Ke Au Okoa, Volume I, Number 1, 24 ʻApelila 1865 — He olelo ao i ka poe e kakau mai ana e pai ia ma ka Nupepa. [ARTICLE]

He olelo ao i ka poe e kakau mai ana e pai ia ma ka Nupepa.

E pono ke palapalaia ka aoao hookahi wale no o ka pepa; e hoopololei i ke kakau ana i na hua i ole e kuhihewa ia e ka poe paipalapala; e hoomanao i na kiko, oia hoi na koma, a pela aku. Ina aole e kakauia ka inoa maoli ma ka palapala i hoounaia mai e pai, alaila, e hai ae ma ka pepa okoa, i ike ai ka Lunahooponopono i ka inoa oiaio o ka mea nana ia palapala, a i ole hoi ia e waihoia ma ka papa me ka hoopuka ole ia. Eia kekahi, mai hoomahuahua wale i na olelo ano ole, e laa me neia, – "E ka mea mama i ka hele mai Hawaii a Keawe a i Kauai a Mano, e lawe ae oe i keia wahi puolo ukana nona ka inoa i kau kehakeha ae la mauna iho," a i ka pau ana o ka palapala penei:– "He malu ia wahi huaolelo–ke hoi nei ko ka malu Koolau keiki, ua malu ka la i na pali." Aka, e kakau iho i na hua e hoomaopopo ai na manao io, a pau ia, e hooki ae. O na mea a pau e pili ana i ka hoonaauao ana, ka hoomalamalama ana, a me ka hapai ana i ke ano o ka noho ana o ko Hawaii nei, oia ka makou e koi nei e kokua mai na makamaka maa i ke kakau palapala. A pela no hoi me na nu hou o kela apana keia apana mai Hawaii a i Niihau, e palapalaia a hounaia mai na makou e hai ae imua o ka lehulehu. Ko Maui Mau Pono Aupuni–Famuli o ke kauoha a ke Kuhina Kalaiaina, e holo ana ka Luna o na Hana Hou o ke Aupuni, via o T. C. Heuck Esq. i Maui i keia la, e hooponopono ai i na hemahema o na hale a me na waiwai e ae o ko Aupuni ma Lahaina, a me na wahi e aku o Maui.