko o ke kanikau.

I ke ku ana mai o ka moku D. C. Murray i kela Poakahi aku nei, ua lawe mai ia i ka nu hou, aole i ka nu e hoolioli ia ai ka naau, e like me ka mea mau a na moku e lawe mai nei. I kona hookomo ana mai i ke awa, aia hoi, ike ia aku la ka hapa ana mai o ka hae, aohe i liuliu hiki mai la ka lono, o ke alakai o ka lahuikanaka nui o Amerika, ke poo o na miliona kanaka he nui, ke kanaka kaka wahie o Ilinoe, i imi nona iho, mai ka paila wahie ka hooikaika ana mai, a hiki wale i ka pane poo a i kaupaku hoi o na hanohano a pau a ke kanaka e ike ai ka mea i manao nui no ka pono o ka lehulehu, ua make! ua lawe ia aku ia i ka wa ana i moeuhane ole ai.

Ua pepehi maluia ka Pere sidena Linekona, iloko o ka hale hana Keaka, na kekahi kanaka ino loa, i manaoia o J. Wilkes Booth, (he hoahanau ia no kekahi haole hana keaka i hiki mai ia nei mamua aku nei.) I ka hora umi o ka po o ka la 14 o Aperila, ia ia e noho ana me kana wahine, e nana i ka hana keaka, komo mai la ua kanaka nei, a ki ia Linekona mahope o ke poo, me ka pu panapana, a mahope iho o ka loheia ana o ke kani o ka pu, lele aku la ua kanaka nei a ku iho la maluna o kahi hana keaka, huli mai la ia immua o ka lehulehu holookoa, me ka pahi ma kona lima me ka i mai, "Pela no e make mau ai na'lii hooluhi wale." "Sic semper tyrannis." Oia mau huaolelo, he huaolelo i kakauia maluna o ke kii o Vereginia. Ke kumu i hooiaioia mai ai ua make io o Linekona, o ka uwe hamama ana a kana wahine. Mahope iho o ka pau ana o ka hai ana a ua kanaka la i ua mau huaolelo nei, huli ae la ia a holo aku la iwaho me ka mama loa, a kau iluna o kona lio a holo aku la. Ua kauohaia na mea makai, na kaaahi, na wahi a pau loa e hiki ai ia ia ke holo malu e kiai makaala loa ia. Ua hoihoi ia aku kona kino i kekahi hale e pili koke mai ana, a mau no ka nawe ana a hala he iwakaluakumamalua minute o ka hora ehiku o kekahi kakahiaka ae, haalele mai la ia i ka la.

Aole paha mea ino loa a eleele i hana ia ma ka ili honua e like me ke ano o ka make ana o ka Peresidena o na miliona kanaka he nui. O ke kaulia ana paha o ko kakou Haku, ka mea ano like me keia. Ka make ana o keia Peresidena aole ia e hoopoina ia e na mea a pau i ike i kona moolelo. O kona mea hoi nana i pepehi, aohe e moe kona po me ka maluhia, no ka mea e uahi ia no ia ma na wahi a pau loa e ka inaina a me ka h uhu o na miliona he nui wale.

Ma kona make ana, ua nele ka poe kipi a pau i ka manao lana he hoaaloha ko lakou me ka Akau. He kanaka noiau kai make; ke koa, ka naauao o ke keneturia 19, ua kua ia ilalo iloko o kona nani.

Aole paha he lahui ma ka honua nei, i kiola kawakawa ia iloko o na awaawa lihaliha o ke kumakena a me ke kanikau, e like me ka poe Amerika, i ka laulaha ana ae mao a maanei o na kihi eha o ke ao holookoa; ua hapa na hae, ua hookani ia na bele, a ua pani ia na ipuka o na hale hana a pau, aole nae ia he mau mea e hoike mai ai oia ke kanikau ana no ka Peresidena i make; aka, ua hoike ia mai e ke kaumaha i kahiko ia iluna o ka helehelena o ka lahui holookoa a pau loa, ko lakou naau ua mokumokuahua ia i ke kaumaha, no ke kumakena a me ke kanikau.

