Ke Au Hou, Volume II, Number 1, 4 Ianuali 1911 — HE MOOLELO KAILI PUUWAI NO Kaehuiki-Mano-o-Puuloa KE KEIKI-MANO A KAPUKAPU LAUA O HOLEI O KE AWA ULILI O PANAU, PUNA HAWAII—KE AIWAIWA I PONIIA I KA NIU HIWA, KA AWA-LAU AME KE KUMU-ULA, A I OLE, O KA IKI HOONAHOA NANA I ULUPA NA NIUHI HAE O NA ALE-KUALOLOA O KA MOANA MAI HAWAII A HOEA I KUKULU O KAHIKI [ARTICLE]

HE MOOLELO KAILI PUUWAI NO Kaehuiki-Mano-o-Puuloa KE KEIKI-MANO A KAPUKAPU LAUA O HOLEI O KE AWA ULILI O PANAU, PUNA HAWAII—KE AIWAIWA I PONIIA I KA NIU HIWA, KA AWA-LAU AME KE KUMU-ULA, A I OLE, O KA IKI HOONAHOA NANA I ULUPA NA NIUHI HAE O NA ALE-KUALOLOA O KA MOANA MAI HAWAII A HOEA I KUKULU O KAHIKI

[Kakauia e KA OHU HAAHEO i na Kuahiwi Ekolu.]

MOKUNA I Hanau ke Aiwaiwa o Puna —Ke Keiki Mano a Kapukapu Laua o Holei A i ke awakea o ka la mamua iho o kanee ana o ka huakai a na alii, hoea mai la o Kahiuka no ka hoomakaukau ana i na mea e pono ai na malihini, a hoaumoe pu iho la lakou ia po. Oiai na alii e pauhia ana me ka nanea iloko o ka hiamoe kulipolipo, ua ala ae la o Kahiuka a hele aku la e ninau ia Honuiki: "Ea, pehea ka noho ana o na alii a kaua?" "Maikai," wahi a Honuiki. "Pehea, ua hoolohe no oe i ka'u mea i kauoha aku ai i ka la hi'u wai o na alii?" "Ae, ua hanaia elike me kau kauoha, i na po apau aole loa i loaa ia'u he mea e hoohuoi ai no ko kaua haku a pela nohoi me na malihini. O ka nanea ana o na alii, ua ike no oe ia mea, ma na lealea maikai no, e laa na hookaau olelo, ke oli, a pela wale aku;" a hoike aku la no hoi o Honuiki i na lealea oia mau po, pela laua i ala ai a hiki i ka moe okoa ana, hooki ke kamailio. I ka puoho ana ae o lakou ua ao, ua makaukau na mea apau o ka papaaina, a i hakalia wale no i ka pau o ka pioeoe o ka maka i ka hooma-u wai, aia lakou nohoi a noho iho no ka uhao ana mai i na wahi ono omakamaka hou oia kakahiaka, hiki ana ka pukaua o ke Awao Puuloa oia o Komoawa, no kona ukali pu ana i ka huakai makaikai a na alii o Hawaii ma ke ano hoohanohano, I ka pau ana o ka paina a makaukau no ka nee o ka huakai, pane mai la o Kaahupahau

