Ke Alakai o Hawaii, Volume I, Number 8, 21 June 1928 — HE MOOLELO KAAO HAWAII NO IWA Kahi Keiki Uuku Akamai i ka Wahahee—laia Nei Loaa na Makemake o ke Alii o Umi—Aihue no Nae Mai ke Alii Mai [ARTICLE]

HE MOOLELO KAAO HAWAII NO IWA

Kahi Keiki Uuku Akamai i ka Wahahee—Iaia Nei Loaa na Makemake o ke Alii o Umi—Aihue no Nae Mai ke Alii Mai

O Keaau i Puna ke kumu o keia Kaao, nana na leho ai o Kalokuno ka inoa. I ka wa e holo ai i ka luu hee, wehe ae la i ka leho a hoike iho, na ka hee no e pii a komo ka waa. Pela mau ka Keaau hana i na la a pau. Kukui aku la ka lohe ia Umi a hiki i Kona. Ia wa hoouna mai la o Umi i na elele i o Keaau la, a lawe ia aku la na leho pii a ka hee. A lilo na leho ia Umi, hoaa o Keaau a nui iho la kona aloha i na leho punahele ana. Noonoo nui loa iho la oia i ka mea e hoi mai ai kela mau leho iaia. Hoomakaukau iho la oia i ka waa, ka puaa, ka awa, ke kapa ouholowai Olaa ame ka eleuli, a loko o ka hokeo, a holo aku la e kaapuni ana ia Hawaii. O keia holo ana a Keaau, aole ia e holo makaikai, aka he holo e imi i kanaka akamai loa i ka aihue, i hele aihue i na leho ana mai ia Umi mai i hoi hou mai na leho iaia. A pae oia i Puna, huli aku la oia i kanaka akamai i ka aihue, aole nae he loaa, huli aku la oia no Kau i ka aina kaulana i ka Palahemo. Huli keia mai o a o o Kau, aole no he loaa iki o ka mea akamai i ka aihue. Aole no nae he pio iho o ko ia nei manao, nolaila hele aku la oia no Kona. A hiki no oia ilaila, oia nele hookahi no. Ua makau wale no na kanaka a pau o keia mau aina i keia hana o ka aihue, a aole no paha he kanaka piko pau iole o keia mau aina. Hele loa no keia no na Kohala, nele no. A Hamakua, oia haawina hookahi no o ka nele; a hiki no hoi i Hilo Hanakahi, hele loa no ma na ano a pau. Mai no hoi oe a haawi pio iho o Keaau i ka huli ana i kanaka aihue akamai e aihue aku ai i na leho ana mai ia Uhi mai, aka no ka nui mai no o ko ia nei aloha i ua mau leho nei ana, nolaila hoomanawanui no oia i ka huli ana i kanaka akamai i ka aihue, me kona manaolana no e loaa ana no iaia ia kanaka ke paupauaho ole oia i ka huli. No ka loaa ole o kekahi kanaka aihue akamai loa ia Keaau ma Hawaii, haalele aku la oia i ka mokupuni nui o Keawe a holo mai la no Maui nui a Kama. Kaapuni iho la oia ia Maui a puni, aole no he loaa iaia o ke kanaka loea ma ka hana aihue. He poe kanaka aihue no kai hele mai e noi iaia nei i ka hana, aole nae i lawa ia lakou ka ike aihue e hiki ai ke loaa na leho a Keaau. Haalele o Keaau ia Maui a holo aku no Lanai, oia ana no; holo aku la keia a Molokai, kaapuni aku la a hiki i Ka-Lae-o-Kalaau, ilaila, loaa he kamaaina e lawaia ana, ninau mai ia ia Keaau: "E holo ana kou waa ihea?" I aku la o Keaau, "E imi ana au i kanaka akamai loa i ka aihue i loaa ai a'u mau leho i limanui ia e Umi, a oia keia waiwai oluna o ko'u waa, he makana na'u i ka aihue e loaa ai o a'u leho punahele." Olelo mai la ke kamaaina, "Ua loaa, e holo oe a hiki i Makapuu, hala ia mahope ou, kau pono aku ko waa i na moku manu ame Mokapu, a ku pono ilaila, nana aku i ka pali e halehale mai ana, he luna ia, he lalo ka pohai kukui, aia ilaila o Iwa, keiki aihue a Kukui." He wahi keiki uuku wale no o Iwa, iloko no o ka opu, hele e aihue, a he oi o Iwa ma ia hana he aihue. "A hiki oe, nana aku i kahi keiki uuku e lewalewa ana no kahi mai, e holo ana i ka lae kahakai, o Iwa ia. Uhau aku oe i ka puaa, a haawi aku i na waiwai a pau loa, mai hoopoina oe, o pau na waiwai i ka aihue ia e Iwa." A lohe o Keaau i na olelo a ke kamaaina, holo aku la ia a hala hope na wahi i olelo ia maluna, hiki aku la ia i kahi o Iwa. I nana aku ka hana, e holoholo mai ana neia wahi keiki i ka lae kahakai e lewalewa ana no kahi mai. Ninau aku la keia: "O Iwa anei oe?" Hoole mai ana kela me ka olelo mai, "Aole owau o Iwa, ei aku no o Iwa i ka hale," a hiki keia i ka hale, e noho ana no o Kukui. Ninau aku la keia: Auhea la o "Iwa." I mai la o Kukui: "Aole anei he wahi keiki uuku i halawai mai nei me oe ma ke ala mai kahakai mai e lewalewa ana no kahi mai?" "He keiki no." "O hoi a uhau aku i ko puaa iaia." A lohe keia hoi aku la a hiki, olelo aku la o Keaau ia Iwa: "O Iwa no ka hoi oe, kuhikuhi paee mai nei oe ia'u." Uhau aku la oia i ka puaa imua o ke alo o Iwa: "A make na Iwa na ke keiki aihue a Kukui, o ka waiwai o kuu waa nau ia a pau loa ame ka waa." Hauoli loa iho la kahi keiki o Iwa a olelo aku la ia Keaau me ka eleu, "E hoi aku kaua i kauhale, a ilaila aku e hoopau loa ai ke kuku ana no kou manao." A hiki laua i ka hale, kalua ka puaa, mama ka awa, paina iho la a pau, ninau mai la o Iwa: "Heaha keia huakai au o ka hiki ana mai nei i ko makou wahi?" Pane aku la o Keaau: "He mau leho punahele ka'u, ua kiina mai e ko makou alii e Umi, a kaili ia a lilo loa ia ia la. Ke noho nei au i ka ma'i i ka nui o ko'u aloha i a'u mau leho, He makemake nui loa ko'u e hoi hou mai ua mau leho nei a'u, a oia ke kumu nui o ko'u hiki ana mai la i o oukou nei." "Pela iho," wahi a Iwa i pane mai ai, "E kakali kaua a kakahiaka alaila maopopo. Moe iho laua nei i ko Iwa hale ia po a ao ae, makaukau ka waa a holo no ka moana. O Iwa mahope o ka waa me kana hoe kaulan a punahele no hoi iaia o Kapahi ka inaa. O Keaau mamua o ka waa. I ko laua nei waa a lana pono iloko o ke kai, kaomi malie aku la na hoe a kaa mawaho o na popoinanalu, hea iho la o Iwa i kana hoe punahele me ka i ana iho, "Kapahi ka moana i kai e Iwa." (O ke ano o ia mau mapuna olelo oia keia: E kuu hoe punahele i hookahi no mapuna hoe a hiki i kahi i makemake ia.) Ia kapeku ana no o ka hoe a Iwa, kaalo ana laua nei mawaena o ke kowa o Kauai me Niihau. Ninau aku la o Iwa: "A hiki kaua la?" "Aolo keia o Hawaii, o Kauai keia me Niihau. Ua huli hewa ka ihu o ka waa o kaua." Ui hou o Iwa i ka waa o laua i huli ka ihu i Hawaii, Hea hou iho la no ia i ua hoe punahele nei ana, "Kapahi ka moana i kai e Iwa." Hookahi no mapuna hoe, a ike kau ana ae o Iwa i kana hoe iluna, kapalulu ana laua nei mawaho o Oahu nei. I hou aku la o Iwa, "a hiki kaua la?" Pane mai la o Keaau, "Aole, o Oahu keia a kaua e haalele nei mahope." Lalau hou no o lwa i kana hoe punahele a hea no e like me mamua, a hookahi no mapuna hoe, haa-

