Ke Aloha Aina, Volume XI, Number 41, 14 October 1905 — HOA NA HALE INU RAMA IAN WAHINE I KEIA WA. ALAHULA PUULOA HE ALAHELE NA KAAHUPAHAU. [ARTICLE]

NOA NA HALE INU RAMA INA WAHINE I KEIA WA.

ALAHULA PUULOA HE ALAHELE NA KAAHUPAHAU.

He nana Ahaolelo wale ae no aohe e loaa ka lua e like me ka ahaolelo i noho alii ia e na Repubulika, ka poe na lakou i hoonoa ae nei na hale rama ina wahine. Ma ke Kanawai Waiona kahiko i hoopaa ia iho nei e lakou ma ke Kau i hala, he kapu loa ke komo ana o na wahine o na lahui a pau a me na keiki opiopio iloko o na Hale Inu Rama e kuai a e inu ai paha, aka, ma keia Kanawai hou i hanaia iho nei a hooholoia e ka Ahaolelo Repubalika, ua wehe hamama ia ae la ka ipuka o na Hale Inu Rama a pau mai Hawaii a Kauai ina wahine. Aohe wahi a keia Kanawai hou i kaupale ai ia lakou. Ua like me ke komo lealea ana o na wahine a me na keiki iloko o na halekuai lole, halekuai meaai a haleinu kope paha, pela no ka noa o na hale rama ia lakou i keia wa; he mea no hoi i ike ole ia pela ma mua, a i ke au hana Kanawai wale iho la no o ka aoao Repubalika, ka aoao i ohohia nui ia e na Mikanele a me na Karistiano a pau o Hawaii nei, ka aoao hoi i kehaia ua pau aku ka poe naauao a me ka poe hoopono o Hawaii nei aia ma ia aoao kalai aina. Ano la, ua pakui ka aina me na hana lapuwale a keia aoao kalaiaina hookamani o na hookamani. Aole keia he mea hauoli i ko makou manao, a aole no hoi makou e kono aku ana i na wahine e hele lakou iloko o na Hale Rama e inu a e kuai rama ai, a i ala e hele paha iloko olaila e hoohaunaele ai a e hoohakaka ai me ka lakou mau kane: Aka, ma ko makou ano he wahaolelo no ka lehulehu he mea hiki ole ia makou ke kaomi iho i keia mea i nana aku a ke hele loa aku

nei e alahula na Haleinu Rama i kahi poe wahine, he ikemaka keia e kamailio nei aole he lohe pepeiao mai, oiai, eia ke ku nei he mau Hale Rama ma kahi kokoke loa i ko makou Keena nei, a pela i lawa ai ko makou ike a kamailio okoa la i ke akea, i ike mai ai ka lehulehu mai hawaii a Kauai i ke ano o ke Kanawai wawahi maluhia a ka Ahaolelo Repubalika i hana ai. I noho a i loaa ia oukou e na kane ka haunaele a me ka uluaoa o ka noho ohana ana ma keia hope aku, a i lilo paha na Hale Rama i wahi no oukou e hokake pu ai me na wahine a oukou, mai ahewa ia lakou, a ia makou hoi i ka nupepa no ka hoikeike aku i keia mea, oiai, o ko makou kuleana keia o ka hoike ae ina Kanawai maikai a me na Kanawai ino i hanaia, me na mea like ole o kela a me keia ano. Aka, e ahewa iho oukou a o kakou pu no i ka poe Repubalika na lakou i hana keia Kanawai lapuwale. A e ao kanaka ae hoi oukou e na kane koho balota a pau e hoouluhua ia ana e na wahine ma keia hope aku, a mai koho hou i ka poe Repubalika holookoa a me ka poe hapa Repubalika ma keia Kau ae, aka, e pono oukou e koho i ka aoao Demokalaka, i hooponopono hou ia a maemae ke ino a na Repubalika i hana iho la a kukalahea ka aina ina ino like ole e ikeia nei i ko lakou au hooponopono Aupuni popopo. A oia ka makou e hoike aku la; ma keia Kanawai Waiona hou, ua noa na Hale Inu Rama ina wahine "Ua Alahula Puuloa he Alahele na Kaahupahau."