imua o na malihini: "O ka pau ana keia o ke anahulu la o ko kakou noho pu ana, a o ka luakaha ana hoi i ke awalau o Puuloa nei, a o Kepanila no nae o oukou ka mea i ike pono i ka nani o Waiawa-nui ame Waiawa-iki," a hu ae la ka aka a na alii no neia mau olelo hoohenoheno a ua ui la o Puuloa. "Eia oukou ke liuliu mai nei no ka haalele ana mai ia'u e noho hoopue hookahi iho i ke anu me ke kokoolua ole nana e hoopumehana, a owau paha auanei ke auamo aku i ka ukana luuluu a ke aloha nou e ka ui o Hilo mamuli o kou lealea ike oli. O ka'u kauoha ia oukou oiai oukou e hele aku ana no mua aku nei, ina aku no ka ai imua ame na mea apau e pono ai, aka, e hoolohe nae oukou i na olelo apau a kuu wahi pilikoko nei. "Ke hiki oukou i Kauai, aia no ilaila ka ai, ka i'a ame na lako apau, aia no ilaila kahi i noho ai ia mau alii oia o Kupiapia ame Kupiopio, na alii nui oia mau aina, a o ka laua mau keiki aku nohoi o Laukahi'u ma, na alii o Niihau. E hoomanao nae oukou, aia ko Kupiapia halau alii i noho ai iwaho mai o Kalanipuu e kupono ana no i ua puu kaulana ala. "A ina no ko oukou kipa ilaila, o ka makamaka ia, a eia ko oukou hoailona la o kuu lei niho o kou lei ia e Kaehuikimanoopuuloa e hele aku ai i ma-ka no oukou. A i haalele oukou ia laila a hele aku i ko Kupiopio wahi, aia kona halau e noho ala i ka moana mawaena o Kauai ame Niihau, a o ka oukou ma-ka no keia e hoike aku ai, a pela no oukou e hele ai a hiki i Kaula i o Kuhaimoana ala, o

ko oukou hoailona no ia e hoike aku ai i ua alii ala o palepale moana, o kuu lei palaoa. Haalele oukou ia laila a au aku oia mau kai loa, alaila, waiho iho oukou i kuu lei palaoa ilaila, a na ko laila poe nohoi ia e hoihoi mai ia'u. O ko oukou kamaaina ia nana e hookipa a e malama a hiki i ko oukou haalele ana ia wahi, a nana no oukou e kuhikuhi aku i na kamaaina oia mau moana aku a oukou e hele ai a hoea i ka pahu hopu o ka oukou huakai.'' I ka pau ana o na olelo a ua aliiwahine nei o Ewa, haawi ae la na aloha hookuu a nee aku la ka huakai a na alii o Hawaii no ke kai o Kaulakahi. O ka pukaua Komoawa mamua loa, o na alii malihini aku, alaila, o Kaehuikimanoopuuloa aku me ka hoailona alii ame ka lei palaoa, ke aliiwahine Kaahupahau mai; a o ka pukaua nui Kahiuka mahope loa o ka huakai, a i ka hoea ana i ka nuku o ke awa, oia ka wa a na pukaua o Kaahupahau i hookuu aku ai i ka huakai a na alii o Hawaii e alakaiia ana e Kaehuikimanoopuuloa me ka lei palaoa nui melemele ma kona a-i, e laa no oe o ka memele o ka hulu o ka mamo. Hele nohoi ka la a kupono i ka lolo o ka piko o Wakea, hiki nohoi lakou nei i kahi o ia alii nui o Kauai o Kupiapia, a ilaila halawai pu lakou me ia mano o Kauai me Niumalu, he wahi mano kuapuu keia, alaila, ninau aku la o Kaehuikimanoopuuloa: "Auhea ke alii?" "Ina no la ke lualai mai la, i ke kaha nalu aku la no la, a o ka hoi ana mai la no ia," wahi aua wahi kuapuu nei, ua hele kahi opu a pohekeheke maikai me he oopu hue ala, i ka ka noke mau i ka hoonuu i ka oopu nopili o Wa-i lua. "E hele hoi ha oe a hai aku i ke alii, he mau malihini makou mai Hawaii Nui Akea mai, a oia ko makou makamaka o ke kipa ana mai nei, a eia ka hoailona la a ko makou kamaaina i haawi mai nei o ka lei niho palaoa o ke aliiwahine o Puuloa," wahi a Kaehuikimanoopuuloa. Ae mai la nohoi ke kiai, a o ko iala hele aku la no ia e hoike i ke alii he mau malihini kana mai Hawaii mai, aia mawaho o ka pahu kapu kahi i kali ai i ka olelo, o oe no nae ko la-