Ka mea i kanikau mua nona o  ka lahui,

No lakou ka Makuakane i lawe ia aku!

Ka wahine, na keiki, e hui i ke kanikau ana,

Nona, ka mea i waiho iho he mau miliona iloko o ka waimaka!

Nona, i hiki i kaupaku o ka hanohano,

Mai ka paila wahie ua lilo aku i ka noho Peresidena!

A! e Amerika haaheo, me kou nani a pau loa,

Kou mau kula i ulu i na koko o ka poe make,

A me kou mau kauhale hanohano aole ia e hoi hou,

A e maliu mai hoi i kau mau kauoha a pau.

Ua kanikau ka lahui no ka make ana o kona Makua, a ihea la anei kona noho makua ole ano e hoona ae ai.

No ka mea, ua hele e aku ka mea nana lakou i alakai i keia mau makahiki eha i kunewa ae nei, me ka noiau nui a me ke akamai lua ole, iloko o na kau kupilikii o keia kaua huliamahi. Ua hana ia me ke akahele a me ka noonoo nui i kahe e pau ai ke kaua me ka hookahe nui ole o ke koko. Aohe he haaloha e ae i holo mahope o ka poe kipi e like me Linekona, no ka mea, i ka wa e koi mai ai kekahi poe e kaua anai loa aku ia lakou, ua pale ae ia i ka lakou, me ka hoomalielie aku i akakuu mai lakou, a ua maliu mai no ka Akau i kana mau mea e manao ai he pono, ua paulele ka Akau hoolookoa ia ia, i ka mea a lakou i manao ai he mea kupono, a he oiaio kana mau hana i ka Akau wale no; aka, ua hana lokomaikai aku ia i na kipi a me na enemi a pau o ka Akau.

Iloko o ka la o ka hanohano a me ka nani nui—iloko o ka hora o ko lakou lanakila—a i ka wa i pu-a mai ai na kukuna la o ka maluhia e kau mai ana, aia hoi, lawe ia aku la oia e ka make, i hoa moe nona.

"Ka make, ka mea nana i omo aku,

I ka meli o kou hanu, aohe ona mana,

Maluna o kou mau pono a pau loa."

Me he mea la paha o ka makemake no ia o ka Lani, e like me Mose i alakai mai ai i ka Isaraela mai ma ka hale paaua mai, a me na noho ana luhi o Aigupita, a i ka aina oluolu o Kanaana, kahi o ka waiu a me ka meli e kahe a wai ana. A pela no hoi o Linekona i kona mau la; i ka hoomaka ana o kona noho alii, ua komohia koke ka lahui holookoa iloko o ka huliamahi, a na kona noiau a me kona akamailua ole i ke alakai ia Amerika, a ua like no nae me Mose, ua make koke, aole ia i komo i Kanaana. Pela no o Linekona, aole paha ia i ae ia e komo iloko o ka lokahi ana, e like me ko Mose ae ole ia ana. E like me ko Mose ae ana ia mai, e pii a ka mauna, a kiei aku i ka waiho laelae o na papu o Kanaana, pela no hoi o Linekona i hookuu ia mai, e hele ia e ike i ka lilo pio ana mai o ka puuhonua o na kipi, a aole paha ia i hookuu ia mai e komo ia iloko e ai a e inu i na huihui waina maikai o ka lokahi.

