Ke Aloha Aina, Volume XXII, Number 47, 23 November 1917 — O KE KEIKI ALII KALANIANAOLE AME C. P. IAUKEA NA MEA I NANA HOPE LOA I KA HELEHELENA O KA MOIWAHINE. [ARTICLE]

O KE KEIKI ALII KALANIANAOLE AME C. P. IAUKEA NA MEA I NANA HOPE LOA I KA HELEHELENA O KA MOIWAHINE.

Mahope o ka lawe ia ana mai o ke kino o kka Moiwahine mai ka luakini mai o Kawaiahao no ka hale alii ma ke ahiahi o ka Poaono nei o ke keiki alii Kalanianaole ame C. P. Iaukea na mea hope loa o ka nana ana i ka helehelena o ka Moiwahine maloko o ka lumi kalaunu mahope o ka hiki ana o ke kino ilaila. O laua nei wale no na mea iloko o ka lumi kalaunu ia manawa, a wehe ia la ke pani o ka pahu koa ame ke pani o ka pahu kila maloko, a na Iaukea i lawe a'e ke kalaunu kaimana mai ke poo mai o ka Moiwahine ame ke kupee makana mai ke Duke mai o Edinburgh i ka makahii 1869 nona ke kumu kuai kiekie loa, a koe aku ke komo kaimana ma ka manamana lima. Mahope o ka pau ana o keia mau mea, ua wehe hamama ia a'e la ka puka o ka hale alii no ka lehulehu e komo aku ai iloko, aole nae iloko o ka lumi kalaunu, o na poe ku kahili, wae no na poe a e ia e komo aku iloko ame kekahi poe kakaikahi no ka hoopono ana i na pua a pela wale aku. Ma hope o ka pau ana o ka nana ana a keia mau mea ua pani ia iho la ka pahu kila maloko ame ka pahu koa mawaho iho no ka manawa hope loa, a hiki i ka hoolewa ia ana ma ka Lapule nei. Aole i kipa aku na hoa hanohano o ka ahaolelo lahui no ka mokupuni o Maui ma keia huakai makaikai aku nei e like me na mea i hoolala ia e na komite, mamuli o ka make o ka Moiwahine a hoi koke mai lakou no ke kono pu ana i ka huakai hoolewa, no ka mea he mea hou loa keia ia lakou ka huakai hoolewa o na 'lii o Hawaii nei, aole lakou i ike mamua.