lele ana laua nei ia Molokai ame Lanai mahope, a pakika loa aku la ko laua nei waa mawaena o ke kowa o Molokini ame Pohakueaea, he lae ia e kiei la ia Hawaii. I aku la o Iwa, "A hiki kaua 1a?" "Ae," wahi a Keaau, "Aia nae i kela puali la, e kau la ke ao i ke kuahiwi, aia ma ke komohana, aia ilaila ko Umi wahi e noho nei." Lalau hou no o Iwa i kana hoe o Kapahi a hoe hookahi no mapuna hoe hele ana laua nei mawahi o Kalaeakeahole, he lae ia e nana la ia Kailua i Kona, kahi a Umi e noho ana. I nana aku ka hana o laua nei, e lana mai ana no o Umi makai o laua nei e lawaia ana. I aku la o Iwa ia Keaau: "Aia o Umi la ke lawaia mai la me na leo, e hoemi ka waa o kaua i hope a nalowale o Umi i ole oia e ike rnai ia kaua. Ua nanea loa ia oia i ka lawaia, aole i ike mai nei ia kaua." A kaawale ko laua nei waa mai kahi a Umi e lana ana, olelo aku la o Iwa: "E Keaau, maannei oe e lana ai me ka waa o kaua a loaa mai oe ia'u." Lana malie iho la o Keaau, a luu aku la hoi o Iwa a loaa ka papaku o ka moana, a hele aku ia a hiki malalo o kahi a Umi e lana ana, a ooki aku la oia i ke aho o na leho a lilo iaia na leho, hoopaa aku la oia i ke aho a Umi i ka pukoa o lalo, a luu aku la oia a loaa o Keaau e lana ana no iluna o ka waa o laua. Ia wa hoi aku la laua a pee ma Leleiwi i Hilo, a noho iho la laua malaila. O ka Keaau hana oia ka hele e lawaia hee me ua mau leho nei, me Kalokuno. O ka ka hee hana e ka pii iluna o ka waa a komo ka waa, a hoi i uka, E waiho iki hoi kakou ia Iwa ame Keaau e hauoli ana i ka loaa o na leho ia laua, a e aka ana hoi i ka hoaa aku o ke alii o Umi i na leho, a e huli iki ae kakou no Umi. A lilo na leho ia Iwa, noho o Umi me ka minamina. Ua manao oia i ka paa o ke aho ana ilalo a Iwa i hoopaa ai i ka pukoa olalo o ka papaku o ka moana he mau maoli. Nolaila ku kiai o Umi i kai me na waa ame na kanaka, aole hoi i uka o ka aina. Iluna no o ka waa oia e ai ai, a pela no hoi me na kanaka, a hookahi hana o ka luu i na leho i na la a pau.