Iloko o ka hale keaka a imua o ka ahakanaka nui, ua pepehi hoomainoino ia oia, a ua hana ia kekahi mea i oi aku ke ino a me ka eleele, a e  hoopailua mai no paha o Diabolo a e hookae mai no hoi o Gehena, i ka mea nana i pepehi no ke ino loa oia hana—he karaima i hanaia, aohe mea kupono e ae e hana ia aku ia kanaka o ka hoouna aku ia ia, e haawi aku i kana mau pule i ka Lani, a e kakali aku ina he ahonui ko laila mai. I ka wa i aneane ai ke kipi e haule ilalo, i  ka wa e hoomaka mai ana na puali kaua kipi e haawi wale mai, i ka wa i pau ai na kupee a pau o na kauwa i holuhi ia, i ka wa i hookomo ia aku ai ke ki e uwehe ae i ke pani o ka noho kuee ana, e hookuu aku i ka lahui o Amerika iloko o na keena hookipa maikai o ka lokahi a me ka  maluhia, i ka wa hoi a ka lahui e olioli ana no ka hiki mai o ka manu haaheo o ka maluhia e uhi hou u i kona mau eheu nani maluna o Amerika mai ka Akau a ka Hema, aia hoi ua lawe ia aku ia e ka lima o ke kanaka ino. Aole mea e hiki ke hana e like me kana mea i hana ai; o  ke kauwa wale no paha i hooluhi ia me he holoholona la.

A! e Hawaii nei! aole anei oe e kumakena, e hoouna ae i kou kanikau i mokumokuhia na ao o ka lewa lani, ina he alii kou i like me keia, ka hoomanawanui iloko o na au o ka popilikia, a o ka aneane aku no hoi e puka iwaho, loohia i ka popilikia? A! e Amerika, e hookuu mai oe ia makou e komo pu aku me oe iloko o kou kumakena, (no kou Peresidena.)

He hana nui kana i hana ai a kukulu iho i kia hoomanao nona, maluna o ka puuwai o na kanaka, a ma ka aoao hoi o na moolelo ou e Amerika!

 

Kanikau Nui.—I ka Poakahi, auina o ka la, pae mai ka hu hou walania no ka hooma ke powaia o Linekona, a i ke kakahiaka Poalua, ua hapaia na hae a pau mai o a o, o ke kulanakauhale nei a me na moku ma ke awa, a ua papaniia na ipuka o ka nui o na halekuai. I ka hora 11 o ke kakahiaka, ua hookani lohi ae la ka bele o ka hale pule Bihopa ma Peleula, a naue aku la malaila kekahi poe he nui, i ka pule ku i ka wa i kauohaia e ka Bihopa o Honolulu, i mea hoomanao no ka Peresidena o Amerika i make aku la. Mahope iho o ia pule ana, ua hookomoia a piha ka hale pule o Kauikeano e ka poe haiamu e hoolohe mai ana i na haiolelo a me na himeni kanikau no ia mea hookahi no. Mamuli o ka manao poloai a ke Kuhina o Amerika e noho nei, ua kauia ka hoailona kanikau ma ka lima hema o ka poe Amerika a pau, e laa me ka mea i kauohaia e ke Kuhina Kalaiaina o ka Moi, ua kauia ke kanikau e na Luna o keia aupuni no na la he umikumamaha.

 

Holoholona ai kanaka.—Ma Singapore, he kulanakauhale ia o Inia Hikina, ua nui wale na Tiga ma ka ulunahele e kokoke ana i kau hale, a ua nui ka poe i make i ua mau holoholona ahiu la, e like hoi ka nui me hookahi kanaka i make i kela la i keia la a puni ka makahiki. Ua hoohanaia na paahao e huli a e pepehi i na Tiga, a ua holo pono ia hana ia lakou.

 

Na mea hou o ke Alo Alii.

Ua olioli ka naau i ka lohe ana, ua oluolu maikai loa ka mai o ka Moi, aia no ia ma kona wahi noho kahakai ma Waikiki.

Ma ke ahiahi Poalua, ua hele ka Mea Kiekie Prince ss Kamamalu i ka holo kaa, me Capt. a me Mrs. Hanamu. A i ka hora 2 o ke ahiahi o ka Poakolu ua holo aku laua me ka Moi Wahine Kanemake me Hakaleleponi ma Kahala. He maikai ke ola o na Alii.

Ua maikai no ke ola o ka Mea Kiekie Kekuanaoa, aia no ia ma Papakanene ma kona wahi noho kahi i noho ai.