kou kamaaina i kipa mai nei, me ka lei palaoa o ia ka ma-ka e ike ai oe ia lakou. He poe hanohano wale no lakou apau a'u i ike aku nei me he mau alii nui ala no Hawaii, a he wahi keiki opio ka mea iaia o ka lakou kamailio, iaia nohoi ka lei palaoa kahi i lei ai. Pane mai la ke alii o Kupiapia: "E kii oe a hookipa mai ia lakou, aole aku la na he lei okoa, o "Kekee o ka Nalu o Makaiwa" aku la na, o ka lei o ka hanai a kaua o Kaahupahau ke aliiwahine o ka I'a Hamauleo. O ko ianei kii mai la no ia a loaa na malihini haele nui aku la no kahi o ke alii o Kupiapia, ia lakou nei i kokoke aku ai pa mai la kahea a kamaaina no ka hookipa ana i na kamahele. Komo aku la lakou a hooluana iho la iloko o kahi o ke alii, a o ka wa ia o ua Kaehuikimanoopuuloa nei i hoike aku ai i ka lei niho palaoa, a ike mai la ke alii o Kupiapia, mahamaha mai la oia i ka opio me ka hoihoi nui a pela nohoi i na malihini apau, a na ka opio i hoolauna aku na alii o Hawaii imua o kamaaina me ka olelo ana aku: "O Kepanila keia o ke alii o Hilo, a o Kaneilihia keia o ko Kau alii, o Kua nei o ke alii o Kona, o Manokini ae ia o ko Kohala ihu hakahaka alii nui, a o Kapulena nohoi keia o ko Hamakua alii, a owau nohoi keia o Kaehuikimanoopuuloa, ke keiki a Kapukapu ma laua o Holei, o kiai pali au o Panau, o Puna i Hawaii, a o ka pau ana nohoi ia o na moku eono o ke keiki hiapo a Wakea. Haawi mai la ua alii ala i kona aloha ia lakou apau a hiki ia Kaehuikimanoopuuloa, lalau mai la ia i ka lei niho palaoa, oia hoi o "Kekee o ka Nalu o Makaiwa" a honi iho la, a pau ka ike ana a kuu nohoi ka nae, hoomakaukau mai la na kamaaina i na mea ai, na ono o uka o kuahiwi, o ka opae mahikihiki ame ka lau hoi'o, o ka oopu nopili nohoi ame ka nakea ai lehua, a o ka lau limu nohoi o kahakai ame ka poke loli kamumumu, hele pono iho la ka lakou nei ai ana a hiki i ka maona ana a hiki ole ke uhao hou aku. I hakalia no a pau ka ai ana, aole i kuonoono pono ia luana ana iho, o ka hoolale koke mai la no ia o ka opio no ka nee ana o ka hua-

