Ke Alakai o Hawaii, Volume II, Number 36, 2 Ianuali 1930 — AIA I HONOLULU KUU POHAKU. [ARTICLE]

AIA I HONOLULU KUU POHAKU.

Kalaupapa, Molokai. Dec. 1929 Mr. Jonah Kumalae, Lunahooponopono o KE ALAKAI O HAWAII, Aloha Oe: - Ka'u hoakaka no ke mele o ka Moi Kamehameha V, a Luka Keelikolani i haku ai, oia iho keia malalo nei. 1. Aia i Honolulu kuu pohaku, a o ko'u manao maluna o keia olelo, o Honolulu he aina pohu, ma ka aoao lulu o ka mokupuni o Oahu, o ka pohaku e olelo ia nei, oia no ka Moi Lota Kamehameha V, e noho moi ana a puni na pae moku o Hawaii, a o keia wahi no hoi kahi i kaulana ai, "Ke one Aialii o Kakuhihewa. 2. Kealohilani kuu haku ia. No keia olelo Kealohilani, he mea kiekie maluna o na kanaka apau, a he haku hoi no ka mea nana e haku nei i keia mele, a o kekahi mau manao o keia mau pauku, oia hoi ke aloha, a he makee Alii. 3. Ua holo ka wela i na mokupuni. O na mokupuni e olelo ia nei ma keia pauku, oia no ka ohana Alii, a o ka oi aku nae, oia no o Luka Keelikolani, ka mea nana e haku nei keia mele, ua nui kona huhu a ua hoopunipuni ia hoi oia e ka Moi, oia ka mea i pili ai o ka pauku 4 ma keia mele, ua ae ka Moi i ka makemake o ka ohana Alii, aole nae ia o kona manaoio maoli, aia no kona manao i ka mea a kona puuwai i iini ai. 5. O a'u Lehua i Mokaulele.

O na Lehua o Mokaulele e olelo ia nei maanei, oia no ka Moi Lota ame ka Princess Pauahi, he koko Alii mai ka laina hookahi mai, he mau lehua no ke kumu hookahi mai, eia nae hoi ka mea apiki, he okoa no ko ka Moi makemake. 6. Hoonee mai e ka Iliahi. O ka Iliahi, oia kekahi laau aala loa o Hawaii nei, a o ka mea ala ma keia wahi oia no o Luka Keelikolani, a maanei paa ka manao o Keelikolani e holo i Honolulu e hui me ka Moi. 7. Hoohanu'a mai la ka ua i uka. O ka ua ma keia pauku, oia no na waimaka ame ka hupe o ke Kamaaliiwahine Luka, a kaua aku la i ka Moi, a me he mea la ma keia wahi o ke mele, ua paa ka manao o ka Moi Lota e haawi aku ia Pauahi na ka mea e aku, oia ka mea i pili ai ka pauku 8 ma keia mele, ina aole i ae o Kamehameha, make o Pihopa i ka Moi, ma ka moolelo o keia Alii he Alii huhu. 9. Aia ka pono ia Oniula. Ua manao ka pono o Luka Keelikolani e noi i ka makuakane a i ole Kahu-hanai o ka Moi e hoopau i kona manao hope, aka, ua hiki ole nae, a oia ka mea i pili ai o ka pauku 10 o keia mele, no ka mea, ua hoike mai ka Moi e noho ana i ke kalaunu o Hawaii i kona ku-e i ka makemake o ka ohana Alii ame na makaainana, e male o Kamehameha V me Pauahi.

11. Kuu Haku i ka ehuehu kai o lalo. Oia hoi pii ae la ka manao o ka Moi i ka mea ana i aloha ai, a hoopili mai ma kona poli, a ko ole hoi ka manao makee haku oiaio, iloko o Luka Keelikolani no Kamehameha V, pela oia i hoopili ai i ka pauku 12 ma keia wahi, a hookanaaho ae la iala iho me ke ala onaona o ka Hala o Puna, a me he mea la ma ka nana aku, o ka aina hanau paha keia o ua Kamaaliiwahine ala, 13. Paa mai Olaa i ka ua noe. Ma keia ua paa loa ka manao o ka Moi Kamehameha aole e noonoo hou maluna o Pauahi a e hookuu aku ka ohana Alii, nana no e koho kana wahine e makemake ai, komo pu me ka pauku 14. 15. Kahiko Poliahu i ka hau anu. Ma keia ua huli ke kaona o ke mele no ke Aliiwahine Pauahi o Poliahu e olelo ia nei ma keia pauku oia no o Pauahi, a o ka hau anu, oia no o Pihopa, he

haole he mea keokeo. 16. He manao paa ko'u a hiki aku. Ma keia wahi o ke mele ua pili ia Keelikolani, ua manao oia e hele e ike ia Pauahi, aka, ua kono e ia mai la e ia hoa Alii ona, a o na laina hope o ke mele he mahalo nui no ka Moi Lota Kamehameha V., a ma ka nana aku i keia mele, ua haku ia he hapa i Hawaii, a he hapa i Oahu. Me ka mahalo a nui, G. M. Kauluwehi, Kalaupapa, Molokai.