Ke Alakai o Hawaii, Volume I, Number 8, 21 June 1928 — UA WAEIA O HOOVER I MOHO PERESIDENA [ARTICLE]

UA WAEIA O HOOVER I MOHO PERESIDENA

Me ka lanakila lua ole i pulelo mai la ke keiki o Kaleponi, Hoover, i ka aha wae moho i mamalamaia mai nei ma Kansas. Ua ike mua ia no ka lanakila o keia keonimana ma ka nui o na elele i puka i kakoo iaia mamua o ka noho ana o keia aha elele wae moho. Ua hoao ae na poe alakai o ka poe mahiai o ka aina e hoike i ko lakou manao koho ole i ka moho Repubalika ina e waeia o Hoover ka moho, me ko lakou olelo ae, ina aole e loaa ko lakou makemake ia lakou nei ma ke kulanakauhale o Kansas, e loaa no ia lakou ma Houston, oia hoi ke kulanakauhale e noho ai ka aha elele wae moho a na Demokalaka, a o ko lakou manao ma keia olelo ana pela, oia keia, ina aole hooloheia mai ko lakou manao e na elele Repubalika, alaila e loaa ana ko lakou hooloheia mai e ka aha elele a na Demokalaka. Aole no i maka'uia ka lakou mau olelo hoomaka'uka'u, nolaila ua hana mai la no ka ahaelele Repubalika e like me ko lakou makemake. Aole kakou o Hawaii nei i maopopo i na hana kalaiaina o ka aina makua, koe wale no na mea loaa mai ia kakou ma na nupepa. Ua eleu no na hana a keia aha elele, no ka mea iloko no o na la pokole eha ua pau iho la na hana a hookuuia na hoa e hoi no ko lakou mau home iho, me ka hauoli ka hapanui, a ua kukule no hoi kekahi poe kakai kahi. O kekahi kumuhana ano nui loa i komo iloko o ke kahuahana a keia aoao kalaiaina, oia ka mea e pili ana i ke kakoo i ka hoololi kumukanawai umikumamawalu o ke aupuni, oia hoi ka mea e pili ana i ka hoole waiona. Ua hiki ae no ma keia halawai na poe makemake e hoonoaia ka waiona, aka he hapa uuku loa lakou, nolaila aole i maliu ia aku ka lakou koi, oiai a ia ka hapanui o na elele ma ka aoao kakoo i ka hoole waiona. O ka hana i koe oia ke kali ana aku i ka la koho e hiki mai ana. Aole o kakou mana koho i na peresidena o kakou, aka ina kakou ma ke ano he mokuaina, ina ua loaa ia kakou ka mana e koho ia laua. Aole paha he wa e ike ai kakou i keia kulana maikai oi ae mamua o keia a kakou e noho nei.