Ua hele ae ka Mea Hanohano Mrs. Bihopa (Pauahi) a me kona kaikoeke ma Pa Iolani Hale Alii, e ike ia Kapena Hanamu a me kana wahine. I ko laua hoi ana mai, ua hele aku ka Rev. Mr. Damona a me kana wahine e ike ia Kapena Hanamu a me kana wahine, na malihini hookipa a ka Moi.

Ma ke ahiahi o ka Poaha, ua haawiia ma ka Hale Wakinikona ka Hale noho o na Mea Hanohano ke Kiaaina o Oahu a me kana wahine (Kamakaeha), he anaina aha Himeni. Ua maikai ka launa ana, a ua nui na mea i hoike ae i ko lakou leo lai kolonahe.

 

A berahama Linekona.

Ua hanau oia ma ka la 12 o Feberuari, M. H. 1809, ma ka moku aina o Kenetuke. He kanaka ilihune kona makuakane, he mahiai kana hana. A i ka hiku o ko Aberahama makahiki, haalele ae la kona makuakane ia Kenetuke, a hele a noho ma ka aoao hema o Inidiana. Noho pu na keiki nei me kona makuakane, a hana malalo ona a pau pono kona mau makahiki he iwakaluakumamakahi, koe wale no ka makahiki hookahi i hele ai oia i ke kula, a he mau mahina hoi i holo ai oia ma Nu Oleana, e makaikai ai ia wahi. A pau pono kona manawa i oo ai ma ke kanawai, hele aku oia mai ka malu aku o kona makuakane, e imi ana i kona ola kuokoa ma Ilinois. Ia manawa, aole i oleloia ua naauao o Linekona, oiai hoi hookahi wale no ona makahiki iloko o ke kula ma kahi kuaaina, aka, he kanaka mikiala no ia, a ua hooikaika oia e hoonaauao ia ia iho, mamuli o na buke i loaa ia ia. I ka M. H. 1832, iloko o ke kaua kuloko me na Ilikini, nana no i hoomakaukau ka puali koa, a ua koho ia oia ke kapena. A hala na makahiki elua, pau ia kaua, ua kohoia o Linekona i Lunamakaainana, a iloko o na makahiki ewalu ma ia hope ae, ekolu ana komo ana i ka Ahaolelo o Ilinois. A hiki i ka iwakaluakumamahiku o kona mau makahiki, loaa ia ia ka palapala laikini e hapai i ka oihana loio, a malaila mai ua ike pinepine ia oia e lawelawe ana ma na oihana o ke Aupuni moku aina o Ilinois. Ma ka M. H. 1846, ua kohoia oia ma ka Hale Lunamakaaina ma Wasinetona, a ma ka M. H. 1860, kohoia oia ka Peresidana o Amerika Huipuia, a ma ka M. H. 1864, koho hou ia. Eha ona makahiki i noho ai ma ka Ahaolelo o Ilinois, elua makahiki ma ka Ahaolelo Nui o Amerika Huipuia, a eha makahiki ma ka oihana Peresidena ; hui ia, he umi makahiki ana i noho ai ma na oihana aupuni. Ma ka la 15 o Aperila, M. H. 1865, ua pepehi powa ia oia, a he kanalimakumamaono o kona mau makahiki, me na malama elua a me na la ekolu i keu.

 

Ka mea nana i pepehi ia Linekona.

O JohnWilkes Booth, oia kona inoa. He iwakaluakumamahiku ka nui o kona mau makahiki, ma Baltimore, Merelani kahi i hanau ai. O kona makuakane, he kanaka no Beritania mai, he kaulana ia iloko o ka wa mamua no kona akamai i ka oihana Keaka, aole nae i kala i make ai. No Merelani kona makuahine. E like me ko ka makuakane oihana, pela no ke keiki, he Keaka no. He kanaka aa no o Booth, ua ikaika kona mau manao, a he hilinai nui kona mamuli o ka aoao o ka Hema. Ua loaa na inoa o kekahi poe i hui ko lakou ohumu ana me ia iloko o ka hoohalua e pepehi i ka Peresidena a me na poe e ae e ke Aupuni, aole nae i hoolaha ia no ia poe, aia a pau lakou i ka hopu ia. Ua holo o Booth maluna o ka lio, oia pu me kona poe kokua, a ua alualuia e na koa o ke aupuni, aia iwaenakonu o Merelani kahi i holo aku ai.

