Ke Alakai o Hawaii, Volume VI, Number 38, 18 January 1934 — KA MAIA [ARTICLE]

KA MAIA

O ka maia kekahi meaai-maikai loa a ke kanaka e aiai, no ka mea, aia iloko o ka maia kekahi mau makelia maikai loa no ko ke kanaka pono o keia ola ana. He mea hikiwawe loa ka maia i ka ulu ke kanuia, a he mea loaa wale no hoi me ke kumukuai oluolu. Aole no e hewa ke kanu kela ame keia ohana i mau wahi kumu maia iloko o ko lakou mau pa pakahi iho; a elike me ka nui o ka aina, pela no e hoomahuahua aku ai ke kanu ana. He meaai hoopalupalu ka maia i ka hanalepo, a he aneane loa no e lawa ko ke kanaka ola ana i ka maia, me kekahi mau wahi meaai uuku okoa ae, e laa me ka waiu, ka ohia aiia me ke kamano ame kahi akaakai a pela aku. Aole me ke kamano wale no e pono ai e aiia ka ohia, aka ua hiki no ia huaai ke aiia me ka maia ame na meaai e ae elike no me ka aiia o na huaai e ae me kekahi mau meaai okoa aku. O ka ohia kekahi mea maikai loa a ke kanaka e ai ai

no kona ola kino. Olelo na kauka, ua oi aku ka waiwai e loaa ana i ke kanaka mailoko mai o ka ohia mamua o ka hua alani oiai no nae he huaai maikai loa no ka alani no ko ke kanaka ola kino, a o ka oi loa no na bebe ame na kamalii, no ka mea he mea kokua nui mai ka alani i ka hooulu ana i ka iwi oloko o ke kino me ka hooikaika pu ia lakou. O ka maia ame ka ohia, he mau mea hiki loa lakou ke kanuia iloko o ko kakou mau pa, a ina aole he aina o kekahi e hiki ai iaia ke kanu i ka mala, ka ohia, ke akaakai a pela aku, ua hiki no ke noi aku i ka hoaloha nui o ka aina e haawi mai nona kekahi wahi e mahiai ai, a hua no hoi na meakanu e haawi aku no hoi i kekahi o na meakanu i oo no ka mea nona ka aina i mahiia ai ia mau meakanu. Ma keia hana ana e hoemiia mai ai

ka lilo o ke ola ana iloko o keia mau la pilikia nui wale maoli. Ke hoomanao nei au i kuu mau la opio i kekahi haole e noho ana ma ko makou hale i kona wa e hoea ai ma ke kulanakauhale nei. Ke kope kana e inu ai i ka wanaao, a i ka la holookoa a po, he maia wale no kana ai me ka waiu. Make oia i kona wa elemakule loa. He u-mi-kumamalima makahiki o kela haole i noho ai me makou a ia mau makahiki apau o ka maia ame ka waiu wale no ka'u i ike ai iaia e ai ana i kela ame keia la mawaho ae o ka pola kope o ka wanaao eia nae aole no nawaliwali o kona ola kino, aole no hoi he nawaliwali o ka ike o kona mau maka. Nana no e pahonohono i kona lole ina i nohae me ke kau ole o na makaaniani. Nolaila ke manao nei au ua hiki no i ke kanaka ke ola i ka maia ame ka waiu wale no a oi loa aku paha ina e {illegible} he wahi akaakai kapiki a {illegible} ma{illegible} okoa me kekahi p{illegible} loa. Ina pela kakou e hana ai aole no hoi e pilikia loa i keia {illegible} ka hana o ka aina.