kai a ua poe alii nei o Hawaii, a ua ae mai la nohoi na kamaaina e hookuu me ka maikai me ka pau ole no nae o ko lakou minamina no ke kaohi ana i na malihini. Hookuu ae la lakou nei me ka haawi ana i na aloha hope, a niau aku la ko lakou nei mau kikala upehupehu no ke kai loa. Aole nohoi he wa oia oni ana aku komo ana lakou nei i ka moana mawaena o Kauai a me Niihau, a lana-lana nui iho la lakou mawawaho o kahi e noho ana o Kupiopio ke alii, a o ka hiki ana mai no ia o ke keiki a laua mai Niihau mai oia o Laukahi'u. Ia laua i ike mai ai i keia huakai malihini me ka iei niho palaoa o Kaahupahau e paa ia aku ana e ka opio kiai makalae o Puna, nolaila, aohe a laua hoapa hou ana iho ma ka hookipa ana mai. Pa mai la kahea a kamaaina, e kipa hale e ka malihini, e hanai ai a hewa ae ka waha, ikaika na maka ke nana aku. O ko lakou nei komo aku la no ia a hui aloha pu iho la me na alii me ke kuihe ole, a o ka wa no ia a Kaehuikimanoopuuloa i hoolauna aku ai i na malihini apau imua o Kupiopio, a hoea nohoi i ua opio nei, puliki mai la lauala, no ka lohe ana mai i ke kaheaia ana o kona inoa ma o Kaahupahau ala, a uwe iho la me ka honi ana iho i ka lei niho palaoa, he hoike no ko laua aloha i ke aliiwahine. A i ke kuu ana o ka hanu naenae, a makaukau na mea ai, haule nui aku la lakou nei hoopiha i ka lua o ka inaina, a i ka pau ana ua lilo ae la ko lakou nei kamailio ma na mea e pili ana ika huakai makaikai. Na ka maka i hoike mai i ka maluhiluhi maka-hiamoe, o ko lakou nei hoi aku la no ia hooluolu ia koena po, a i ke ao ana ae a makaukau no ka hele, ua hookomo nui iho la na wahi pulehu uwala mahanahana a piha palula aku la ka opu, oia ka wa i pane mai ai o Kupiopio i ke keiki ia Laukahi'u: "Auhea oe, e hoi pu oe me na malihini a hiki i kou wahi hookipa aku oe ia lakou me oe, a nau nohoi ia e hookuu aku ia lakou me ka maikai ma ia wahi aku." Ae mai la nohoi o Laukahiu, a hookuu ae

la lakou nei iloko o na puili aloha pumehana ana a o ko lakou nei au aku la no ia malalo o na alakai ana a Laukahiu, aole nohoi i li'u iho hoea lakou nei i kona halau hale hua limukala i ka mole o Niihau ma ka huli o Kawaihoa, kipa aku la lakou nei ilaila hoopiha no i ka houpo lewalewa, hookahi no ia alelo wana momona me ka ulinalina opihi koele nunui, inu mai la ka poi uwala awaawa, piha maikai mai la o loko, o ka maona me ka pumehana pu. Aoe i kana mai ke ai mau o nei poe mano, o ke ano no paha o ka huakai hele a na alii. Hooluana lakou nei a li'u iki, o ka pai aku la no ia o ka opio no ka hele, o ko lakou nei haalele iho la no ia ia Niihau a kia pololei aku la no kahi o Kuhaimoana ka lae ko'ako'a, ka home uluwehi hoi i ka hohonu o ke kai lipolipo, a aia hoi ka ihu o Kaula ke au-ku mai la i ka makani me he a-i ala no ke koloa ke aeaea i ka wai, a maanei hoomanao ae la ka mea ka- kau i keia mau wahi lalani mele: Nani wale au e ike nei I ka aina o Kuhaimoana Aina i ke kai lipolipo Hookala kupueu a ke aloha. I ko lakou nei komo ana aku i ke ana o Ku, oia ka inoa o ka halau alii o ua Kuhaimoana ala i ka moku o Kaula ma kaulana a ka la, he ku i ka weliweli ka lakou nei ike aku, he kohu kuahiwi maoli. Ua olelo ae lakou, ina no lakou e huiia apau aole no ia he mea e loaa aku aio ka hapawalu o ka nui o ke kino o ua aiwaiwa nei. A ike mai la o Kaimaio ka haku ai-puupuu nui o ke alii i ka paa aku o Kaehuikimanoopuuloa i ka lei niho palaoa hoailona alii o lakou, o kona kii koke mai la no ia e hookipa ohaoha i ka huakai malihini me kona hoohakalia ole iho. A i ko lakou komo loa ana aku iloko o kahi o ke alii, hoike aku la ke kiai i na mea a pau no na malihini ame ka lei niho palaoa o laua o Kaahupahau, a wahi a ka opio i pane aku ai; "Ua haawi ia mai nei ia'u keia lei i hoailona no makou e ike ai oe, o oe ko makou kamaaina o nei wahi makamaka ole a hiki i ko makou hele ana aku no ka makou huakai.