 

An drew Johnson, ka Peresidena hou.

Malalo o ke Kumukanawai o Amerika Huipuia, ina e make ka Peresidena, alaila, ua noho mai ka Hope Peresidena i pani hakahaka nona. O Andrew Johnson, no Tenese, oia ua Hope Peresidena la i koho like ia me Linekona, a i ka make ana o ka Peresidena ma ka hora 7 o kakahiaka, ua hoohiki kokeia o Johnson e ka Lunakanawai Kiekie. No ka Hema o Johnson, he kanaka ilihune ia i kona wa opiopio, a kanaka makua ae, akahi no a aoia i ka heluhelu a me ke kakau palapala. Aka, no kona paulehia i ka imi naauao, ua holo oia imua, a ua kohoia e na kanaka o Tenese, e hele iloko o ka Ahaolelo ma Wasinetona. A mahope, ua hooliloia e Linekona i Kiaaina no Tenese, a i ke koho Peresidena ana iloko o ka M. H. 1864, loaa ia ia ka oihana Hope Peresidena. He kanaka ikaika ooia, a ua oleloia, ua nui kona inaina no ka poe kipi, a e hoopai oolea auanei oia i na 'lii o lakou e loaa ana ma kona lima.

 

W. H. Seward, ke Kuhina no ko na Aina e.

No ka mokuaina o Nu Ioka o M r. Seward, he kanaka noiau, he loio kaulana. Ua manaoia, oia ke pookela o ka poe noiau iloko o na Kuhina o ke Aupuni o Amerika Huipuia. He ikaika kona kue ana mai kinohi mai i ka hookauwa nika ana o ka Hema, nolaila, ua enemi loa ko lakou naau ia ia. Mai ka hoomaka ana o ke au ia Linekona, o Seward kona Kuhina Nui, ia ia i hilinai nui ai ka Peresidena ma ka hooponopono ana i ke Aupuni. I ole ai o kona akamai, ina paha ua hihia o Amerika, a komohia i ke kaua me Beritania iloko o keia mau makahiki, aka, no ke akahai a me ka noonoo pono ana o Seward, ua mau ka maluhia me na aupuni e. E minamina nui ana o Seward ke make ia.

 

No Seward.

I ka hora umi, ka hora i pepehi powaia ai ka Peresidena, ua komo mai kekahi kanaka me ka owili pepa me ka olelo mai, mai kahi mai ia o ke Kauka e lapaau ia Seward, no ka mea, e waiho ana o Seward no ka mai ; a i hele mai ia e kuhikuhi aku i ke ano o ka hana ana i ka laau o Seward; hoole mai la ke kauwa, aole e hiki ke komo, kui aku la ua kanaka nei, a pela no ka hana ana a ua kanaka ino nei i ka poe e noho ana iloko o ka rumi o Seward, a loaa mua i ke keiki ka eha, mahope loaa i ka makuakane. A! me he mea la o ko laua hora hookahi no ka paha ia a na kipi i manao ai, e ako aku i ka pua o ke ola, a ke Akua Ahonui i kanu, i hooulu, a i hiipoi makamae ai a waiho mai i mau mea nana e hooponopono i ka noho'na o ka lehulehu. Ia wa, holo aku la ke kanaka powa, a waiho iho i ka poe o ka hale me ka u a me ke kaumaha. Aka, ua pomaikai o Amerika i ka holo lea ole ana o ka mea a ka powa i manao ai e hooko.

