Ke Alakai o Hawaii, Volume II, Number 37, 9 January 1930 — NA MANAO WEHEWEHE MALUNA O KA LALANI EONO. [ARTICLE]

NA MANAO WEHEWEHE MALUNA O KA LALANI EONO.

6. Hooneenee mai e ka iliahi. Ko Kapano manao: Hooneenee, hookokoke ana mai o ka poe ahe laau ala; ua hoohalikeia ka poe a'hia'hi me ka iliahi. Ili, ili aina, ili o ka laau. Ahi, he mea i hanalimaia, he mea ia i loaa mai mamuli o ka hia ana. A'hia'hi, holoholo olelo. O ka manao o ka lalani eono oia no keia. Mahope o na walaau hoinoino nui ana a na enemi o ke Alii ua kokoke mai la lakou iaia ma ke ano hoomalimali a me he mea la ua hoala ia lakou elike me ke ala o ka iliahi. Ko Kahapula manao: O ka manao o ka lalani eono, oia no ka punihei ana aku o na kanaka i ke alo o ke Alii, i na enemi o ke Alii, a ala mai la na ku-ee ana a kokoke maoli no e haunaele. Ko Nalimu manao: Hoonee|nee, hookokoke mai, makemake e loaa aku na pomaikai mai ke Alii aku. Iliahi. poe manao wela, manao hoehaeha. He laau ulu no hoi ma na mauna. A'hia'hi, holoholo olelo. O ka manao o ka lalani eono, oia no ka hookokoke ana mai o ka poe hoehaeha manao a holoholo olelo e hoao ana e loaa aku na pomaikai mai ke Alii aku.

Ko Kupihea manao: Iliahi, ili mahana, a ua pili no hoi keia huaolelo i ke kanaka lawaia, no ka mea, he mahana kona ili aole hoi e like me ke kanaka mahiai, he anu, a he puanuanu kona ili. Nolaila, o ka manao o ka lalani eono, ua pili no i ka ipo, oia hoi ka hooneenee ana mai o ka ipo me he iliahi ala i ka poli o ke aloha. Ko Kuluwaimaka manao: Iliahi, pili i ka mea hooinaina, hoala huhu, a he laau hana aloha nohoi. Nolaila, o ka manao keia lalani eono oia no ka hookokoke ana mai o ka poe hooinaina i ke Alii. Ko Iokepa manao: Iliahi, ua pili keia huaolelo i ka mea kaili kane a kaili wahine no hoi, oia hoi, he mea i makemake e kaili i kau kane a wahine paha mai ia oe aku. Eia kekahi olelo kaulana "Eia aku o ka iliahi ke hooneenee mai la."