Ke Au Hou, Volume I, Number 13, 27 July 1910 — HILIHEWA KA MANAO [ARTICLE]

HILIHEWA KA MANAO

—o — I kuu hialaai nui KE AU HOU, aloha oe: —Olu- olu i kou ahonui, i ke kauwahi keena kaawale o kou mau oneki, no kela mau wahi huaolelo kupaianaha e hekau ae la. Heaha mai nei keia a ua mau keonimana maikai nei e alakai ae la ia Hawaii Lahui? E hoohuhewa ana paha ia Hawaii Lahui i ka imu nanahu. E hoole ma e! A e inu ma e! I ola honua, no ka mea, iluna no ka ua, wehe ke pulu. I kuu io kuu koko, e aloha kekahi i kekahi, i loaa ia kakou ka lokahi mau. Nolaila, e Hawaii nui o Keawe, e makee nou iho, mai puni i na manao kipalale a ke aloha ole. Ke ninau nei o W. M. o ke ala ulili, ka poka ahi Helena. "No keaha o hoole waiona e kinai nei ia inu waiona? Oiai, aole na punawai i hele aku i kahi o pipi, o pipi no kai hele aku ia punawai. Ekahi, aole i ilihune o Hawaii Lahui ia waiona. Elua, aole i hoopilikia wale mai o waiona ia oe. Ekolu, aole i lele kohana wale mai o waiona ia Hawaii Lahui. E Hawaii! Aole! aole!! aole loa no paha. Aole no oe e Hawaii Lahui i nele i kahi mea uuku i loaa. Ano no ka manawa e Hawaii Lahui e wehe ae ai i kou mau pale pouli o ka nanaina, a e makee e Hawaii Lahui nou iho, mai puni i na kipalale o ke aloha ole. No oukou e na keiki o ke keena pa'i ko'u welina nui. Kou oiaio, W. M. KAWELOHEA. Hamakua; Hawaii.