Komo koke mai la o Stanton a me Welles, kekahi mau Kuhina e ike ia Seward, a ilaila laua i lohe ai, o ka makua o ka hu makaainana o Amerika ua haalele i ka la. No ka like loa o ka hora hookahi i pepehi hoomainoinoia ai ka Peresidena, nolaila, ua manaoia o ka hora hookahi no paha ia i manao ai, e puhi i na ipukukui ikaika o ka malamalama o Amerika. Aka, aia ka mea kupaianaha, iloko o ka malama o Aperila ke kahe mua ana o ke koko, ma Lexinetona i ke kaua huliamahi mua, iloko no o ka malama o Aperila ke kahe mua ana o ke koko ma Belatimoa i keia kaua mai nei, a iloko no hoi o ka malama o Aperila ka make ana o ka makua o ke ahonui o Amerika.

Ma ka make ana o ka Peresidena, ua ili aku ka noho Peresidena ia A. Johnson, kona hope, ma ke awakea o ka la 15 o Aperila.

No ka nui loa paha o ke kanikau ana o Amerika no kona kahu, aohe he nui o na nu hou i hiki mai no na mea e pili ana no ke kaua. O ka mea nui nae, o ka haawi pio ana mai o Johnson, i kona puali holookoa. Ua hoopuka ae na Kenela kipi a pau i ko lakou manao, e maliu mai i ke Aupuni kahiko.

 

Ka "Shenandoah."

Oia ka inoa o kekahi moku o ka Hema, i kapiliia ma Beritania, a hooholoia'ku e powa i na moku kalepa o ka Akau. He moku nui ka Shenadoa, a he mama no hoi ka holo ana, aia mahope kona huila. He mau pu nui kona, a ua makaukau i na mea kaua a pau. Ua lohe ia mai nei, aia no ia ma Melbourne, he awa ku moku no ia ma Nu Holani, no Beretania kela aina. Ua komo aku o Shenadoa malaila, i mea e loaa ai ka lanahu a me na mea e ae e pono ai. He umi mau moku kalepa Amerika i pau ia ia i ka powa ia a puhiia hoi i ke ahi, i kona holo ana ae mai Europa aku a hiki i Nu Holani. A ua olelo ia, e holo hou ana ua moku nei a i Califonia, a mawaho o ke awa o San Francisco, malaila e powa ia'i na moku mahu e holo mau nei i Panama me na eke gula o Califonia. Ua pihoihoi ka manao o ka poe kalepa o San Francisco, a ua kahea ae lakou i ke Aupuni, e hoouna koke mai i mau moku manuwa mahu, i mea e pale aku ai ia pilikia ke hiki aku ilaila. Ua makaukau loa na papu o ia awa, nolaila e hiki ole ana ua powa nei ke komo iloko, aka, o kona noho kiai ana mawaho, me he ahele la e ale ai i na moku kalepa, oia ka lakou la e hopohopo nei. He mau manuwa no e noho la malaila, aka, he mau moku pea liilii ku pono ole ke hakaka me ka Shenadoa. A mahope paha e lohe hou ana kakou no na hana a keia moku mahu o ka Hema.

 

Kahuna Hoopunipuni.

Eia ma Heeia uka, e pili ana me Ahuimanu, aia malaila keia wahine hoopunipuni, o Kahaonui kona inoa: eia ka mea i akaaka ai o kona hoopunipuni, hele aku'la kekahi kanaka o Nahaalu kona inoa. I hele mai nei au ia oe, e hana mai oe i kuu noho lio. Ninau mai la ua kahuna nei, I aha la ia kou noho? Ua lilo i ka aihue ia. I mai la ua kahuna nei, Aohe mea e ae i lilo ai ko noho, he hoa paio no no kou keiki, ka mea i lilo ai o ko noho. I aku'la ka mea nona ka noho, Pehea la uanei e loaa ai kuu noho lio? Olelo hou mai la ua kahuna nei, Aia nae ka hale i lilo ai la i ka palena e kaawale ai o Kahaluu, a me Waihee, aia ilaila ka mea i lilo ai o kou noho. I aku la ka mea nona ka noho, E hele ana au i ke kahuna kuni, nana e hana mai. Ia manawa o ka hele koke aku la no ia i ke kahuna kuni, o ka Pohaku kona inoa, e hai mai ana ua kahuna nei $20 dala oia ka uku. I aku ana ka mea nona ka noho, aia a loaa ka noho, alaila, haawi ka uku, eia ka i ka Pake ka noho, alaila, maopopo iho la ka hoopunipuni o neia kahuna wahine me keia kahuna kuni. Eia ka hoi i keia pake kolohe aole no hoi he olelo mai o ua mau kahuna nei, ua lilo i ka pake; E nana pu mai kakou e ka poe naauao i keia hoopunipuni nui. I na he kupono i ka Luna Nui o Ke Au Okoa, e hookomo iho ma kahi kaawale o ka Nupepa Aupuni. E aho ia wahi kanaenae i ka Nupepa Aupuni. Me ke aloha.  Na Poliuliu.

Waihee, Oahu, Mei 8, 1865.

 

He Manao Hoolana.

E na makamaka a pau, aloha nui oukou. He manao lana nui ko'u e kamailio ia oukou ma keia pepa ; o ka Helu Ekolu nei, a owau no ia, i hanau ia ae nei mailoko mai o oukou, o na kanaka kupa o kuu onehanau. O ko'u mau la pokeo keia ; ua hanauia mai au iloko iho nei o Aperila, ilaila au i hoomakaia ai e hanau i elele no oukou, na kanaka kaulana, ka poe i aoia, ka poe hoi i ao ole ia, a me ka poe haahaa ilalo loa ; e hiki ana au io oukou la, e noho pu ana kakou iloko o ko oukou wahi home, ina he maikai, a ina he pelapela.

E hiki no ia oukou ke hookipa maikai ia'u me ka malama loa ; mai kilei oukou ia'u, a hoomainoino hoi ma na paia o na wahi pupu hale o oukou, o pau au i ka amuia e na elelu, a me na iole ; mai hoolei oukou ia'u na na mu e ai mai, a hoohalike ia'u me he pio la no ka la hoouka, a hana oukou ia'u me ka manao aloha ole, e like me ko oukou aloha ole i o'u mua, na kahu o'u, o Lama Hawaii, o Kumu Hawaii, o Nonanona, o Elele, o Hae Hawaii, o Pakipika, a me Kuokoa, aka, ke manao nei au, ko oukou hoa opiopio, ua haule lakou, a o ko lakou mau iwi, ke waiho kuakea mai nei.

Nolaila, kakaikahi loa o lakou i malama pono ia ma na wahi paa o ko oukou mau home, no ka mea, i keia mau la, ke ku nei au imua o ko oukou mau alo me ka haahaa, me ke kauoha aku ia oukou, o ko'u wahi ola ka oukou e noonoo ai, me ka malama loa, i mea hoi e mau ai ko'u  noho ana me oukou. Aole au e paupauaho ana i ka hele ana ma na aina kuaaina haalele loa, a me kuu hehi ana i ka lepo poho o Mahiki, a me kuu alo ana iwaena o ka wa ino a me ka wa ua, aole a'u olelo ia oukou no ka la malie, nolaila hoi, mai pauaho oukou.

No ka mea, aole no au e molowa ana i ka hehi iho i na opuu lepo paho o Laa, i uka loa o ka nahele ; e hele ana au ilalo i na alu i ku ia e na home o oukou, iluna hoi o na wahi kiekie. Nolaila, ke haawi aku nei au i ko'u aloha ia oukou, a me ko'u manao pu kekahi. Nolaila, ke kauoha aku nei au ia oukou, e hana oukou ia'u me he keiki la, e hookipa maikai ia'u, imua o na kaikamahine ano maikai, naauao ; a pela hoi i na keikikane, e lawe oukou ia'u, a e hanai i ka ai kupono no ko'u ola ana, oia hoi na dala elua no ka makahiki.

A ke i aku nei au, o ke Aupuni kuu mea nana i hanau ; o Hawaii ka makuahine, o ke Aupuni ka makuakane. Nolaila, eia ko'u manao ia oukou, e na kumukula a pau, e haawi oukou i kuu kino nei     haumana a oukou, e paipai ia lakou e imi i kuu wahi ola, no ka hapa makahiki, no ka mea, he mau hoa paani o oukou no'u i keia manawa a ke hai aku nei au ia oukou, aole no e hooleia na manao o oukou ke hooiliia mai ma kuu inoa nei, a i ole au, ma ka inoa o ko'u mau kahu, e hana oukou ma na rula i hoikeia aku ai, ke kakau akaka mai me na kiko o na ano a pau i pono ai, no ka mea, he okoa ka poe nana e puolo mai a paa i ke koko, kau mai maluna o kuu wahi hokua opiopio, he lawe wale no ka'u i na manawa a pau a'u e hiki aku ai.

E hoomakaukau oukou i keia manawa, a me na wa e ae a pau loa, a'u e hele aku ai, no ka mea, i pono no ka hele ana aku o ka malihini i kamaaina, ea aku, ua pumehana ka hale, ua a kahi umu, ua moa kahi ia, hookahi ka paina pu ana, no ka mea, aole au he keiki kamaaina ia oukou, aka, he ano malihini no. Nolaila, mai nanau oukou ke lawe ia aku kuu kino nei ma na wahi home o oukou, mai kulou ke poo ilalo, mai haawi i na kuli ma kahi kokoke i ka umeke, he hana pi ia, he aua, he makona, he lokoino, a he aloha ole. Mai hana oukou pela ia'u, o hilahila auanei au, a uwe iho, no ka mea, he wahi keiki wale no au, akahi no a paa kahi malo i ka hope, ke kau nei ka piwa, he papale no ka la makani. Aloha.

 

Luku Maoli.—Ma St. Pitabuga, oia ke kulanakauhale Alii o Rusia, ua ike ia iho nei iloko o kekahi halepule nui, ua nakaka na paia pohaku o ka hale, a ua anoninoni ka manao o na kahuna pule o hanee mai auanei ia, a nolaila, ua haomakaukau ia e hana hou ae. A oiai e hana ana ka poe kamana maluna o ke ala-pii iloko o ka hale, haalulu ae la ke ala-pii, a maka'u iho la na kanaka a holo aku iwaho. Laulaha koke ia aku no ka lohe no keia mea iwaena o ke kulanakauhale holookoa mai o a o; a eia hoi kekahi mea kupanaha, ua haiamu koke ae na kanaka he nui wale e makaikai ai no ka naha ana o ka halepule nui kaulana, a komo aku la lakou iloko o ka hale a piha loa, ua manaoia ua aneane eono tausani na kanaka iloko, na kane a me na wahine. A oiai o lakou e kuineki ana, nakaka u-i-na mai la na paia o ka hale, a holo walawala-ki aku la na kanaka, e ake nui ana e puka koke iwaho, i mea e pakele ai. Aka, no ka nui o na kanaka o waho mai e hoomaka e ana a e makemake ana e komo aku, aole no i hiki ke puka aku keia poe oloko. Ia manawa no, haule u-i-na iho la ua halepule nei, me ka wawalo nui, a popoiia iho la a ulupa ia na kanaka a pau malalo o na paia kiekie i hina ilalo a mokaki liilii ia. Hookahi paha sekona, a pauhia ka hale a me na tausani kanaka i ka hooliloia me he waihona moku nui la. Aole o kekahi mea hookahi o lakou i ola mai, ua pau loa i ka make. Ua eli ia i keia wa, a ua loaa mai na kino kupapau, a haawiia aku no i ka poe pili, aka, o kekahi poe ohana, ua pau loa i ka make, aohe mea koe, a na ke Aupuni lakou i kanu. Ua nui ke kumakena a me ke kanikau ana ma St. Pitabuga, no keia pilihua nui.